حصريا ..... فى رمضان

السلام عليكم ورحمة الله وبركاته

قبل كل رمضان كالعادة .. والناس مضغوطة ومطلوب منها طلبات أد كدة وخصوصا رمضان إللى بعده المدارس 

( وإللى أكيد بعده العيد بردو) 

نلاقى جميع القنوات بتعلن عن المسلسلات الحصرية  إللى مفيش زيها أبدا ..

وإعلانات عن برامج المقالب .. والحوارات المحرجة والصريحة ..

والممثلات إللى مش لابسين هدوم فى المسلسلات ..

والممثل إللى بيتسرع فى برنامج معمول فيه مقلب ..

والممثلة إللى بتعيط من سؤال محرج فى برنامج ما

( ياعينى بيتبهدلوا فى رمضان بجد )

دى إستامبا كلنا متعودين عليها فى كل رمضان .. والغريب إن بعد كل الإعلانات دى بيبدأ رمضان وإحنا مش عارفين على أى قناة هنلاقى المسلسل أو البرنامج ده لأن كل القنوات كانت بتعلن فى نفس الوقت ..

ولحد 10 رمضان كدة بنبدأ نستقر ونتعرف على معاد برنامج أو مسلسل أو إتنين بعد ما بتكون بطارية الريموت فضيت من كتر التقليب بين القنوات ....

مشكلتى أنا بقى إن دايما بقلب والفواصل الإعلانية شغالة وفى الآخر مش بوصل لأى نتيجة

أنا بقى الحمد لله ربنا تاب عليا من المسلسلات الهابطة وغير الهابطة .. بس منكرش إن فى برامج كتير تافهة مازالت بتشدنى أتفرج عليها ...

رمضان السنة دى بقى لاحظت ظاهرة غريبة ..

أثناء بحثى عن البرامج التافهة أثناء الفواصل الإعلانية ...

ألاقى نفسى متكعبلة فى واحدة منتقبة ماشية أو قاعدة أو واقفة المهم المنظر ده بيشدنى أعرف إيه إللى هتعمله أو إيه المناسبة يعنى  ..

إحنا إتعودنا إن الممثلات بتقلع فى رمضان .. معقول إتنقبوا السنة دى ....

وأفضل متابعة إيه إللى هيحصل وأحيانا لمدة حلقتين والنتيجة النهائية 

إنى بيتحرق دمى

( ليه بيتحرق دمى ؟ )

هتعرفوا بعدين

مرة ألاقى واحدة لابسة النقاب علشان هربانة من البوليس

ومرة غصب عنها ومجبرة على كدة

ومرة واحدة لسانها طويل ووبتدعى الإلتزام

وإللى ينقط أكتر إنى ألاقى واحدة لابسة شورت بتفتى وتقول إن النقاب مش من الدين ... طيب خلينا نقول أوكى ..

السؤال هنا بقى 

( إيه وضع الشورت فى الدين عادة ولا عبادة ؟ ) 

ياريت يوضحولنا فى المسلسل الحصرى إللى جاى أنا فى إنتظاره

إللى عايز يعرف أنا ليه محروق دمى وليه منقوطة وإن مكونتش كتبت الكلمتين دول كان ممكن يجرالى حاجة ؟

هو إنى وليا الفخر والعزة من المنتقبات دول والحمد لله .

والأغرب من كدة وإللى مش ممكن حد يصدقوا

إنى لما لبست النقاب لبسته من نفسى مش بأمر من أمير الجماعة ولا حاجة

حتى إنى لحد دلوقتى محدش بعتلى رشاش هدية مكافئة على نقابى

ولا لاقيتهم جايبنلى واحد معرفوش وقالولى ( يا أختنا غدا سيتم زفافك على الأخ عبد القادر )

وإنى بتكلم عادى بالعامية زى باقى البشر كدة وأحيانا بقول كلام إنجليزى كمان

وحتى عندى  كمان الإختراع إللى إسمه موبايل وبغيرله الكفر كل فترة ...

لا وإيه عندى مينى لاب توب وجوزى إللى جايبهولى كمان

 عندى شبشب للحمام بلاستيك .. مش بدخل الحمام بالقبقاب ولا حاجة

ومقطعتش صلتى بأى صاحبة ليا  مش منتقبة وقولت عليها عدوة الله والدين

إيه تانى

أه لما بجوع باكل 

وبطبخ مكرونة بالباشميل وفراخ بانية وبفتيك وبيتزا.. ونفسى أعرف طريقة  البيكاتة بالشامبليوو ..  وكل أكل الفرنجة بنعمله وبناكله 

(سامحنى يارب )

الغريب جداا بقى .. إن لما حد بيقول نكتة قدامى .. تخيلوا بضحك عليها وممكن أقولها لغيرى وأضحكه  ( شئ لا يصدقه عقل )

وساعات لما ببقى قاعدة وقت كبير كدة فى البيت بتضايق وببقى عايزة أخرج وأتفسح زى البنات إللى مش منتقبات بالظبط 

سبحان الله ( شئ مدهش)

 

