الأربعاء، 17 فبراير 2010

ذكريات مطبخ سنة اولى جواز

السلام عليكم ورحمة الله وبركاته

البوست إللى فات كلمتكم عن ذكرياتى فى مطبخ ماما .. وأد إيه انا كنت طباخة فظيعة .. وأد إيه انا كنت حد ملوش سبت فى الطبيخ ..

(أخدتوا بالكوا من حد دى .. أصل نفسى اقولها من زمان )

نكمل بقى بحق وحقيقى .. 



المهم يا سادة يا كرام .. قبل ما اتجوز بحوالى 3 - 4 شهور ..

ماما قالتلى حجتك بطلت ولازم تتعلمى بقى .. 

وفعلا إتعلمت المبادئ بتاعت الطبخ كلها .. الأساسيات يعنى وجربتها كلها بنفسى

بس إكتفيت إنى أكتب  باقى الوصفات زى البشميلات والمحاشى وبعض الحلويات فى أجندة علشان مكنش فيه وقت

وقعدت مع ماما قبل الجواز بحوالى أسبوع كدة واقفة وراها فى المطبخ وماسكة الأجندة والقلم وأسألها عن الحاجات إللى مجربتهاش بنفسى

زى أعمل المحشى إزاى ..

وهى تقولى كذا وكذا وكذا وتقشرى توم علشان التقلية ..

أقولها كام تومة يعنى

تقولى 3 أربعة كدة حسب حجمهم .. 

اقولها لأ كام بالضبط وحجمهم اد إيه .. 
متبوظليش الطبيخ بتاعى ( آل هى إللى هتبوظهولى )

إللى إكتشفته بقى بعد الجواز .. إن الفكرة مش فى التعليم بس ..

إنما التعليم ده لازم يكون معاه الخبرة والممارسة

هتقولولى ليييييييه .. 

أقولكم

علشان أولا :اللياقة البدنية

هتقولولى يعنى إيه

أقولكم

يعنى لما أبقى قاعدة فى بيت أبوية مأنتخة ومبلطجة وأخرى أقوم أعمل شاى بالعافية ويوم اما آجى على نفسى أوى أحضر العشا مع ماما

يبقى بالشكل ده لما اتجوز وأصحى أحضر فطار وبعد الفطار أبدأ أحضر فى الغدا وبعدين يبقى مستنينى تحضير عشا بالليل وخصوصا لما تتجوزى واحد زى جوزى عايز يكون قدامه أطباق كتير على أد ما تقدرى .. وبيحب التزويئ والإختراعات الجديدة فى كل حاجة وبيمل من تكرار الأصناف ( يا عينى عليا )

هتلاقى نفسك هنجتى فى نص اليوم ومش قادرة تخدى نفسك ورجلك بتنأح عليكى وتعبانة وعايزة تنامى بعد كل وجبة 

وخايفة اليوم يعدى علشان هتكررى كل ده تانى يوم .. 

وجوزك هيحس إن عندك 60 سنة 
مش فى ربيع عمرك لأ دا هيلاقيه خريف وبيمطر كمان

وخصوصا فى الأيام إللى بيطلعلك فيها أعمال مصاحبة زى التنضيف والغسيل وغيره

أنا عن نفسى كنت أروح أزور ماما وبابا يقولولى مالك يابنتى تعبانة كدة ليه ووشك مخطوف ..

أقولهم أصلى النهاردة عملت فطار وغدا ....... عشينا بقى يا ماما عاااااااا

كانت امى تفرح فيا بس بابا كان يقعد يأنبنى ويقولى فطار وغدا أومال بعد العشا بتكونى عاملة إزاى

ويدور الدفة على ماما كالعادة ويقول ما امك دى إللى خيبتك جمبها وهى إللى دلعتك
وتبدأ المناقشة المعتادة .. وأنا اروح أترمى على أى سرير فى البيت


طبعا موضوع اللياقة البدنية ده بيكون مؤقت وبعد كدة الحاجات دى مش بيتعملها حساب وبتبقى سهلة جداا وممكن الواحدة تعمل 4 او 5 شغلانات فى وقت واحد وبعد ما تخلص تكون لسه فريش ومفيش مانع تخرج تتمشى هى وجوزها كمان 

.. وكمان بعد ما بتخلف بتقدر تعمل 70 شغلانة فى وقت واحد



ثانيا بقى : الخبرة والنفس بتاع الطبيخ

عايزة ممارسة بصراحة

هفهمكم من خلال موقفين حصلولى

أولا .. الرز المعمر

أكيد كتير منكم عارفينه

فى اول شهر جواز حبيت اعمل لجوزى مفاجأة وأعمله رز معمر لأنه بيحبه

ومش أى حد يطبخه دا لازم تكون طباخة مية مية ... حبيت طبعا اسبتله إنى طباخة بريمو .. ما أنا معايا كل الوصفات فى كتاب نظيرة .. قصدى اجندة ماما 



