الأحد، 21 فبراير 2010

كان نفسى أكون كدة ..



 


نفسى لما أشوف سطور وأقراها هى وبس ..مفهمش إللى بين السطور لأنه أحيانا بيتعب .. وبالذات لما بتكون السطور بتقول كلام تانى غير إللى بينها 


  لما أى إنسان يقول كلام يضايقنى أو يجرحنى ويدعى إنه مكنش يقصد .. نفسى مفهمش إنه كان يقصد كل كلمة بيقولها 


 نفسى مكونتش أعرف عدوى من حبيبى .. علشان متعبش أوى لما أبقى متأكدة إن ده عدوى وبيمثل عليا دور حبيبى


نفسى لما أتكلم مع أى إنسان .. وأقول أى كلمة .. ويدعى إن كلامى ضايقه .. مفهمش إنه متأكد إنى مقصدش .. بس هو إللى عايز يمسك عليا غلطة لمجرد إن ده بيسعده


 نفسى لما أكون تعبانة وحزينة ومهمومة .. أبكى وأحزن وأصرخ قدام الناس كلها .. ومجيش على نفسى وأضحك علشان مزعلش الناس إللى بيحبونى


نفسى لما حد يضايقنى بجد ويظلمنى ويجرحنى .. آخد منه موقف شديد أو أبعد عنه وأطرده من حياتى .. من غير ما أحاول أخترعله  عذر واتنين وتلاتة وأديله أكتر من فرصة


 نفسى لما أفضل أدى كتير وكتير لأى إنسان أقف عند حد معين .. ولو مفيش مقابل يبقى خلاص لحد كدة وكفاية


نفسى لما أكون محتاجة شئ أو نفسى أحقق شئ لنفسى .. أعمله حتى لو مش هيفيد غيرى أنا .. ومتخلاش عنه وأتهم نفسى بالأنانية 


نفسى لما احب محبش أوى .. علشان متعبش واتألم لما ملاقيش مقابل الحب ده 


 نفسى موزنش كل شى حواليا بميزان حق ..  وبمثالية زايدة  ..  وأخاف أظلم ناس أسهل حاجة عندهم إنهم يظلمونى


نفسى لما أسمع هموم غيرى .. متأثرش أوى وأفضل أحط نفسى مكانهم .. وأنا عندى إللى مكفينى ومحدش بيسمعنى .. وإللى بيسمعنى .. بيسمع بس و مبيحسش بيا


أنا أسفة 

كان نفسى أقولكم كلام يضحككم زى كل مرة .. بس تعبت من كتر ما بضحك وأضحك الناس وأنا جوايا مش بيضحك


نفسى ربنا يعفوا عنى ويرحمنى ويغفرلى ويهدينى
اللهم عافنا وأعفوا عنا يارب وأغفر لنا كل ذنوبنا ما ظهر منها وما بطن








27 التعليقات:

صبرني يارب يقول...

يا لهوي عليكم على الصبح

كده فى وشي يا ام بوبه

انا عملت فيكى حاجه يا اختي


بتقلبي عليا المواجع لييييييييييييه

طب ممكن امضي تحت البوست بتاعك ده من فضلللللللللك

عادي جمب اسمك

اصل انا نفسي اقول زيك كده بالظبط

نفسي ارتاااااااااح

نفسي اشيل الفيشه بتاعة مخي
ونفسي اقفل حنفية الحنااان والصعبه على الخلق شويه

ونفسي افتح حنفية قلة الذوق شويه عشان اقتص من الخلق

زههههههههههههههههههقت يا اختي والنبى

مافيش فايده العبيط بيعيش عبيط ويموت عبيط استسلمى لعبطك بقى

روووووووووووووقي واحتسبى كل خير بتعمليه عند الله والى عند الله ما بيضيعش

صيدلانيه طالعه نازله يقول...

و انا كمان نفسى ابقى كده
نفسى افهم اللى قدامى و اعرف بيفكر فيا ازاى
نفسى اما اصاحب حد و يبقى عزيز عليا ابقى متأكده من محبته ليا
نفسى انسى الحزن بقى شويه و ينسانى

انا مش عارفه هو معندوش حد غيرى

نفسى تغيرى الكلام لان انا بجد على اخرى و دموعى نزلت

هيثــم رمضـــان يقول...