الأغرب من كدة ومش ممكن حد يصدقوا .. إنى مش بس منتقبة 

لأ دا جوزى كمان ( مش منتقب طبعا ) لأ ملتحى ( يعنى مربى دقنه بالعربى ) بس مش هو الأخ عبد القادر دا الدكتور عبد الله

مفيش مجال بقى أحكيلكم عن جوزى لأنكم مش هتصدقوا

هديكم نبذة بسيطة جوزى عنده أكاونت على الفيس بوك (و ساعات بيلعب نييييييد فور سبييييييييد ) واااااااااااااااااااو

محصلش مرة إن حد كسر علينا باب الشقة وأخدوه فى نص الليل ومنعرفلوش طريق جرة 

الحمد لله لحد النهاردة ملوش ملف فى أمن الدولة يا عالم بكرة إيه إللى هيحصل

جمدوا أعصابكم بقى لأن أخوية الكبير دكتور هانى  ملتحى (أى مربى دقنة ومراته منتقبة زيى بالظبط )

والغريب إن إبنهم إسمه عمرو وبيدلعوه بيقولوله يا عمورة

كفاية هزار بقى علشان متتخنؤش منى

بجد بجد الحقيقة غير إللى وسائل الإعلام بتحاول توصلها للناس

وأنا متأكدة إن فى منكم كتير يعرف كدة وفاهمنى أنا أقصد إيه

ليه لبست النقاب ؟

موضوع أكيد يطول شرحه

النقاب فرض أو فضل ؟

مش تخصصى علشان أفتى فيه .. بس أكيييييييييد أكيييييييييد مش عادة جاهلية زى ما بيقولوا

فى ناس بتستخبى ورا النقاب وتعمل حاجات تخالف الضمير ؟

أكيييييد طبعا .. زى الدكتور إللى بيستخبى ورا البلطو بتاعه .. والظابط إللى بيستغل بدلته وزى الست الشيك جداا الستايل إللى راكبة عربية آخر موديل وبتخدع الناس بمظهرها لأغراض أخرى

مشكلة إن النقاب بيخفى الشخصية إللى لابساه ؟

نظارة شمس كبيرة وإيشارب يقدروا يخفوا أى شخصية .. عملية تجميل تقدر تغير ملامح أى إنسان .. صابغة شعر وقصة جديدة وعدسات يغيروا شكل أى بنى آدم

.. ده ميمنعش إن يكون فى إجرآت مناسبة بدون إهانة أى إنسان للتحقق من شخصيته فى كل مكان

النقاب بقى موضة ؟

فعلا كتير بيلبسه لمجرد التقليد أو واحدة جوزها حمش وطلب منها تنتقب .. أنا عن نفسى منعت ناس كتير إنهم يلبسوا النقاب لأنهم هيسيئوا له ومش مستعدين أبدا لتحمل مسئوليته أو حتى ربعها  والحكاية مش ناقصة

بس السؤال إللى محيرنى .. لو النقاب عامل مشكلة دلوقتى وبيحاربوا فيه لأنه بيخفى الشخصية إللى لابساه وبيساعد على حدوث جرمتين تلاتة كل يوم

طيب ليه بيحاربوا الملتحيين مع إن اللحية محدش قال إنها عادة ولا بتخفى شخصية إللى مربيها ولا كل ملتحى ماشى فى الشارع مخبى رشاش فى جيبه ولا بيخبوا سماعات الموبايلات فى لحيتهم وهما بيمتحنوا 

ليه إللى بيلتحى إقتداء بالرسول بيتحارب مع إن فى ناس كتير مربية دقنها موضة وبتقلد ناس ممكن يكونوا مش مسلمين وبيتقال عليهم روشيين .. ليه لما راجل بيقصر بنطلونه إقتداء بالرسول بيبصوله بصة تانية غير أى ولد ماشى فى الشارع لابس بنطلون برمودة تحت الركبة لمجرد إنها موضة 

فين المشكلة بالظبط ؟

مستنية الإجابة من أى شخص ممكن يفهمنى إللى أنا عاملة مش فاهماه

المنتقبات والملتحيين بشر عاديين جداااااا بتغلط وبتستغفر وبتبعد وبتقرب وبتحاول توصل ومنتظرين النتيجة مع الكل ..

وأى حد ممكن يكون أحسن منهم وممكن يكونوا أحسن من ناس كتير

الله أعلم هو الحكم العدل .. الحكم لله وحده

خلينا نقول إن لبس النقاب أو تربية اللحية حاجة من ضمن مليون حاجة فى الدين ..بترفع الواحد درجة أو إتنين الله أعلم .. 

بس مش من حق أى حد إنه يقرر إنها لازم تكون آخر حاجة فى المليون حاجة دول ..

إللى يقدر على حاجة يعملها ميستناش يعمل غيرها الأول لأنه ممكن ميقدرش على غيرها ويبقى خسر الإتنين .. 

إللى هينتظر إنه يكمل الجوهر قبل المظهر سواء كان حجاب عادى أو نقاب أو تربية لحية يبقى هينتظر كتير وممكن ينتظر للأبد لأن الكمال لله وحده جل جلاله 

أكيد للنقاب إحترامه وللحية ولازم إللى يقدم عليهم يكون قدهم ...