المهم عملت كل حاجة مكتوبة بالحرف الواحد ومن المعروف إن الرز المعمر بيتعمل بلبن ( طبعا حطيت اللبن مش نشا مش للدرجادى ) وحطيته فى الفرن ومستنية بقى وبعد شوية ببص ... لاقيته عامل زى ما يكون رز بالجبنة .. اللبن مكلكع كدة والرز فى جمب واللبن فى جمب ومش شبه الرز المعمر خالص إللى ماما بتعمله

قررت أرميه فى الزبالة بقى وأعمل رز عادى وخلاص بما إن جوزى ما يعرفش

بس إللى حصل فى اللحظة دى لاقيت باب الشقة بيتفتح وجوزى جه .. والصينية سخنة ومش عارفة أفضى الرز منها وأرميه قبل ما جوزى يشوف الفضيحة

فذكائى بقى وسرعة البديهة بتاعتى خلتنى أرمى الصينية كلها فى الزبالة وقفلت عليها بسرعة 

ودخل جوزى طبعا على المطبخ على طول وسألنى السؤال المعتاد الأكل خلص

قولتله كل حاجة خلصت بس لسة شوية على الرز ههههههههههههه (دى أنا)


إللى إتضحلى بعد كدة إن اللبن كان رايب .. وكان المفروض أختبر اللبن الأول بإنى اغلى شوية كدة على جمب علشان أتاكد إنه كويس 
(هو ده الدرس المستفاد من أول رز معمر عملته فى حياتى )


ندخل على الحمام المحشى بالرز لأننا مش بنحب الفريك

لاقيت فى الفريزر بتاعى حمام قولت ليه لأ .. يعنى إللى بيطبخ حمام احسن منى
وروحت على التيليفون ( التيليفون الأول وبعدين المطبخ
أسأل ماما لأنه مكنش فى كتاب نظيرة

ماما قالتلى كل الوصفة ومن ضمنها إنى بعد ما احشى الحمام أقفله بالإبرة والخيط كويس علشان الحشوة متقعش منه وهو بينطبخ

إلتزمت بالتعليمات وبعد ما حضرت كل حاجة .. مسكت الخيط والإبرة وقفلت الحمام كله ولا أجدعها خياطة لدرجة إن مفيش رزاية واحدة حتى وقعت منه وهو بيتسلق
( لأ طباخة طباخة يعنى )

وخلص الحمام وكله ماشى تمام وإتحمر وبقى شكله تحفه .. وقعدت أصور فيه بالموبايل وكنت ناقص أنزله على النت

وجه جوزى وتفاجئ وإنبهر ..  ثم .. إستغرب وقلق
(ده تطور طبيعى وإحساس طبيعى بيبقى عند الأزواج الجداد )

وطبعا كنت محضرة المقص مع الأكل علشان نفتتح الحمام لأنه متقفل جامد .. وطبعا كالعادة بدأ الأول بتفريغ الحشوة من الحمام فى الطبق (ترك ترك ترك ترك ترك) ده صوت الرز وهو بينزل على الطبق

مستواش ههههههههههههه ( دى انا )..

الناس بتقول فى الطبخات البايظة أصلى زودت الملح شوية او قللت الماية شوية ...

وأنا قولت

أصلى خيطه جامد شوية ههههههههه .. 


لدرجة إن الماية موصلتش للرز ومستواش 
(ودا الدرس إللى إستفدته من أول حمام محشى عملته فى حياتى )


باقى المقالب إللى شوفتها وجربتها وجوزى كان صابر عليا فيها كتير عايزين مدونة لوحديهم بس بصراحة كان جوزى راجل مثالى وبيصبر وبيحتسب


بس أكيد فهمتونى أنا أقصد اقول إيه من الموقفين دول


لأن إتضحلى بعد ما إتعلمت الطبيخ كويس ومارسته كتير إنه ممكن يكون زى الموهبة والإحتراف كمان ..
وينفع فيه الإبتكار والإختراع كمان وأحيانا التأليف وبتكون الست مستمتعة جدااا وهى بتبتكر وبتجرب

بس ده كله مينفعش يتعمل إلا بعد ممارسة طويلة وخبرة وساعتها بتكون الست واثقة فى نفسها وتقدر تتحكم فى نتيجة أى شئ هى بتعمله حتى لو كان لأول مرة


عايزة أقول حاجة كمان

إنى بجد عملت المدونة دى وبكتب فيها الكلام ده .. 

علشان أولا وأخيرا ..

أوجه نظر الناس سواء بنات او ولاد أو ستات أو رجال لحاجات ممكن يكونوا شايفنها صغيرة بس هى أخطاء بتتكرر كل يوم ومهملة ..

وكل جيل بيسلم للجيل التانى نسخ طبق الأصل من الأولانى .. يعنى نفس الأخطاء دى بتتكرر بنفس الحجج والمبررات ومفيش توجيه كافى فيها .. لأنهم شايفينها صغيرة والكل بيقول بكرة يتعلموا ..

