الأربعاء، 10 فبراير 2010

ذكريات من مطبخ قبل الجواز

السلام عليكم ورحمة الله وبركاته

إيه الأخبار ؟؟!!

 الحمد لله ...

 الحمد لله ... أخبار النكد إيه والكسل وحالات الإحباط  .. مش احسن برده 

 الحمد لله ...

 الحمد لله ... أنا كمان كنت داخلة على حالة الكسل والإحباط  .. بس الحمد لله 

 الحمد لله ... 

 طبعا الحمد لله





حبيت اكلمكم النهاردة عن ذكرياتى فى مطبخ ماما قبل الجواز

 وعايزة بقى بالذات البنوتات الحلوات المقبلات على الجواز يصحصحوا معايا علشان يستفيدوا .

 وطبعا كالعادة الدعوة عاااااااااامة للجميع 

 أنا طبعا هتكلم عن نفسى وتجربتى الخاصة  وممكن ميكونش كتير منكم كان بيستمتع بالمميزات بتاعتى دى

 يعنى أختكم كانت قبل  الجواز .. أستاذة فى الطبيخ .. قمة فى جميع أصناف الحلويات والباشميلات وتخريط الملوخيات إلخ إلخ إلخ

( أول مرة أشوف واحدة بتكدب وبتقول إلخ إلخ )  هو الكدب كمان فيه إلخ 


نقول الحقيقة بقى .... أنا بصراحة مكنليش فى المواضيع دى .. كنت قايمة بالدور التانى فى فيلم المطبخ يعنى تقشير توم .. بطاطس .. سلق بيض .. حرق رز .. حاجات من هذا القبيل ...... مع إنى كنت بكره الدور التانى ده 

 كنت بحس إنى مش سيدة الموقف .. أو بمعنى أصح مش سيدة المطبخ .. وكنت دايما بتخانئ مع سيدة المطبخ إللى هى أمى  

وكان المطبخ بالنسبالنا بيبقى ساحة المعركة ووبتنتهى المعركة بصرخة كبيرة من ماما بتنده لبابا وبتقوله ( طلع البت دى من هنااااااااااا )

بس هى بصراحة إللى كانت تاعبة نفسها معايا  فى حاجات بسيطة  ممكن تتغاضى عنها .. زى

 كانت بتحاول كتير تقنعنى إنى لما أكون واقفة فى المطبخ أكون مشمرة إيديا الإتنين .. وأنا مكونتش بحب أعمل كدة

وغولبت معايا بصراحة فى إنها تحاول تخلينى أستخدم إيدى الإتنين .. يعنى مينفعش أقلب البطاطس فى الزيت بإيد والإيد التانية أحطها فى جيبى كالعادة  .. وأنا كنت بحب دايما احط إيدى فى جيبى وأنا واقفة فى المطبخ ( طول عمرى شيك )

 وكمان كانت دايما تقولى لما يكون فى حاجة سخنه على النار ياريت أستخدم فوط المطبخ فى شيلها من على البوتاجاز وبلاش كمام البيجامات بتاعتى 
أنا عن نفسى كنت بلاقى الطريقة دى عملية أكتر وسريعة مع إنها أحيانا بتسيب أثر فى كمام البيجامة .. وكمان فادتنى كتير لما روحت سكن الطالبات


 أنا كنت دايما أقول لماما مش مهم انا بعمل الحاجة إزاى .. المهم النتيجة 

 بس هى كانت دايما تقولى لأ .. الوقفة فى المطبخ ليها أسلوبها وطريقتها 

 كانت دايما تقولى أنا مش هدفى إنك تساعدينى فى حاجة .. أنتى بتعملى كدة علشان نفسك علشان لما تتجوزى

 أقولها خلاص ياستى ليكى عليا قبل ما أتجوز بشهرين آخد قرص طبيخ مكسف وأبقى طباخة مية مية 



كنت بتضايق أوى لما بلاقى ماما بالليل واحنا كلنا قاعدين سوا .. وهى واقفة فى المطبخ بتعمل حاجات ..وأقعد أقول لنفسى هى بتجيب الشغل ده منين هو شغل المطبخ ده صبح وظهر وبالليل كمان 

وأقول أنا لما هتجوز عمرى ما هعمل كدة .. المطبخ له وقته وبعد كدة خلاص شطبنا .. والواحد يقعد بعد كدة مع عيلته 

 لما ماما كانت تصحى بدرى وإحنا نايمين وألاقيها بتخربط فى المطبخ وأسمع صوت الحنفية شغال  .. 
كنت بتضايق لأن كان نومى خفيف جدااا .. وكان نفسى تبطل العادة دى وتصحى متأخر شوية .. حتى فى الأجازة بما إنها كانت بتشتغل .. إيه المشكلة يعنى 

 وكمان كنت بتضايق لما كانت تدخل الأوضة عليا وأنا نايمة علشان ترتب فيها حاجة .. وتقعد تخربط فى الأوضة 

 وأقولها طيب ما تستنى يا ماما لما أصحى ..

