السبت، 26 مايو 2012

مع السلامة يا مصريييين أنا مسافرة .. هتوحشونى .. ( سلامى لا يشمل الفلول )

السلااااااااااااااام عليكم ورحمة الله وبركاته ..
إزيكم يا مدونين عاملين إيه .
 وحشتونى قولت أما أدخل أبص بصة أهو بالمرة أهوى المدونة بتاعتى شوية بقالها يجى أكتر من سنة مفتحتهاش وتلاقيها مكمكمة وفيها شوية صور قديمة شيلتها ونفضتها كدة ورشيت إنتوا عارفين بقى الصيف والنمل بيبقى عامل إزاى 

وقولت أما أشوفكم فى ظل هذه الظروف العصيبة التى تمر بها البلاد عاملين إيه .. فرحانين ولا زعلانييين .. شبعانيييييين ولا جعانييييييين , هادييين ولا متعصبيييييين و مشفشقييييين

شفتوا إللى حصل  : 

أنا قبل ما الثورة تبدأ كنت منتظرة إبنى أحمد يشرف .. ويلاقى الدنيا بقت تمام وريس حلو إبن حلال والحياة إتغيرت .. 
والحمد لله حسنى سمع كلامى وانصرف قبل ما ميدو يشرف وينور .. 
والواد يعين أمه جه على نفسه وقعد سنة بحالها فى بلد ملهاش ريس ..
 والنهاردة أحمد إبنى كمل سنة بالتمام والكمال ربنا يبارك فى عمره ويرزقه طول العمر وحسن العمل ....

يقوووووووووم بعد كل ده يا شعب مصر .. أو بمعنى أصح الفلول من شعب مصر .. تبقوا عايزين شفيق ... شفييييييييييق .. شفيييييييييييق ياراجل

لأ لأ لأ أحمد زعلان بجد ..       

عامة أنا أصلا سايبة مصر قريب  .. كنت زعلانة أوى .. بس بصراحة من إمبارح  مش زعلانة خالص..
 ونويت أخد جنسية البلد إللى هروحها أهو بالمرة لو ميدو إتجنن وحب يرشح نفسه رئيس لمصر يستبعدوه .. 
وعندى حضانة هنا فى مصر إسمها بيبى سكول هغير إسمها .. هسميها بيبى فلول .... متنسوش بقى تبقوا تحضروا إجتماع أولياء الفلول أول كل شهر

أنا خلاص بحضر شنطتى وماشية هتوحشونى يا مصرييين 
المصريين اللى بجد .. الفلول أكيد مش هيوحشونى

دول بوبة وميدو بيساعدونى فى تحضير الشنط

7 التعليقات:

P A S H A يقول...

حمداً لله على السلامة يا أستاذة :)
بارك الله في أولادك وحفظهم من كل سوء
تروحوا وترجعوا بألف سلامة إن شاء الله
تحياتي

ستيتة يقول...

سعدت جدا انك مريتي عليا وسلمتي قبل ما تسافري
بوبة ما شاء الله كبرت
وربنا يبارك في مودي
اوعي ترجعي
علشان بحبك
روحي بكرم الله وعيشي وسيبي اللي هنا
الشعب ده يستاهل بعضه واللي ربنا كارمه ها يلاقي فلص ويخلع يا ست اووووسة
تحياتي

هناء محمود يقول...

pasha

الله يسلمك إن شاء الله رايحين والرجوع برده بإذن الله وحده

هناء محمود يقول...

دكتور ستستة مرورك أسعدنى بجد .. أكيد هتواصل معاكم برده بعد ما أسافر إن شاء الله .. بس حبيت أسلم عليكم وأنا لسه على أرض الوطن .. إللى الله أعلم بكرة هيكون إيه .. والله يا دكتورة مش عارفة أقولك إيه إحنا كلنا بنضحك وبنتريق وبنكت .. وبنطلع أحلى قفشات بس قلوبنا بتبكى بجد

وربنا يسترها من عنده

شمس النهار يقول...

اهلا اهلا
بلوجر نور
بس صدمتيني
يعني جاية تقولي باي باي

واهلا بالريس احمد نور الدنيا

:))
كل سنة وانتي طيبة

ظلالي البيضاء يقول...

السلام عليكم ..
رغم حالتي الـ "مخبثنة" قلت أدخل أشوف مين الزائرة الجديدة لمدونتي ..
لقيت نفسي هنا ..
ورغم إني عامل إضراب عن زيارة المدونات .. لكني لما دخلت هنا اضحكت .. "بس ضحكة مخبثنة" هههه ..

تروحي وترجعي بالسلامة ..
وأهو الحمد لله شفيق رحل .. ويمكن يدور على بلد تانية يعمل فيها ريس ..

ومبروك عليكي أولادك وربنا يبارك فيهم ويقدرك على تربيتهم تربية صالحة ويطلعوا من الفلول (عفواً قصدي يطلعوش من الفلول)

مع التحية الطيبة ..

التميز المثالي للخدمات المنزلية يقول...


شركة تاج للتنظيف بالدمام 0551844053

شركة رش مبيدات بالدمام

شركة مكافحة حشرات بالدمام

شركة تنظيف شقق بالدمام

شركة تنظيف فلل بالدمام

شركة رش مبيدات بالخبر

شركة مكافحة حشرات بالخبر

شركة تنظيف منازل بالخبر

شركة تسليك مجارى بالدمام

شركة تنظيف بالدمام

شركة تنظيف سجاد بالدمام

شركة مكافحة حشرات بالاحساء

شركة مكافحة النمل الابيض بالاحساء

شركة مكافحة حشرات بالجبيل

شركة مكافحة النمل الابيض بالجبيل

شركة تنظيف منازل بالجبيل

شركة مكافحة النمل الابيض بالدمام