الأحد، 22 أغسطس، 2010

حصريا ..... فى رمضان

السلام عليكم ورحمة الله وبركاته


قبل كل رمضان كالعادة .. والناس مضغوطة ومطلوب منها طلبات أد كدة وخصوصا رمضان إللى بعده المدارس 
( وإللى أكيد بعده العيد بردو
نلاقى جميع القنوات بتعلن عن المسلسلات الحصرية  إللى مفيش زيها أبدا ..

وإعلانات عن برامج المقالب .. والحوارات المحرجة والصريحة ..

والممثلات إللى مش لابسين هدوم فى المسلسلات ..
والممثل إللى بيتسرع فى برنامج معمول فيه مقلب ..
والممثلة إللى بتعيط من سؤال محرج فى برنامج ما
( ياعينى بيتبهدلوا فى رمضان بجد )

دى إستامبا كلنا متعودين عليها فى كل رمضان .. والغريب إن بعد كل الإعلانات دى بيبدأ رمضان وإحنا مش عارفين على أى قناة هنلاقى المسلسل أو البرنامج ده لأن كل القنوات كانت بتعلن فى نفس الوقت ..

ولحد 10 رمضان كدة بنبدأ نستقر ونتعرف على معاد برنامج أو مسلسل أو إتنين بعد ما بتكون بطارية الريموت فضيت من كتر التقليب بين القنوات ....

مشكلتى أنا بقى إن دايما بقلب والفواصل الإعلانية شغالة وفى الآخر مش بوصل لأى نتيجة

أنا بقى الحمد لله ربنا تاب عليا من المسلسلات الهابطة وغير الهابطة .. بس منكرش إن فى برامج كتير تافهة مازالت بتشدنى أتفرج عليها ...

رمضان السنة دى بقى لاحظت ظاهرة غريبة ..

أثناء بحثى عن البرامج التافهة أثناء الفواصل الإعلانية ...

ألاقى نفسى متكعبلة فى واحدة منتقبة ماشية أو قاعدة أو واقفة المهم المنظر ده بيشدنى أعرف إيه إللى هتعمله أو إيه المناسبة يعنى  ..

إحنا إتعودنا إن الممثلات بتقلع فى رمضان .. معقول إتنقبوا السنة دى ....

وأفضل متابعة إيه إللى هيحصل وأحيانا لمدة حلقتين والنتيجة النهائية 

إنى بيتحرق دمى

( ليه بيتحرق دمى ؟ )

هتعرفوا بعدين

مرة ألاقى واحدة لابسة النقاب علشان هربانة من البوليس
ومرة غصب عنها ومجبرة على كدة
ومرة واحدة لسانها طويل ووبتدعى الإلتزام

وإللى ينقط أكتر إنى ألاقى واحدة لابسة شورت بتفتى وتقول إن النقاب مش من الدين ... طيب خلينا نقول أوكى ..

السؤال هنا بقى 
( إيه وضع الشورت فى الدين عادة ولا عبادة ؟

ياريت يوضحولنا فى المسلسل الحصرى إللى جاى أنا فى إنتظاره

إللى عايز يعرف أنا ليه محروق دمى وليه منقوطة وإن مكونتش كتبت الكلمتين دول كان ممكن يجرالى حاجة ؟

هو إنى وليا الفخر والعزة من المنتقبات دول والحمد لله .

والأغرب من كدة وإللى مش ممكن حد يصدقوا

إنى لما لبست النقاب لبسته من نفسى مش بأمر من أمير الجماعة ولا حاجة

حتى إنى لحد دلوقتى محدش بعتلى رشاش هدية مكافئة على نقابى

ولا لاقيتهم جايبنلى واحد معرفوش وقالولى ( يا أختنا غدا سيتم زفافك على الأخ عبد القادر )

وإنى بتكلم عادى بالعامية زى باقى البشر كدة وأحيانا بقول كلام إنجليزى كمان

وحتى عندى  كمان الإختراع إللى إسمه موبايل وبغيرله الكفر كل فترة ...

