الثلاثاء، 27 أبريل 2010

سر السكرتيرة والحارس الخاص


السلام عليكم ورحمة الله وبركاته

تحية كبيرة أوى ليكم كلكلم .. وبجد مع إنى بقالى كتير مكتبتش بس متبعاكم دايما وبقرأ أغلب مواضيعكم .. وعلى فكرة أنا راجعت المواضيع القديمة ورجعت بعضها 
ندخل فى الموضوع





طبعا العنوان غريب وعامل زى عنوان القصص الأجنبية المترجمة .. بس هو مش قصة ولا حكاية .... هو فى الأغلب حالة بتتكرر كتير .. وبنسمع عنها كتير .. ومحدش فكر هى ليه بتحصل وبتتكرر بنفس الصورة غالبا 

 وهى قصص الحب بين السكرتيرة والمدير .. والأميرات أو المشهورات وحارسها الخاص

 بصرف النظر إن كان عبارة عن حب صادق أو نزوة أو حب عابر .... إنما فى حاجة بتجذب الطرفين لبعض

أنا بقى عندى وجهة نظر متواضعة فى الموضوع ده بس مقتنعة بيها شخصيا

أولا بالنسبة للسكرتيرة والمدير

غالبا ومن وجهة نظرى إن المدير هو إللى بينجذب للسكرتيرة الأول أو بمعنى أصح بيكون الأصدق فى مشاعره لأن أسبابه بتكون مقنعة 

غالبا بتكون السكرتيرة بنت أو سيدة جميلة وشيك .. متعلمة ومثقفة ولبقة ... 
دايما أنيقة فى قمة زينتها و ريحتها حلوة ..
صوتها واطى وهى بتكلمه ..
بتعامله دايما إنه سيدها وهو الآمر الناهى .. والكلمة كلمته .. 
بتقول حاضر وبس ..
بترتبله مكتبه ومواعيده
ممكن كمان تاخد بالها من صحته لو عنده معاد مع الدكتور أو فى معاد دوا ... 

هو بيشوف فيها المرأة المثالية إللى بيحلم بيها ... وأنا قصدت أقول كلمة المرأة مش الزوجة ... لأنها هتتغير كتير لو أصبحت زوجة 

ومقصدش هتتغير للأسوأ .. أقصد الظروف هتتغير من حواليهم مش هيفضلوا طول النهار فى المكتب .. لأ هيشوفها وهى فى المطبخ .. هيشوفها مع العيال وهى بتزعق .. هيسمعها وهى بتنده عليه بصوت عالى لأنه مشغول فى حاجة ومش سامعها .. هيشوفها وهى صاحية من النوم من غير مكياج .. هيشوفها بالبيجامة والجلابية وأحيانا هى رابطة دماغها علشان بتنضف البيت ....

كل ده هى لازم تعمله ومحدش غيرها هيعمله وإن عملتوش هتتهم بالإهمال .. ومينفعش تعمله وهى فى قمة شياكتها وأناقتها ... بس للأسف ممكن الراجل يقارن بين زوجته وبين واحدة تانية ماشية فى الشارع أو معاه فى الشغل وكأنه متخيل إن الست التانية دى طول الوقت كدة حتى فى البيت  ويباخته إللى متجوزها


 كل المواصفات إللى ذكرتها عن السكرتيرة ... فعلا مواصفات جميلة ومهم إنها تكون موجودة فى أى زوجة ..

بس نفترض إن فى واحدة ست قدرت تكون سوبر ومن وعملت كدة أغلب الوقت ... يا ترى هتلاقى التقدير ونظرة الإعجاب من زوجها زى نظرة المدير للسكرتيرة ..