تقولى يعنى أستنى للظهر .. ليه هو أنا مش ورايا غير اوضتك

 أقولها طيب انا لما هصحى هرتبها 

 تقولى .. مش هتعملى حاجة .. أعملها انا أضمن  

 (كانت بتثق فيا ثقة عمياء)

 كان ناقص تطبق البطانية وانا فيها علشان تبقى خلصت ترتيب البيت 

 وكانت دايما تقولى إنى أنا المفروض أصحى بدرى 
( طبعا ده كان بيكون فى الأجازات )

 بس بقى انا كان عندى وجهة نظر ومقتنعة بيها  فى الموضوع ده

بما إنى طول السنة فى دراسة زى أخويا الولد بالظبط ..

مينفعش لما آخد اللأجازة أقضيها فى المطبخ وهو يبقى سهران براحته ومزاجه حلو .. وانا إللى أدخل أنام بدرى و أصحى بدرى علشان عندى شغل بيت الصبح ... أومال هرتاح إمتى بقى 

 والله لو مش عاجبهم الحال ده .. كان عملوا معانا زى زماااااان ...

لما كانت البنت مش بتتعلم وحتى بنات الذوات كانوا بيجيبولهم فى البيت مدرسين يعلموهم القراية والكتابة .. ومدرسة البيانو ومدرسة الفرنساوى وخلاص .... 

وبيتعلموا التريكو والكروشيه والأشغال اليدوية ........ والله كانوا زى الفل وقاعدين فى البيت مترستأين .. ولا مواصلات ولا سكن طالبات ولا بهدلة وفى اللآخر كانوا بيتعلموا أحسن مننا

 مأنا فضلت أربع سنين رايحة جاية بلاد تشيلنى وبلاد تحطنى علشان أتعلم إسبانى وفى الآخر قعدت فى البيت ومش فاكرة منه حاجة غير hasta la vista  يعنى إلى اللقاء

 وياما انا وشيما صاحبتى 

دعينا على هدى شعراوى وقاسم أمين 

وإحنا صاحيين الصبح بدرى ورايحين الكلية ومتعكننين

وبنقول منهم لله مكونا فى بيتنا مرتاحين 

 ووقتها مكوناش عارفين لا إحنا  ستات بيوت شاطرين 

ولا عارفين نبقى زى الولاد 
طول السنة فى دراسة وفى الأجازات مرتاحين ومبسوطين ...

بقى عندنا بدل الشغلانة الواحدة شغلانتين 

ولا إحنا فى دى عدلين ولا فى دى فالحين 



 الحكاية قلبت معايا شعر ههههههههههه .. مكنش مقصود والله بس طلع معايا كدة 

 البوست الجاى إن شاء الله هقولكم .. إيه إللى إكتشفته فى مطبخ سنة أولى جواز .. غير عندى وجهات نظر كتييييييير











70 التعليقات:

مواطن شووجااع يقول...

هههههههه


( أول مرة أشوف واحدة بتكدب وبتقول إلخ
إلخ )

VÖltaa يقول...

ههههههههه

لا حلوة تقعدى في البيت ويجبولك مدرسين بيانو وفرنساوى

طب تصدقى انا امى فى مرة حاولت تعلمنى ازاى اعمل مكرونة ورز
وتقولى واخد بالك ؟ اقولها مممممممم
وبتبص عليا لاقتنى ماسك جزرايا وبقرا فى جرنان عالرخامة
هههههههههههه

الشعب لابد له من حكومه تشكمه يقول...

خدى الحته دى:
olaaaaaaaaaaaaa العواف عليكى بالاسبانى:)

اسسسسسسسسسسسسسسسسكتى كلللله كووووووووم وكم البيجاما كوم تانى:)
فاكره التريننج بتاعى لما ساح,يانهارى دحنا كنا فشله:)
ولعلمك باه انا لحد دلوقتى بقلب البطاطس بايد واحده هى تقول لا ولااييييييييه,وبعدين ما انا بقلبها بايد التانيه اعمل بيها ايه احطها فى الزيت يعنى؟؟:)

بس متخيله انا طنط اصلى عندى نسخه منها:) سلميلى عليها اوى وحشتنى والله,

وضمى رفاعه طهطاوى لقاسم امين وهدى شعراوى بالمره:) اومال تمثاله دا كان منظر فى الكليه ولا ايه؟

بس انا اشطر منك انا فاكره فى الاسبانى كومستاس؟؟موى بيان جراسيس:)

يخيبك باه عملتهونى ونستيه:)

وايييييييييييييه كما قال عندليب الشرق محمد محى:
زى مروحنا زى مجينا بس الاسم اننا اتعلمنا:)

سمع هوص (Abo 3li) يقول...

ههههههههههههههههههههههههه
والله ضحكتيني... انا عمال اقري حاجات كئيبة من الصبح...
اخيرا حاجة تضحك...

"كنت بتضايق أوى لما بلاقى ماما بالليل واحنا كلنا قاعدين سوا .. وهى واقفة فى المطبخ بتعمل حاجات "

تعرفي ان انا كمان الموضوع ده بيضيقني... بسلحد م الجوع يعمل عمايله...ابتدي اسألها هوا مفيش عشا ولا ايه ياحاجة....

تحياتي

ذكرى رحيل قلم يقول...

السلام عليكم
عندك حق يختي
هههههههههههههههه


مكنا في البيت متستفين في بد المية الف وشويا هههههههه

بس احلي حاجة الكلمتين الاسباني هقعد اقولهم لزوجي
كل شويا hasta la vista

الحمد لله انا كنت بحب اعمل اكل قبل الزواج عشان انا مشش بحب الطبيخ وبحب اكل النواشف

ونئضيها
دمتي يا قلبي
ربنا يسعدك

Mahmoud Ahmed يقول...

