الثلاثاء، 4 سبتمبر 2012

كلمتين عايزة أقولهم .. من غير مناسبة ..........

 
 
 
السلام عليكم ورحمة الله وبركاته
 
مساء الخير يا مدونين .. معكم أم بوبة أحد الطيور المهاجرة .. مهاجرة من التدوين .. وكمان مهاجرة من مصر .. بس بفكر أرجع للتدوين بس .. أما مصر لسه شوية أما يظبطوا موضوع  قطعان النور ده أبقى أفكر ..............
 
 
طقت فى دماغى أقول كلمتين جد قبل ما أنام .. موضوع كدة جه فى بالى .. مش عارفة إيه إللى جابه .. بس فى الوقت ده لما بيكون الواحد تحت تأثير النوم .. عادى ممكن يجى فى دماغه أى حاجة من غير مناسبة 

 أحب أنوه بردو قبل ما أتكلم إن كلامى ده غير نابع من تجربة شخصية والحمد لله ولكن تجارب الناس حوالية زى الشمس بنسمع وبنشوف كل يوم عبر لازم نحطها قدام عنينا على طول وأكيد بتأثر فينا ....
 
 ( الكلام كبير صح ... إنتوا لسه شوفتوا حاجة )
 

 أحب أقول لكل بنت نفسها تتجوز أو إتأخرت فى الجواز ... متفتكريش إن السعادة ربنا إقتصرها على المتجوزين وبقيت الناس عايشين فى تعاسة .. السعادة دى رزق ممكن يبقالك نصيب فيه بأى طريقة وفى أى مكان .. ربنا وحده إللى قادر على كدة
لو بصيتى حواليكى هتلاقى ناس كتير إسمهم متجوزين بس بتندم ندم عمرها وكانت تتمنى لو عاشت طول عمرها من غير جواز بس ممرتش بالتجربة دى

 الله أعلم تأخير جوازك أو عدمه ربنا كاتبلك إيه عنده أو عافاكى من إيه يمكن حظك أحسن من ناس كتير جربوا وندموا على التجربة دى وسابت فى حياتهم وحياة غيرهم كمان أثر مش كويس فضل معاهم طول عمرهم

مش المهم تدعى إنك تتجوزى وبس .. الأهم إنك تدعى ربنا يرزقك الزوج الصالح ويجعلك الخير والسعادة فى جوازك منه .. ولو إتأخر أو مجاش خالص متزعليش واحمدى ربنا إنتى أحسن من ناس كتييييييييييييييير واستمتعى بحياتك وعيشيها كويس متفضليش عايشة منتظرة وبس .. إمشى فى طريقك عادى وإللى ليكى نصيب فيه هتشوفيه إن شاء الله

أحب أقول بردو لكل زوجة إتجوزت ولسه ربنا مرزقها بالأولاد .. وحياتها كلها كآبة وحزن ومش قادرة تعيش حياتها كويس هى وجوزها والموضوع ده هو محور حياتهم وكلامهم وكأن الدنيا مش هتمشى من غير أولاد

 .... لو دخلتى أى مستشفى وشوفتى أم محجوزة بإبنها المريض إللى بقاله سنين مغير محل إقامتها ومخليها مقضية حياتها فى المستشفيات من يوم ما إتولد .. هتعرفى إن مش كل طفل بيخلى حياة كل أم جنة ... على أد ما هى بتحبه وتتمنى إنه يخف على أد ما ساعات بتوصل بأمهات إنها تتمنى موت إبنها من كتر ما قلبها وجعها عليه

زى ما ضحكة الطفل بتنور حياة أمه .. بردوا لو دخلت فى جسمه شوكة كأنها دخلت قلبها ... متفتكريش إن كل أم عايشة حياتها بتجرى ورا إبنها وبتلعب معاه وبيضحكوا وضحكهم مالى البيت أيوة فى طبعا أمهات كتير كدة ربنا يباركلهم فى أولادهم يارب.. بس بردو فى أمهات كتير حياتهم إتحولت لجحيم من يوم ما خلفوا .. وعارفين كويس قيمة الوضع إللى انتى فيه ومش راضيه عنه

مش مهم تدعى إن ربنا يرزقك بطفل وخلاص .. إدعيله هو كمان إن ربنا يعافيه من كل سوء ويقر عينك بيه وتفرحى بيه من قلبك .. وبردو متزعليش لو إتأخر أو مجاش خالص وعيشى حياتك وإحمدى ربنا إنتى بردو أحسن من ناس كتير ويمكن ربنا أراد بيكى الخير وانتى مش عارفة

( أنا الظاهر رغيت كتير ... إنتوا كمان مش متعودين على الكلام الجد ده  منى)

علشان كدة أحب أقول لكل إللى شاف كلامى  ده وقال فى سره إيه الرغى الكتير ده يا أم بوبة ......... إن جلاكسى هى إللى هتخلينى أعدى كل ده ( عندما تعشق الشيكولاته :):) تصبحوا على خير

9 التعليقات:

بيطرية ومش بايدى يقول...

وانتى من اهله
واحلام سعيدة
وعودة حميدة
وحاجا حلوة كتيرة
^_^
اما موضوع البوست فهو ف وقته الصراحة
بالنسبة لحاجات بتحصل قدامى ف الوقت الحالى
اغلب الناس مشكلتها انها رابطة السعادة بتوقيت
اللى هو وقت اما اتجوز اكيد هكون اسعد من دلوقتى واحسن من النهاردة
وبرده وقت ما اخلف اكيد هكون فرحانة اكتر من دلوقتى ان شايفة حتة منى قدامى
كل الكلام ده حلو اوى
بس الاقتصار عليه لوحده مش حلو خالص

الخلاصة من التعليق اللى هيقلب ع بوست
:D
جشطة عليك
وموااااااااافقة ع كل كلمة
وصباح الخير وكده :)

هناء محمود يقول...