مع إنهم لو إتعلموها النهاردة هتفرق معاهم كتير بكرة وهيكونوا أحسن فى بعد بكرة كمان

كلامى مش بينطبق على الموضوع ده بس ولا كل المواضيع إللى كتبتها عن الحياة الزوجيه إنما كمان كل حاجة تخص حياتنا 

بس أنا آخر تخصص ليا حاليا هو الحياة الزوجية إللى مليش حياة غيرها

فى مقولة سمعتها زمان

إن الغبى ..إللى مش بيستفيد من أخطاؤه
وإن الذكى .. إللى يستفيد من أخطاؤه
وإن الأذكى .. إللى يستفيد من أخطاء الآخرين


لو كنت فى حياتى شايفة نفسى إنى كنت بحاول أكون ذكية .. 

فبتمنى بجد إن كل إللى حواليا يكونوا أذكى ويستفيدوا من أخطائى .. وميمنعش كمان إنى بحاول أكون الأذكى فى حاجات تانية كتير وأستفيد من أخطاء غيرى

والسلام ختام


49 التعليقات:

Mahmoud Ahmed يقول...

احجز الالالاول
رقم واحد
وبعدين اقرا ^_^

Mahmoud Ahmed يقول...

اممممممم
يعني مش حرام عليكي تجيبي سيره الحمام و سيره الارز بلبن (( وش بيعيط ))
جريتي ريقي ^_^
عليكي عزمه بقي لينا كلنا
و يكون محشي مع حمام بالفريك

....

و بعدين مش بتحبي الفريك ازاي بس؟؟
ده طعمه جمييييييييييييييييل بس ابقي زودي القشطه على الوش بس ^_^

....

ملحوظه صغيره :
الحمام مش بيتخيط كله ، الحمامه المقطوعه بس ^(^ ، انتي تلفي الرجلين عكس بعضهم وهما هيتقفلوا و مفيش حاجه هتقع ^_^

....

بس الفكره حلوه ان الناس تستفيد من الاخطاء و تتعلم الطبخ و ترحم جوزها ^_^

Mahmoud Ahmed يقول...

تعليقين ورا بعض
ده كتير عليا ^_^

ستيتة يقول...

طيب اقول لك ايه
هههههههههههههههههههههههه
خدي بالك انا بضحك بشكل هستيري
متقوليش في عقلك الست دي ها تعمل عليا كانت خبيرة
ابدا
بس سبحان الله انا محصلش لي ولا موقف واحد رغم اني عمري ما دخلت المطبخ قبل الجواز
يعني ربنا ستر معايا والحمد لله حسبو مشمتش فيا ولا مرة

الا الحمام
كله كوم والحمام كوم
حماتي ربنا يخليها ويديها الصحة كانت بتجيبه لي متنضف ومغسول وعلى الحشو مباشرة
وعملته اول الجواز بالرز وعجب الباشا جدا
وعملته صينية وعجبه برضه
وعزمنا صحابه والحمد لله اتسترت برضه
وفي مرة من ذات المرارير
بغسل الحمام قبل ما اعمله لقيت درة خارجة منه
واساشا انا مكنتش بمد ايدي فيه وكان ناقص اجيب الراجل اللي كان مع لينا في مسرحية المتزوجون يحميه بالشامبو

المهم قلبي وقع في رجلي وقعدت ادور على درة تانية لحسن كنت عاملة عزومة
ومن يومها بعرف انضفه واطلع الحوصلة

وبعدين رحت صرخت لحماتي
اه اصلها زي ماما بتستحمل جنونتي عادي
وقلت لها ده اسمه كلام يا سوسو كنت ها اتفضح قدام الناس
اتاريها المرة دي سابته لحد من اللي شغالين في البيت هو اللي ينضفه

الموقف التاني بقى بتاع البامية المتوحشة اللي ليها شوك ودخل في ايدي وورمها ده ابقى احكيه لك بعد الفاصل

بس اسكتي
الا الإبرة والخيط
لأ
ملكيش حل
فكرتيني بلبنى عبد العزيز
ده نجرسكو يا طنط

ربنا يكرمك ويفرح قلبك

ستيتة يقول...

شفتي اسبايدر مان؟
ونعم الرجال
مش بنخيط خالص
بنلف الرجلين عكس بعض ونربط الحوصالة بعد الحشو ودمتم
ولو لم نربطها ونزلناها في المية المغلية بالشويش مش بتنزل الرز خالص برضه
ههههههههههههههههههههه

انا مش بقول لك انتي زمانك خبيرة عني
انا بقول للغلابة اللي ها يمروا بكل ده
هههههههههههههههههههههههه

هناء محمود يقول...

سبايدر مان .. ما شاء الله باين عليك

إنك إللى طباخ بجد

بصراحة مراتك هيبقى موقفها صعب جداا ربنا معاها

إنما الفريك بجد مش بحبه خالص فى اى حاجة

بالنسبة للحمام إللى كنت بطبخه ماما عملت حسابها وقالتلى أخيطه لأنها عارفة إنى هقطعه وابهدله وانا بحشيه وده إللى حصل فعلا .. وكمان مكونتش بعرف اعمل الحركة بتاعت رجليه دى بجد
فالخياطة كانت اسهل

هناء محمود يقول...

