الاثنين، 29 مارس، 2010

أستودعكم الله .. الذى لا تضيع ودائعه







السلام عليكم ورحمة الله وبركاته

أنا آسفة لو كان كلامى النهاردة هيصدمكم .. أو ممكن يضايقكم ويفاجئكم

بس أنا هكلمكم بصراحة ... بصراحة جدااا .. وهقول كل إللى جوايا بوضوح تام

حتى لو كنت هلاقى إنتقادات كتير .. ومعارضين كتير لكلامى ده وقرارى إللى أخدته

أنا أسفة إنى أخفيت كل مواضيع المدونة ...

من أول ما بدأت أكتب فى المدونة دى .. وأنا بخاف من كل كلمة بكتبها وبسأل نفسى ياترى هى فى ميزان حسناتى ولا ميزان سيئاتى

لأنها مشكلة كبيرة ... الكلام إللى بيتكتب ده سلاح ذو حدين .. لأنه هيفضل على طول .. وهيتحاسب عليه الإنسان حتى بعد ما يموت .. سواء إتكلم بالخير أو بالشر

ساعات كتير كان بيبقى نفسى أكتب حاجة وعارفة إن فيها شبهه ومكن تكون عليا مش ليا .. بس نفسى تغلبنى وتخلينى أكتبها ... لأنها هتظهر أد إيه دمى خفيف .. وكمان أكيد هتعجب الكل ... وواحدة واحدة مبقتش أفكر فى أنا بكتب إيه .. المهم أكتب إللى على بالى وخلاص


وكمان بطلت أحس إنى بكتب لله وبس وأخلص نيتى بكدة ... أحيانا كنت بكتب لأنى منتظرة أقرأ تعليقاتكم إللى بتفرحنى لما ألاقى ناس تقولى ..

أسلوبك رائع
دمك خفيف
إنتى زى العسل

وغيره وغيره

أكيد ده شئ جميل ويفرح أى إنسان لأننا مخلوقين كدة بنحب المدح وكلمات الإعجاب

بس لما يتحول الهدف الوحيد من كتابتنا هو الحصول على كلمات الإعجاب والمدح

يبقى أكيد ده شئ مش مبشر بالخير


عايزة أقولكم إنى كنت بعد ما بكتب بوست عن شوبير ... ضميرى كان بيأنبنى .. وأحس إنى إتكلمت عن إنسان بكلام مش من حقى أقوله عليه .. وبسخر منه بشكل لا يرضى الله عز وجل

وربنا نهانا عن السخرية من بعض ... كان ممكن أنتقده بشكل أفضل من كدة وبدون تجريح وإستهزاء وإستهتار بكلمات أحاسب عليها يوم الدين .. كل اما يقرأها إنسان

حتى كلامى عن الزواج مع إنى بجد بجد كان نيتى فيه إصلاح البيوت .. إلا إنه كان بيصيب البعض بالإحباط والإكتئاب .. والإنسان لازم يبشر ولا ينفر

أنا بقالى فترة كبيرة محتارة وقلقانة وفى نفس الوقت مستمرة فى إللى أنا بعمله ... وبرمى ورا ضهرى أى شئ ممكن يرجعنى عن إللى انا بعمله .. لحد ما النهاردة حصلى موقفين ورا بعض خلونى أراجع حساباتى تانى

بس بجد انا خوافة ومش قد اللعبة دى .... خايفة أموت وأتعذب بكلمة أو إحساس وصلته لإنسان غلط .. أو كلمة إستهتار أو سخرية من شخص

قال رسول الله صلى الله عليه وسلم
إن الرجل ليتكلم بالكلمة لا يرى بها بأسا يهوي بها سبعين خريفا في النار "


وحطوا تحت ( لا يرى بها بأسا ) سبعين خط

أكيد فى كتير منكم هيشوفونى مكبرة الموضوع .. أو متشددة أو متخلفة
وممكن حد منكم يشوفنى صح .. الله أعلم

بس أنا بجد إتعودت إنى مخودش قرار فى حياتى وأقتنع بيه واتراجع عنه أبدا

بس لأنى بحترمكم وبقدركم كلكم

حسيت إن من حقكم عليا إنى أقولكم كل إللى بيدور جوايا وأسبابى إللى خلتنى عملت كدة ...

