الأربعاء، 20 يناير، 2010

إزاى تخلى زوجتك تحبك

السلام عليكم ورحمة الله وبركاته




انا بقى هتكلم دلوقتى عن شوية حاجات بسسسسسيطة جدااااااا ( أكيد من وجهة نظرى الشخصية ) لو عملها الزوج بتفرق كتير أوى مع الزوجة فى وسط الضغوطات النفسية والبدنية إللى بتكون فيها الستات بعد الجواز والخلفة والعيال
كلامى كله فى الحاجات البسيطة إللى ممكن تفرق معايا أو مع غيرى أو متفرقش مع حد غيرى ... بإستثناء إللى بيفرق مع الكل وهو .. (الخيانة , الكذب , الإساءة فى المعاملة , البخل , الكراهية إلخ إلخ الحاجات إللى ميختلفش عليها إتنين )  مش موضوعى

طبعا انا مش بنفى إن الزوج مش بيكون مضغوط فى شغله وتحمله المسئولية ..  .. هو كمان بيكون مضغوط وتعبان ومرهق ..

بس فى البوستين إللى فاتوا أنا كنت حابة أبين للى مش عارف إن ست البيت مش مجرد واحدة قاعدة  فى البيت وفاضية ومش حاملة هم حاجة .. لأ دى بتشتغل كتير وشغل مهم جداااا لا يقل أهمية عن قيمة شغل الرجل ولو توقفت عن شغلها ده فى أى وقت الدنيا بتبوظ خالص وحتى معندهاش أجازات  ( علشان نبقى فرغنا من النقطة دى قبل ما نتكلم )

ثانيا
ليس كل ما يكتب في مدونتي إسقاط على حياتي الشخصية
الإنسان مش مجرد حياة بيعيشها
لكن حياة بيشوفها وبيسمعها وبيتأثر بيها

على فكرة انا إستلفت الكلمتين دول من عند الدكتورة ستيتة حسب الله الحمش

نبدأ بسم الله .....
كلامى موجه طبعا  للرجال المتزوجين ..... والدعوة عامة طبعا للباقى 

1 .. صلوا على النبى  (عليه الصلاة والسلام )

2 .. من الحاجات إللى بتضايق الستات .. إن لما جوزها يرجع من الشغل ويلاقى الأكل متأخر يتنرفز ويقولها ( أومال بتعملى إيه من الصبح ) .. وبيبقى مستنى رد مقنع والمشكلة إن الست بتبقى مش عارفة ترد تقول إيه لأنها بتكون عملت حاجات كتييييييير كلها صغيرة وتعتبر هايفة بس مهمة وبتاخد وقت وخصوصا لما بيكون فيه أطفال وكل إللى تعرفه إنها من أول ما صحيت من النوم وهى بتشتغل ومقعدتش فالكلمة دى بجد بتأثر فى نفسيتها جداااا

الحل .. وخصوصا لو كانت الحكاية دى نادرا لما بتحصل هو إنك تاكل أى حاجة تيك أوى من التلاجة وترحمها شوية من نرفزتك علشان تنجز وتكمل الأكل لأن مناقشتك معاها هتأخر إللى إنت عاوزه ومش هتجيب أى نتيجة غير إنها هتحس إنها مهانة وخصوصا لما تكون مش مقصرة بجد

3 .. ياريت لما ترجع من بره وتلاقى البيت منظم ومرتب وتحس إنه باين عليه إنها لسة مخلصة شغل وتنضيف فيه ... بلاش الخصلة بتاعت بعض الرجالة إللى عينيهم بتقع على الحاجة الغلط وبسرعة يقولها مرتبتيش ليه كذا أو نسيتى تنضفى كذا .. وكأنه داخل مسابقة دور على الجزء إللى مش نضيف ....... البديل بقى الله يهديك أولا إنك تتغاضى عن ملاحظاتك الدقيقة فى الحاجات إللى نسيت تعملها  وتأجلها لوقت تانى يكون مناسب وتقولها لها بشكل لطيف ....

وثانيا إنك تحسسها إنك لاحظت إن البيت جميل ومنظم وحاسس بالمجهود إللى هى عملته وياسلام لو قولتلها أنا مش عارف من غيرك كنا هنعمل إيه (ولك الأجر والثواب عند الله)

4 .. ياريت لو كنت من النوع إللى ماما كانت مدلعاك جدااا واخواتك البنات شايلينك من على الأرض شيل .. واتعودت إنك متعملش حاجة بنفسك .. فى الحالة دى مش هنطلب منك كتير .. بس هو ياريت بعد ما تشرب شاى أو أى مشروب فى كوباية ومراتك فى المطبخ ياريت قبل ما تطلع من المطبخ ومجرد ما تيجى تقعد وترتاح متقولهاش خودى بقى الكوباية دى .. مش هيحصل حاجة لما توديها بنفسك المطبخ مع إبتسامة رقيقة.......