وهل يا ترى هتمسع من زوجها كلمات مدح وإعجاب زى إللى ممكن يقولها المدير للسكرتيرته .. زى ما بنسمع فى الأفلام والمسلسلات ( إنتى كل يوم بتحلوى عن اليوم إللى قبله )

ولا أى زوج بيبص لمراته على إن ده فرض عليها ولازم تكون كدة وكويس أوى إنى مستحملها فى الأوقات التانية إللى مبتقدرش تكون فيها كدة 

وبيبص لغيرها بنظرة إعجاب وتقدير على إنها سيدة أنيقة وشيك وجميلة وياريت كل الستات تعمل زيها ... وميهمهوش غير الظاهر وبس ... ولا بينطبق عليه فى الحالة دى المثل إللى بيقول ( شاعر البلد مبيسليهاش )




 بالنسبة بقى للحارس الخاص

 محدش سأل نفسه ليه دايما بنسمع قصص حب بين الأميرات أو المشاهير مع حارسها الخاص مع فارق المستوى حتى وإن كانوا متزوجات

 غالبا أو دايما بيكون الحارس الخاص ده ..
وسيم  ورياضى وأنيق وجان زى ما بيقولوا ..
وعايزة أقولكم إن أكيد المواصفات دى ممكن تجذب أى واحدة ست .. 
بس المواصفات الأقوى منها هى .. قوته وإحساسها بخوفه عليها حتى وإن كان ده بالنسباله تأدية لوظيفته .. 
بس بيحسس الست بالإحتواء والأمان والإهتمام وخصوصا إنه معاها طول الوقت مهتم بيها هى وبس مش شايف غيرها ..
مهتم بإهتمامتها حتى إن قعدت مع صاحباتها فى النادى بيروح معاها ..
لو كانت لواحدها ومش لاقية حد تكلمه .. بتكلمه وبيسمعها .. 
وقت الخطر بيدافع عنها ..
من الأخر هى كل دنيته 

ومع إنها بتكون مستواها أعلى منه بمراحل وممكن تكون متزوجه من أمير أو رجل أعمال مشهور بس على الورق وبس مش عايش معاها بروحه 

 ومع إن الحارس ده نفسه ممكن يكون متجوز ومراته فى البيت وحيدة بالشهور بسبب وظيفته وشغله ... هو فعلا مواصفاته مواصفات رجل الأحلام بالنسبة لأى واحدة ست 

 بس برده هيختلف كتير لو بقى زوج ... مشغول بسبب شغله .. مش بيسمع كل كلامها لأنه زهقان وطهقان من الشغل .. 
يمكن كمان بيكون حلم من أحلام زوجته إنهم يخرجوا ويتفسحوا مع بعض لو لساعتين مع الأولاد بس ميبقاش مستعجل ولا محسسها إنه ضحى بوقته السمين علشان يخرج معاها .. 
وميبقاش ساكت طول المشوار .. أو مقضيه كلام فى الموبايل .. متبقاش كل مشاويرها الضرورية بالنسبالها مع مامتها أو أختها .. وحتى لما تيجى تحكيله عملت إيه عند الدكتور أو فى اى مشوار تبقى شاكة أنه مش سامعها أصلا 

 من الأخر هل ممكن يكون فى راجل سوبر مان ويقدر يكون فى حياة زوجته زى الحارس الخاص كدة ... 

 لأنى متأكدة إن مفيش ست هتقدر تكون فى حياة زوجها بنفس مواصفات السكرتيرة طول الوقت ولا الزوج هيقدر يكون بمواصفات الحارس الخاص ولو لربع الوقت ...

علشان كدة الحكايات دى فى حياة أصحابها أغلبها بتكون نزوات أو أحلام وأوهام غير واقعية 

لأن الحياة الزوجية حاجة تانية خالص محتاجة تنازلات وتقدير من الطرفين ومحتاجة وسطية فى الإهتمامات ..

وإن كل طرف يكون فى حياة الطرف التانى هو الأهم ... ياريت يكون الإهتمام بالروح أهم من الإهتمام بالمادة .. لأن الروح بيجيلها وقت وتطهق وتموت حتى لو كانت لسه بتتنفس .. 

مينفعش نوصل لدرجة إننا نسمع عن ستات كتير ورجالة أقصى أحلامهم إنهم نفسهم يتغدوا مع بعض ويقعدو يشربوا كوبايتين شاى ومزاجهم رايق ومش مستعجلين ..

علشان محدش يستغرب لما يسمع قصص ناس بقالهم سنين عايشين وأولادهم كبروا ومنهم إللى إتجوز وفى الآخر ينفصلوا ... 