بس من الواقعى إنه مش هيوصل لدرجة الملايكة .. ومحدش ينتظر منه كدة .. لأنه بشر زى باقى البشر 

مع كل إللى بيحصل اليومين دول والهجوم العنيف على النقاب .. 

ليه ألف عذر إللى ممكن يتأثر .. وإللى بيتلخبط .. وإللى مش فاهم حاجة .. وإللى تخاف تلبس النقاب ..وإللى مش عارف شرعيته إيه 

مع كل الهجوم والمشاكل إللى حصلتلى وقت ما لبست النقاب من ست سنين إلا إن الوضع كان أهدى بكتير من دلوقتى ..

وبعد الست سنين دول وكل إللى بيحصل ده .. إكتشفت إن النقاب كان ........

أحسن وأجمل قرار أخدته فى حياتى وبسأل الله إنه يثبتنى عليه إلى يوم الدين

حبيبة بنتى ( الطفلة المعجزة)

 السلام عليكم ورحمة الله وبركاته

حبيبة بنتى عندها دلوقتى سنتين ونص .. من زمان بتحب تردد كلمات الأذان لما بتسمعها

بس من كام يوم إكتشفت إنها حفظت شكل كلمات الأذان ما شاء الله وبقت بتقراها من التيليفزيون والصوت مقفول

هى بتأذن بطريقة تضحك شوية .. وبنص لسان 

بس هتعجبكم إن شاء الله 

قولولى رأيكم فيها

وإدعولها ربنا يحفظها ويباركلى فيها وأشوفها إبنة صالحة ويبعد عنها كل سوء ويفرحنى بيها وميبتلنيش فيها أبدأ .. 

بستغلكم بقى علشان تدعولها وتدعولى

سر السكرتيرة والحارس الخاص

السلام عليكم ورحمة الله وبركاته

تحية كبيرة أوى ليكم كلكلم .. وبجد مع إنى بقالى كتير مكتبتش بس متبعاكم دايما وبقرأ أغلب مواضيعكم .. وعلى فكرة أنا راجعت المواضيع القديمة ورجعت بعضها 
ندخل فى الموضوع

طبعا العنوان غريب وعامل زى عنوان القصص الأجنبية المترجمة .. بس هو مش قصة ولا حكاية .... هو فى الأغلب حالة بتتكرر كتير .. وبنسمع عنها كتير .. ومحدش فكر هى ليه بتحصل وبتتكرر بنفس الصورة غالبا 

 وهى قصص الحب بين السكرتيرة والمدير .. والأميرات أو المشهورات وحارسها الخاص

 بصرف النظر إن كان عبارة عن حب صادق أو نزوة أو حب عابر .... إنما فى حاجة بتجذب الطرفين لبعض

أنا بقى عندى وجهة نظر متواضعة فى الموضوع ده بس مقتنعة بيها شخصيا

أولا بالنسبة للسكرتيرة والمدير

غالبا ومن وجهة نظرى إن المدير هو إللى بينجذب للسكرتيرة الأول أو بمعنى أصح بيكون الأصدق فى مشاعره لأن أسبابه بتكون مقنعة 

غالبا بتكون السكرتيرة بنت أو سيدة جميلة وشيك .. متعلمة ومثقفة ولبقة ... 

دايما أنيقة فى قمة زينتها و ريحتها حلوة ..

صوتها واطى وهى بتكلمه ..

بتعامله دايما إنه سيدها وهو الآمر الناهى .. والكلمة كلمته .. 

بتقول حاضر وبس ..

بترتبله مكتبه ومواعيده

ممكن كمان تاخد بالها من صحته لو عنده معاد مع الدكتور أو فى معاد دوا ... 

هو بيشوف فيها المرأة المثالية إللى بيحلم بيها ... وأنا قصدت أقول كلمة المرأة مش الزوجة ... لأنها هتتغير كتير لو أصبحت زوجة 

ومقصدش هتتغير للأسوأ .. أقصد الظروف هتتغير من حواليهم مش هيفضلوا طول النهار فى المكتب .. لأ هيشوفها وهى فى المطبخ .. هيشوفها مع العيال وهى بتزعق .. هيسمعها وهى بتنده عليه بصوت عالى لأنه مشغول فى حاجة ومش سامعها .. هيشوفها وهى صاحية من النوم من غير مكياج .. هيشوفها بالبيجامة والجلابية وأحيانا هى رابطة دماغها علشان بتنضف البيت ....

كل ده هى لازم تعمله ومحدش غيرها هيعمله وإن عملتوش هتتهم بالإهمال .. ومينفعش تعمله وهى فى قمة شياكتها وأناقتها ... بس للأسف ممكن الراجل يقارن بين زوجته وبين واحدة تانية ماشية فى الشارع أو معاه فى الشغل وكأنه متخيل إن الست التانية دى طول الوقت كدة حتى فى البيت  ويباخته إللى متجوزها

 كل المواصفات إللى ذكرتها عن السكرتيرة ... فعلا مواصفات جميلة ومهم إنها تكون موجودة فى أى زوجة ..