وكمان ياريت وانت راجع من الشغل تعلق هدومك على الشماعة وتحطها فى الدولاب ومترميهاش على السرير مش هيحصل حاجة خالص لما تعلقها إنت وتوفر عليها الدقيقتين دول تستفيد بيهم فى أى حاجة تانية وفى نفس الوقت هيبان إنك منظم ... 
5 .. بالنسبة بقى للرجالة إللى عدوا المرحلة إللى فاتت دى .. مش هيجرى حاجة لو إتعلموا يعملوا المشروبات لنفسهم وخصوصا فى الأوقات إللى بتكون فيها الست مشغولة .. وكمان سلق البيض وقليه وبعض مبادئ الطهى (علشان فى حالة الظروف القسوى وتعب الزوجة أو ولادتها )

يعنى حتى علشان لو كانت نايمة تعبانة أو مرهقة ميروحش يصحيها ويقولها انا عايز أفطر ( بجد لما بيعمل الزوج حركة زى دى زوجته بتحس إنها فى نظره خدامة وخصوصا لما بيكون مجرد فطار أو كوباية شاى وهى بتكون تعبانة أو عيانة ) إنما لما بيحصل العكس بجد بيزيد فى نظرها وبتحبه أكتر وبتقدره وممكن تقوم تساعده كمان وهى فرحانة  

6 .. إبعد عن إدمان الماتشات وبرامج التحليل الرياضية وياريت يكون لها وقت محدد مش كل وقت وكل يوم أولادك وزوجتك أولى بالوقت ده كله

7 .. وانت راجع من شغلك ياريت قبل ما تروح بسرعة لمراتك التانية .. سلم الأول على مراتك الأولانية وغير هدومك وأقعد مع أولادك وإتغدى وبعدين يا سيدى أبقى روح شوية عند مراتك التانية  .... طبعا هتقولوا مين مراته التانية هقولكم الكمبيوتر ... ياريت متنسوش نفسكم أوى وانتوا قاعدين عليه بالساعات   .. وحجتكم إن الست مشغولة .. 

مادام فى اولاد يبقى تقعدوا معاهم وتهتموا بيهم جوا البيت زى الست بالظبط مينفعش تكون بالنسبالهم مجرد مصرف فلوس وبس علشان هى برده مينفعش تكون بالنسبالهم مجرد طباخة ودادة متنساش إنك مسئول عن تربية الأولاد زيها بالظبط ويمكن أكتر و أكيد إهتمامك بالولاد جوا البيت بيخفف عنها كتير وبيسعدها



هقول كفاية كدة .. وفى الآخر دى مجرد حاجات بسيطة كلها كلام أو أفعال سهلة وبسيطة مش بتنتقص من رجولة الزوج بالعكس دى بتزودها وبتفرق مع الست كتير .. أكيد مفيش راجل واحد فيه كل الحاجات دى ... بس بصراحة لو فيه واحد مش بيغلط كل الغلطات دى انا بحييه وبقوله ربنا يكرمك ويبعد عنك إنت وزوجتك الحسد


وربنا يهدى الجميع وجزاكم الله كل خير 


والسلام عليكم ورحمة الله وبركاته








31 التعليقات:

الشعب لابد له من حكومه تشكمه يقول...

انا جيييييييييييييييت يااااه بقالى كتير مكونتش اول كومنت ياااه يانوءا معلش ياصاحبتى انتى عارفه المود كان عامل ازااااى.

والله يا اوختى كلامك عين العقل بس الا قوليلى بالنسبه للورد ايه موقفه فى الحياه الزوجيه هههههههههه
باااااااااااس والله ما انتى معقدانى سبينى اتخيل ههههههههههه.
يعنى هيحصل ايه وهو راجع يجيب ورده بجنيه هيخس مثلاااا,طب اديله انا الجنيه ويجيب ولا ايه:))

على فكره موضوع انهم بيجيوا يقلعوا اللبس والكلام ده مش عاوزه اقولك اخوياااا كان فظيييييييييع لما اتجوز باه مؤدب وبيعلق هدومه مكانها هههههههههه.

قلم رصاص يقول...