مساء النور وكدة .. ونورتينى يا عسل .. الله يجبر بخاطرك يارب ويخليهوملك إنتى الوحيدة إللى دخلتى عندى النهاردة



والله الموضوع ده أكتر حاجة زهقتنى منه الفيس بوك فى بنات كل مهمتها فى الحياة انها تصحى من الصبح لحد ما تنام تشير فى بوستات كلها عن العريس وفستان الفرح والجواز ويوم الفرح وتدعى شوية وتتحسر شوية على الوقت اللى بيضيع منها

بجد حاسة إنهم مش وراهم حاجة تانية خالص وحاسين إن كل الناس أحسن منهم ومش بتدور على أى حاجة تانية تعملها غير انها تستنى وزيهم بردو إللى رهنين حياتهم قصاد الخلفة .. الدنيا فيها حاجات كتير أوى حلوة المتجوزين والمخلفين مش عارفين يعملوها وراحة عليهم يحاولوا هما حتى يستمتعوا بيها لحد ما يجى الجواز وتيجى العيال على مهلهم

أنا كمان الكومنت قلب معايا بوست أستأجز بقى

sony2000 يقول...

بجد ليكي وحشه من ايام الشوكلاتات:)

صدقيني كلنا بنمر بالحاله دي
حاله اننا بنخاف كون لوحدنا وكل اللي حولينا بيبقوا عوزين يخلصو مننا بأي طريقه ويحسسونا اننا حمل علي قلبهم

بس اهم حاجه الصبر

بيخلينا نعديها بردو

شمس النهار يقول...

ايووووووووووة كده
احنا عايزين الرغي الجميل ده
:))

تدوينة جميلة

وموافقة عليها
اللي يدعي يدعي صح

هناء محمود يقول...

sony 2000
أنا عارفة المرحلة دى رخمة كلنا مرينا بيها .. وكل واحدة حسب حظها اليوم فيها بيبقى بسنة عند أهلها وعند إللى حواليها .. والناس هى إللى بتحول محور حياة البنت لكدة

هما إللى بيحسسوها إنها نقصها حاجة وإنها عايشة بس علشان تستنى العريس

و إللى بتتجوز لولا الكسوف كانوا سألوها مفيش حاجة فى السكة تانى يوم جواز

هما بيصبروا شهر بالظبط ويقرفوها أسئلة بيحسسوا إللى بتتأخر فى حملها شهر انها بقالها سنة المفروض بجد الأسلوب ده لازم يتغير وكل واحد يكون فى حاله

وربنا يهدى الجميع

ونورتينى

هناء محمود يقول...

نورتينى يا شموسة .. أيوة كدة خلى المدونة تتشمس شوية تلاقيها كمكمت من كتر الركنة

ربنا يرزقنا كلنا نعمة الدعاء ويلهمنا بيه ويستجيب بكرمه ورحمته يارب

ديدي يقول...

عزيزتي أم بوبه :
للأسف الناس ما بترحمش ، ومحدش بيسيب حد في حاله ، من مصمصة شفايف ويا عيني الأصغر منها إتجوزوا وهي لاء، ولو راحت تجامل حد شوفي عامله في روحها إيه أصلها عاوزه تتجوز وياعيني عاملة روحها مبسوطة وهيا مقهورة من جوه ، ولوجالها حد ما توافقي وأهي جوازة والسلام ، أصلك لو كنت ملحلحة ونغشة كنتي زمانك معلقة حد من زمايلك .... موال أسود بعيد عنك ، بس نقول إيه ربنا عايز كده .
تحياتي لكي

هناء محمود يقول...

ديدى

عارفة وأكتر من كدة .. الناس كلمها بيكون زى الكرباج .. واللى مش بيتكلم عنيه ونظراته بتقول الأصعب من الكلام

بس القناعة الداخلية للشخص نفسه انه مهما حصل هو فى أفضل حال وانه حظه أحسن من ناس كتير أكيد هتفرق كتير واتمنى فيوم من الأيام إن الإحساس ده وثقتهم فى نفسهم تنعكس على الناس الفاضية اللى مش وراها حاجة الا متابعة اللى اتأخروا فى الجواز والخلفة .. ويرحموا نفسهم شوية ويرحموا الناس

التميز المثالي للخدمات المنزلية يقول...


شركة تاج للتنظيف بالدمام 0551844053

شركة رش مبيدات بالدمام

شركة مكافحة حشرات بالدمام

شركة تنظيف شقق بالدمام

شركة تنظيف فلل بالدمام

شركة رش مبيدات بالخبر

شركة مكافحة حشرات بالخبر

شركة تنظيف منازل بالخبر

شركة تسليك مجارى بالدمام

شركة تنظيف بالدمام

شركة تنظيف سجاد بالدمام

شركة مكافحة حشرات بالاحساء

شركة مكافحة النمل الابيض بالاحساء

شركة مكافحة حشرات بالجبيل

شركة مكافحة النمل الابيض بالجبيل

شركة تنظيف منازل بالجبيل

شركة مكافحة النمل الابيض بالدمام