بس نفترض إن فى واحدة ست قدرت تكون سوبر ومن وعملت كدة أغلب الوقت ... يا ترى هتلاقى التقدير ونظرة الإعجاب من زوجها زى نظرة المدير للسكرتيرة ..

وهل يا ترى هتمسع من زوجها كلمات مدح وإعجاب زى إللى ممكن يقولها المدير للسكرتيرته .. زى ما بنسمع فى الأفلام والمسلسلات ( إنتى كل يوم بتحلوى عن اليوم إللى قبله )

ولا أى زوج بيبص لمراته على إن ده فرض عليها ولازم تكون كدة وكويس أوى إنى مستحملها فى الأوقات التانية إللى مبتقدرش تكون فيها كدة 

وبيبص لغيرها بنظرة إعجاب وتقدير على إنها سيدة أنيقة وشيك وجميلة وياريت كل الستات تعمل زيها ... وميهمهوش غير الظاهر وبس ... ولا بينطبق عليه فى الحالة دى المثل إللى بيقول ( شاعر البلد مبيسليهاش )

 بالنسبة بقى للحارس الخاص

 محدش سأل نفسه ليه دايما بنسمع قصص حب بين الأميرات أو المشاهير مع حارسها الخاص مع فارق المستوى حتى وإن كانوا متزوجات

 غالبا أو دايما بيكون الحارس الخاص ده ..

وسيم  ورياضى وأنيق وجان زى ما بيقولوا ..

وعايزة أقولكم إن أكيد المواصفات دى ممكن تجذب أى واحدة ست .. 

بس المواصفات الأقوى منها هى .. قوته وإحساسها بخوفه عليها حتى وإن كان ده بالنسباله تأدية لوظيفته .. 

بس بيحسس الست بالإحتواء والأمان والإهتمام وخصوصا إنه معاها طول الوقت مهتم بيها هى وبس مش شايف غيرها ..

مهتم بإهتمامتها حتى إن قعدت مع صاحباتها فى النادى بيروح معاها ..

لو كانت لواحدها ومش لاقية حد تكلمه .. بتكلمه وبيسمعها .. 

وقت الخطر بيدافع عنها ..

من الأخر هى كل دنيته 

ومع إنها بتكون مستواها أعلى منه بمراحل وممكن تكون متزوجه من أمير أو رجل أعمال مشهور بس على الورق وبس مش عايش معاها بروحه 

 ومع إن الحارس ده نفسه ممكن يكون متجوز ومراته فى البيت وحيدة بالشهور بسبب وظيفته وشغله ... هو فعلا مواصفاته مواصفات رجل الأحلام بالنسبة لأى واحدة ست 

 بس برده هيختلف كتير لو بقى زوج ... مشغول بسبب شغله .. مش بيسمع كل كلامها لأنه زهقان وطهقان من الشغل .. 

يمكن كمان بيكون حلم من أحلام زوجته إنهم يخرجوا ويتفسحوا مع بعض لو لساعتين مع الأولاد بس ميبقاش مستعجل ولا محسسها إنه ضحى بوقته السمين علشان يخرج معاها .. 

وميبقاش ساكت طول المشوار .. أو مقضيه كلام فى الموبايل .. متبقاش كل مشاويرها الضرورية بالنسبالها مع مامتها أو أختها .. وحتى لما تيجى تحكيله عملت إيه عند الدكتور أو فى اى مشوار تبقى شاكة أنه مش سامعها أصلا 

 من الأخر هل ممكن يكون فى راجل سوبر مان ويقدر يكون فى حياة زوجته زى الحارس الخاص كدة ... 

 لأنى متأكدة إن مفيش ست هتقدر تكون فى حياة زوجها بنفس مواصفات السكرتيرة طول الوقت ولا الزوج هيقدر يكون بمواصفات الحارس الخاص ولو لربع الوقت ...

علشان كدة الحكايات دى فى حياة أصحابها أغلبها بتكون نزوات أو أحلام وأوهام غير واقعية 

لأن الحياة الزوجية حاجة تانية خالص محتاجة تنازلات وتقدير من الطرفين ومحتاجة وسطية فى الإهتمامات ..

وإن كل طرف يكون فى حياة الطرف التانى هو الأهم ... ياريت يكون الإهتمام بالروح أهم من الإهتمام بالمادة .. لأن الروح بيجيلها وقت وتطهق وتموت حتى لو كانت لسه بتتنفس .. 

مينفعش نوصل لدرجة إننا نسمع عن ستات كتير ورجالة أقصى أحلامهم إنهم نفسهم يتغدوا مع بعض ويقعدو يشربوا كوبايتين شاى ومزاجهم رايق ومش مستعجلين ..

علشان محدش يستغرب لما يسمع قصص ناس بقالهم سنين عايشين وأولادهم كبروا ومنهم إللى إتجوز وفى الآخر ينفصلوا ... 