هههههههههههههههههههههه
الله بجد على البوست الحلو دا يا ام بوبه
انا بحيي بوبه بصراحه .. عشان هي السبب في البوست دا .. لما نامت وسابتك تكتبيه
^_^

" (وياسلام لو واحد زى جوزى كدة مبيفطرش خالص يبقى لوقطة )"

اه والله فكره برضه

فكرتيني بالزعيم في الواد سيد الشغال لما بيقول لمصطفى متولي : ماشاء الله انتوا بتفطروا كل يوم!

ههههههههههههههه

وبخصوص ممدوح فرج .. فدا بقى ليه قصه
ظريفه اوي .. بتاخدي بالك منه لما يقول ايه عن احد المصارعين :

طبعا ياجماعه الراجل دا توقف شوية .. وبعدين عمل Come back
وهوب سلام .. هوب كروز لاين ..الخ الخ
ههههههههههههههه بيبقى منظره يضحك اوي وينقط وهو عامل فيها ابو العريف..!

عجبن اوي تشبيهك للكمبيوتر بالزوجه التانيه .. بجد حلو جدا

بس بشكل عام اتفق معاكي والله في كللللللل
النقاط اللي أثرتيها .. لأنها عادله جدا وانا كواحد من الرجال شايف انها لاتنتقص أبدا من الرجوله .. رجولة ايه بس اللي ليها علاقة بالتعاون في الحياه بين الزوجين

صدقوني انتوا بتحملوا الرجوله مالم تحتمل فالرجولة مواقف وتصرفات نبيله مش مجرد شوية شكليات تافهه كما يدعي بعض الرجال وبعض النساء برضه..!!!

أحييكي بشدة على الطرح الرائع اللي في بوست دا

دمتي مبدعه دايما

في حفظ الله

الشعب لابد له من حكومه تشكمه يقول...

مش هاين عليا اسيبك ومكسله افتح الميل بقالى يومين بحالهم مكلمتكيش:(

هكلمك تومورو ان شاء الله هقوم اصلى الفجر باه دعواتك باه يا انتيمتى.

الشعب لابد له من حكومه تشكمه يقول...

اه نسيت اقولك ممدوح فرج ده انا بكرهه بكرهه بكرهه بكرهه.
اييييييييييه الحكمه ان حد يتفرج على اتنين بيضربوا بعض؟ هه ايه الحكمه؟

sookra يقول...

وربنا انا كنت هاقولك بعد ماقريت انه يجيبلها ورده وهو راجع لكن لقيت شيما سبقت وقالتها وعشان كدا انا بضم صوتى لصوتها
نفسى فى ورده ياناس
يالهوى انا عمرى ماجالى ورد
وكنت بجيبه لنفسى
هههههههههههههههههههههه
وبعدين انا الحمد لله الحمد لله
قايمه فى بيت ابويا بمسئوليه السباك دى بس لما اروح عند الباشا جوزى لو قالى سلكيها انتى هااسد بيه البلاعات كلها
هههههههههههه
صباحك شيكولاته
سلمى على بوبه

ستيته حسب الله الحمش يقول...

تعليق واحد ع الماشي قبل ما افضى بليل واعلق براحتشيييي


انا بحب يا ماما المصارعة الحرة واللي يقلبها يوم الخميس من على ام بي سي اكشن او يوم الأحد من على نسمة التونسية ابندجه :)

يعني فيه حد برضه يكره جون سينا ولا شون مايكلز ولا ترابل ايتش ولا كوفي كنجستون وبيج شو اللي شبه الغوريلا والواد الغدار راندي أورتن والا ابن المجنونة شيميس
لا لا زعلت حقيقي
هو فيه ست عادية شبهي "عين بتبربش" متتفرجش ع المصارعة الحرة وال WWE والراسيل مينيا؟
قطيعة
محدش بياكلها بالساهل :)
قال ميتفرجش ع المصارعة قال
بليل بقى اديكي تعليكي على البوست الروعة ده

ستيته حسب الله الحمش يقول...

شيما وسكرة

زي ما عاوزين الوردة لازم تتفرجوا معاه ع المصارعة والماتشات يا ماما وتنفعلي وتديه دبل استريك في النص ويقوم هو هابدك كده وتحسوا انكم ام ام مش عارفة ابعبر لكم
تبادل الثقافات الرومانسية يا ماما منك ليها
هو ليه رومانسية وانتم ليكم رومانسية شكل تاني
لاااااااااااااااازم يحصل تفاعل بين الأحماض والقلويات علشان تفضل ورقة "عباد الشمس" بنفس لونها
برضه قطيعة في التخصص :)

شمس النهار يقول...