لا وإيه عندى مينى لاب توب وجوزى إللى جايبهولى كمان

 عندى شبشب للحمام بلاستيك .. مش بدخل الحمام بالقبقاب ولا حاجة

ومقطعتش صلتى بأى صاحبة ليا  مش منتقبة وقولت عليها عدوة الله والدين


إيه تانى


أه لما بجوع باكل 

وبطبخ مكرونة بالباشميل وفراخ بانية وبفتيك وبيتزا.. ونفسى أعرف طريقة  البيكاتة بالشامبليوو ..  وكل أكل الفرنجة بنعمله وبناكله 

(سامحنى يارب )


الغريب جداا بقى .. إن لما حد بيقول نكتة قدامى .. تخيلوا بضحك عليها وممكن أقولها لغيرى وأضحكه  ( شئ لا يصدقه عقل )

وساعات لما ببقى قاعدة وقت كبير كدة فى البيت بتضايق وببقى عايزة أخرج وأتفسح زى البنات إللى مش منتقبات بالظبط 

سبحان الله ( شئ مدهش)
 

الأغرب من كدة ومش ممكن حد يصدقوا .. إنى مش بس منتقبة 

لأ دا جوزى كمان ( مش منتقب طبعا ) لأ ملتحى ( يعنى مربى دقنه بالعربى ) بس مش هو الأخ عبد القادر دا الدكتور عبد الله


مفيش مجال بقى أحكيلكم عن جوزى لأنكم مش هتصدقوا

هديكم نبذة بسيطة جوزى عنده أكاونت على الفيس بوك (و ساعات بيلعب نييييييد فور سبييييييييد ) واااااااااااااااااااو

محصلش مرة إن حد كسر علينا باب الشقة وأخدوه فى نص الليل ومنعرفلوش طريق جرة 

الحمد لله لحد النهاردة ملوش ملف فى أمن الدولة يا عالم بكرة إيه إللى هيحصل


جمدوا أعصابكم بقى لأن أخوية الكبير دكتور هانى  ملتحى (أى مربى دقنة ومراته منتقبة زيى بالظبط )

والغريب إن إبنهم إسمه عمرو وبيدلعوه بيقولوله يا عمورة






كفاية هزار بقى علشان متتخنؤش منى


بجد بجد الحقيقة غير إللى وسائل الإعلام بتحاول توصلها للناس

وأنا متأكدة إن فى منكم كتير يعرف كدة وفاهمنى أنا أقصد إيه


ليه لبست النقاب ؟

موضوع أكيد يطول شرحه

النقاب فرض أو فضل ؟
مش تخصصى علشان أفتى فيه .. بس أكيييييييييد أكيييييييييد مش عادة جاهلية زى ما بيقولوا


فى ناس بتستخبى ورا النقاب وتعمل حاجات تخالف الضمير ؟

أكيييييد طبعا .. زى الدكتور إللى بيستخبى ورا البلطو بتاعه .. والظابط إللى بيستغل بدلته وزى الست الشيك جداا الستايل إللى راكبة عربية آخر موديل وبتخدع الناس بمظهرها لأغراض أخرى

مشكلة إن النقاب بيخفى الشخصية إللى لابساه ؟

نظارة شمس كبيرة وإيشارب يقدروا يخفوا أى شخصية .. عملية تجميل تقدر تغير ملامح أى إنسان .. صابغة شعر وقصة جديدة وعدسات يغيروا شكل أى بنى آدم
.. ده ميمنعش إن يكون فى إجرآت مناسبة بدون إهانة أى إنسان للتحقق من شخصيته فى كل مكان

النقاب بقى موضة ؟

فعلا كتير بيلبسه لمجرد التقليد أو واحدة جوزها حمش وطلب منها تنتقب .. أنا عن نفسى منعت ناس كتير إنهم يلبسوا النقاب لأنهم هيسيئوا له ومش مستعدين أبدا لتحمل مسئوليته أو حتى ربعها  والحكاية مش ناقصة


بس السؤال إللى محيرنى .. لو النقاب عامل مشكلة دلوقتى وبيحاربوا فيه لأنه بيخفى الشخصية إللى لابساه وبيساعد على حدوث جرمتين تلاتة كل يوم

طيب ليه بيحاربوا الملتحيين مع إن اللحية محدش قال إنها عادة ولا بتخفى شخصية إللى مربيها ولا كل ملتحى ماشى فى الشارع مخبى رشاش فى جيبه ولا بيخبوا سماعات الموبايلات فى لحيتهم وهما بيمتحنوا 

