الاثنين، 10 سبتمبر، 2012

أنا فاهمة كل حاجة .. بس عايزة أفهم كمان شوية !!!!




دلوقتى لما يبقى فى ناس محترمين ... أخلاقهم عالية ... شايفين شغلهم تمام ... ملف حياتهم وشغلهم مفيهوش نقطة سودة ... ومش بشهادتهم هما , لأ بشهادة الجميع  ..........

( إنتوا معايا .. واخدين بالكو ) شايفين عينى الشمال بتبربش لواحدها خلو بالكو دا مرض معدى  (أصلى واخدة الموضوع على أعصابى شوية )

أبطل رغى وأرجع للموضوع

يقووووووم الناس دول ياخدو قرار إنهم يربوا دقنهم ... ليييييييييييييييييه ...

مش شغلنا هما حريين ...



يربوها إقتداء بالرسول .. ولا علشان بيوفروا فلوس الحلاق .. ولا علشان يضفروها .. هما حريين ... المهم إن قرارهم ده مش هيضر حد ولا حتى هيضرهم شخصيا ولا هيضر شغلهم

 ( واخدين بالكمعينى اليمين بدأت هى كمان تبربش , قولتلكم المرض معدى  .. نكمل


تقووووووووووووم تيجى ناس تانية .. توقفهم عن العمل ...

ليييييييييييييييييييه ..

إحلقوا دقنكم الأول وبعدين تعالوا إشتغلوا ...

ليييييييييييييه ..


 أهو كده .. (أحتمال تكون دقنهم دى هتشوكهم )

الناس بقى اللى ربوا دقنهم الموقوفين دول .. بيطالبوا بحقهم إنهم يرجعوا شغلهم ... والكل مطنش وعاملين نايمين والمنبه لسه مضربش


وأسمع ناس بتقول ... طب كانت دقنكم دى فين من زمان ولا الإيمان منزلش عليهم إلا لما الإخوان مسكوا الحكم ؟

هو فى حاجة فضلت على حالها بعد الثورة .. ما حاجات كتير اتغيرت .. وحاجات كتير مكنش حد عارف يعملها قبل الثورة وعرف يعملها دلوقتى ... إشمعنى دول إللى حكايتهم بقى فيها إن

واحدة قيلالى النهاردة شغلهم أهم حرام عليهم  .............. طيب هو مين اللى وقفهم عن العمل .. الناس عايزة تشتغل ..


إللى أنا فاهماه إنها العقدة القديمة مازالت بشنيطة عند بعض الأفراد اللى نشأت وترعرعت على إيد النظام القديم  وللأسف مازال ليها كلمة وسلطة فى وقتنا ده

عقدة الدين ... إعمل أى حاجة .. أى حاجة ..  بس متقولش أصل دينى إللى بيقولى كدة ... يا نهار اسود انت متدين

ربى دقنك آه بس متقولش إقتداء بالرسول لأ كدة غلط  وكدة الشغل هيتعطل والسياحة هتنضرب والشواطئ هتتقفل وعلاقتنا بالدول التانية هتبوظ وهنروح فى ستين داهية ...

ممكن تربيها إقتداء بسمير الإسكندرانى ماشى نعديها دى .. كدة ميت فل وعشرة انت كدة ماشى صح

تقصر بنطلونك إقتداء بالرسول .. إوعى .. كدة هتتحط فى اللستة السودة ... ممكن تقصره إقتداء ببرمودة تامر حسنى ماشى إحنا معاك وكلنا بنحبك ومتخافش من أى حاجة

... حتى لو كانوا بيفكروا إن الدقن دى بتعكس منهج  وسلوك فى دماغ الشخص إللى مربيها هما مش راضيين عنه ومش حبينه ... طيب هو لما يحلقها ويرجع شغله .. إنتوا كدة  مسحتوا منهجه ولا حلقتوله دقنه وخلاص 

دا لو عندهم شوية ذكاء يسيبوهم براحتهم مرابيين دقنهم .. أهم يبقوا متعلمين ومعروفيين ويتحطوا تحت المراقبة علشان إللى يغلط بجد يتعاقب ..  ولا هى إيه النظرية بالظبط