1-اللهم صلي وسلم عليك ياحبيبي يارسول الله

2-لما الزوجه تكون قاعدة في البيت وزوجها يرجع من الشغل ميلاقيش اكل يبقي ده غلطها وسوء تنظيم للوقت وجر شكل للزوج اللي بيحب حد بيسعده وبيعمل اللي يريحه وخصوصا لما يكون متاح اللي هيعمله ده
يعني بعد خروج الزوج اول حاجه اعملها اطبخ واخلص المطبخ
وبعد كده اعمل اي حاجه تانيه وانظم اولوياتي ووقتي
مابقاش مضيعه اليوم كله شغل واهم حاجه تخص حبيبي لما يرجع مااعملهاش

3-في دي عندك حق بس هي ممكن ترد عليه تكسفه اي رد من نظرية ان كيدهن عظيم
زي اصلي كنت بفكر فيك ونسيتها
يانهار ابيض معلش ياروحي الزهمير وحش
لو اعرف انها هتضايقك اولع فيها وتاخدها هزار
وكلمة حاضر في النهاية بتريح

4-معاااااكي في دي
نوع الرجاله ده عايز معامله خاصه جدا علشان للأسف مامته ست واخواته بنات وعملوا عمله سوده في ست زيهم
بس ربنا منتقم جبار

بس برضه ليها حل
نحول الدلع ده لصالحنا
برضه بنظرية ان كيدهن عظيم
هو مش هيودي الكوبايه عمره وفي نفس الوقت هي كمان ماتقموش وتقول له حاضر اقعد معاك شويه بس انت واحشني
وكمان تحاول وهي بتحضر العشا تاخده معاها المطبخ بحجة انه يونسها وتحكي له عملت ايه النهارده وياريت تكون حكايه مسليه ووحده واحده رجله هتيجي علي المطبخ
وهيلاقي المطبخ ده موضوع مسلي جدا(الطريقه دي متجربه ومضمونه)
لكن موضوع الهدوم ده هياخد وقت ازاي؟
لما يرجع من الشغل اقفي معاه وهو بيبدل هدومه وساعديه واديله البيجامه جمبه وشويه واديله الشماعه يعلق هدومه وخديها منه وحطيها في الدولاب وشويه شويه هتلاقيه يعلق هدومه
ودايما تكوني معاه وبتكلميه في اللبس وياريت توصليه لحد الباب

5-هتيجي لوحدها بعد نمره اربعه وشوفي الحته دي لما تكوني تعبانه وفي السرير اطلبي منه يعمل لك شاي اي حاجه وافضلي اشكري فيها وانها احلي حاجه في الدنيا
ولما تخفي في قاعدة صفاء كده قولي له ياريت تعملنا كوبيتين شاي لحسن مش قادره انسي طعمها::))
واحده واحده هيلاقي الموضوع لطيف مع كل مره

6-اما موضوع التليفزيون ده مالوش حل غير انك تولعي في الريموت وتبيعي الدش والتليفزيون

7-النمره دي ماكانتش علي ايامي خااالص مش هقدر افيدك فيها

8-اهي دي المضحكه جدا جدا عموما شركات النظافه حلتها بالسلاكاوي

البوست جميل جدا وتعليقي يعتبر احتلال تدويني يستوجب المقاومه البلوجاريه

بس عايزه اقول لك ان في ستات كتير مش بتحب الزوج يدخل خالص في شؤن البيت والا يعلق هدومه والا يدخل المطبخ ومره وقعني حظي العثر بين زوجين احل مشكله وطلعت ايه انه سولت له نفسه واشتري حاجات من السوبر ماركت وفضاها من الاكياس في اماكنها وبوظ لها الدنيا
اصحاب العقول في راحه
في النهايه ماحدش عاجبه حاله
اسفه علي الاطاله


تحياتي لك علي البوست اللطيف جدا

سلام

هي وظروفها يقول...

مساء الفل

بيوتنا وحشه وخربانه مش عشان معندناش اتيكيت ولا ذوق ولا رومانسيه
ولا عشان مش حنين ولا مجوزين اتنين

بيوتنا وحشه ومليانه مشاكل عشان احنا ااقصد اغلبنا
بعيييييييييييييييييييييييد عن ربنا

ده اصل وفصل وحل وكل عقد مشاكل حياتنا زوجيه بقي اجتماعيه
اقتصاديه راسماليه زي ماعايزه تقولي قولي

Bondoka يقول...

هههههههههه
ياسلام يا ام بوبه لو الرجاله سمعوا الكلام ده واقتنعوا بيه
دى تبقى الدنيا بيس بيييس

أميرة الأحلام يقول...