مقدرش أقفل باب مدونتى فى وشكم فجأة وبدون أسباب ... بجد انا بكتب وشايفة فى عيون كل شخص فيكم نظرات بتعبر عن إنزعاجكم أو مفاجئتكم وإستغرابكم .. ومش قادرة أقولكم كلام تانى أكتر من إللى انا قولته


أنا مش هقفل المدونة دى

ولا هحذف المدونة التانية .. لأنى مش شايفة فيها شئ يقلقنى
http://awraktanbod.blogspot.com/

بس يمكن دخولى ومشاركتى هتكون قليلة شوية

مش علشان أى شئ
بس بجد حبيبة بنتى محتجانى أوى اليومين دول .. ومنكرش إن المدونة أخدت من وقتها كتير ... كفاية إنى بضطر أفتحلها التيليفزيون على قناة انا مبحبهاش تتفرج عليها مدة طويلة .. علشان أقدر أكتب وكمان أقرأ بعض المدونات

لأن مشاهدة التيليفزيون للأطفال لفترة طويلة مش لصالحهم أبدا ... ودا كان شئ بحاول اصلحه عندها .. دلوقتى أنا إللى بقيت بفتحهولها بإيدى


أنا مش هبطل أقرالكم أبدا .. ومش من السهل إنى أبعد عنكم ... بس أعذرونى ... ومتزعلوش منى مهما كنتم شايفين قرارى ده صح أو غلط

وياريت محدش ياخد كلامى ده بإنى بوجهله إتهام بإنه صح أو غلط .. أو إنى بحكم على أى إنسان بأى شئ .. أنا أقل من كدة بكتير ... كدة تقريبا خلصت كلامى

أستودعكم الله الذى لا تضيع ودائعه 



39 التعليقات:

صاحب رأى يقول...

والله كل اللى بتمناه انك تكونى اخترتى الفرار السليم لصالح اسرتك اولا
ونصيحه من اخ صغير
اهتمى بحياتك وحياة اسرتك
وكلامك فعلا سليم

انا عن نفسى وجودى قل جدا فى المدونة من قبل السفر بشهرين تقريبا
لان فى اولويات فى حياتى غير المدونة

رتبى اولوياتك فى الحياة وربنا يعينك

صيدلانيه طالعه نازله يقول...

كلامك صح يا جميل
و اعتقد فعلا ان حق اسرتك عليكى اهم بكتير من حق المدونه
ربنا يوفقك لما فيه الخير و الصواب

و خدى بالك من نفسك و من بنتك و من جوزك

تحياتى

Lady E يقول...

ربنا يعينك ويوفقك يا أم بوبة يارب

جميل انك مش هتقفلي المدونة

ان شاء الله ترتبي وقتك وترجعي تاني تكتبي

بوسيلي بوبه

هيثــم رمضـــان يقول...