كنت زمان بسمع الناس إللى عندها شوية حكمة بتقول .. لما تشوف حد ظاهر عليه المعصية متحكمش عليه إنه مش كويس .. ربنا هو الأعلم بالنوايا والقلوب

الغريب إننا دلوقتى بنتمنى العكس ... لما  تشوف حد ظاهر عليه الطاعة سواء راجل مربى دقنه ولا واحدة محجبة ولا منتقبة .. متقولش أكيد أخلاقه زى الزفت .. حتى لو كنت شوفت أمثلة سيئة مرت عليك فى حياتك .. مش حجة مقنعة .. بردو مش من حقك تعمم ..

إللى نفسى حد يفهمهولى أكتر ... الدقن دى هتعوق العمل إزاى بالظبط ؟ واللى بيحصل ده إيه ؟ ليه نفس الناس إللى بتطالب بحرية الإبداع .. فى حاجات زى الزفت تغضب ربنا ومفيهاش أى إبداع زى ما بيقولو ... بيجوا على الشئ إللى يرضى ربنا وبيقيدوا حريته ..

مش خلاص بقى ولا إيه ؟؟ دماعنا هينضف من البلاوى اللى معششة فيه دى ولا لسة شوية .. ولا لسه كتير ؟؟

ليه قنوات وبرامج متكلفة تقعد تعيد وتزيد فى تفاهات ...

النهاردة ماسكين موضوع جلابية المحافظ وعاملين عليها أفلام ؟؟ والراجل برر موقفه وابنه ماشى يحكى لكل الناس حكاية صلاة الفجر والجلابية


المشكلة كانت فى الجلابية ولا فى صلاة الفجر ولا فى إيه بالظبط .. إذا كان دخل المستشفى علشان يطمن على أحوالهم لأن واحد طلب منه كدة ... يعنى كان يقوله استنى لما أروح ألبس البدلة أصلى كفاءتى فى الشغل بتعلى لما بلبس البدلة

والراجل أكيد مكنش متخيل إن الهوليلة دى كلها هتحصل علشان الجلابية  ...عايزين نشتغل بقى ومفيش حاجة تعطلنا لا جلابية ولا شبشب ولا قبقاب .. إللى يقدر يعمل حاجة يعملها بأى شكل وفى أى وقت

خلونا نطلع بقى من عنق الزجاجة وندخل فى الشاليموه  

إحنا مش كنا بنقول نفسنا إللى يمسكوا بلدنا يبقوا  مننا وعايشين عيشتنا وحاسين بينا ويمشوا فى وسطنا  ... طب ليه منحسبهاش كدة وخصوصا إنها أول مرة لما تبقى تتكرر كتير نبقى بقى نلت ونعجن لحد ما نوصل للسر الخطير إللى ورا لبس الجلابية

هواحنا عايزين ايه  ؟ إنتوا عايزين حاجة ؟ أنا مش عايزة حاجة ؟ إلى عايز حاجة يقول ؟

إنتوا عنيكم كويسة ولا إتعديتوا .. أنا لما فضفضت عنيا إرتاحت شوية من البربشة الحمد لله :D بس إحوليت للأسف





 

الثلاثاء، 4 سبتمبر، 2012

كلمتين عايزة أقولهم .. من غير مناسبة ..........

 
 
 
السلام عليكم ورحمة الله وبركاته
 
مساء الخير يا مدونين .. معكم أم بوبة أحد الطيور المهاجرة .. مهاجرة من التدوين .. وكمان مهاجرة من مصر .. بس بفكر أرجع للتدوين بس .. أما مصر لسه شوية أما يظبطوا موضوع  قطعان النور ده أبقى أفكر ..............
 
 
طقت فى دماغى أقول كلمتين جد قبل ما أنام .. موضوع كدة جه فى بالى .. مش عارفة إيه إللى جابه .. بس فى الوقت ده لما بيكون الواحد تحت تأثير النوم .. عادى ممكن يجى فى دماغه أى حاجة من غير مناسبة 

 أحب أنوه بردو قبل ما أتكلم إن كلامى ده غير نابع من تجربة شخصية والحمد لله ولكن تجارب الناس حوالية زى الشمس بنسمع وبنشوف كل يوم عبر لازم نحطها قدام عنينا على طول وأكيد بتأثر فينا ....
 