الله موضوعك ده جميل بجد
فعلا الحاجات دى مع انها بسيطه ومش هتكلفهم حاجه بس بتفرق مع الست اوى
لانها بتحس انه مقدرها ومقدر الي هي فيه
بس فيه والله رجاله بتعمل كده
انا اعرف ناس بيعملوا كده مع زوجاتهم
وربنا يهدى الجميع لما فيه الخير والسعاده يارب
تحياتى ياقمر ..

M و H يقول...

جمييييييييييلة بجد مدونتك
قريتها كلها

هيثــم رمضـــان يقول...

أولاً اللهم صلي علي سيدنا محمد
ثانياً بما إني من المستهدفين في البوست ده فلزمن وحتماً ولابد أعلق إن شاء الله.
عايز الأول أحيكي بجد وبجد جداً علي إسلوبك الرائع واللذيذ جداً.
أبدأ بالنقطه رقم (2) الحمد لله عمري ما إستعجلت علي الأكل لا قبل الجواز ولا بعده وبالعكس بلاقي الأكل جاهز وتقعد تنادي -يالا علشان الأكل ما يبردش- ولو لسه مثلاً السلطه ما خلصتش أقولها برحتك أنا مش مستعجل لأني فعلاً مش ببقي مستعجل.

النقطة رقم(3)
برضه المشكله سعات بتحصل علشان العكس أقولها إنتي لازم تروقي البيت كتير كده؟ وهي بصراحة دي أهم حاجه عندها ومادتنيش فرصه قبل كده أعلق علي حاجه.

النقطه رقم (4)
بعمل كده والحمد الله وبشيل الكوبيات بس سعات بنسي الهدوم وطبعاً لأنها ماشاء الله منظمة ما بتسكوتش والنتيجة إني باقوم أشيلهم أو هي تشلهم ما بندقش.

النقطة لرقم (5)
بالنسبة للمشروبات الحمد لله أنا مش كييف أي حاجه خالص يعني ممكن أقعد شهر ما أشربش شاي عادي جداً وتصدقي عمري ما صحتها علشان الفطار أو علشان ساندوتشات أخدها معايا لو صاحية بتعمل ولو نايمة بعمل أنا ولما أرجع لازم تقولي ما صحتنيش ليه وبصراحة أنا شايفها بايخه قوي أصحي حد بدري كده علشان يعملي ساندوتش وكنت كده مع أمي برضه وبستغرب من الرجاله اللي بتشوف في كده رجوله وسيطرة.

النقطة رقم (6)

والله عندك حق أنا زهقت منهم من زمان ومش متابعهم خالص دلوقت وكمان عملت بنصحتك وقفلت التليفزيون خالص ومعظم الأيام بنام قبل الساعه 10 وخصوصاً في الشتاعلشان بصحي بدري.

النقطة رقم (7)

دا إنتي متفأله قوي !! هو أنتي فاكره إني ممكن أفتح الكمبيوتر لما بروح أبسلوتلي ولو كان في وقت أصلاً وفكرت أعمل العمل الشنيع ده الأنسه هنا تنط فوقيا وفجأة تفتكر إن إحنا عندنا كمبيوتر وتبدأ تطلب أي حاجه من حاجاتها إلا إذا كنت عايز أعمل حاجه مهمه أستأذنها الأول.

النقطه رقم (8)

كان نفسي أكمل معاكي وكل حاجه كانت تبقي حلوه لكن موضوع الحوض والسباكه والكلام ده صعب جداً وكمان أي عمل له علاقه بالصيانه سباكه ..كهربه ..حاجه بايظه مش بعرف أتصرف ولازم المختص يجي بذات نفسيته.

أنا مش بقول الكلام ده علشان حد يفتكر إني زي الأستاذ عبد البديع جوز الست إحسان في الشهد "والبتوع" عجبتني البتوع دي-المسلسل ده كان مكسر الدنيا- لاء طبعاً أنا سعات بتنرفز وسعات بكشر وأكيد أكيد فيا عيوب وأكيد بيحصل مواقف تدايقها مني ومواقف تدايقني منها لكن المهم إزاي نعدي المواقف دي بدون خسائر ومانسبهاش تكبر وتبوظ الحياة الزوجية لكن أنا بقول كده علشان أأكد علي كلامك إنها حاجات فعلاً بسيطة جداً ويزيد عليهم كلمتين حلوين يضيعوا تعبها طول النهار وصدقيني الحاجات دي مش محتاجه يكون جواز عن حب وكلام من ده محتاج يكون في معامله حسنه بين الطرفين ووجود موده ورحمة وكل طرف يعامل التاني بما يرضي الله ورسوله ويتصرف بحكمة في الأوقات العصيبة ويحاول كل طرف يساهم في حل أي مشكلة قائمة بينهم لا قدر الله حتي لو هتحتاج شوية تضحية صغيرة.