السلام عليكم ورحمة الله
من الواضح يا أم بوبه إنك من الناس اللي بتحاسب نفسها أول بأول علشان لو فيه حاجة غلط تتصلح وده طبعاً شيء جميل لأن محاسبة النفس شيء مطلوب , وكمان إهتمامك ببنتك وأسرتك له الأولوية عن أي حاجة تانية , لكن إنتي قولتي إنك بتكتبي علشان تفيدي الناس لكن في بعض الأوقات كتبتي حاجة إنتي مش راضية عنها وده ممكن يحصل لأي حد لأننا بشر لكن المهم عدم تكرار الخطأ ومش علشان في حاجة مش صح تمنعي الحاجات التانية المفيدة لأ ..إنتي فعلاً موهوبة ولازم تستمري في ممارسة هويتك وهي الكتابة لأن ده هيفيدك إنتي شخصياً علي الجانب النفسي واللي هيأثر علي حبيبه وعلي الدكتور لكن لو عاقبتي نفسك بعدم الكتابة لأنك حاسه إنك كتبتي حاجه غلط صدقيني نفسيتك بعد شوية هتبقي وحشة لأنك دفنتي رغبة الكتابة جواكي وطبعاً نفسيتك الوحشه دي هتأثر علي الأسرة ..يبقي الحل إيييييييه ( يبقي خير الأمور الوسط) زي ما قولت في تعليقي علي البوست اللي فات إن كل شيء لازم يبقي في المعقول لآزم تخدي بالك من بنتك وبيتك كويس قوي وكمان يكون في وقت لنفسك لتلبية رغبتها في ممارسة هويتك وده هيساعدك في تأدية دورك الأساسي في البيت بنفسية متوازنه, صدقيني تنظيم الوقت شيء مهم جداً ويخليكي تعملي حاجات كتير في حياتك فلو نظمتي وقتك بشكل جيد هتدي البيت حقه وكمان هتاخدي حقك في إنك تكتبي حاجات كتيرة ومفيدة وأنا شخصياً إستفدت من مدونتك لأنك إنتي ما كنتيش بتحبطي بالعكس إنتي كنتي بتنبهي وبشكل لذيذ جداً الناس علشان ما حدش يكرر الأخطاء الشائعه.
أنا شايف إن أهم حاجة النية وإنتي نيتك كانت زي الفل فتوكلي علي الله وأكتبي وطالما نيتك خير فكتاباتك هتبقي كلها خير بإذن الله ولو في حاجه فلتت نرجعلها ونصلحها زي ما عملتي كده ..مش كده ولا إييييييييييه

وربنا يوفقك إلي كل خير ويقدر لكِ كل خير

تحياتي

محمد فؤاد (صاحب عمود النور) يقول...

عارفه
انا فكرت فى نفس الكلام بالظبط
ودا اللى مخوفنى انى انزل الديوان او اى حاجه انا بكتبها
خايف اتحاسب على الكلام اللى كتبه
بفكر كتير جداااااااااااا
وربنا يستر

خواطر شابة يقول...

عزيزتي لن أقول لك الا كلمة واحدة انه قرارك انت والجميع سواء الموافق او الرافض عليه احترامه
تمنياتي لك بالتوفيق وبحياة سعيدة ان شاءالله

sony2000 يقول...

انتي كدا صح
بس مكنشي في داعي صراحه انك تمسحي المواضيع
لانها اتقرت اتقرت خلاص
المهم دلوقتي بدال مااخدتي القرار
خلاص مدام ده مريحك
ربنا معانا ويهدينا يااااااارب

حنين يقول...

حبيبتى ام بوبه
واللهى انا بجد حبيتك جدا
انتى قرارك صح وحلو انك تراجعى نفسك والبيت له حق ماحدش ينكر بس خليكى متواجده ولو على فترات بس ماتبعديش رتبى ظروفك واكتبى كل فتره حاجه هتوحشينا
بس احنا معاكى وانتى معانا
تحياتى

عاوز اصحي يقول...

مادامت نيتك خير يبقي ان شاء الله هيوفقك للخير

أحمد شريف يقول...