دكتورة ستيتة

إيه النور ده

والله ضحكتينى على البامية المتوحشة دى

أصلى برده مش بحبها خالص علشان تقميعها ده وبتشوكنى فعلا

والله كان اغلب الحاجات إللى كنت بطبخها كانت بجد بتطلع تحفة ويمكن أحسن من ناس كتير متعودين عليها .. بس كان جوزى يقولى ده حظ مبتدئين .. الأهم تانى مرة ههههههههه

بس دلوقتى مقولكيش .. خلاص الحكاية بقت هواية عندى .. وخصوصا إن جوزى بيشجع الإختراعات الجديدة وبيمل من الأكل التقليدى

والحمد لله الحال إتغير خالص
وبقى يعتمد عليا وبقيت أعمل الحاجة الواحدة بسبعين طريقة علشان الدكتور ميزهقش

بس القرف من تنضيف الحمام أو الفراخ أو سمك او أى حاجة تانية لسه موجود وبتضايق جدااا لو لاقيت الحاجة متنضفتش كويس وبيبقى هاين عليا أتخلص منها فى الخباثة أسهل من إنى أنضفها

أكيد لسه مازال عندى رواسب جاهلية هههههههههه

واللى يعيش ياما يشوف وإللى يشوف يتعلم وإللى ميتعلمش يستاهل إللى يجراله

نورتينى يا دكتور

الشعب لابد له من حكومه تشكمه يقول...

ههههههههههههههههههه عارفه انا موقف الحمام ده:)

بس لعلمك باه انتى مش بتقولى نتعلم من اخطاء الاخرين وانتى عارفه مبدأى سبينى اغلط براحتى:)

وبناء عليه هتعلم برضه فى اخر 4 شهور قبل الجواز ان شاء الله,,

اى نعم انا اتعلمت بعض الحجات مجبر اخاك لا بطل بس الصوانى باه والحجات دى على جثتى مش هتعلمها دلوقتى,

باه يرضيكى احرم جوزى من المواقف والطرائف دى,,وبعدين دا اثبات حبه ليا ياكل يجيله تلبك معوى وهو صابر وساكت:)

مجرمه انتى ومتخيلاكى طبعا ههههههههههه انا حسه انى هكون نسخه بالكربون منك ,
اصل منظرك دا بيفكرنى بمنظرى:)

بس للامانه ياجماعه ام بوبه عزمتنى على الغدا وعملتلى مكرونه وفراخ بانيه وحركات كده والاكل كان حلو بصراحه انا اى نعم فى الاول كنت ماسكه المعلقه وايدى بتترعش اصلى عارفاااااااااااها بس تشجعت وقلت اقف جمب صاحبتى برضه والاكل والله طلع حلو:))

أميرة الأحلام يقول...

ضحكتينى والله
بوست رائع كالعاده
فعلا عندك حق المطبخ اكتر حاجه بيبقى عايزها الخبره فعلا
انا عن نفسي ببقى سعيده جدا وانا بتفنن فيه واخترع حاجات كتيره وبتكون الحمدلله كويسه
ربنا يوفقك يارب
ويخليلك بوبه الجميله

بيطرية ومش بايدى يقول...

احجز العاشر ونقول صباح الخييييييييييييييييييييييييييييييييييييييييييييييير

بيطرية ومش بايدى يقول...

ااااااااه
انتى خوفتينى يا ام بوبة انتى هتخلينى اقوم اصحى امى ونقوم نعمل الغدا بتاع بكرة من دلوقتى

ياخوفى يابدران لاعمل زى لينا واحط علبتين رابسوا على السبانخ واعمل بعد كده يوميات فرن فرن ايه ده على كده مش هيحصل وابور
ويبقى الراجل مالحقش الاربعين واعملوا اربعين تانية بس وهو مش موجود :)))
والله انا ماقدرتش امسك نفسى من الضحك والله افتكرونى فى البيت اتجننت ولا حاجة


ربنا يكرمك

دومتى بكل ود وحب

Mahmoud Ahmed يقول...

ههههههههه
ههههههههههه
ايه ده انتوا اخدتو فكره عني غلط خالص
ههههههههههههههه
لا انا لا بعرف اطبخ ولا حاجه
بس بنتعلم من الست الوالده و بتفرج عليها و هي بتطبخ عشان ابقي اتخانق مع مراتي بعد كده ان شاء الله ههههههههههههههههههههههههههههههههه

....

بس ده ميمنعش برضه اني بحاول اعتمد على نفسي في الاكل عشان لما نتخانق انا و مراتي و اخليها تروح بيت ابوها اعرف آكل نفسي ههههههههههههههههههههههههه

شرير قوي انا ، صح ؟؟

Mahmoud Ahmed يقول...

ستيته حسب الله الحمش يقول...