ليه إللى بيلتحى إقتداء بالرسول بيتحارب مع إن فى ناس كتير مربية دقنها موضة وبتقلد ناس ممكن يكونوا مش مسلمين وبيتقال عليهم روشيين .. ليه لما راجل بيقصر بنطلونه إقتداء بالرسول بيبصوله بصة تانية غير أى ولد ماشى فى الشارع لابس بنطلون برمودة تحت الركبة لمجرد إنها موضة 

فين المشكلة بالظبط ؟
مستنية الإجابة من أى شخص ممكن يفهمنى إللى أنا عاملة مش فاهماه


المنتقبات والملتحيين بشر عاديين جداااااا بتغلط وبتستغفر وبتبعد وبتقرب وبتحاول توصل ومنتظرين النتيجة مع الكل ..

وأى حد ممكن يكون أحسن منهم وممكن يكونوا أحسن من ناس كتير

الله أعلم هو الحكم العدل .. الحكم لله وحده

خلينا نقول إن لبس النقاب أو تربية اللحية حاجة من ضمن مليون حاجة فى الدين ..بترفع الواحد درجة أو إتنين الله أعلم .. 

بس مش من حق أى حد إنه يقرر إنها لازم تكون آخر حاجة فى المليون حاجة دول ..

إللى يقدر على حاجة يعملها ميستناش يعمل غيرها الأول لأنه ممكن ميقدرش على غيرها ويبقى خسر الإتنين .. 

إللى هينتظر إنه يكمل الجوهر قبل المظهر سواء كان حجاب عادى أو نقاب أو تربية لحية يبقى هينتظر كتير وممكن ينتظر للأبد لأن الكمال لله وحده جل جلاله 

أكيد للنقاب إحترامه وللحية ولازم إللى يقدم عليهم يكون قدهم ...

بس من الواقعى إنه مش هيوصل لدرجة الملايكة .. ومحدش ينتظر منه كدة .. لأنه بشر زى باقى البشر 

مع كل إللى بيحصل اليومين دول والهجوم العنيف على النقاب .. 

ليه ألف عذر إللى ممكن يتأثر .. وإللى بيتلخبط .. وإللى مش فاهم حاجة .. وإللى تخاف تلبس النقاب ..وإللى مش عارف شرعيته إيه 

مع كل الهجوم والمشاكل إللى حصلتلى وقت ما لبست النقاب من ست سنين إلا إن الوضع كان أهدى بكتير من دلوقتى ..

وبعد الست سنين دول وكل إللى بيحصل ده .. إكتشفت إن النقاب كان ........

أحسن وأجمل قرار أخدته فى حياتى وبسأل الله إنه يثبتنى عليه إلى يوم الدين








24 التعليقات:

مصري جدا يقول...

ههههههههههههههههههههههههه

بتوجعي تاكلي!!!!!!!!!!!!!!!!!

يا خرابي


الأجابه على سؤالك وببساطه شديده

ممنوع الأقتراب من الدين

ليه؟

لأنه هيعدل المايل

والمايل مش عاوز يتعدل لانه لو أتعدل الحال مالوش مكان

فهمتي حاجه؟

dreams يقول...

انا زيك بسأل نفسى هوا ليه النقاب مضايقهم اوى كده وكل شوية يعملوا عليه موضوع كبير مع انه مش جديد على المصرييين وكان موجود من زمان فى فترة الثلاثينات او الاربعينيات وكان كل المصريات بيرتدوا ملابس سوداء والنقاب ابيض ولا تفرق بين المتدينة وغير المتدينة....بكرة تبقى اللى لابسة طرحة ولا اللى بشنب هما كمان من عصر الجاهلية

قطرة وفا يقول...

ههههههههههههههههههههههههههههههههههههههههههههههه


والله ضحكتييييييييييني أووووي ... ياااااااااااه ... كل حاجة بالدين لازم يعلقوا عليها !!! .... و زي مقال الأخ مصري جدا لأنو الموضوع بيخص - الدييييييييييييييين - ... و انتي عارفة بقا !!!!!!!


ربنا يحمينا إن شاء الله :)

emymony يقول...

