متهرجوش يا مسلمين

فعلا الشجرة دى شكلها جميل أوى ومبهج ومبهر أحيانا, بس مش معناها إننا كمسلمين نجيب شجر من ده اليومين دول ونزوق فيه فى البيت ونعيش جو الكريسماس . متزرعوا شجر طول السنة قدام بيوتكم وتزوقوا فيه زى مانتوا عايزين حتى هتاخدوا ثواب .

أى نعم الأفلام الأمريكية بتصور يوم الكريسماس ده بغاية الروعة , التلج الأبيض نازل بيتمرجح من السما والشجر المنور والشوارع النضيفة والهدوم الشتوى الشيك جداا وبابا نويل ماشى يوزع هدايا على إللى يقابله ببلاش والكل سعيد ومبسوط وأجواء ساحرة وخيالية أى حد يتمنى إنه يعيشها .

وأفلام العرب بتجيب أعياد المسلمين قاعدين قدام الفرن حرانين بيعملوا كحك العيد وملحوسين دقيق ,والفقرا مش لاقيين هدوم جديدة يلبسوها  وحالتهم تقطع القلب , وحوادث بتحصل أول يوم العيد , وكتر خيرهم أوى لو جابو صلاة العيد من بعيد شوية وميطولوش أحسن الناس تحب الصلاة ولا حاجة تبقى مصيبة !

بس ده بردو مش معناه إن من جوانا نفضل طقوس غير المسلمين على طقوس المسلمين

مع العلم إن طرق الإحتفال دى لم ينص عليها لا دينهم ولا ديننا , يعنى ربنا مأمرمش المسحيين إنهم يجيبوا شجر يزوقوه ولا أمرنا نجيب كحك وننقشه , كل واحد بيصنع عيده بعينه وبطريقته إللى تفرحه وتفرح إللى حواليه وتميز أيام العيد عن باقى الأيام , المهم إننا نحتفل وبس

يعنى إحنا ممكن نخلق من أعيادنا صورة تخلى كل الناس يتمنو إنهم يشاركونا فيه , ليه دايما بنستسهل التقليد وكأننا كائنات غير قادرين على الإبتكار , ليه دايما إللى بيعملوه غيرنا حلو أوى فى عينينا , وإللى بنعمله إحنا بنعمله أحيانا وإحنا خجلانين ,

أكيد أكيد ديننا أمرنا نتعامل معاهم بخلق حسن ومنبدأش بالإساءة معاهم ونعيش فى مكان واحد آمنين , وأى نعم الدين لله والوطن للجميع ,بس مش معناه أبدااااااا إننا علشان نتودد ليهم  نملى بيوتنا بشجر عيد الميلاد ونجيب لأولادنا ماسكات بابا نويل , مع العلم إن بابا نويل راجل ملتحى , يعنى إحنا لو جيبنا واحد ملتحى بجد من المسلمين يوزع على الناس هدايا فى الشارع  فى العيد هيتقبض عليه , إنما لحية بابا نويل على قلبنا زى العسل

كنت زمان بسمع المسلمين بيقولوا لبعض ولغير المسلمين فى التوقيت ده هابى نيو يير , ودا أكيد مش صح , إنما لما توصل إننا نقول لبعض " مارى كريسمس " يبقى بقينا فى غيبوبة ومحتاجين نفوق دى مش شياكة ولا تحضر .

مش محتاجة أقولكم فتاوى وكلام كبير علشان أقنعكم إن الكلام ده مخالف لعقيدتنا ,إحنا كلنا عارفين كدة كويس , 




إنما إللى أعرفه ومتأكدة منه ومش محتاج تفسير ولا تأويل عندى , إنى مسلمة وعقدتى هى عقيدة الدين الإسلامى ومدام أنا مؤمنه بعقيدة الإسلام , دا معناه بمنتهى البساطة إنى غير مؤمنه بعقيدة أى دين تانى , فمينفعش بإسم التحضر والرقى أخلط فى العقائد , إحنا عايشين فى بلد واحدة آه نعيش بسلام واحترام أى نعم , إنما عمر ما كانت ولا هتكون عقيدتنا واحدة ودا المفروض ميزعلش حد من الطرفين .

  أحب أقول لناس كتير بالبلدى كدة ومن غير كلام كبير من أختكم المسلمة , متعيشوش دور الوحدة الوطنية والمدنية ومتهرجوش يا مسلمين ......