إزيك يا أم بوبه .. علي فكرة مش لازم تضحكينا في كل بوست لأننا لازم نشاركك في جميع الحالات ونحاول نساعدك لأن الدنيا من المحال أن تبقي علي حال.
الواضح من كلامك عن نفسك إنك شخصية طيبة جداً وديماً النوع ده بيواجه بعض الصعوبات في التعامل مع الناس لأن بعض الناس بيفهموا الطيبة دي غلط ويستغلوها وإنتي علشان طيبة بتيجي علي نفسك وده حال الناس الطيبين , لكن مش معني كده إن إنتي غلط لأ بالعكس هما اللي غلط وأوعي تتخلي عن شخصيتك الطيبه علشانهم إتمسكي بالتسامح اللي جواكي وزودي المحبه اللي عندك وكتري من العطاء وفي وقت الغضب إعملي زي ما إتعودتي وأكظمي الغيظ علشان ثوابه كبير جداً" والكاظمين الغيظ والعافين عن الناس".
يعني كل الصفات اللي مش عجباكي في نفسك وحسه إنها تعباكي كلها صفات حميده وجميلة والاسلام وصي بيها خليكي زي ماانتي متسامحه ومعطائه ومحبه وإذا كان هناك من لا يستحق فأبتعدي في هدوء دون البحث عن مبررات , وعلشان تبقي مستريحه خلي في تفكيرك إن إنتي بتعاملي ربنا سبحانه وتعالي وأنتظري منه المكافأة ولا تنتظري رد فعل البشر لتعاملك الحسن معاهم لأنهم في النهاية سيدركون أنك من كنت علي حق لانه لا يصح إلا الصحيح, وصدقيني السعادة في الحاجات اللي إنتي بتعمليها لكن كل ما في الأمر إنك تستمري زي ما أنتي بس من غير ما تظلمي نفسك يعني وزني بين الأمرين .
يارب أكون قولت حاجه مفيدة ويارب يصلح لك الحال ويشرح لكِ صدرك وييسر لكِ أمرك ويقدر لكِ كل خير.

تحياتي

البنفسج الحزين يقول...

بصي يا ام بوبه انا متأكده انك مش هتتغيري ولا حتي هتحاولي تعملي اي حاجه من اللي انتي قايله ان نفسك تعمليهم لأنك كده وده طبعك ودي شخصيتك واللي بيحبك بيحبك عشان انتي كده واللي بيكرهك علشان بيحقد عليكي لأنه هو مش كده ...
عمر الطيبه والتسامح ما كان غلط بالعكس بس خلي بالك برضه ...حاولي تكون ليكي بعض الأساليب اللي تقدري
تجيبي بيها حقك لو حدظلمك لان الحق دايما محتاج قوة تدافع عنه...

البنفسج الحزين يقول...

روقي روقي وادخلي عندي اقري البوست المسخرة اللي انا كاتباة عشان تضحكي شويه...

بسمة انور يقول...

صباح التفااااااااؤل

انا كمان نفسى اكون حاجات كتير اوى

حاولى جايز تقدرى توصلى لواحد فى الميه من اللى نفسك تكونى فيه

Mahmoud Ahmed يقول...

يكفني تعليقا بهذه الجمله



نفسى موزنش كل شى حواليا بميزان حق .. وبمثالية زايدة .. وأخاف أظلم ناس أسهل حاجة عندهم إنهم يظلمونى


هاخد الحته دي بعد اذنك عندي ؟؟

أميرة الأحلام يقول...

ام بوبه حبيبتى
مالك يارب تكونى بخير
يااااااااااه على كلامك
وجعتينى اوى
وحسستينى انك بتتكلمى عنى
انا كمان نفسي اعمل كده
كنت لسه امبارح باليل بعيط وبقول ليه الواحد المفروض يرضي الي حواليه ويضحك قدامهم عشان خاطرهم ومحدش في الاخر بيحس بيه
ربنا يفرج عننا جميعا يارب
ويستجيب دعاءك
ربنا يوفقك ياحبيبتى ويكرمك يارب
دمتى في حفظ الله ورعايته

حصان المرجيحة يقول...

كلام صعب اوي
و مش عارف اقول ايه
غير ان ربنا يصبر كل الناس
و لو ماحستيش بده تبقي مش دنيا
بس خلاص

هي وظروفها يقول...