ههههههههه
بس انتوا مش هيعجبكوا حاجه
لو قلنا اقعدوا في البيت
يبقي احنا وحشين
اشتغلوا
مش عايزين
ههههههههههه
امال تحبوا ايه طيب ^_^ ؟؟

شمس النهار يقول...

مش مهم ذكريات مطبخ ما قبل الزواج

دي كانت تجارب في الاخوة الزملة في البيت ماما بابا اخواتك
وهتخدي تريقه وكلنا ستر وغطا علي بعض
المهم ذكريات سنة اولي مطبخ في بيت الزوجية
حيث لأ لأ مام مابتطبخش كده
فينك ياماما تشوفي ابنك وهوه بياكل اي كلام
:::)))


سلامي

صيدلانيه طالعه نازله يقول...

هههههههههههههههه
كلنا كنا كده نفس البرود الا متناهى
المنقطع النظير
و يا ما نمت و سبت الست الغلبانه تطحن لوحدها و عملت عبيطااااااااااااا

بس الحمد لله ربنا مبيسيبش حق حد ربنا خلص تارها منى تالت و متلت

محمد فؤاد (صاحب عمود النور) يقول...

واللهى كل البنات دلوقتى بقوا كدا مش بيقفوا فى المطبخ ولا بيطقواه

خلالالالالالاص زمن الستات اللى على حق راح واختفى ههههههههه يعوض ربنا

كلامك دا بياكد حاجه واحده ان الاسلام فعلا اعز الستات وقال انهم مالهمش غير البيت

صباح الفرن

هههههههههههه

خواطر شابة يقول...

تعرفي بفرح لما بأكتشف اني مش حالة استتنائية وان فيه زيي كثيير عجبتيني هنا "بما إنى طول السنة فى دراسة زى أخويا الولد بالظبط ..
مينفعش لما آخد اللأجازة أقضيها فى المطبخ وهو يبقى سهران براحته ومزاجه حلو .. وانا إللى أدخل أنام بدرى و أصحى بدرى علشان عندى شغل بيت الصبح ... " شفت الهم اللي أحنا فيه ولو انزعجت يقولولك ماهوا راجل وانا الكلمة دي بتخليني أعند وأقول طيب والله ماأناعاملة حاجة هههه

هناء محمود يقول...

مواطن شووجاااع

شكرا على المرور

هو فعلا انا مشوفتش حد بيكدب وبيقول إلخ

هناء محمود يقول...

mo7ammed

المفروض بقى بجد تركزوا انتوا كمان مع مامتكم فى المطبخ .. علشان تعرفوا حاجة اهى تنفاعكم فى مساعدة المساكين إللى هتتجوزوهم

هناء محمود يقول...

شيما

hola seniorita

زودى إتش بس مبتتنطقش

شوفتى انا لسه فاكرة برده شوية حاجات

فاكره الترنج .. وكل هدومى انا كمان كان كمامها سايحين

بس المشكلة كنا بنحتاس فى الصيف مش بنلاقى كمام



أنتى فعلا عندك النسخة التانية فى البيت .. أنا اكتشفتها أخر مرة زورتك فيها .. لما كانت بتنصحنى أعمل إيه فى الطين إللى فى ديل الإسدال لما أروح ههههههههه فاكرة


هما مشتركين فى شرح الحاجة مع الزن المستمر ههههههههههههه


أنا كمان فاكرة من التشيكى

تسوز نامينا و نى هههههههههه

فاكره إنتى da بتاعة الروسى يعنى yes دا الروسى ده كان عجبة

هههههههههههههههههههه

وسباسيبا إللى كانت نشوى بتنصب علينا فيها

هههههههههههههههههه

كفاية كدة بقى انا حصلى إنتعاش فى الذاكرة

على رأيك زى ما روحنا زى ما جينا
بس إللى طلعنا بيه ذكريات سكن الطالبات والله إتعلمنا منها أكتر من إللى إتعلمناه فى الكلية

هناء محمود يقول...

سمع هوص

الحمد لله إن البوست بتاعى خرجك من الإكتئاب

ماهو إللى بتقول عليه ده بيظهر اكتر بعد الجواز

الراجل يقول لمراته إنتى مش بتقعدى معايا ليه وواقفة فى المطبخ

وفى نفس الوقت أول ما بيشوف وشها يقولها جعاااااااان

هناء محمود يقول...

ذكرى رحيل قلم

بس علشان تتفزلكى على جوزك عدل هقولك بتتنطق إزاى

hasta la vista

أستا لا بيستا

مش زى الإنجليزى يعنى

علشان متروحيش تتفزلكى غلط هههههههههه

هناء محمود يقول...

سبيدرمان

الفكرة مش إننا مش عاجبنا حاجة

لازم نتعلم طبعا .. بس بجد وجهة نظرى فى الموضوع ده

إن المفروض يدخلولنا فى التعليم الحاجات إللى هتنفعنا فى حياتنا بعد كدة .. إيه المشكلة إنهم يعلمولنا الطبيخ فى الجامعة وأساسيات الحياة

وشوية نصايح ومعلومات عن تربية الأطفال مع المواد التانية إللى بندرسها

عل الأقل علشان الواحدة لو مشتغلتش تبقى إستفادت بحاجة فى حياتها العملية .. مش ضيعت وقت على الفاضى وخلاص

هناء محمود يقول...