هههههههههههههههههههه
كمان بتعملى بيتزا لاءءءءءءءءء انا كده بقا هقر عليكى مش بتتظبط معايا
المهم النقاب حاجه طبيعيه جدا جدا بس يمكن بعض الناس اللى بتستخدمه بطريقه غلط ادت فكرة عامه انه وحش وبيستخدموا لامور زى السرقه الاختفاء حاجات زى دى
بس فادت مفهوم عام لبعض الناس اللى مش بيفكروا انه كله كده
انما اللحيه دى لا اعتراض عليها وكل انسان حر
له الحريه الكامله انه يفعل كما يشاء ومش شذوذ عن الاخرين ولا حاجه
بس بيخافوا الدين يغلب على الحياة فينصلح حالنا ويضيعوا هما وسرقاتهم ونصبهم ونهبهم للشعب
فبيهاجموا المنقبين والملتحين علشان خوف على نفسهم مش اكتر ودول اعداء نفسهم تركوا ضميرهم وجريوا وراء اهوائهم
انما احنا كبشر عادى ليا اخوات وقرايب منقبين وملتحيين
وبندعى ربنا يهدينا ويعطينا اراده اننا نكون كده لان دا شىء جميل
ربنا يثبتك يارب
تحياتى وتقديرى
وكل سنه وانتى طيبه

بنـوتــــة يقول...

ربنا يثبتك يا رب على الخير بإذن الله
بجد الكلام جامد
و على فكرة قاطعتيني كده و أنا مكونتش لسه متخنئتش
^ـ^
بصراحة كنت ناوية أعلقو أقول حاجات كتير
بس تعليق " مصري جداً " جابها من الآخر

و كل سنة و انتم حصريين
قصدي و انتم طيبين
^ـ^

سلسبيل يقول...

سيدتى كلامك فى منتهى الواقعية
أى حاجة تمس الدين دلوقتى اصبحك
ارهاب و مش النقاب بس كمان
دول بيشوهوا صورة اى حد بيقول
أى حاجة عن الدين حسبنا الله و نعم الوكيل لكى كل احترامى و تقديرى
و كل سنة و حضرتك طيبة

ستيتة حسب الله الحمش يقول...

بيكاتا بالشامبو!!!!!
يادي الهول
سلوا سيوفكم ياردالة
البه نؤا ها تصبأ
انا دخلت فيلم فجر الإسلام يا أمي ولا إيه؟ :)

كل سنة وانتي طيبة وبوبة طيبة ودكتور عبد الله طيب
ربنا يعيد عليكم الأيام بكل خير ويتقبل منا ومنكم ويصلحنا ويثبت القلوب على ما يرضى ويحب

طبعا بحبك يا امي
بس زي ما انتي انشغلتي يظاهر انها حااااااااااااااااالة عاااااااااااااامة
وسلمي لي على شيماء كتير جدا جدا جدا

وبالنسبة للبيكاتا قولي لي عاوزاها بالصويا صوص ولا القشطة وانا فوريرة اعلمها لك وبعدين ادفع الجزية :)

غير معرف يقول...

بجد عندك حق انا كمان منتقبه من خمس سنين والحمد لله وساعه مافكرت البسه مقلتش لنفسى انا حلبسه ليه وهل انا استحق من جوايا انى البسه ولا لأ وعمرى مادورت ع الحكم الشرعى من لبسهانا لبسته لانى حابه يبقى فيا حاجه من ريحه نساء الصحابه حتى لو حاجه صغيره

أم الخــلـود يقول...

اصحى يا نايم ووحد الدايم

أرجوا من المدونين الموقرين أن يضعوا شعار الحملة واسمها فقط فوقها

(حملة الجسد الواحد)

في الشريط الجانبي لمدوناتهم كدلالة على وحدة صف أمة محمد

http://dndanh111.blogspot.com/2010/06/blog-post_14.html

ومن أجل قيام الولايات المتحدة الإسلامية

http://dndanh111.blogspot.com/2010/06/blog-post_17.html

جعله الله في ميزان حسناتكم .. آمين

كيــــــــــــارا يقول...