عارفه يا ام حبيبه

انتي اللي صح

انتي اللي المفروض اللي بتتكلمي عنهم يعملوا زيك
مش العكس

انتي الصح

عارفه والله قولتلي كلام اكني انا اللي بقوله

بس والله العظيم حتي لو اللي بيفكر بنفس طريقتك وطريقتنا كانوا شواذ القاعده في زمنا
بس احنا الصح
وبكره ميزان الدنيا يميل ناحيتنا

والدنيا تبقي احلي

R-H-S يقول...

كان عندي بوست اسمه نفسفسات زييك كدا بس بتاعك مضلم حبتين

لما كنت فى الاعدادي الاستاذ كان دايما يقولنا الامتحان هييجي من بين السطور وانا اقعد ادور علي اللي بين السطور علشان افهم

غير معرف يقول...

ماما بحسها بتيجى اوووى على نفسها وتعدى كتيييير جداااااااا
وبصراحة بستغرب اوووى
بس بتقول انا بعامل ربنا مش عارفة هو الواحد اه يعامل ربنا بس مينفعش اجى على نفسى عشان ارضى الناس
بس اهم حاجة الواحد يكون مرتاح فى اللى بيعمله وفى طريقة تعامله مع المواقف والاحداث ويرضى ربنا فى كل الاحوال

ياااااااارب تروقى بسرعة وتهدى وعدى اى حاجة ملهاش لازمة فى حياتك عشان تفضى مكان لحاجات اهم تاخد مكانها الحقيقى من حياتك واهتمامك

خواطر شابة يقول...

عزيزتي انت لن تتغيري مهما حاولت هذه انت كما أنت وليس مطلوبا منا في هذه الحياة ان نتخلى عن انسانيتنا لنعيش بالعكس وتأكدي ان الخير في النهاية دوما هو الذي ينتصر
أحسست بكل كلامك وأشاركك فيه خصوصا هذه الجملة" نفسى لما أسمع هموم غيرى .. متأثرش أوى وأفضل أحط نفسى مكانهم .. وأنا عندى إللى مكفينى ومحدش بيسمعنى .. وإللى بيسمعنى .. بيسمع بس و مبيحسش بيا"
ان شاء الله هذا شعور وقتي سيمر وتعودين ام بوبة الضاحكة المبتسمة
تحياتي

ShiMOo يقول...

عارفه ... احساس وحش اوي انك تبقي من جواكي مش مصدقة ولا كلمة من اللي قدامك وبتحاولي تقنعي نفسك بالعكس.

والاصعب انك تبقي مش لاقيه سبب لـ ده.

ليه بتحاولي تقنعي نفسك بالعكس لما انتي مش مصدقة كلامه !!!!


امممممم بيتهيألي محدش فاهم حاجه D:

ستيتة يقول...

سهلة
تجيبي مية نار
تغسلي روحك من المشاعر
وتغسلي عقلك من الذكاء والفطنة
ساعتها بس ممكن تبقي كده

ما عدا نقطة واحدة اعيبها عليكي وعلى كل ست شرقية
وهي ان رغبتي في شيء يخصك لوحدك واعتبرتي ان حصولك عليه او عمله يعتبر انانية
دي صفة المرأة الشرقية والمصرية خاصة
ودي صفة بلهااااااااااااااء
ساعات قليلا من توابل "الأنا" تجعل العطاء لل "هم" احسن وافضل أداءا وبمزاج رايق وميت فل

قصة ضحيت هنايا فداهم اشهد عليه يا ليل دي مش دايما تضحية وفداء
ساعات بتقضي على الإنسان وتستهلك اعصابه ومشاعره
وده مش في صالح المجموعة اللي عايش معاهم

ربنا يديكي كل اللي نفسك فيه لو كان خيرا لك في دينك ومعاشك وعافبة امرك

تحياتي يا جميلة

Cute Kitty **sookra يقول...

جبتى المفيد ياست ام بوبه
بجد قلتى اللى عاوزه اقوله ونفسى جدا انفذه بقى يمكن ارتاح
سورى لانى مقصره بس والله متابعاكى على طول وكمان ماردتش ازعلك واغيظك واطلعلك لسانى واقولك برغم انى لسه عند امى الا اننى ست بيت بريمو وربنا والحمد لله وكان نفسى بجد ابقى موش بعرف حاجه عشان اختبر الراجل جوزى اول الجواز واشوفه هيتحمل لامتى

мαησηα يقول...