شمس النهار

متستعجليش .. التقيل جاى ورا

وكله فضايح


دا كان طبعا

دلوقتى كله إتظبط الحمد لله

نورتينى يا ماما شموسة

هناء محمود يقول...

صيدلانية طالعة نازلة

أنا زيك بالظبط

وفعلا طلع عليا دلوقتى تالت ومتلت ومربع كمان

ههههههههههههههههه

هناء محمود يقول...

محمد فؤاد

أنا معاك إن الست دورها الأساسى فى البيت

بس مش معنى كلامى إنها تفضل جاهلة متتعلمش

بس كان قصدى يشوفوا إللى يناسبها أكتر ويعلموهولها

حتى لو هيضيفوه للمواد الدراسية إللى بتتدرسها فى اى مجال هى إختارته

مش تبقى متبهدلة فى الكلية وبتتعلم حاجات حتى الولاد شايفين إنها مش هتفيدهوم فى حاجة وكلها تضييع وقت

وتروح البيت أمها كمان عايزة تعلمها شغل البيت إللى مش بيخلص

كدة بجد يبقى كتير وبهدلة وفى الحالة دى فعلا البنات مش هتستحمل

علشان كدة تلاقى الإتجاه للقعاد فى البيت كتر دلوقتى وإللى تعب فيه قاسم آمين بدأ يروح هدر الحمد لله

هما كانوا عايزين يفيدوا الست وينقذوها من الجهل

بس بصراحة انا شايفة إن تطبيقهم كان غلط وناقص حاجات كتيييييييير

هناء محمود يقول...

خواطر شابة

لأ دانا كنت من أنصار المرأة جامد وأنا فى بيت اهلى

وكنت دايما بطالب بالمساواة جوه البيت بس طبعا ههههههههه

والحمد لله ربنا رزقنى بزوج أمه غلطت نفس غلطت أمى فى تربية أخوية .. وعلمته إن الراجل راجل والست ست فى البيت

هههههههههههههههههههه

Mahmoud Ahmed يقول...

انتي تعرفي
كان في مدرستنا و في كل المدارس الثانوي
لازم تاخدي حاجه + مواد الثانويه

يا اما

زراعه او صناعه او اقتصاد منزلي

الى هو النشاط ده الى لازم تنجحي فيه وخلالالاص

تصدقي ان كل البنات دخلت زراعه او صناعه

و محدش قرب ناحيه الإقتصاد المنزلي ^_^

...

يعني انتوا عايزين تتعلموا لحد الثانويه بس

و بعدين في الجمامعه يكون فيه تعليم ازاي تكوني ست بيت ؟؟ صح كده الي انا فهمته ؟؟ ^_^

هناء محمود يقول...

على فكرة إحنا كمان كان بيطبق عندنا نفس الشئ

انت عارف البنات كانت بتاخد زراعة أو صناعة ليه

لأن كان المدرسين مش بيشتغلوا فى الحصص دى والبنات بتقعد تتكلم مع بعضها

ومدرسات الإقتصاد كانوا بيشتغلوا وبيطلبوا حاجات كتير من البنات

إنما بقى لو مدرسين الصناعة والزراعة كانوا بيشتغلوا بضمير .. وبهدلوهم فى الزراعة والطين وكمان الخشب والمناشير والشواكيش فى الصناعة

كانوا أخدوا ديلهوم فى سنانهم وطفشوا على الإقتصاد



أنا أقصد من كلامى إن يكون فى إقتصاد منزلى وكمان أى دراسة ومعلومات تفيد البنت لما تتجوز وتخلف
تكون ماشية مع دراستها بخط متوازى حسب سنها طول سنين حياتها الدراسية

بس بشرط تكون بتنضاف للمجموع وبتفرق معاها .. علشان متستهترش بيها وتهملها على حساب المواد التانية الأهم

ساعتها البنت هتتخرج من الكلية وتبقى فول أوبشن وعمر ما تعليمها هيروح هدر حتى لو قعدت فى البيت ومشتغلتش

ولو برده إشتغلت .. ساعتها هيكون أفضل برده لأنها على دراية كاملة بمتطلبات بيتها وأولادها

هيثــم رمضـــان يقول...

جميلة أوي يا أم بوبه إسلوبك أكثر من رائع وشيق جداً جداً وبيخليني مش عايز البوست يخلص وطبعاً خفة الدم في المواقف والأحداث بتجذب القاريء جداً لأنه مشتاق للإبتسامه .

hasta la vista

البنفسج الحزين يقول...

كلنا هذة الفتاة ...
يا بنتي بيت الأسرة مهما كان مملكه الأم وهي صاحبه القرار في كل حاجه ومهما عملتي فيه لازم هيكون دورك ثانوي ,,,
البنت مش بتحس انها سيدة القصر هههه(أو صاحبه القرار)الا في بيت جوزها لما تستقل ...

إيمان يقول...