حلو اوي لما بتضايقي بتخرجي

ياربي

انتي زي البشر بئا واحنا مش نعرف

وبتاكلي بانيه

لالالالالالا انتي كدا غيرتي الصورة خالث

لا حول ولا قوة الا بالله

نفسي اعرف يتحرق دمك ليه

سيبي اللي يتكلم يتكلم وادام الانسان متيقن ان اللي بيعمله صح خلاص اضربي بكلام اي حد الحائط

منقبة محجبة مش محجبة كلهم بشر
وبياكلو نفس الاكل وبيشربو من مية واحده
بس الدين ودرجه الايمان دي بين الانسان وربه مش في حد في الكون له دخل بيها ومش في ح ممكن يعرف هو قريب لربنا اكتر من التاني ولا لا

دي حاجه بين العبد وربه ومحدش له انه يتدخل فيها

كيــــــــــــارا يقول...

نسيت اقولك

كل سنة وانتي طيبه

وربنا يباركلك في زوجك ويباركله فيكي

ويوفقكم دايما :)

اقصوصه يقول...

رمضان كريم

وكل عام وانتم بخير

شوكولاتة يقول...

ههههههههه دمك عسل اوي واخدتي الموضوع بطريقة لذيذة
بصي ياستي هقولك ايه المشكلة انا بالرغم من احترامي الشديد للنقاب والمنقبات واعترافي الكامل بانه فضيلة جميلة وحرية شخصية وقطع لسان اللي يقول غير كده الا اني بعيب على منقبات كتير لازم يلبسوا اسود في اسود ليه مش يلبسوا ألوان حشمة او عباية مش ملفتة للنظر وشكلها شيك وتلبس عليها نقاب زي زمان كنا بنشوف الناس لابسين لبس عادي جدا وشكله جميل ونظيف ولابسين عليه خمار ونقاب تاني حاجة زي ماقولتي ان التخفي في شخصية اخرى ده بقى سمة من سماتنا يعني اللي بيقعد يتكلم بصفات مش فيه طيب ماهو كده منافق المشكلة ان احنا بقينا مجتمع بيحكم بالمظهر الديني يعني لو بنت منقبة نص المجتمع بيبصلها انها محترمة ومتدينة اوي والنص التاني بيبصلها على انها متخلفة ورجعية ولو البنت مش محجبة نص المجتمع بيبصلها على انها بت مشافتش رباية وحبلها فالت والنص التاني بيقول عليها عايشة حياتها انا كل اللي عاوزة اقوله ان احنا نحكم على الناس من خلال تصرفاتهم مش لمجرد زيهم يبقى كده احنا نقول على كل الاوروبيين حلوين وعساسيل ومتقدمين وكل السعوديين متخلفين وتبقى هرجلة

انا اسفة اوي اني طولت عليكي بس الموضوع عجبني جداااا

وكل سنة وانتي طيبة وبوبة زي القمر والدكتور عبد الله من نجاح لنجاح ان شاء الله

شوكولاتة يقول...

ههههههههه دمك عسل اوي واخدتي الموضوع بطريقة لذيذة
بصي ياستي هقولك ايه المشكلة انا بالرغم من احترامي الشديد للنقاب والمنقبات واعترافي الكامل بانه فضيلة جميلة وحرية شخصية وقطع لسان اللي يقول غير كده الا اني بعيب على منقبات كتير لازم يلبسوا اسود في اسود ليه مش يلبسوا ألوان حشمة او عباية مش ملفتة للنظر وشكلها شيك وتلبس عليها نقاب زي زمان كنا بنشوف الناس لابسين لبس عادي جدا وشكله جميل ونظيف ولابسين عليه خمار ونقاب تاني حاجة زي ماقولتي ان التخفي في شخصية اخرى ده بقى سمة من سماتنا يعني اللي بيقعد يتكلم بصفات مش فيه طيب ماهو كده منافق المشكلة ان احنا بقينا مجتمع بيحكم بالمظهر الديني يعني لو بنت منقبة نص المجتمع بيبصلها انها محترمة ومتدينة اوي والنص التاني بيبصلها على انها متخلفة ورجعية ولو البنت مش محجبة نص المجتمع بيبصلها على انها بت مشافتش رباية وحبلها فالت والنص التاني بيقول عليها عايشة حياتها انا كل اللي عاوزة اقوله ان احنا نحكم على الناس من خلال تصرفاتهم مش لمجرد زيهم يبقى كده احنا نقول على كل الاوروبيين حلوين وعساسيل ومتقدمين وكل السعوديين متخلفين وتبقى هرجلة

انا اسفة اوي اني طولت عليكي بس الموضوع عجبني جداااا

وكل سنة وانتي طيبة وبوبة زي القمر والدكتور عبد الله من نجاح لنجاح ان شاء الله

شوكولاتة يقول...