والناس تقول ليه كدة دول كانوا كويسين و وكانت ست محترمة وكمان جوزها مكنش حارمها من حاجة

والحقيقة إن الإتنين كانوا فى قمة الحرمان وأخيرا قرروا إنهم يدوا لروحهم فرصة إنها تتنفس وتحيا بعيد عن بعضهم لأن ده بقى الحل الوحيد

حاجات فى حياتنا كتير بجد لازم تتغير بس مين إللى هيبدأ الأول

التوحد مجرد مرض

السلام عليكم ورحمة الله وبركاته 

 أنا بكتبلكم النهاردة .. علشان أحكيلكم حكاية وأطلب منكم طلب

 الحكاية أولا

 زوجى زى مانتوا عارفين دكتور اطفال ... جه فى يوم من الأيام راجع من الشغل ومعاه كتاب ... بس كان مترجم بالعربى ..

مش كالعادة يعنى كله إنجليزى 

 وسابه على ترابيزة السفرة كالعادة بردوا .. فأنا لفت نظرى إن الكتاب عليه صورة طفل .. وكمان بالعربى .. وانا بحب أقرأ أى شئ عن الأطفال 

 بس كانت الصورة غريبة شوية .. طفل قاعد بعيد عن اصحابه .. وحيد ... وعنوان الكتاب ... التوحد 

 طبعا سألت زوجى وقالى .. شوية معلومات بسيطة وسريعة عن التوحد ومن أهمها .. سبب تسميته التوحد

 غالبا الطفل ده بيحب يقعد لوحده وينعزل عن الناس .. 

 وممكن كمان يحب ياكل نوع واحد من الأكل .. ويلبس لون واحد من اللبس .. 

ويلعب لعبة واحدة بيفضلها عن كل الألعاب .. إلخ إلخ إلخ

 بجد حسيت إنها حاجة ولا الأحلام .. ولا عالم الخيال العلمى 

 طيب وإيه سبب المرض ده ؟!!..

 الله أعلم .. لسه محدش توصل لأسباب معينة ومحددة .. 

يمكن كل حالة لها سبب مختلف عن التانى 

 طيب إيه علاجه ؟!!..

 برده الله أعلم .. مفيش حاجة مثبته علميا لحد دلوقتى .. وكل طفل ممكن يكون له طريقة علاج مختلفة عن التانى

 بس كمان زوجى قالى .. إن الأطفال دول غالبا بيكونوا أذكية جداااااا .. لدرجة إنهم ممكن يوصلوا للعبقرية 

 وقالى كمان .. إن بيتهوفن , وبيل جيتس , أينشتاين .و تمبل جرانديد  كل دول كان عندهم توحد وهما صغيرين 

 ومن اليوم ده شغلنى أوى موضوع التوحد ده .. ولو أى شئ صادفنى عنه لازم أقراه .. حتى إنى حبيتهم جدااااااا والله وبدون مبالغة وتعاطفت معاهم 

 لحد ما فى يوم .. كنت بعمل سيرش على النت عن مواضيع متعلقة بتعليم الأطفال الصغار الكلام لأن بوبة إتأخرت شوية فى الكلام 

 فخدنى السيرش على موقع منتديات .. من ضمنهم منتدى التوحد 

 بصراحة انا كنت متخيلة إن عددهم قليل ... إتفاجئت بعالم تانى 

 شوفتوا كدة العوالم المتوازية ... أهو النت ده بحس إنه كده .. مجموعة من العوالم المتوازية ... كل واحد فى عالم تانى ومش شايف غيره 

 شوفت نوع تانى من الأمهات عمرى ما شوفته ولا سمعت عنه ممكن تطلقوا عليهم أمهات محاربات .. دا أقل شئ ممكن يتقال عنهم .. 

ونوع تانى من الأطفال

متتخيلوش محتاج مجهود أد إيه الطفل ده علشان يقدر يبص للإنسان إللى قدامه فى عينه أو ينده على أمه ويقولها يا ماما ... أقل شئ ممكن يعمله أى طفل ...

 ومن يومها وأنا زائرة مستديمة للمنتدى ده .... وإللى شايفاه فيه إنه عبارة عن قصص بطولات متكررة 

 بتبدأ بموضوع الصدمة الأولى لكل أب أو أم ... وبعد كدة يتعافى من الصدمة ويقف جمبه كل أب وأم فى المنتدى ويدوله من وقتهم ومعلوماتهم 

ويقولوله يعمل إيه لإبنه او بنته وهما محتاجين إيه ........

 ويبدأوا مشوار العلاج والتدريب والصبر والأمل .......... والمشوار ده بيتخلله ... أحيانا إنتصارات .. أو إنتكاسات أو مفاجآت .. ودموع وأفراح ومباركات 

 بس أكتر حاجة إتعلمتها فعلا من العالم ده ... إن الصبر ملوش غير مقابل واحد وهو الفرج ......... وإن مع العسر يسر

 والحمد لله نهاية المشوار بإذن الله وحده وبفضله بتكون الشفاء 

انا تقريبا دلوقتى أعرف معلومات عن التوحد وطرق علاجه وتدريباته أكتر من زوجى ...لدرجة إنى حابة المجال ده جداا ونفسى أدرس فيه واشتغل فيه