وأخيراً أطلب من الزوجات إحترام الزوج وتقديرة ومن الأزواج أن يرفقوا بالزوجات.

ويارب يسعد الجميع

تحياتي لمجهودك الرائع

بعبعه يقول...

حلوه اوي النصايح دي

بس هما يعملوا نصها

وبعدين ده القطط الفاطسه دي شغلتهم يا ماما

هما لهم غيرها

وكلمة بتعملي ايه من الصبح دي لاااااااازم

مش هاقولك الرد عليها بيبقى ايه

خلاص هو حرم يقولها من يجى.... مش فاكره سنين كتيره يعنى

طوبه فضه وطوبه دهب يقول...

سيدى ياسيدى ايه الحب والوصفات السحريه دى كلها بس نصيحه مع انى لسه ماجربتش بس سمعت ذيك بالظبط مفيش راجل بيعمل اى حاجه من الحاجات دى دول مجرد اوهام اوهام ياولدى

أم .. بوبه يقول...

السلااااااااااااام عليكم ورحمة الله وبركاته

بصراحة أنا مينزيهلة
مش من عدد التعليقات
بس من حجم البوستات أقصد التعليقات

وكل تعليق محتاج بوست علشان أرد عليه

وده شئ أسعدنى جدااا بصراحة تفاعلكم مع الموضوع بالشكل ده

فلذلك لقد قررنا وى آر أم بوبة

إنى إن شاء الله بعد ما الكل يكتب تعليقه

هرد عليكم .. ناااااافر ناااااافر

بس مش هنا فى صفحة التعليقات .. إنما فى البوست القادم إن شاء الله

ومنتظرة باقى التعليقات إن شاء الله

мαησηα يقول...

اول مرة اجى هنا وندمت بصراحة وبضرب نفسى بالبندجة علشان مش جيت هنا قبل كده

اول هام انتى بجد احلى ام بوبة ربنا يحميكى يارب ويبارك فيكى

تانى هاااااام عايزة اقولك ان كل الناس بتحبك وعمالين يقولوا ام بوبة ام بوبة وانا مكنتش اعرف انها انتى بس مبسوطة انى عرفتك

تالت هام انا بحضر لبوست شبه ده بس بتاعك احلى عارفة ليه لانك بجد واقعية اوى انما انا كنت هاكتب كلام فسفس محدش كان هيعمل بيه لذلك صرفنا نظر عنه

رابع هام انا حبيبتك اوى

خامس هام انا عايزة واحد لوقطة من اللى عندك هههههههه اكتر حاجة معقدانى من الجواز وبفكر بجد فيها بغباء موضوع الفطار ده عااااااااااااااااااااا

انا لحد دلوقتى امى اللى بتحضرلى الفطار عاااااااااا اقولك انا مش هاتجوز ههههههه

سادس هاااام وربنا حتة الكوبيات دى بجد بتعقدنى فعلا فعلا بتعمل مواعين لوحدها بعد ماتكونى شطبتى المطبخ عااااااااا وازايز الماية كمان

سابع هام انا رغيت كتير بس تحسى انى عايزة افضفض معاكى معلش بقه ارتحت لك

ثامن هام بما انك تزوجتى وبقيتى ام ف مثل بيقول جوزك على ما تعوديه وحيث اننى من عاشقات النظام والنضافة ونفسى ججوزى يعمل كل اللى قولتيه ده تفتكرى هاقدر اعوده ع النظام ده ولا ايه ؟؟

تاسع هام تفتكرى لو فشلت هاكمل ف الجواز ولا ايه ؟

عاشر هام كفاية كده بقه ورايا مدونة عايزة اقراها من اولها اسمها فرن بالكهربا

خلاص بقه بوسيلى حبيبة وانتى كمان

ودمتى رائعة

norahaty يقول...

تسلم بقك يااستاذ نفيسة:)
قصدى يسلم لسانك وكلامك
ياام بوبه نصايح غالية
لو نفذوها الاساتذة كلها
حيبقى كل البيوت سعيدة
وجميلة والمدامات مبسوطات:)

فاتيما يقول...