ههههههههه دمك عسل اوي واخدتي الموضوع بطريقة لذيذة
بصي ياستي هقولك ايه المشكلة انا بالرغم من احترامي الشديد للنقاب والمنقبات واعترافي الكامل بانه فضيلة جميلة وحرية شخصية وقطع لسان اللي يقول غير كده الا اني بعيب على منقبات كتير لازم يلبسوا اسود في اسود ليه مش يلبسوا ألوان حشمة او عباية مش ملفتة للنظر وشكلها شيك وتلبس عليها نقاب زي زمان كنا بنشوف الناس لابسين لبس عادي جدا وشكله جميل ونظيف ولابسين عليه خمار ونقاب تاني حاجة زي ماقولتي ان التخفي في شخصية اخرى ده بقى سمة من سماتنا يعني اللي بيقعد يتكلم بصفات مش فيه طيب ماهو كده منافق المشكلة ان احنا بقينا مجتمع بيحكم بالمظهر الديني يعني لو بنت منقبة نص المجتمع بيبصلها انها محترمة ومتدينة اوي والنص التاني بيبصلها على انها متخلفة ورجعية ولو البنت مش محجبة نص المجتمع بيبصلها على انها بت مشافتش رباية وحبلها فالت والنص التاني بيقول عليها عايشة حياتها انا كل اللي عاوزة اقوله ان احنا نحكم على الناس من خلال تصرفاتهم مش لمجرد زيهم يبقى كده احنا نقول على كل الاوروبيين حلوين وعساسيل ومتقدمين وكل السعوديين متخلفين وتبقى هرجلة

انا اسفة اوي اني طولت عليكي بس الموضوع عجبني جداااا

وكل سنة وانتي طيبة وبوبة زي القمر والدكتور عبد الله من نجاح لنجاح ان شاء الله

ويكا يقول...

تسلم ايدك

ودماغك ، ويباركلك فى جوزك واخوكى ونفسك وكل اهلك.

بس غير كده مش هعرف اقول
غير انى ممكن اخلعلك القبعه ، بس دى عاده جاهليه فمش هقدر اعملها.

ههههههه
تسلمى

شمس النهار يقول...

ايه يابوبه قطعتي نفسي وانا بقرا البوست
وشويه اضحك وشويه اندهش وشويه ارثي عل حال المسلمين
بصراحة لعبتينا السبع لعبات
:))))

عموما انا مريحه نفسي ومالييش في التليفزيون اصلا مش علشان هو حرام لا علشان مالييش طولت بال عليه

كل سنه وانتي طيبه واسرتك


تحياتي

غير معرف يقول...

ثقافة الهزيمة.. أسكندرية ...ليه؟

متحف الأسكندرية القومى والمتحف اليونانى الرومانى و متحف المجوهرات الملكية و متحف الفنون الجميلة و متحف الأحياء المائية و متحف محمود سعيد ، و قلعة قيتباى و قصر المنتزة و مكتبة الأسكندرية الجديدة و الميناء الشرقى و حديقة أنطونيادس و نصب الجندى المجهول.

ومن الآثار الرومانية الموجودة بالإسكندرية المسرح الرومانى و عمود السوارى و معبد الرأس السوداء وحمام كوم الدكة الرومانى والذى أقيم على طراز الحمامات الرومانية القديمة ، و مسجد سيدى بشر ومسجد سيدى جابر ومسجد القائد إبراهيم ومسجد المرسى أبو العباس، وكاتدرائية الكرازة المرقسية وكاتدرائية اليونانيين الأرثوذكس و كنيسة سان مارك.