شفتي اسبايدر مان؟
ونعم الرجال
مش بنخيط خالص
بنلف الرجلين عكس بعض ونربط الحوصالة بعد الحشو ودمتم
ولو لم نربطها ونزلناها في المية المغلية بالشويش مش بتنزل الرز خالص برضه

.............

اشكرك يا افندم و الله
على تأكيدك للمعلومه
هيه هيه هيه هيه
قولت حاجه صح
هيه هيه هيه هيه

............

اقري بقي كلامي الى قبل ده ، الكومن الى فات عشان اكيد انتي واخده فكره غلط عني خالص ^_^

صبرني يارب يقول...

هههههههههههههههههههههههه

عسل والله

عارفه بجد انتى كلامك صح جدا جدا جدا

صوتي راح مع العيال اخواتي عشان يفهموا مافيش فايده

وكل حاجه تقولك نتعلم بعدين هو يعنى شغلانه

نقولهم يا جدعان افهموا الحكايه مش كتاب ابله نظيره
الحكايه ممارسه

انتى عارفه انا كنت باطبخ كل الاكل تقريبا وانا ثانويه عامه ماما كانت تيجى من الشغل وانا فى الاجازه تلاقي الاكل على السفره
اه والله يا اختي

العيال اخواتي بقى اجارك الله تحف

حتى اختي الى اكبر مني كانت تحفه

طبعا الى اتجوزوا منهم دلوقتي بيعملوا كل حاجه بس بعد ايييييييييه
فاضل واحده نفسي افرح فيها

عارفه البت اختي اول لما اتجوزت راحت اشترت فرخه وقالت للراجل قطعه واسلخها عشان قرفانه تمسكها

وخدتها وروحت وطبعا لانها هبله ما بصتش فى الكيس حتى وهي هناك

راحت البيت لقتها مش متقطعه ولا مسلوخه

حطتها فى الحوض وقعدت تبصلها وتعيط
ههههههههههههههه

وراحت بقى لبست كيس في ايدها عشان تغسلها بالملح وتنضفها كويس
هههههههههههههههههه

دلوقتي تقريبا بتلحسها بلسانها عشان اديها مش فاضيه ولا ايه مش عارفه

بس برضه زي ما بتقولي الى ما بتبقاش واخده على شغل البيت

بتتعب بجد على ما تتعود عليه ولو يعنى هى شخصيه اصلا شاطره ممكن بعد سنين تبقى ست بيت كويسه

وفى منهم كتير بعيشوا ويموتوا مايلين حضرتك

عارفه دول عاملين زي ايه ؟؟
زي الى بياجل المذاكره لليلة الامتحان بالظبببببببببط

شاب فقرى يقول...

يالهوووووووووووى
دا انا سخسخت من الضحك
فرفرت
اصل فى حاجات حصلت قدامى من اختى الفاضلة
بقيت مش مصدق
بس فعلا لازم الكل يتعلم من الجيل الل قبل مننا
منحسش ناحيتهم بانهم بيقيدونا او يخنقونا
بل بالعكس نستمتع باننا بناخد المعلومة والخبرة الصافية بدون اى ضرر ولا احراج

شكرا جدا عالبوست
:)
خالص التحية
ربنا يخلى لك بوبة يارب
شاب فقرى

هناء محمود يقول...

شيما

قوليلهم قوليلهم .. مش كان الأكل حلو يا شوشو .. أنا فاكرة إنك سألتينى وانتى بتاكلى بحذر كدة .. إنتى إتعلمتى الطبيخ فين وإمتى ههههههه

أنا كنت ملاحظة إنك متوترة وخايفة بس عملت مش واخدة بالى علشان موتركيش اكتر ههههههههه والحمد لله جات سليمة

بلاش أنتخة يا شوشو .. حتى إتعلمى دلوقتى علشان تساعدى الست الغلبانة إللى مخلفتش غيرك دى .. إنتى البت إللى طلعت بيها من الدنيا

والله أنا لما بشوف نفسى والحاجات إللى بعملها دلوقتى والمجهود إللى بعمله .. بقول والله بربعه بس كنت ساعدت ماما زمان وكنت كسبت ثواب وفرحتها بيا مانا زى حلاتك مفيش غيرى .. بس دايما الواحد مش بيتعلم إلا بعد فوات الأوان

هناء محمود يقول...

أميرة الأحلام

إنتى كدة فى السليم .. إتمتعى وفننى زى مانتى عايزة .. والله الطبيخ ده متعة وفن بس للى يفهم وميبصلوش كعقاب أو شغل أو هم

هناء محمود يقول...

بيطرية ومش بإيدى


لأ قومى صحيها

ولا أقولك فكرة .. تصحيها ليه .. قومى روحى المطبخ ودعفسى فيه وطلعى الأكل من الفريزر .. وعكى ولبخى وفجئيها الصبح

وربنا يستر

بس طمنينا عليكى بكرة ضرورى

هناء محمود يقول...

سبيدر مان

ما هو الكلام إللى قولته فى الأول بصراحة يخلى الواحد يفتكر إنك طباخ درجة اولى

بس كويس إنك مهتم بالحكاية دى

لأنها أكيد هتنفعك وعادى جدا لما تكون بتعرف تطبخ .. إنت إنسان .. يبقى لازم تعرف تقضى متطلباتك بنفسك وخصوصا لو إضطرتك الظروف لكدة.