لا و الله حلوة الحدوتة جدا
يا أم بوبة


بس تفتكرى حد هيهتم

انا مش عاوزة اتهم الاخوة الرجال
لاقدر الله انهم ملهموش فى الملاحظات دى


اطلاكاااااااا

انا بس عاوزة اقول
انهم عارفين كل حاجة

بس بيطنشوا

مش غلاسة
لااااااا

دول عاوزين يعرفوا غلاوتهم
عندنا بس
مش اكتر



على فكرة بقى
انا ليا فى العاشرة مساءا
و كمان فى كل قنوات الرياضة و الماتشات مبقولش لأ
بالعكس انا بحب اتابعها جداااا
يعنى مش هتبقى مشكلة إن شاء الله


انما ميجبش لنفسه كوباية مية؟!!
دنا ابعته الصومال يا امى



بوست حلو
بس اللى يسمع و يتعظ

اروح اقرى اللى فاتنى بقى
و سعيدة جدا بيكى
و بمدونتك

خالص تحياتى يا فندم

reem يقول...

ازيك يا قمر

عامله ايه

بصي اكتر حاجة بتعجلنى في البوستس بتاعتك انها واقعية جدا جدا

تعرفي موضوع الحوض دا بينرفزنى بجد جدا

اللى عندى الحمد لله لايمكن يودى كوباية المطبخ ولا يقوم يشرب بنفسه
عارفه لما بروح لمامتى واقعد عندها يومين برجع الاقي كل الكوبايات جنب السرير

هههههههههههههه
وجربت كل حاجة مش في فايدة

لازم يقرا البوست دا

بس بصراحة في موضوع الاكل مش بيقول حاجة لو م عملت اكل او مش خلصت بيجيب دليفري

تفتكرى اكلى هو اللى وحش ؟؟؟وبيفرح انى مش عملت اكل؟؟

عاجبنى اوى رد شموسة الرومانسي الجميل دا

سلامى وبوساتى لبوبة ربنا يخليها ويحميها

ذكري رحيل قلم يقول...

السلام عليكم سعيدة جدا بتواصلنا

علي فكرة بجد بشكرك بالنيابة عنهم يارب يسمعوا كلامك اللهم امين

ذكري رحيل قلم يقول...

عايزة اقولك حاجة يمكن لا يخلو اي بيت من المشاكل الطفيفة بس والله لو كل واحدة اتجهت لرضي الله عز وجل هيرضي عنها زوجها

وهيستحملها من غير اي قلق
متنسيش تقولي للطرفين طبعا الموظبة علي الصلولت في موعدها
الورد اليومي من الاذكار والقرآن

الا بذكر الله تطمئن القلوب

ميرسي مرة تانية علي النصائح الغالية

دمتي بحب وود

Engineer A يقول...

مع ان الكلام للسادة الرجال إلا اني انبسطت وانا أأراه :)

بوست ماحصلش!

بانتظار المزيد من النصائح الذهبية وللمواقف الحلوة ..

شكراً

احساس طفلة محبة للرومانسية بس واقعية يقول...

جمييييييييييييييييل جدا اسلوب عرضك وبسيط ومميز
انا شخصيا عندى حكاية الكمبيوتر ودخول البيت علية على طول بس دا لانى حالة خاصة الكمبيوتر بالنسبالنا كلنا هو الحياة يعنى تلفزيون وكاست وتواصل بمصر والعاب وكارتون وبرامج واخبار والاكيد الايميلات والشغل وغيرة :)

اتفق معاكى تمام ان الست اللى بتقعد فى البيت مش قاعدة طول النهار مرتاحة
وكمان حتى لو فكرنا فى حل كل المواقف مش هنلاقية متعب شوية تفاهم وتقدير وصبر واننا نحط نفسنا مكان الاخر ونتعامل معاه على الاساس دا عشان الحياة تمشى مش لازم المواقف كلها تتحل او تتغير بس على الاقل متبقاش روتين او حاجة طبيعية عشان الحياة تبقى افضل

من رأيي انك لو كملتى على نفس الاسلوب هتنجحى اوى
عشان بتقولى حاجات من الواقع يعنى اللى كويس فى مواقف وبيعملها بالطريقة الصح للحفاظ على مشاعر الاخر او لتقديرة اكيد بيخطئ فى مواقف اخرى مفيش حد كامل وانتى بتعرضى كل المواقف او اغلبها لان المواقف كتير عشان كدا بقولك استمرى

ربنا يوفقك
دمتى بكل خير
تقبلى مرورى

موناليزا يقول...