هههههههههههههههه بوست تحفه ...بس ده مش يمنع انى باعرف اعمل معظم اصناف الاكل والحلويات والخ الخ الخ بدون كدب ههههههههههه
وباسهر براحتى واصحى الظهر اعمل الاكل واروق البيت وعامله فيها سعديه الخدامه طول الاجازة وعلشان مامتى موظفه برضو اوقات لما برجع من كليتى بدرى اتولى انا امر الغداء وامرى الى الله ...بالنسبه للاوامر فحاليا انا اللى بديها لماما ودايما خناق على السهر والصحيان بدرى ازاى تسبنى انام واقولها ماانا بعملك اللى انتىت عيزاه سبينى بقا ولكن الامهات طبع فيهم لازم يصحونا بدرى فتعودت انى قبل ماانام اقفل باب اوطتى ولا ازعاج بعد النوم ههههههههههه
هاستنى بوست سنه اولى جواز خلينا نتفرج قصدى نتعلم قبل ما نقبل على عش الزوجيه ربنا يستر
مع خالص حبى وحبى

Mahmoud Ahmed يقول...

بدايه بس قبل ما ارد
عجبتي قوي قوي قوي
كلمه بنت فول اوبشن دي
هههههههههههههههههههههههههههه
هههههههههههههههههههههههههههه
...
طب مش هيبقي فيه ظلم يعني لو الحاجات ده تنضاف للمجموع :(
اممممممم
عاوزين تدخلوا انتوا كليه الطب و احنا لأ ههههههههه
...
هو كلامك صح ،مكانوش بيعلموا حاجه
بس البنات عندنا حاجه تتعلم بيه شغل البيت
...
اممممممممممم
خلاص هو الحل الآمثل يعملوا ليكوا كليه اضافيه + الكليه بتاعتكوا هههههه

...
..
.

بس بجد بجد
لو عايزه تسمعي راي
مفيش احسن من والدتك
تساعديهاو تكسبي ثواب
و تتعلمي و ترحمي جوزك
ههههههههههههههه

...
..
.

لو عندك بنت فول اوبشن قوليلي و انا اتجوزها من بكره ^_^

Mahmoud Ahmed يقول...

و بما انك متجوزه
فأكيد اتعلمتي الطبخ
لو تخدميني خدمه
عمري ما هنسهالك ابدا ابدا
نفسي اعرف طريقه عمل ( سلطه الكول سلو ) ؟؟؟
لو تعرفي تعمليها ياريت الطريقه ^_^
اصلي غاوي سلطات شويتين
و غاوي طبخ بس عشان اأكل نفسي بس
انام لما اتجوز مش هحط ايدي في اي حاجه نوهائي ^_^

قلم رصاص يقول...

طبعا انتي تعرفي ان أحسن الطهاه في العالم رجاله .. يعني الحاجة الوحيدة اللي مفروض تبقوا فالحين فيها عننا .. احنا تفوقنا برضوا عليكوا ههههههههههه
(وش مطلع سانه)

بس حلو اوي بجد اسلوبك .. بس واضح ان ماما طيبه وبنت حلال .. دي لو ماما تانيه ، من عمايلك معاها كانت حاطتك في الفرن وداست 120 فولت هههههههههه


hasta la vista

مع ان عادل امام مقالهاش في الواد سيد الشغال وهو بيستعرض مواهبه العبقرية في الغنا بالافرنجي ههههههههههههه

مشكوره جداااااا ام بوبه على البوست الجميل دا والله

دمتي مبدعه

في امان الله

سواحة يقول...

احلى حاجة الفرفشة الى انت كاتبه بيها
ياه الواحد بقاله زمن مضحكش يا سينيورا

المهم دعيتى على الناس ديه كلها و بعدين
لما بوبة تكبر و تروح الجامعة حتكمل مسيرة الدعاء :-)))

سوال بتعرفى تقلبى الرز فى الححلة بايد واحدة برضه ؟؟

Cute Kitty **sookra يقول...

هههههههههههههههههههههههههههههههههه
ضحكتينى بجد
والله عندك حق انا بعمل كدا بمسك باكمام البيجامه او العبايه او اى كان

والله بجد ضحكتينى وتخيلتك فى المطبخ وانت فى منتهى الشياكه كدا وايدك فى جيبك
وبتغاظ جدا من موضوع الصحيان بدرى دا
يخرب بيته
ههههههههههههههه
مساكى شيكولاته

غير معرف يقول...

هههههههههههههههههههههههههه

كانك بتحكى عنى
فكريتنى لما ادخل المطبخ كنت ببقى لابسة الساعة والبنطلوبن والبلوزة وعادى جدا ولاتقوليش خارجة

بس الزمن بيربى صحيح لسة صغنونة وف كلية ومتوزتش ولا كبرت اوى بس الزمن نعمل فيه ايه ههههههههههه

بس اسلوبك حلو اووى وياترى دلوقتى بقيتى بتدخلى المطبخ ازاى

مستنية البوست الجاى
وربنا يوفقك دايما

just waiting يقول...

احمدك يارب احمدك يارب احمدك يارب
مش انا لوحدي الي بتمسك الحاجات السخنة بطرف الكم وتبوظ بجامتها وبعدين من امتى بنقلب البطاطس بأدينا الأتنين على فكرة احنا مضحوك علينا مش المفروض اصلا نمد ادينا في حاجة من اساسه طبقا لمبدأ ليه تعمل بمزاجك دلوقتي لما هتعمل غصب عنك بعدين :)

حنين يقول...