يعنى مش تاكل بس


وياريت الرجالة كلها تعمل كدة

هناء محمود يقول...

صبرنى يارب

دا إيه النور ده فينك من زمان

أكيد إنتى بقى لما إتجوزتى كانت الحكاية بالنسبالك عادى كدة لعب عيال

وأكيد فارقة معاكى لحد دلوقتى

أنا لما دخلت المطبخ بتاعك إللى فى المدونة التانية ما شاء الله بصراحة إنبهرت

بس عرفت السر دلوقتى .. ووجهة نظرى طلعت صح .. أهم حاجة الممارسة والخبرة لأنها بتفرق كتييير

أختك زى حلاتى .. أنا مرة حصلت معايا حكاية الفرخة دى .. كانت الكهربة قاطعة عند بتاع الفراخ .. وجوزى قاله يبعت فرختين على البيت

ولما وصلوا .. بفتح الكيس لاقيت الفرختين متنضفين اى كلام وكمان بطنهم مقفولة متفتحتش أساسا .. والبنت بتقولى إفتحيهم بسرعة ونضفيهم علشان ميبظوش .. لأن الكهربا والماية قاطعين عندنا

والله بجد حطيتهم فى الحوض وكنت هعيط وخصوصا لما فتحتهم مبقيتش عارفة أعمل إيه

واتصلت على جوزى فى العيادة وأقوله ينفع كدة يعنى أنا اعمل إيه دلوقتى .. وقعد يضحك عليا بس أنا كنت متغاظة متغاظة

ومازلت لحد دلوقتى لو إتكرر معايا الموقف ده هعيط برده .. كله إلا ده

طبيخ حلويات صوانى أى حاجة ماشى إلا تنضيف الفراخ والسمك يع يع يع

ههههههههههههههه

ربنا يكون فى عون اهلينا زمان إللى كانوا بيدبحوا وينضفوا ويطبخوا فى نفس اليوم

داحنا بندلع دلع ماسخ بجد ههههههه

هناء محمود يقول...

شاب فقرى


المشكلة إننا بجد وقتها بيتهيألنا إننا صح وإنهم بيطلبوا مننا الحاجات دى لمجرد الإستفادة مننا ولفرض رأيهم علينا

والكسل بيبقى ماسكنا وإهتمامتنا بتكون مختلفة

ومش بنفهم الصح غير فى الوقت الضايع

ولو نصحنا غيرنا برده مش هياخد بالنصيحة

تحياتى لأختك الزميلة

قيس بن الملووووح يقول...

نحن في حاجه الي كل راي حكيم في مشاكل اصدقاء مدونة "دقات قلب بعد الخمسين"

خواطر شابة يقول...

ياليتنا فعلا نتعلم من اخطاء غيرنا لكن نحن للاسف لانفعل
انا ايضا البنت الوحيدة وسط اخوة ذكور وفي البيت مصرة اتعامل زيي زيهم يعني المطبخ بعرفه كده لما الظروف تفرض ده عليا وبيكون بالمناسبات
تعرفي اني انا كمان فكرتي انه كفاية شهور قبل الزواج الواحد يركز فيها ويتعلم
تعرفي عندنا مثل مغربي بيقول "هي ماشي بالحداقة ولا بالزين هي بالسعد لمن أعطاه الله" معناه ان السعادة في الزواج مش مرتبطة لابجمال ولا بكونك طباخة بريمو بقدر ما مرتبطة بأن نصيبك يوقعك في أبن حلال لانه ممكن تكوني اجمل الجميلات وطباخة لايعلى عليك وولا يثمر فيه
كلما بأقرأ لك بضحك من قلبي ربي يفرح قلبك دائما

حصان المرجيحة يقول...

تصدقي فتحتي نفسي للجواز
بس المهم انها ماتكنش عاملة مدونة علشان ماتقولش علي الضرب اللي هاضربهولها ههههههههههه
شكرا ليكي

VÖltaa يقول...

كويس انى ولد بقى
يعنى دورى اتذوق الاكل
وبسسسسسسسسسس
نياهاهاهاهاهااا

بالمناسبة
الشروط اللى حطيتها للى هيتجوز بوبة
موجودة فيا كلها
اجى بقى اتقدم رسمى فهمى نظمى امتة ؟

غير معرف يقول...

ههههههههههههههه
مواقف جااامدة من الاخر
بس موقف الحمام ده حاجة تانى

ده الواحد يتعلم له كام طبخة من دلوقتى

OlivE يقول...

