السبت، 23 مارس 2013

فين هى مصر ... + تحديث

 
 
 
لما أهل الدين يتقال عليهم دجالين
 
والمسلمين يتقال عليهم نصابين
 
والمسموعين يتقال عليهم كدابين

وواحد تبقى تهمتوا علامة صلاة على الجبين

أو مربى لحيته زى سيد المرسلين

وناس متفرقين على الشمال وعلى اليمين

وناس بتقتل بعضها وناس واقفين متفرجين

وناس بتدعى على إخواتها وأهلها وبتقول آمين
 
وناس في الوسط تايهين ومش فاهمين
 
بلدهم جاية منين أو رايحة فين
 
وأيام عمالة تعدى بتجر السنين
 
والحق ضايع مش عارف صاحبه مين
 
يبقى فين هى مصر ..
 
ومين إللى كانوا إسمهم مصريين
 
 
مصرية حزينة أوى على بلدها
 
 
ملحوظة مهمة : أنا وجهة نظرى الشخصية إن الدعاة كلهم مش كدابين , ولا كل المسلمين نصابين , ولا كل الإعلاميين كدابين , كل دول فيهم الشر والخير , بس أنا بنقل الكلام إللى بنسمعه كتير الأيام دى إللى بقى التعميم فيه هو الأساس والمصداقين كتير , ومعدش حد عارف يفرق أو بمعنى أصح عايز يفرق بين الحلو والوحش , زى ما يكون معدش عندهم وقت يفكروا شوية , علشان كدة بسأل لما كل الناس إللى في بلدنا زى ما بيتقال عليهم دجالين ونصابين وكدابين طيب المصريين فين

12 التعليقات:

أسماء فتحي يقول...

مش عارفه والله بجد
ان لقيتي اجابة ياريت تعرفيني
كلنا بقينى بنخون بعض ونطلع في الاعلام ونهزء بعض وفقدنا المصداقة في كل اللي حوالينا


تحيـــــاتي
كانت هنا ورحلت
Asmaa Fathy

موناليزا يقول...

حاجة توجع
ومن كتر الوجع مابقيناش عارفين نعبر عن الألم
أصل هنقول إيه ولا إيه ولا إيه! :(

اللهم ارفع غضبك ومقنك عنا

ظلالي البيضاء يقول...

مؤلمة ..
لكن لئلا نقع في الإثم لا ينبغي أن نعمم ونشمل الكل والجميع ..
كل التحية الطيبة ..

هناء محمود يقول...

asmaa fathy
شكرا على مرورك , أنا كمان معنديش إجابة وحزينة على كل إللى بيحصل ده

هناء محمود يقول...

موناليزا
عندك حق انا بفضل اتجاهل إللى بيحصل علشان متوجعش , بس ساعات الألم بيكون قوى وبيوجع مهما حاولتى تتجاهليه

هناء محمود يقول...

ظلالى البيضاء

شكرا على مرورك , وكويس إنك لفتى نظرى , لأنى كنت خايفة فعلا إن إللى يقرأ الكلام يفتكر إنى مقتنعة بيه أو ده رأيى الشخصى ..أنا إللى حبيت أقوله إننا بقينا بنقول على بعض كدة والتعميم هو اللبانة إللى في بقونا , هحاول اعمل أى تغيير علشان توصل صح

حاول تفتكرنى يقول...
أزال المؤلف هذا التعليق.
حاول تفتكرنى يقول...

كل الاوضاع مقلوبة

شمس النهار يقول...

مصر موجوده
بس معلش حبه هرجله كده وبعدين ان شاء الله كله هيبقا زي الفل

هناء محمود يقول...

حاول تفتكرنى

فعلا كل الوضاع مقلوبة وياعالم هتتعدل إمتى

أسعدنى مرورك على مدونتى

هناء محمود يقول...

شمس النهار

يارب يكون كلام صح يا مدام شمس وترجع كل حاجة كويسة تانى

أنا نازلة مصر بعد أيام ومش عارفة أفرح ولا أزعل وهما بيقولولى تعالى بالنهار علشان قطاع الطرق حاجة كدة توجع القلب

التميز المثالي للخدمات المنزلية يقول...


شركة تاج للتنظيف بالدمام 0551844053

شركة رش مبيدات بالدمام

شركة مكافحة حشرات بالدمام

شركة تنظيف شقق بالدمام

شركة تنظيف فلل بالدمام

شركة رش مبيدات بالخبر

شركة مكافحة حشرات بالخبر

شركة تنظيف منازل بالخبر

شركة تسليك مجارى بالدمام

شركة تنظيف بالدمام

شركة تنظيف سجاد بالدمام

شركة مكافحة حشرات بالاحساء

شركة مكافحة النمل الابيض بالاحساء

شركة مكافحة حشرات بالجبيل

شركة مكافحة النمل الابيض بالجبيل

شركة تنظيف منازل بالجبيل

شركة مكافحة النمل الابيض بالدمام