اللهم امييييييييييييييين

ام بوبة حبيبتى سلامتك من التعب والزهق والحزن يارب اللى يكرهوكى حبيبتى

انا مش عارفة اقولك ايه ؟

بس هاقولك انا كنت زيك زمان وبعدين اتحولت بقيت حد تانى خالص وحش ومش عاجبنى نفسى

تعبت من كل اللى قولتيه وقررت اكبر دماغى علشان ارتاح لقيتنى تعبانة اكتر

من الاول

هاقولك بس انا اسفة لو ف يوم دخلتى عندى ولقيتينى كاتبة حاجة تخليكى تشيلى هم فوق همومك

هاقولك صدقينى لما تسمعى كلمة الله يباركلك يا ام بوبة انا اترتحت لما اتكلمت معاكى هتلاقيها احلى كتير اوى

من كلمة مالك اتغيرتى ليه ؟
انتى فين وحشتينا وحشتنا ام بوبة بتاعة زمان

حاولى ما تستسلميش للى انتى فيه ده وحياة بنتك بوبة الجميلة دى اللى انا بموت فيها

ربنا يارب يفرج همك ويسعدك على قد ما دخلتى الفرحة ف قلوب ناس كتير انا كنت منهم

وسامحينى بجد على تقصيرى معاكى

وادعيلى " بشيلك همى بردو هههههههه "

وبصى بقه انا بحبك جداااااااااااا والله العظيم

سمع هوص (Abo 3li) يقول...

انا بقي مش نفسي ابقي كده...

لأني لما بحب اكون كده... بكون كده... طالما ده ال انا عاوزوه... وانا مبحبش اعوز حاجة مقدرش احققها...



تحياتي...

سمع هوص (Abo 3li) يقول...

انا بقي مش نفسي ابقي كده...

لأني لما بحب اكون كده... بكون كده... طالما ده ال انا عاوزوه... وانا مبحبش اعوز حاجة مقدرش احققها...



تحياتي...

Unknown يقول...

دي اول مرة ازورك فيها ..
ماتقوليش آسفة .. :)
دة حقك ..
حقك انك تزعلي و تزهقي و تفضفضي ..
الناس مش مهمين ..
المهم انتي ..
بجد .. !!
اهم حاجة انتي .
لأن الناس دي بتعمل معاكي كدة عشان همة اهم عند نفسهم من الناس التانية .
فهمتيني؟؟
:)

مش باقولك خليكي انانية ..
باقولك ماتهلكيش نفسك وجع ..
ماتعمليش كدة ..
مفيش حاجة تستاهل .
قولي لا اله الا الله يا ام حبيبة .
مفيش حد ماعندهوش مشاعر .. مفيش حد مش بيوصل لمرحلة الضيق و الملل و الزهق ..
بس مش كلنا بنقدر نحس ببعض عشان الاحساس دة ملكة . . يعني موهبة ربنا بيديها للناس .. و مش لكل الناس .
ربنا يفرج كربك و يذهب همك .

هناء محمود يقول...

صبرنى يارب
________________

ضحكتينى وانا مليش مزاج

فيشة مخى برضه واصلها كهربا 24 ساعة ويمكن ده إللى بيرهق الواحد مبتفصلش حتى زى التلاجة

امضى زى مانتى عايزة .. أنا عارفة إن فى كتير منى كدة

الحمد لله على فكرة مفيش حاجة انا كويسة الحمد لله بس شوية أحاسيس قديمة متراكمة كنت عايزة أخرجها



صيدلانية طالعة نازلة
______________________

نفسى انسى الحزن بقى شويه و ينسانى

وأنا كمان ..... هههههههههههه

الحمد لله إحنا قدها وقدود


هيثم رمضان
___________

أنا عمرى ما أحب إنى أتغير .. والحمد لله كل الصفات إللى تعبانى دى نعمة من عند ربنا أحمده عليها

بس فعلا أصحاب الصفات دى تعبانين فى حياتهم جدااا .. بس الأهم إن الواحد يكون ضميره مرتاح والحمد لله

واكيد احسن شئ إن الواحد يعامل ربنا .. لأن حقه مش بيضيع أبدا فى الحالة دى

هناء محمود يقول...