اولا

وحشتينىىىىىىىىىىىى
انا اسفه بقالى كتير مش برد
معلش بقى استحملى انتى الكبيره :)

كلامك صح اوى
وعلشان كدا ادينا بنتعلم كل شىء
وعلى فكره تعليم البنت فى بيت اهلها بيرجع لمامتها
يعنى انا لولا ماما مكنتش اتعلمت حاجة وانها دايما عايزانى اتعلم كل حاجة وانا لما بتقفل معايا بتقفل بس كنت بلين شويه علشان ميقولوش عليا خايبه
( اه احنا ناس جامدين اوى)
وكمان لانى البنت الوحيده اهى اهى اة
كان لازم اتعلم ولو الاساسيات
وبعد كدا تعمقت شويه مش اوى يعنى

بس اكتر حاجة بخاف منها وبفشل فيها الحلويات :(

سلامى لبوبه ولام بوبه

القدر و انا يقول...

ام بوبة
ضحكت جدا من مقالب الطبيخ للجدد
بس معاك حق لابد من الممارسة والتعود
انا لا احب المطبخ نهائيا ولكنى اجيد ما اعمله لانه واجب قومى
ولا اعمل الا الاشياء السهلة
اما الباقى ربنا ستر لان فى السنين الاولى كان يوجد الطباخ ومن بعدها شقيقتى ادامها الله لى
عليها كل التقايل من محاشى الى ملوخية
قال اقطف واخرط قال
وعموما الاولاد اول ما يكبروا شوية حتشوفى انهم لا يفضلون غير المشويات السريعة وباى يا مامى
وبكرة بوبة تعمل اكتر من كده
تحياتى

حنين يقول...

فكرتينى برضه بمغامراتى فى اول سنه بس على فكره اى واحده مهما كانت بتطبخ كويس قبل الجواز فى الاول بتكون متلغبطه وهايبه الحياه الجديده بس انا كنت زيك بالظبط ما بعملش حاجه خالص انتخه اخر حاجه بس ده كان زمان وجبر تعالى شوفينى دلوقتى عبره لمن لايعتبر بس الحمدلله كله بقى تمام بعد كده
تحياتى
سلامى لبوبه

سمع هوص (Abo 3li) يقول...

انا جوعت....

ربنا يستر بقي... الواحد لازم يعمل اختبارات طبيخ لزوجة المستقبل الاول...
منا مش مستعد ابقي حقل تجارب في اول سنتين جواز...
ده الاكل من اهم الاسباب الممكن تخليني اتجوز... علشان ربنا يتوب عليا من اكل الشارع- بما اني مش عايش مع الاهل- دنا من كتر اكل الشارع بقيت لما اكل الاكل بتاع الست الوالدة ... بطني بتوجعني.. مبقتش واخدة علي الاكل النضيف...

تيجي انتي وتقوليلي اني هعاني في اول الجواز مع الاكل بتاع المداااام...

لا والف لا...
انا هبقي اجيبها عندك البلوج قبل الجواز تمتحينهالي....


تحياتي ليكي ول بوبة

إيمان يقول...

ههههههههههههه ياعينى دا كله حصل
كويس انى باعرف اطبخ وشطورة وفعلا الحمام مش بيتخبط دى بتلف الرجلين عكس بعض زيها زى الفرخه المحشيه
بس فعلا ربنا كان مصبرة
ربنا يكرمكم ببعض ويسعدكم
بس افتكر اول مرة جربت اعمل اكل فى بيت بابا ههههههههههه انا لسه فيه برضو بس طباخه طباخه كنت عملت مكرونه واجارك الله طلعت عجين هههههههههه
تحفه بجد انا هلكانه ضحك هههههههههه انا اصحابى كده برضو بيقعدوا فى الاجازة يحاولوا يعملوا لدرجه وحده بتعمل محشى كسلت تلف بقت تفرد الرز على ورق الكرنب وتريح دماغها وقال كده صنيه محشى هههههههههه
ربنا يوفقك ويسعدك يارب
تحياتى

Engineer A يقول...

هههههه والله مدونة عسل وحكايات جميله :)

ذكرتيني باول طبخة طبختها كانت "مجبوس دياي" يعني مكبوس دجاج بس بالكويتي ودي اكله كويتية لذيذة ومعروفة عبارة عن عيش اللي هو رز عندكم احنا بنسميه عيش و دجاج ومزينة بالحشو اللي هو عبارة عن بصل مفروم+ زبيب مقلي ومبهر نحطه فوق الرز كل شي كان تمام ماعدا الرز "كان بيتكتك زي ماحصل معاكي في الحمام المحشي" ماكانشي مستوي :/


وأنا أييد كلامك الطبخ عاوزله نفس وممارسة وتجربة وخطأ علشان بنضبط :)

غير معرف يقول...

هههههههههه
أضحك الله أيامك كلها
رغم إنك اتعلمت يا حوا
لكننا كرجال اتعلمنا كتييييييييير
واول حاجة هنخش في المطبخ عليها .. سلة القمامة ^_^
بالمناسبة لا تقولي " حد " في الموضع الذي سقتيه فهذه الكلمة ليست مناسبة بالمرة تماماً
للأسف انتشرت ورُوج لها بصورة مخلة لتعبر عن انسان بدلاً من تعبيرها الأصلي عن جماد . مش حاجة تفلق ؟!

morgana يقول...