محطة الرمل وكامب شيزار وسان ستيفانو وسيدى بشر ، و طريق الجيش الممتد بمحاذاة الكورنيش ، و سى جل للأسماك فى أبوقير و بحرى، و جيلاتى عزة و جيلاتى النظامى و قدورة للأسماك فى بحرى ، و شارع سعد زغلول و شارع صفية زغلول وفول محمد أحمد و حلوانى طلعت وهريسة الحلبي و البن البرازيلى فى محطة الرمل، و حلواني صابر بالأبراهيمية، و مشويات أبن البلد بمصطفى كامل، و سان جيوفانى فى ستانلى ، و مول سان ستيفانو ، و مشويات حسنى بالمندرة ،و مشويات بلبع فى سيدى بشر قبلى، و حلواني شهد الملكة فى ميامى و فيكتوريا، وركوب الترام من غير محطة محددة فقط كى تتفرج على الأسكندرية من شباك الترام و أهل الأسكندرية الطيبين.

هذة بعض ما تحتويه مدينة الأسكندرية من معالم سياحية و مع ذلك لا تجد مدينة الأسكندرية على خريطة المدن السياحية الجديرة بالزيارة فى مصر فى مكاتب السياحة بالخارج و التى تنظم لها رحلات سياحية..

باقى المقال ضمن مقالات ثقافة الهزيمة بالرابط التالى www.ouregypt.us

العاب يقول...

قصة جميلة ويالجمال رمضان الله يعيده علينا

غير معرف يقول...

السلام عليكم..
والله اللي انا شايفه ان المفروض مانعممش الحكم على الاشخاص بمجرد المظهر سواء كان حكم سلبي او ايجابي
يعني مثلا لما بتشوف واحد بيصلي يعني بتاخد فكرة كويسة عنه مجرد ظن مش اكتر..بس ماتحكمش عليه الا اما تتعامل معاه..
ونقيس على كل الحاجات اللي بنتقرب بيها لربنا
وكمان لما نشوف واحد ملتحي او واحدة منقبة مثلا اخطأوا في شئ مانرجعش نقول انا لقيت واحد ملتحي بيعمل كذا وكذا ونعد نكيل ليهم
او يقولوا انا شفت واحدة منتقبة بتعمل كذا وكذا ونعد نشيل ونحط عليها
خلينا نكون عقلاء على الاقل احنا مش بنعمل كده مع اللي لامؤاخذة بيلبسوا حاجات مش كويسة يعني شوية عقل
يعني شوفنا واحد بيخطئ وبس مش اكتر لانقول ملتحي ولا منقبة..
يعني مفيش داعي للحساسية السخيفة دي

romansy يقول...

بهديكم بوكيه من الورورد على أنغام أحلى عود ودايما العيد عليكم يعود كل سنة وانتم دايما بخير

عيد سعيد على كل الناس الطيبين

مجداوية يقول...


السلام عليكم
سعيدة جدا بتعرفي على مدونتك من لينك لهذه التدوينة الرائعة عند أختنا الكريمة سارة طوبار في مدونة محاولات للبحث عني وأشكر الغير معرف الذي وضع هذا اللينك

كل عام وأنت ِ وكل من تحبين وأمة سيدنا محمد صلى الله عليه وسلم بألف خير

غير معرف يقول...

والله انت انسانه رائعه انا كنت في طريقي للنقاب والناس وعلتي مبهدلني عشان انا اخذت القرار ده وبيقولولي انت هتتجوزي واحد مربي دقنه ولابس جلابيه يالهوي
وانا لسه عندي 17سنه وكلو بيقولي ياحاجه يعني بيغيظو فيه وطبعا ياست الشيخه وكلام كده
ربنا يثبتا ويخليكي على الموضوع الرائع ده عشان اعرف ارد عليهم

شركة تنظيف بالدمام شركة تاج يقول...


شركة تاج للتنظيف بالدمام 0551844053

شركة رش مبيدات بالدمام

شركة مكافحة حشرات بالدمام

شركة تنظيف شقق بالدمام

شركة تنظيف فلل بالدمام

شركة رش مبيدات بالخبر

شركة مكافحة حشرات بالخبر

شركة تنظيف منازل بالخبر

شركة تسليك مجارى بالدمام

شركة تنظيف بالدمام

شركة تنظيف سجاد بالدمام

شركة مكافحة حشرات بالاحساء

شركة مكافحة النمل الابيض بالاحساء

شركة مكافحة حشرات بالجبيل

شركة مكافحة النمل الابيض بالجبيل

شركة تنظيف منازل بالجبيل

شركة مكافحة النمل الابيض بالدمام