السلام عليكِ
انا أحييك على مراجعة خطواتك ونفسك دائماً
هذه نقطة إيجابية في صالحك
أما عن القادم فأنا أنصحك إن كنت ترى هناك فائدة من أطروحاتك القامة أن تطرحيها ولا تبخلي بها على أحد شريطة أن تنسقي بين وقتك هنا وبين التزاماتك الأسرية

سعيد جداً بمراجعتك لطريقتك في النقد
والحديث الذي طرحتيه اليوم سبق لي أن طرحته على مدونين كثر وآخرهم اليوم .. مون مشهور وله كتب ساخرة يقول عن الرئيس السادات راح في داهية على الهواء مباشرة
لا حول ولا قوة إلا بالله يقول عن الدار الآخرة داهية
وحينما وجهته أن ينتقد من يريد شريطة أن يراعي الكلمة والأسلوب والنقد البناء
اتاني في مدونتي ساخراً ليقول : يا عيني على المثالية

لا حول ولا قوة إلا بالله
ربنا يهدي العباد ، للأسف الكثير يظن أن الحرية تسمح له أن يقول ويفعل ما يريد وللأسف هو أبعد ما يكون عن هذا

نصيحتي لا تتوقفي عن الكتابة أنا مثلك لي مشاغل في أكثر من مكان ومحافظة ورغم هذا أنظم وقتي وأستعين بالله على الاستمرار .. عل كلمتي تكون ذات قيمة ونفع لدى غيري
والله الموفق وهو نعم النصير

سمع هوص (Abo 3li) يقول...

اكيد هنحترم قرارك.. وخصوصا ان اسبابك مقنعة جدا.. علي الاقل بالنسبة ليكي...

هتوحشينا.. ويبقي طمنينا عليكي وعلي حبيبة.. من وقت للتاني..

تحياتي لحبيبة وامها

мαησηα يقول...

ما اقدرش اقولك غير انك بجد هتوحشينى اوى

وانك بجد لو كنتى فاكرة ان كلامك ماكانش هادف او محققش اللى كنتى بتتمنيه فهمو ع الاقل انتى ف يوم من الايام

نفعتينى انا كانسانة جدااااااا

وبجد دعيتلك من قلبى وبدعيلك بردو

لان بجد انتى من الناس اللى فرضت على

الواحد انه يحترمها ويحبها وف نفس

الوقت بيضحك من قلبه

او على الاقل لما بيكون مهموم بيجى

عندك ينسى همه شوية

ربنا يخليلك بوبه ويوفقك للخير

ويسعدك يا جميلة

ويارب على قد الفرح والبهجة

اللى دخلتيها ف يوم على قلبى

ربنا يرزقك قدها خير وفرح وهنا

فى امان الله

خلى بالك منك ومن بوبه وباباها

سلام

emymony يقول...

بجد هتوحشنا بوستاتك اوى
بس مفيش مانع ولا اى اعتراض بوست كل فترة تطمنينا عليكى
ربنا يخليكى لحبيبه
اهم شىء انك تكونى سعيده وراضيه عن نفسك
مع انى مااعرفكيش اوى
بس حاسه ان حد بحبه اوى مسافر وانى واقفه اسلم عليه
بجد والله حاسه ان دموعى هتنزل مااعرفش ليه
هتقولى هبل بس بجد والله دا احساسى
باكرة كلمه فيها هتوحشنوى والى اللقاء والكلام ده
قولى جايلكم تانى ياعيال
مع خالص حبى وحبى

OlivE يقول...

بجد بجد هتوحشينى

انا كنت بتمنى اتعرف بيكى اكتر من معرفه بلوجات وخلاص

وكمان ليكى عندى صورتين كدا كنت خطفتهم من صور بوبا

انا محتفظه بيهم عندى وعملت عليهم شويه كلام حسيت وكان دى بنتى انا وبتقولى كدا

بجد انتى انسانه رائعه ومثاليه جدا
ربنا يوفقك الى ما يحبه ويرضاه ليكى فى حياتك ومع اسرتك
ويارب تكونى ام صالحه للابد وبوبا بالابنه الرحيمه باهلها :)

سلامى وهتوحشنى بجد

قلم رصاص يقول...