مين يسمع:)
واضح ان كل الزوجات بجد متفقين على شئ واحد وهو لو مش هتقدر تساعدنى يبقى ماتتعبنيش
أحييكِ على الموضوع
وأدعوكى لزيارة هذا الموضوع فهو مشابه ايضا ولكنه من وجهة نظر نسائية متعددة
http://monaliza110.blogspot.com/2009/02/blog-post.html
والموضوع ده بقى مهم جدا للزوجات ادعوكِ لزيارته
http://monaliza110.blogspot.com/2009/02/blog-post_07.html

حنين يقول...

عزيزتى الغاليه ام بوبه
كلام جميل وكلام معقول ماقدرش اقول حاجه عنه لكن خيال حبيبى اللى قاعد جوه مش لاقيه فيه حاجه منه.
بس كفايه مااقدرش اقول تانى
يارب الرجاله تفهم
لاننا بجد بنبقى امنا الغوله
بسببهم هما زى ما شوفتى البوست
بتاعى ولا ايه.
جميل موضوعك يا ام بوبه
ربنا يباركلك

حصان المرجيحة يقول...

انا لسة ماتجوزتش
بس النقطة بتاعت اني ارجع البيت و الاقيها مش مجهزة الاكل ، المشكلة مش في الاكل بالذات بس اظن الفكرة اني برجع البيت و ببقي متخيل انها هاتستقبلني بالورود و ريحة الاكل الجامدة و غيرووووو
و هي بتبقي متوقعه اني هارجع ادلعها و و اشكرها انها اتاخرت في توضيب الاكل
و هنا الشيطان بيدخل
بس اظن ان ساعتها ممكن يكون معايا حق اكتر منها
شكراااااااااا

أحمد شريف يقول...

السلام عليكم
مدونة لطيفة .. أضحكتني بعض فقراتها
ولفتت نظري فقرات أخرى لنقاطِ ما وأخرى لم أتفق معك فيها

لكن بصفة عامة استمتعت بها وبنقاش زوارك وعلى رأسهم تلك النقاشات كان الرد الثري لمدام شمس

أكرمك الله وأكرم زوارك

لجين أبو الدهب يقول...

الله ينور عليكى الصراحة ..

انا اول ل ما شفت مقدمة البوست قلت الصراحة هاتبقى حاجات تقليدية

بس فعلا قلتى حاجات مهمة جدا واغلبية الرجالة بتقع فيها ..

بس كله الا اللى يصحيه تعمله فطار ..
ايه الدلع ده

دى تقوم اقلل حاجة تديله بالمخدة فى وشه

بدل ما تقوم تلاقيه محضرهولها D:

رجالة اخر زمن

جزاكِ الله خير بجد

ياريت تستمر فى الكتابة عن الحياة الزوجية

دمتِ بخير ..

أم مالك يقول...

ام بوبة الحبيبة
قبل مااقول اى حاجة البت لجين
اللى معلقة قبلى بتقول لو جوزها صحها
تعمله فطار عاوز بضرب بالمخدة فى وشه
ياخسارة تعليماتى ليكى
ياخسارة اللى كنت بعمله مع ابوكى وبتشوفيه بنفسك

ماتستغربيش ياام بوبة اصلها بنتى

بصى ياحبيبتى كثير من اللى انتى بتقوليه
بيحصل دلوقت بس لااخفى عليكى البنت بدا موضوع الزواج بدلع وشعارات
لو هى عاملة رصيد عنده قبل الانجاب وقبل المرض وقبل المشغوليات حيتاخر
انه يعمل الحاجات اللى قولتيها
والله اشك فى ذلك الا من نوعية بسيطة
زى مابقولك ياام بوبة تقدم هى السبت قبل الحاجات اللى ذكرتها ستجد الحد

وبعدين دلوقت قل فعلا التواجد الاسرى بمعنى هما متواجدين وكل واحد فى سوقه
ليه ميتجمعوش على حاجة يتفرجوا عليها
او حاجة يتكلموا فيها ياريتها تيجى هى على نفسها شوية وتشاركه ميوله حتى وان كانت مش على مزاجها
كفاية كده علشان عندى الكثير والكثير فى هذا الموضوع
انما كله كوم والمخدة فى وشه كوم طب
قولى لها اعمليها كده والله ماتقدر

ربنا كرم التدوين بيكى ياام بوبة
تحياتى

اسمي أحمد .. لو مخانتنيش الذاكره !! يقول...

ما شاء الله .. ايه الأسلوب الراقي ده بس ؟ .. نمسك الخشب .. بجد تحفففففففه

اتمنى أتشرف بزيارة حضرتك في مدونتي الجديده و أشوف تعليقك على إحدى صفحاتها

رابط المدونه
http://ra7alaat.blogspot.com/

شكرا لوقتك