بس أكتر مشكلة بيعانوا منها الناس دول فى بداية المشوار ... هى الناس 

 ونظرة الناس 

 وكلامهم إللى مبخلصش

 ونظرتهم للطفل ده على إنه معاق ومفيش منه فايدة 

ومش الناس بس ده ساعت المدرسين بتوعهم إللى فى المراكز الخاصة بيتعاملوا معاهم على الأساس ده وبيعملوا إحباط للأمهات بكلامهم

مع إن برا غير كدة خاااااالص .. علشان كدة حالات الشفاء عندهم بتزيد بفضل الله

 وبالطريقة دى أحيانا بدل ما يساعدوا الأم إنها تخرج إبنها من دايرة التوحد .... لأ دول بيخلوها تهرب معاه فيها وتبعد عن الناس 

 مع إن من أهم وسائل علاج الطفل ده إنه يختلط بالناس

هما محتاجين بجد إن كل إللى حواليهم يتغيروا ويثقوا فى أبناءهم وقدراتهم ويساعدوهم ويساندوهم ويقفوا جمبهم ... 

محدش بعيد عن المرض ولا عامله محضر بعدم التعرض له 

 دى مقادير ربنا مقدرها على عباده ... لحكمه هو واحده يعلمها ... وكان ممكن إحنا نكون فى مكان غيرنا .. محدش أحسن من حد 

 يبقى نحمد الله على أى شئ مهما كان ... ونطلب من ربنا إنه يحسن خاتمتنا ولا يجعل مصيبتنا فى دينا .. هو ده أهم شئ

 أنا كتبت الكلام الكتير ده .. علشان اقولكم إن مجموعة من المنتدى ده عملوا جروب على الفيس بوك علشان يحاولوا يغيروا فكرة الناس عن التوحد .. وعن اطفالهم .. لأنهم نفسهم يطلعوا أولادهم للنور من غير ما حد يحرجهم أو ينظرلهم نظرة تضايقهم أو يقولهم شئ يجرحهم حتى لو بجهل منه أو من غير  قصد

الجروب ده إسمه 

 التوحد مجرد مرض .. Autism just disease

http://www.facebook.com/group.php?gid=104827802886886&ref=mf

ياريت تساندوهم ولو حتى بالإنضمام 

أستودعكم الله .. الذى لا تضيع ودائعه

السلام عليكم ورحمة الله وبركاته

أنا آسفة لو كان كلامى النهاردة هيصدمكم .. أو ممكن يضايقكم ويفاجئكم

بس أنا هكلمكم بصراحة ... بصراحة جدااا .. وهقول كل إللى جوايا بوضوح تام

حتى لو كنت هلاقى إنتقادات كتير .. ومعارضين كتير لكلامى ده وقرارى إللى أخدته

أنا أسفة إنى أخفيت كل مواضيع المدونة ...

من أول ما بدأت أكتب فى المدونة دى .. وأنا بخاف من كل كلمة بكتبها وبسأل نفسى ياترى هى فى ميزان حسناتى ولا ميزان سيئاتى

لأنها مشكلة كبيرة ... الكلام إللى بيتكتب ده سلاح ذو حدين .. لأنه هيفضل على طول .. وهيتحاسب عليه الإنسان حتى بعد ما يموت .. سواء إتكلم بالخير أو بالشر

ساعات كتير كان بيبقى نفسى أكتب حاجة وعارفة إن فيها شبهه ومكن تكون عليا مش ليا .. بس نفسى تغلبنى وتخلينى أكتبها ... لأنها هتظهر أد إيه دمى خفيف .. وكمان أكيد هتعجب الكل ... وواحدة واحدة مبقتش أفكر فى أنا بكتب إيه .. المهم أكتب إللى على بالى وخلاص

وكمان بطلت أحس إنى بكتب لله وبس وأخلص نيتى بكدة ... أحيانا كنت بكتب لأنى منتظرة أقرأ تعليقاتكم إللى بتفرحنى لما ألاقى ناس تقولى ..

أسلوبك رائع

دمك خفيف

إنتى زى العسل

وغيره وغيره

أكيد ده شئ جميل ويفرح أى إنسان لأننا مخلوقين كدة بنحب المدح وكلمات الإعجاب

بس لما يتحول الهدف الوحيد من كتابتنا هو الحصول على كلمات الإعجاب والمدح

يبقى أكيد ده شئ مش مبشر بالخير

عايزة أقولكم إنى كنت بعد ما بكتب بوست عن شوبير ... ضميرى كان بيأنبنى .. وأحس إنى إتكلمت عن إنسان بكلام مش من حقى أقوله عليه .. وبسخر منه بشكل لا يرضى الله عز وجل

وربنا نهانا عن السخرية من بعض ... كان ممكن أنتقده بشكل أفضل من كدة وبدون تجريح وإستهزاء وإستهتار بكلمات أحاسب عليها يوم الدين .. كل اما يقرأها إنسان

حتى كلامى عن الزواج مع إنى بجد بجد كان نيتى فيه إصلاح البيوت .. إلا إنه كان بيصيب البعض بالإحباط والإكتئاب .. والإنسان لازم يبشر ولا ينفر