البنفسج الحزين
_______________

أنا فعلا محبش أتغير أبدا .. وإن كنت مش راضية عن تصرفات الناس وردود أفعالهم معايا .. إنما بحمد ربنا على الصفات إللى إدهانى وراضية عنها

وفعلا بدأت اتغير من فترة وأجمد قلبى فى طلب حقى وأثبت على كدة والله المستعان


بسمة انور
_________

أدينا بنحاول وربنا يوفق


سبايدر مان
____________

الجملة إللى إخترتها دى بجد بجد من أكتر الحاجات إللى تعبانى فى حياتى .. وكل اما أحرم أعملها برده أرجع وأعمل كدة تانى .. علشان مش بعرف أكون غير كدة

هناء محمود يقول...

أميرة الأحلام
____________
أنا الحمد لله بخير دى شوية أحاسيس متراكمة طلعت معايا كدة فى لحظة زهق

الحمد لله روقى انتى كمان وربنا كريم


حصان المرجيحة
________________

آمين ربنا يصبرنا ويصبر كل الناس ويزود عندنا وعندهم الإحساس ببعض شوية


هى وظروفها
____________

أنا عارفة فعلا إنى أنا إللى صح .. وده يمكن من الحاجات إللى بتدايقنى أكتر

لما ألاقى إللى بيعمل الغلط بيبوصلى على إنى إللى مش صح وبيحاسبنى كمان وساعات بيكون عايز حقه منى

هههههههههههه هم يضحك

هناء محمود يقول...

عاوز أصحى
___________

أنا طول عمرى أستاذة قراية بين السطور ويمكن ده تعبنى أكتر .. لأنى بكتشف بلاااوى


star
_________

أنا ومامتك ومامتى نسخة واحدة .. مع إنى كنت بنصح ماما كتير زمان بس للأسف أنا مأخدتش بالنصيحة


خواطر شابة
__________

طبعا مش عايزة أتغير .. مينفعش خلاص أخدت على كدة

هو فعلا شعور وقتى وممكن بحاجة بسيطة جداا وتافهة أنسى كل حاجة مديقانى .. ده الطبيعى بتاعى

morgana يقول...

هو ده حال الدنيا

/
اللهم عافنا وأعفوا عنا يارب وأغفر لنا كل ذنوبنا ما ظهر منها وما بطن

/


اللهم امين

هناء محمود يقول...

shemo
________

أنا فعلا مش فاهمة شوية .. بس حاسة إنتى عايزة تقولى إيه وموفقاكى عليه

د.. ستيتة
__________

عندك حق

بس المشكلة إن الإحساس والفطنة والذكاء دول نعم مقدرش أتمنى زوالهم

بس منكرش إنهم بيتعبوا صاحبهم كتير

معاكى فى طبيعة المرأة الشرقية
بس المشكلة مش فيها لوحدها .. المشكلة كمان إن إللى حواليها إتعودوا منها على كدة .. وبقوا حاسين إن إهمالها لنفسها ورغباتها حق مكتسب ليهم .. واليوم إللى بتفكر تعمل فيه شئ لنفسها .. يمكن هما أول ناس بيتهموها بالأنانية زائد كمان التقصير فى حقهم .. ولو هى شايفة حد حواليها مهتم بيها وبيحاول حتى يشجعها إنها تتمرد على فطرتها دى شوية وتهتم بنفسها يمكن كانت الأحوال إتغيرت

هناء محمود يقول...

سكرة
_____

حمدا لله على السلامة ولا يهمك يا جميل
انتى منورة .. حتى لو معلقتيش


manona
________

أنا كمان والله بحبك

ولا يهمك متخافيش عليا أوى دى سحابة وهتعدى إن شاء الله

وحاولى ترجعى زى زمان بس بإعتدال ومتظلميش نفسك وفى نفس الوقت يكون ضميرك مرتاح

شوفتى انا شاطرة إزاى وبنصحك


سمع هوص
_________

انا بقي مش نفسي ابقي كده...

لأني لما بحب اكون كده... بكون كده... طالما ده ال انا عاوزوه... وانا مبحبش اعوز حاجة مقدرش احققها...

وجهة نظر تحترم


قهوة بالفانيليا
_______________

كلامك بجد عجبنى جدا .. جزاكى الله كل خير

ولا إله إلا الله .. والحمد لله .. أنا فى نعمة كبيرة .. بس الإنسان دايما كدة
ربنا يسامحنا ويغفرلنا

وشكرا على الدعاء ربنا يستجيب منك إن شاء الله