لي لأحد هنا عليكِ لوم بقدر ماتطلبه ظروفك وحياتك الشخصيه
فالمدونه صحيح جزء من حياة صاحبها لكن دا لايجعلنا ننسى انها شيئ مستحدث وليس من ضروريات الحياه وان كان وجودها فيها هيضر يبقى قلتها احسن

دا طبعا وفقا للمبدأ الاسلامي المعروف:

درء المفاسد مقدم على جلب المنافع


دي نقطه

النقطة التانيه انا بجد احييكي على محاسبتك لنفسك بين الحين والاخر ..واسبابك مقنعه جدا ومنطقيه فهناك اولويات

صحيح موضوعاتك محترمه جداااااااا وهادفه وافادتنا واسعدتنا كتير بس سعيييييييييد اوي اوي اوي انك حريصه على تحري عدم تجريح حد او المساس بشخصه سواء من بعيد او قريب حتى لو كان الحد دا لاتربط به اي صله او قرابه مثل نجوم المجتمع زي مانبقول زي احمد شوبير كما قلتي مثلا.

جزاكي الله كل خير والله

ورتبي اولوياتك
والمدونه اهه موجوده لكن حياتك اهم

تقبلي مروري وتحيتي

P A S H A يقول...

أنــــت صــح

سلسبيل يقول...

بجد أنا مش عرفة أقول أية

شكلى فقر عليكى

أنا حبيت مدونتك أوووووى

وكان نفسى تستمرى فى التدوين

طلب أخير ممكن بس تكتبى موضيع صغيرة

وكل فترة وفترة مش لازم علطول أرجكى

أوعدينى بجد أنا كنت سعيدة جداً لدخولى

على مدونتك وحبة أستمر فيها منتظراك

norahaty يقول...

تمنياتى بالتوفيق
وبرضاكى عن حالك
لانه أهم شىء انك تكونى
راضية عن نفسك بينك وبين نفسك.

أم .. بوبه يقول...

صاحب رأى

فعلا انا محتاجة ترتيب أولويات .. جزاك الله كل خير

أم .. بوبه يقول...

صيدلانية طالعة نازلة

ماشى يا علا .. هتوحشينى والله بس ده مش معناه إنى مش هقرى بوستاتك لأ هتابعها إن شاء الله

أم .. بوبه يقول...

lady

أكيد إن شاء الله هرجع أكتب تانى ولو حتى على فترات .. بس بعد ما أرتب أمورى وأرتب دماغى كمان .. علشان مكتبش حاجة وأرجع أحذفها تانى

أم .. بوبه يقول...

هيثم رمضان

جزاك الله كل خير

بالنسبة للكتابة .. مش هبطلها إن شاء الله .. لأنها فعلا بتفرق معايا ومع نفسيتى كتير

بس محتاجة أرتب بعض الأمور فى حياتى واتفرغلها شوية .. وليا عودة بإذن الله

أم .. بوبه يقول...

محمد فؤاد


فكر أكتر ومتكتبش حاجة إنت شايف إنها ممكن تكون عليك مش ليك ... لأنها هتكون حسنة جارية أو سيئة جارية .. خاصة الكتب .. وربنا ييسرلك أمورك

أم .. بوبه يقول...

خواطر شابة

جزاكى الله كل خير ... وإن شاء الله ربنا ييسر الأمور

أم .. بوبه يقول...

sony 2000

اولا أنا أخفيت المواضيع بس .. لأنها عزيزة عليا ومش هاين عليا أحذفها

بس لو كنت سببتها ممكن تتقرا تانى من أى حد جديد .. فكدة أحسن

أم .. بوبه يقول...

حنين

إنتى كمان هتوحشينى .. وإن شاء الله كل فترة هكتب حاجة علشان يكون بينا تواصل وميتقطعش بإذن الله

أم .. بوبه يقول...

عاوز أصحى

جزاك الله كل خير

أم .. بوبه يقول...

أحمد شريف

جزاك الله كل خير

فعلا هو موضوع محتاج المراجعة والوقوف مع النفس .. سواء بالنسبالى أو بالنسبة لغيرى

والحمد لله

أم .. بوبه يقول...