أنا بقالى فترة كبيرة محتارة وقلقانة وفى نفس الوقت مستمرة فى إللى أنا بعمله ... وبرمى ورا ضهرى أى شئ ممكن يرجعنى عن إللى انا بعمله .. لحد ما النهاردة حصلى موقفين ورا بعض خلونى أراجع حساباتى تانى

بس بجد انا خوافة ومش قد اللعبة دى .... خايفة أموت وأتعذب بكلمة أو إحساس وصلته لإنسان غلط .. أو كلمة إستهتار أو سخرية من شخص

قال رسول الله صلى الله عليه وسلم

إن الرجل ليتكلم بالكلمة لا يرى بها بأسا يهوي بها سبعين خريفا في النار "

وحطوا تحت ( لا يرى بها بأسا ) سبعين خط

أكيد فى كتير منكم هيشوفونى مكبرة الموضوع .. أو متشددة أو متخلفة

وممكن حد منكم يشوفنى صح .. الله أعلم

بس أنا بجد إتعودت إنى مخودش قرار فى حياتى وأقتنع بيه واتراجع عنه أبدا

بس لأنى بحترمكم وبقدركم كلكم

حسيت إن من حقكم عليا إنى أقولكم كل إللى بيدور جوايا وأسبابى إللى خلتنى عملت كدة ...

مقدرش أقفل باب مدونتى فى وشكم فجأة وبدون أسباب ... بجد انا بكتب وشايفة فى عيون كل شخص فيكم نظرات بتعبر عن إنزعاجكم أو مفاجئتكم وإستغرابكم .. ومش قادرة أقولكم كلام تانى أكتر من إللى انا قولته

أنا مش هقفل المدونة دى

ولا هحذف المدونة التانية .. لأنى مش شايفة فيها شئ يقلقنى

http://awraktanbod.blogspot.com/

بس يمكن دخولى ومشاركتى هتكون قليلة شوية

مش علشان أى شئ

بس بجد حبيبة بنتى محتجانى أوى اليومين دول .. ومنكرش إن المدونة أخدت من وقتها كتير ... كفاية إنى بضطر أفتحلها التيليفزيون على قناة انا مبحبهاش تتفرج عليها مدة طويلة .. علشان أقدر أكتب وكمان أقرأ بعض المدونات

لأن مشاهدة التيليفزيون للأطفال لفترة طويلة مش لصالحهم أبدا ... ودا كان شئ بحاول اصلحه عندها .. دلوقتى أنا إللى بقيت بفتحهولها بإيدى

أنا مش هبطل أقرالكم أبدا .. ومش من السهل إنى أبعد عنكم ... بس أعذرونى ... ومتزعلوش منى مهما كنتم شايفين قرارى ده صح أو غلط

وياريت محدش ياخد كلامى ده بإنى بوجهله إتهام بإنه صح أو غلط .. أو إنى بحكم على أى إنسان بأى شئ .. أنا أقل من كدة بكتير ... كدة تقريبا خلصت كلامى

أستودعكم الله الذى لا تضيع ودائعه 

صوت الجمال يتخطى حدود السمع

أرايت شمساا.. أشرقت تلك السمآء ..
تغدو الحياة بنورها .. تسمو سمآآء..
ناديتها انغام صوت هاتف
لكنها تأبى بأن تتكلما
أرايت زهرا في الربيع تفتقت
يسبى القلوب جمالها يروي الظمى
عاتبتها أن طال عني غيابها
فوجدتها تأبى بأن تتكلما
وإذا بزاوية هناك تلوح لي
وطفله حسناء
تلعب بالدمى
خاطبتها
لم تمرحين وحيدة لكنها عجزت بأن تتكلما ..
أدركت حقا بعد ذلك أننا عن الحقيقه قد أصبنا بالعمى
كم من روائع في الحياة ترنو لنا
لكنها عجزت بأن تتكلما..

_________
________________________________

 أنا مش بعمل إعلان عن زين طبعا .........

بس انا مبهورة بالكلمات والأداء والفن الراقى والرسالة إللى فى الإعلان ده

.. وحابة أقول ..

إن ممكن الواحد يسمع صوت وكلمات جميلة ويشوف صورة وفن رائع وراقى ... 

ويستفيد وينبهر ويستمتع لأقصى درجة

( من غير ما يغضب ربنا ) 

إللى عايز يعمل حاجة حلوة وصح هيعملها ..

مش لازم كل الحاجات الحلوة والممتعة فى حياتنا منستمتعش بيها غير بشكلها الغلط والغير جائز

الشئ الجميل والصح والحلال فى حياتنا كتير بس نفسنا إللى بتصعبوا علينا  

 

الكورة ......... فيييييييييين ؟؟!!

أهم الأنباء 

 خبر بعنوان ...

 ***حالة من الإستقرار النفسى تسود الأسر المصرية فى الأيام الماضية 

      قد لوحظ منذ فترة وجيزة ظاهرة جديدة تسود على الشارع المصرى وتنتشر  بين الرجال وهى حالة من التركيز والنشاط وعدم الكلام بشكل مستمر ودائم عن موضوع واحد وهو أخبار الكورة . كما كان يحدث من قبل بشكل مستفز . 