ام بوبه الجميله
ازيك وازى بوبه
ايه المغامرات دى اللى مع المطبخ
فكرتينى كان لى ذكريات كتير
وكنا بندخل المطبخ دلع دلوقتى
انتى عارفه طبعا يلا نحمده
تحياتى

Mahmoud Ahmed يقول...

اتفضلي يا افندم
اهداء ليكي ^_^
http://islamblog-spiderman.blogspot.com/2010/02/blog-post_11.html

حصان المرجيحة يقول...

احسن حاجة اعترافكو انكو مش زي الرجالة
يعني البنت مش زي الولد زي مابيقولو
بس يا تري دي الحالة العامة و للا ....
شكرا ليكي

ستيتة يقول...

طب والله يا نوؤا انتي كنتي طيبة
يعني كنتي بتقلبي البطاطس
ده انجاززززززززززززززززز

غيرك عمره ما دخل مطبخ ماما
وربك ستر
ومكنش فيه خسائر في الأرواح بعد أول سنة
كل الحدوتة بس كنت ببدأ أطبخ عشرة الصبح
يقوم يعمل فطار كبييييييييييييييير ويقعد يلغ
لأنه عارف أنه ها يتغدى 6 المغرب :)

!! a7mad sala7 !! يقول...

اااايوة
تخنى مخهم بقي

تلاقي الواحدة عندها ييجي 20 سنة ولا تفقه شيئ
وتيجي تكلمها تقولك لسه بدرى
يا بنتى مش هتتجوزى كده هتفضلى جنب ماما
تقولك هتعلم قبلها لسه بدرى

وماعتقدش انها بتتعلم اوى يعنى
والغلبان ييجي يشيل يا عيني على عماه

واللى يغيظ بقي
يروح الخطيب يتغدى عند خطيبته

اللـه جميلة المكرونة بالبشاميل دى مي ناللى عاملها
ترد تقوله انا يا حبيبي
وتلاقيها اول مرة تشوفها قبل ما ييجي ب5 دقايق

يتجوزها الغلبان ويكتشف انها مبتعرفش تسلق المكرونة اصلا :D

اللهم احفظنا :)

morgana يقول...

انا ادخل المطبخ واعمل كل حاجه بس بمزاجي
ومحدش يعمل نص الشغل ويقولي كملي
يا اعمل من الاول يا بلاش خالص
ولو ماما في البيت مبمدش ايدي في حاجه طبعا:D

بس ما بصحاش بدري بردو

مسيرنا هيبقي لنا بيت وهنبقي مضطرين نصحي من بدري ونعمل شغل البيت كله

بس وقفة المطبخ متعه

هناء محمود يقول...

هيثم رمضان

شكرا على المرور والمتابعة وإهتمامك الدائم بالأسلوب والمضمون

هناء محمود يقول...

البنفسج الحزين

سيدة القصر إيه

قولى خدامة القصر .. البت إللى بتنضف القصر

إنما سيدة القصر دى فاتن حمامة الله يمسيها بالخير

ههههههههههههه

هناء محمود يقول...

emymony

دانتى شطورة خالص ربنا يخليكى لماما

إن شاء الله هتبقى ست بيت مية مية

هناء محمود يقول...

سبايدر مان

وماله لما يعملولنا مواد إضافيه

مانتوا كمان محتاجين مواد إضافيه

فى إدارة البيت وتربية العيال ولا إحنا إللى هنربى لوحدينا

وساعتها يبقى مفيش مشكلة من إضافتها للمجموع

ومحدش يبقى أحسن من حد

هناء محمود يقول...

سبايدر مان

نسيت أقولك

إن البتاعة إللى بتسأل على طريقتها دى

ممكن تلاقيها فى الصيدلية جاهزة احسن

هناء محمود يقول...

قلم رصاص


الفكرة إن الست إتشتت بجد

وبقى اكتر تفكير الستات بتوع حقوق المراءة إنهم يبعدوا عن أى حاجة تخص المراءة .. ومش عارفين يفلحوا فى حاجات الرجالة .. فلا هما نافعين هنا ولا هنا

بس ده مش معناه إن الست فاشلة فى كل حاجة لأ

الست ذكية جدااا وساعات بتكون بستين راجل

بس هى تخليها فى إللى بتفهمه وبتحبه حتى ولو كان تخصص رجالى .. إنما بلاش يكون الهدف الوحيد بس إنها تثبت إنها زى الراجل

ده تركيبة وهى تركيبة تانية ومش معناها إن فى حد فيهم افضل من التانى .. الإتنين محدش فيهم يقدر يستغنى عن التانى والحياة عمرها ماتمشى من غير الإتنين

هناء محمود يقول...

wanda

لأ انا مش بقلب الرز أنا بسيبه كدة قرص جميل على بعضيه .. علشان مطلعش إيدى من جيبى


ههههههههههههههههه

هناء محمود يقول...

sokara

دانتى هتبقى طباخة بريمو إن شاء الله

متعمليش حساب فوط المطبخ فى الجهاز بقى ... ماشى

هناء محمود يقول...

star in the sky


لأ الموضوع إتغير تماما دلوقتى وإتربيت خلاص .. وعرفت إن ماما كان عندها حق وأنا إللى كنت بدلع

ودلوقتى بتأدب ههههههههههه

هناء محمود يقول...

just waiting

طيب كويس دا طلع كتير أوى بيعملوا الحكاية دى

وكمان البطاطس فعلا مش محتاجة غير إيد واحدة .. انا مش عارفة هما بيحبكوها كدة ليه .. استمرى استمرى ولا يهمك

هناء محمود يقول...