سمع هوص

جزاك الله كل خير .. والله يسلمك

أم .. بوبه يقول...

manona


تعليقك أسعدنى كتييييييير والله

زى ما كنتى بتسعدينى كل مرة

جزاكى الله كل خير بجد ... وإن شاء الله ليا عودة تانية .. بس هرتب أمورى وأولوياتى .. وكمان حبيبة محتاجة تدخل حضانة .. وأنا هروح معاها فترة لحد ما تتعود علشان كدة هكون مشغولة أوى اليومين دول ... إدعيلى يا جميل

هتوحشينى أوى .. أحبك فى الله

أم .. بوبه يقول...

emmymony

رجعالكو يا عيال

خلاص متزعليش .. أنا أهبل منك والدمعة كانت هتفر من عينى


إن شاء الله ليا عودة ... وكمان هتابعكم على أد مقدر ... متزعليش بقى ربنا يخليكو ليا

أم .. بوبه يقول...

olive

انا كمان يشرفنى إنى أتعرف عليكى

وكمان عايزة أشوف صور حبيبة إللى عندك وكاتبة عليها إيه

أنا عارفاكى مش بتقدرى تقاومى صور الأطفال

ربنا يرزقك بالزوج الصالح وبالذرية الصالحة يارب

أم .. بوبه يقول...

قلم رصاص

جزاك الله كل خير على كلامك وتأييدك لرأي

انا فعلا محتاجة أرتب أمورى ولما وقتى يسمح إن شاء الله هيكون ليا عودة

أم .. بوبه يقول...

pasha

جزاك الله كل خير

أم .. بوبه يقول...

سلسبيل

لا والله يا حبيبتى لا وشك فقر ولا حاجة

انا إللى كنت مشغولة على طول وكمان كنت بفكر فى القرار ده من زمان

حتى إنى فى الفترة الأخيرة مش لاقية وقت أقرأ فيه المدونات التانية وأعلق عليها ...... ففعلا بس محتاجة أرتب أمور بيتى وبنتى وبعدين أرجع إن شاء الله ولو حتى على فترات .. ومتزعليش نفسك أبدا

وعلى فكرة انا دخلت مدونتك وعجبتنى مواضيعك جداا خفيفة وهادفة وجميلة جزاكى الله كل خير

أم .. بوبه يقول...

norahaty

طبعا رضا الإنسان عن نفسه مهم جداا .. ورضا الله عليه أهم .... ربنا يرضينا ويرضى علينا إن شاء الله

جزاكى الله كل خير

قهوة بالفانيليا - شيماء علي يقول...

مقدرة موقفك جدا
و معاكي حق في اي حاجة هتعمليها
وفقك الله أينماذهبتِ ..
:)
من حقك تخفي محتويات المدونة ..
دة حقك .. و دة بيتك .
ربنا يكرمك .. و يفرح قلبك ببنتك .

حصان المرجيحة يقول...

احييكي علي قرارك
بس ممكن لما تفكري بهدوء تلاقي انك غلطانة
او انك فعلا كان معاكي حق
المهم انك حتي لو كنتي غلطانه فممكن ترجعي بالصح
و لو كنتي صح تحاولي تزوديه
و طبعا البيت اولي
كلامك علي راسنا كلنا
تسلمي

سبايدرمان يقول...

عندك حق في كل كلمه قولتيها
ربنا يوفقك يارب
و حاولي تستغلي المدونه بتاعتك في شئ يعود عليكي بالنفع
اعملي بيها خير
كل كلمه خير هتقوليها هتاخدي عليها حسنه بيها

....

في كلمه قرتها في (( مدونه من نور ))

قال أنس بن مالك رضي الله عنه حينما رأ ى حال الناس من حوله:انكم لتأتون أعمالا هي أدق في أعينكم من الشعر .كنا نعدها على عهد الرسول من الموبقات)