ههههههههههههههههه
فكرتيني بأول مره اولع البوتوجاز الشقه كلها كانت هتولع:D
بس كنت لسه في ابتدائي


ولا بنت خالي كانت بتعمل كيك فحطت فلفل اسود عليها عشان البيض

محدش بيتعلم بالساهل

رحــــيـل يقول...

ههههههههههههههه

انا حاسه ان بعد جوازى انا كمان هكتب عن فضايحى ومغامراتى اصل انا ناوية انى متعملمش الطبيخ غير لما اتجوز وابقى فى بيتى براحتى

ربنا يصبر خطيبى بقى انا عامة قولتله مش يقلق لانى واثقه من قدراتى وانى هبقى ست بيت شاطرررره جدا بس تقريبا هو مش مصدق
:))

انا عايزه الاجندة بتاعة ماماتك :)) هستلفها منك لما اجى اتجوز

هناء محمود يقول...

قيس بن الملوح

إن شاء الله يشرفنى الإطلاع على مدونتك

هناء محمود يقول...

خواطر شابة

انا كنت زيك كدة مع إخواتى لأنهم كانوا الإتنين ولاد وكنت دايما بقول أنا زيى زيهم ههههههههه

هناء محمود يقول...

حصان المرجيحة

لأ ضرب لأ دى تبهدلك فى محكمة الأسرة وفى الآخر إنت إللى هتطبخ لنفسك

هناء محمود يقول...

mohamed

ما هى المشكلة إن فعلا الأولاد بيتهيألهم إن وظيفتهم هى الأكل وبس

وبصراحة انا مش شايفة إن ده يليق بكائن حى عاقل

المفروض يكون بيعرف يصنع لنفسه إحتياجاتها ومتطالباتها

وده بيخليهم أكتر إحتياج للست وده مش فى مصلحتهم دايما

هناء محمود يقول...

star in the sky

لا إلحقى نفسك انا قولتلك وعملت إللى عليا

هناء محمود يقول...

olive

أنا إللى أسفة بجد لأنى اليومين إللى فاتوا كنت مشغولة ومش عارفة اتابع مدوناتكم كلكم كويس

منورانى وإستمرى على كدة ربنا معاكى والحلويات دورى عليها على النت .. أنا عن نفسى إتعلمتها من النت

هناء محمود يقول...

القدر وانا

حاولى تتعمقى اكتر زى أختك .. والمشكلة عندى فى أبو الأولاد هو إللى محيرنى فى الأكل عايز يجرب كل حاجة

هههههههههههههه

هناء محمود يقول...

حنين

كلنا بقينا عبرة لمن يعتبر ولمن لا يعتبر .. أبقى تعالى أقعدى جمبى فى المطبخ انا هناك على طول

ههههههههههه

هناء محمود يقول...

سمع هوص

كل إختبارات الطبيخ قبل الجواز فاشلة
لأن فيها آيادى خفية بتساعد .. كلكم لها وهو كاس وداير على الكل

هناء محمود يقول...

emymony

كويس إنك شطورة إستمرى بقى على كدة ربنا يوفقك

انا وماما كنا عارفين إن الحمام مش بيتخيط .. بس المشكلة إنى مكونتش أعرف أعمل حركة الرجلين دى كانت خيابة خيابة يعنى .. فماما قالتلى أخيطه أسهل
ههههههههه

هناء محمود يقول...

engeenera

حلوة الوصفة الكويتية دى .. جوعتينى دا لو جوزى قرأ كلامك ده .. مش هيهدى إلا لما أعملهاله بيموت هو فى اى وصفة جديدة ههههههههههههه

تسلم الأيادى أكيد بعد كدة الرز بيكون مستوى

هناء محمود يقول...

أحمد شريف

الله يكرمك شكرا على مرورك

أنا قولت حد دى للسخرية منها مش أكتر
لأنى فعلا بكره الكلمة دى وبتضايقنى جداا وبصراحة إنتشرت أوى .. أنا عن نفسى شيفاها متنفعش لا لجماد ولا حيوان ولا إنسان حتى .. هى مجرد كلمة ملهاش معنى

وشكرا على النصايح اللغوية الدائمة

هناء محمود يقول...

morgana

هههههههههههه
بجد ضحكت اوى على بنت خالك إللى حطت الفلفل على البيض فى الكيك

أصلى بجد بجد كنت فى يوم سرحانة وأنا بعمل كيك وأول ما حطيت البيض لاقيت إيدى راحت تلقائى على علبة الفلفل ومسكتها بس لحقت نفسى فى آخر لحظة

هههههههههههههههه

هناء محمود يقول...

رحيل

بس ياريت تلحقى إنتى وتكتبى فضايح المطبخ قبل ما هو إللى يعمل مدونة ويكتب عن إللى بيشوفه

ههههههههههههههه

إلحقى إتعلمى شوية دلوقتى علشان الراجل ميتصدمش بعد الجواز .. أصل الرجالة دول كلهم مخهم فى معدتهم مش قلبهم