 ( الكلام كبير صح ... إنتوا لسه شوفتوا حاجة )
 

 أحب أقول لكل بنت نفسها تتجوز أو إتأخرت فى الجواز ... متفتكريش إن السعادة ربنا إقتصرها على المتجوزين وبقيت الناس عايشين فى تعاسة .. السعادة دى رزق ممكن يبقالك نصيب فيه بأى طريقة وفى أى مكان .. ربنا وحده إللى قادر على كدة
لو بصيتى حواليكى هتلاقى ناس كتير إسمهم متجوزين بس بتندم ندم عمرها وكانت تتمنى لو عاشت طول عمرها من غير جواز بس ممرتش بالتجربة دى

 الله أعلم تأخير جوازك أو عدمه ربنا كاتبلك إيه عنده أو عافاكى من إيه يمكن حظك أحسن من ناس كتير جربوا وندموا على التجربة دى وسابت فى حياتهم وحياة غيرهم كمان أثر مش كويس فضل معاهم طول عمرهم

مش المهم تدعى إنك تتجوزى وبس .. الأهم إنك تدعى ربنا يرزقك الزوج الصالح ويجعلك الخير والسعادة فى جوازك منه .. ولو إتأخر أو مجاش خالص متزعليش واحمدى ربنا إنتى أحسن من ناس كتييييييييييييييير واستمتعى بحياتك وعيشيها كويس متفضليش عايشة منتظرة وبس .. إمشى فى طريقك عادى وإللى ليكى نصيب فيه هتشوفيه إن شاء الله

أحب أقول بردو لكل زوجة إتجوزت ولسه ربنا مرزقها بالأولاد .. وحياتها كلها كآبة وحزن ومش قادرة تعيش حياتها كويس هى وجوزها والموضوع ده هو محور حياتهم وكلامهم وكأن الدنيا مش هتمشى من غير أولاد

 .... لو دخلتى أى مستشفى وشوفتى أم محجوزة بإبنها المريض إللى بقاله سنين مغير محل إقامتها ومخليها مقضية حياتها فى المستشفيات من يوم ما إتولد .. هتعرفى إن مش كل طفل بيخلى حياة كل أم جنة ... على أد ما هى بتحبه وتتمنى إنه يخف على أد ما ساعات بتوصل بأمهات إنها تتمنى موت إبنها من كتر ما قلبها وجعها عليه

زى ما ضحكة الطفل بتنور حياة أمه .. بردوا لو دخلت فى جسمه شوكة كأنها دخلت قلبها ... متفتكريش إن كل أم عايشة حياتها بتجرى ورا إبنها وبتلعب معاه وبيضحكوا وضحكهم مالى البيت أيوة فى طبعا أمهات كتير كدة ربنا يباركلهم فى أولادهم يارب.. بس بردو فى أمهات كتير حياتهم إتحولت لجحيم من يوم ما خلفوا .. وعارفين كويس قيمة الوضع إللى انتى فيه ومش راضيه عنه

مش مهم تدعى إن ربنا يرزقك بطفل وخلاص .. إدعيله هو كمان إن ربنا يعافيه من كل سوء ويقر عينك بيه وتفرحى بيه من قلبك .. وبردو متزعليش لو إتأخر أو مجاش خالص وعيشى حياتك وإحمدى ربنا إنتى بردو أحسن من ناس كتير ويمكن ربنا أراد بيكى الخير وانتى مش عارفة

( أنا الظاهر رغيت كتير ... إنتوا كمان مش متعودين على الكلام الجد ده  منى)

علشان كدة أحب أقول لكل إللى شاف كلامى  ده وقال فى سره إيه الرغى الكتير ده يا أم بوبة ......... إن جلاكسى هى إللى هتخلينى أعدى كل ده ( عندما تعشق الشيكولاته :):) تصبحوا على خير