حنين

كلنا بندخل المطبخ دلوقتى زى ال ....

بلاش

إنتى عارفة طبعا أدب واخلاق ومفيش حتى بم

مجبر أخاك لا بطل

هناء محمود يقول...

حصان المرجيحة


أنا موافقة طبعا إن البنت مش زى الولد

بس ده لأن طبيعتهم وفطرتهم مختلفة وقدراتهم كمان

بس ده مش معناه إن الولد احسن من البنت أو العكس

لكل واحد فيهم دور التانى ميقدرش يقوم بيه

ومينفعش واحد فيهم يسيب دوره علشان يثبت للتانى إنه يقدر يقوم بدوره

هناء محمود يقول...

دكتورة ستيتة

شوفتى بقى

أنا كنت بعمل ده كله .. والست ماما مش عاجبها .. ومش فاكرالى أى جميلة لحد دلوقتى

بس كويس إن جوز حضرتك كان بيتصرف

انا أعرف واحد كانت بتعمل كدة بس فى رمضان .. كانوا بيفطروا العشا

ههههههههههههه

هناء محمود يقول...

a7mad sala7

أنا مع إن البنات تتعلم الطبيخ

بس ضد إنها تقضى حياتها قبل وبعد الجواز فى الطبيخ .. لأ كدة حرام

من أول ما توصل ل 13 سنة بالكتير يعنى

يبقى مطلوب منها تحضير فطار وغدا وعشا وتنضيف وترتيب

أومال هتستريح إمتى .. ولو مدلعتش فى بيت أهلها هتشوف الدلع ده تانى فين

دانا بقالى 4 سنين متجوزة وزهقت من الروتين اليومى ده

كفاية حتى التفكير أنا هطبخ إيه النهاردة مع إنى بقالى أربع سنين بطبخ كل يوم

أومال إللى متجوزين بقالهم 30 سنة حاسين بإيه دلوقتى

إللى مش عاجبه بقى يتعلم الطبيخ إحتياطى ويبقى يعلم مراته ويساعدها

هناء محمود يقول...

morgana

أنا زيك بالظبط ولحد دلوقتى

مبحبش يبقى معايا حد فى المطبخ أو حتى أنا ادخل مع حد المطبخ وأقوله اعمل معاك إيه

أنا يا إما اعمل كله بمزاجى يا بلاش خالص

مبحبش الدور التانى ده ببقى كسلاااااااانة

إنما لوحدى ببقى دينامووو

قلم رصاص يقول...

"ده تركيبة وهى تركيبة تانية ومش معناها إن فى حد فيهم افضل من التانى .. الإتنين محدش فيهم يقدر يستغنى عن التانى والحياة عمرها ماتمشى من غير الإتنين"

بجد أحييكي على رأيك المحترم دا
لخصتي فيه الحكاية كلها

ربنا يكرمك

تقبلي مروري

أميرة الأحلام يقول...

ازيك يا جميل
موتينى من الضحك تقريبا كده كل الامهات زى بعض
وفكرتينى بنفسي في حاجات كده
زى اكمام البيجامات والنوم الخفيف
بس انا مكنتش اعرف اشتغل في المطبخ الا وانا مشمره اكمامى
ههههه
وكنت قبل ما اتجوز شاطره في المطبخ جدا
بجد مش كدب والله
ماما معودانا من صغرنا على دخول المطبخ
والتفنين فيه
انا رغيت كتير اوى
بس البوست بصراحه عجبنى
تسلم ايدك يا قمر

هناء محمود يقول...

قلم رصاص

متشكرين على التحية

دا واجب علينا

هناء محمود يقول...

أميرة الأحلام


كويس إن مامتك كانت معوداكى على دخول المطبخ من الأول

ماما بقى كانت مش بتحب حد يكون معاها فى المطبخ .. ولما كنت أدخل معاها كنا بنقضيها خناق هههههههه

فاتيما يقول...

هههههههه

فكرتينى بنفسى يا شيخة

تبق الأصل و الله

بس بعد الجواز فضلت برضو شرحو

و ملحقتش اخد كورسات الصراحة

و مبحبش الطبيخ لحد النهاردة

بس لما بخش المطبخ ساعات
الحى كله بيعرف و بيبقى يوم تاريخى
فى حياة الامة


مستنية اسمع حواديتك
هتفكرنى أكيد بالذى مضى

بوسة كبيرة لبوبة الجميلة
و حضونات ليكى

momken يقول...

الحقيقه انا اخر معلوماتى عن المطبخ فى بيتا انه فى اللدور الى تحت فى اخر الطرقه

لو كانوا غيروة يبقى هما السبب بقى فى انى معرفش اعمل حاجه فى المطبخ خالص

البوست جميل وى
وطريقه سردك روعه

تحياتى

هناء محمود يقول...