وتم دراسة هذه الظاهرة ومتابعتها ورصدها وآخر ما توصل إليه الأخصائيون أنها 

ظاهرة صحية أدرجوها تحت مسمى

(حالة نقص شوبير فى الدم )

وتم  أيضا ملاحظة تغيرات تطرأ على النساء من جميع الأعمار .. وهى إعتدال جامد جدااا فى المزاج وروقان البال .. وإختفاء لظاهرة الصداع النصفى التى كانت منتشرة بينهم .. مما أدى إلى معاملة الأطفال والأزواج بشكل يقترب إلى المثالية .. وقلة المشاحنات والخلافات المستمرة بينهم على الفاضية والمليانة

وأيضا عند كبار السن إعتدال واضح فى معدلات الضغط  و نسب السكر فى الدم وتراجع فى أعراض الزهايمر

وأيضا الأطفال لم يفلتوا من هذه التغيرات ... حيث أنهم اصبحوا يتمتعون بسعادة غامرة خاصة يوم الجمعة الأجازة الرسمية .. بعد ان أصبحوا يقضون وقتا كبيرا مساء الجمعة خارج البيت بصحبة والديهم 

وقد أدرج الأخصائيون هذه الظاهرة عند النساء والكبار والأطفال تحت مسمى ..

(حالة نقص شوبير فى البيت )

 وبشكل عام قامت كل هذه التغيرات بإضفاء جو من السعادة والراحة النفسية على معظم الأسر المصرية .. 

وعند إستطلاع الرأى فى الشارع المصرى .. كان هذا رأى احد السيدات السعيدات بهذه الظاهرة 

( الحمد لله ربنا يخليلنا مرتضى منصور .. وزى ما إرتحنا من شوبير عقبال مدحت شلبى وخالد الغندور)

 وتحث كل السيدات ان يرددوا من خلفها   آآآآآآآآميييييييييييييين

سؤال المسابقة

 تفتكروا البرنامج الجديد البديل لبرنامج الكورة مع شوبير هيكون إيه ؟؟؟

  1_ الكورة مش مع شوبير

  2_الكورة مع مرتضى منصور

  3_ الكورة فييييييييييين؟؟

طبعا عارفين هتبعتوا الإجابات فين .. 

والسلام عليكم ورحمة الله وبركاته

مع تحياتى أم بوبة 

البقاء لله .. أسألكم الدعاء

السلام عليكم ورحمة الله وبركاته 

إنا لله وإنا إليه راجعون

 النهاردة جدتى إتوفت ... وبكرة إن شاء الله هتدفن بعد صلاة الظهر

مش هقدر أحكى انا أد إيه كنت بحبها ومش أنا بس كل أولادها وأحفادها وأهلها وجيرانها وكل إللى يعرفها

 ومفيش لا وقت ولا مكان يسيع كلامى عن طيبتها ورقتها وعزة نفسها وحلاوة لسانها وكلامها ودعاءها المستمر لكل شخص تعرفه او متعرفوش 

وكمان  مفيش وقت أشرح فيه معاناتها فى آخر أيامها وصبرها وعدم تهويلها للأمور وعدم شكواها وحمدها لله الدائم الخالص وإقتناعها التام إنها فى أحسن حال وفى نعمة كبيرة

 بإختصار شديد وشديد جداااااااااااااااااااااا 

 كانت بشهادة الجميع .. أبر إبنه .. وأخلص زوجة .. وأحسن أم  .. و أجمل حماه .. وأحن جدة

أدت أدوار حياتها كلها ببساطة وببراعة فى نفس الوقت 

 مش طالبة منكم غير الدعاء ليها من قلبكم  وبأكد من قلبكم بجد 

 كلنا هنحتاج لكل شخص يدعيلنا فى اليوم ده .. وأكيد مهما كانت أفعالنا وأعمالنا كويسة فى نظر الجميع .. فإحنا فى أمس الحاجة لرحمة الله ثم لكل دعاء خالص ممكن يوصلنا ويخفف عنا ويثبتنا 

اللهم ابدلها دارا خيرا من دارها واهلا خيرا من اهلها وادخلها الجنة واعزها من عذاب القبر ومن عذاب النار .

اللـهـم عاملها بما انت اهله ولا تعاملها بما هى اهله .

اللـهـم اجزها عن الاحسان إحسانا وعن الأساءة عفواً وغفراناً.

اللـهـم إن كانت محسنه فزد من حسناتها , وإن كانت مسيئه فتجاوز عن سيئاتها .

اللـهـم ادخلها الجنة من غير  حساب ولا سابقة عذاب .

اللـهـم اّنسها في وحدتها وفي وحشتها وفي غربتها.

اللـهـم انزلها منزلاً مباركا وانت خير المنزلين .

  ملحوظة :

________

  مازال تعليقات البوست إللى فات مفتوحة لمن يرغب فى التعليق

 _________________________________________________

 وآسفة بجد على إنشغالى الفترة إللى فاتت وتقصيرى فى متابعة مواضيعكم .. وسامحونى لو إنشغالى طول شوية