فاتيما

نورتينى

والبوسات والحضونات كلها وصلت

استنى بقى البوست الجاى علشان تضحكى عليا ههههههههه

بس متضحكيش أوى كلنا فى الهوى سوا

هناء محمود يقول...

momken


طيب كويس معلوماتك كويسة جدااا

طيب التلاجة بتاعتكم كانت فين فى المطبخ برده ولا فى تلاجة فى الدور التانى .. علشان متدخليش المطبخ نهائى حتى لو عايزة تشربى

بلا مطبخ بلا وجع دماغ

بيطرية ومش بايدى يقول...

بصى مبدئيا كده قبل السلام والكلام والحاجات دى
انا بوجه ندائى الى الست ام بوبة وابو بوبة وجدة بوبة والسيد المسئوم انه لازم يبوسلى بوبة بوسة اااااااااااااااااااااااااااااااااااااااااااااااد الدنيا كلها
لحد ماتتفعص
بعد الشر طبعا
ربنا يباركلك فيها ياااااااااااااااااارب وتطلع احلى بنوتة فى الدنيا وتفرحى بيها دايما

بيطرية ومش بايدى يقول...

اما بقى بالنوسبة للذكريات بتااعة المطبخ
فاانا الحمد لله نظرا لانى محاولاتى كلها باءت بالفشل ولم تلق اعجاب اى احد من الجماهير
واستوجب احضار عربة اسعاف 7 راكب مينو
فانا والحمد لله معدتش ليا ذكريات غير الارز المعجن وفقط
بس انا بعمل شاى يجنن عشان برده محدش يفقد الامل فى البيطرين
ربنا يسترها معانا

فوتك انا بعافية يااوختشى

المدونة تحفة تحفة تحفة من هنا لبكرة الصبح

هناء محمود يقول...

بيطرية ومش بإيدى

عجبنى إسمك أوى

أنا عارفة إن كل البيطريين مش بإديهم .. أصل كنت هعمل العاملة دى وبعدين رجعت فى كلامى ومخلتش حد يأثر عليا وغيرت إتجاهى لكلية تانية

ههههههههههههه

البوس والأحضان بتوع بوبة هيوصلولها إن شاء الله والتفعيص كمان .. أنا أصلا كل يوم بفعص فيها من غير ما حد يقول


مبدئيا الرز المعجن كويس

قللى بقى الماية وهيطلع الأول مش مستوى وبعدين زودى شوية وأقعدى جربى كدة لحد ما يتظبط .. كلها سنتين وهتبقى زى الفل إن شاء الله

هههههههههههههههه

نورتى المدونة يا جميل

Unknown يقول...

لما اتحطيت فى
المطبخ والطبيخ
بالغصب عنى لما
سافرت السعودية
لقيت الحكاية
سهههههههههلة
اوى المشكلة ايه
امال؟اللى بيقولولك
عليه:النفس!فى الطبيخ
أه بطبخ بس الكوسة تفتكريها
مكرونة بالبشاميل ولا بصارة يعنى!:)
بوست جميل ياأم بوبه واللى زاده
حلاوة صور بوبه الجميلة.ربنا يميها.

ShiMOo يقول...

\\كانت بتحاول كتير تقنعنى إنى لما أكون واقفة فى المطبخ أكون مشمرة إيديا الإتنين .. وأنا مكونتش بحب أعمل كدة\\


زي ما تكوني بتتكلمي عني انا وماما :))هههههههههههههه
بس بدأت اتأقلم الحمدلله وبعد مجهود جبار يعني عملت كيكة :">
ومش هعرف اوصفلك كنت مرعوبه ازاي اول ما حطتها في الفرن
وكنت فرحانه مووووووت اول ماداقوها وقالوا حلوه
ودايما ماما كانت تقولي ان المطبخ خبرة وتعود والحمدلله بعد ما عملت الكيكة لاول مره وطلعت حلوة قعدت اغيظ فيها للصبح p-:

على فكرة متابعة جيدة للبلوج بتاعك من اول بوست بس اعذريني كنتي بكتفي بالقراية ومش بعلق :)

ذكرى رحيل قلم يقول...

السلام عليكم
بجد متشكرين
حلوة قوي كده عشان انا كنت هقول زي الانجليزي
ميرسي ع النطق الصح
طيب ممكن بقي تعمللنا شويا اسباني مع النطق العربي ونتعلم منك ومنه تتذكري اللغات اللي تعلمتيها
والسنين مترحش هدر ومن علمني حرفا
سرت له عبد

ههههههههه

دمتي بحب وود

هناء محمود يقول...

norahaty

ههههههههههههههه

ضحكتينى بحكاية النفس دى

بجد النفس ده بقى إللى اكتشفت إنه بيجى من الخبرة والممارسة

هناء محمود يقول...

shimoo

نورتينى بتعليقك يا جميل وياريت كل مرة تقرى تعلقى فيها .. متقريش وتجرى

على فكرة بالنسبة للكيكة أنا بسمع دايما عن حاجة إسمها حظ المبتدئين
نجاح الشئ اول مرة مش بيضمن نجاحه تانى مرة

جربى تانى كدة وقوليلنا الأخبار

هههههههه

هناء محمود يقول...

ذكرى رحيل قلم

إنتى تؤمرى يا جميل

يعنى أروح اطلع القاموس بقى علشان أغش وأقولكم هههههههههه

بس انا هاخد فى الحصة مممممممممممم

متخافيش هكرمك برده مش هعاملك زى الغريب