والناس تقول ليه كدة دول كانوا كويسين و وكانت ست محترمة وكمان جوزها مكنش حارمها من حاجة

والحقيقة إن الإتنين كانوا فى قمة الحرمان وأخيرا قرروا إنهم يدوا لروحهم فرصة إنها تتنفس وتحيا بعيد عن بعضهم لأن ده بقى الحل الوحيد

حاجات فى حياتنا كتير بجد لازم تتغير بس مين إللى هيبدأ الأول

24 التعليقات:

صيدلانيه طالعه نازله يقول...

و الله يا حبيبتى انتى شرحتى سبب الانجذاب فى كل حاله للطرف التانى
و للاسف ده فعلا اللى بيحصل
كل راجل فاكر الست المتلمعه اللى ماشيه فى الشارع انها كده بتبرق طول اليوم
مش فاهم انها كد بس فى الشارع
و ان الست اللى طالع عينها فى البيت عشانه و عشان ولاده احق باهتمامه و حبه
المفروض الطرفين فعلا يفهموا بعض و يحتوا بعض على قد ما يقدروا
عشان منوصلش للنهايه اللى انتى اتكلمتى عنها

سلسبيل يقول...

بجد موضوع جميل جداً

بس مش للمتزوجين بس انا كمان استفدت

منه كتير تقبلى مرورى

أم .. بوبه يقول...

دكتورة علا وحشتينى يا جميل ... نورتينى

المشكلة إن ده حال الدنيا ودايما الواحد مبيحسش بقيمة الشئ إلا بعد ما بيتحرم منه

والحكاية إتحولت لطبيعة بشرية تطبعنا بيها وإتعودنا عليها وبتتكرر كل يوم فى كل بيت .. ربنا يهدى الجميع

أم .. بوبه يقول...

سلسبيل

أخبارك إيه .. يارب تكونى بخير

الموضوع ده بيتهيألى يفيد المش متجوزين أكتر علشان يحاولوا يبتدوا بداية صح .. وربنا يوفقك

مجرد بنت يقول...

عارفة المشكلة اننا دايما فاهمين
ان الشخص الى قدامنا ده
عايش حياته على الوتيرة الى بنشوفها عليه
ومبيتغيرش
يعنى الوحش بنفهم ان وتيرته دايما وحشة والحلو بردو كذلك
بجد شرحك جميل واسبابك مقنعة
ولو راعينا ربنا
ولا حد هيبص للسكرتيرة ولا واحدة هتبص للحارس الخاص
سلااااااام
اه على فكرة ماشاء الله بوبة قممممممممر
هجوزها لاخويا

فيفى يقول...

اى الكلام الجامد ده يا نوئه بس بجد صح جدا وده من تجارب كل صحباتى اللى اتجوزا واللى اكتشفوا الحقيقه المره بعد الجواز واللى سببوا ليا عقده من الجواز ربنا يستر

أم .. بوبه يقول...

مجرد بنت

عندك حق لو إتقينا ربنا مشاكل فى حياتنا كتير هتتحل .. وربنا هباركلنا فى أنفسنا وذريتنا .. ربنا يهدى الجميع .. نورتينى يا جميل

أم .. بوبه يقول...

فيفى ...

إنتى كنتى قاعدة فى المدونة ولا إيه ... ههههه
يا ترى كام صاحبة من صحباتك إللى إتعقدوا من الجواز ..

عقبال ما نفرح بيكى يا فيفى وتحاولى إنتى تغيرى من الواقع الأليم .. وتعملى طفرة .. بس أهم حاجة إبعدى عن الدكاترة غير قابلين للطفرات ههههه

هي وظروفها يقول...

مش عارف يا ام حبيبه

اقولك ايه

العيب في مين

فينا كرجاله وانجذابنا كرجاله للست اي ست

وخصوصا كمدير وسكرتيره

يمكن لان الاختلاط بيدي المجال للشيطان يلعب ويبرطع ويجيب اجوان علي حسابنا

ولا يمكن لاننا مش بنعرف نتعامل ازاي مع ازواجنا او العكس مع الستات وزوجاتهم

يا تري العيب في اننا بقينا قليلي الدين والحيا والاخلاق

وبقينا مجرد ديكورات ماشيه بوشوش حمل
ومخبيه جواها ذئابه ولا مكر الوحوش
تصدقي بلله

انا ليه صديق ودي تفريعه بس قريبه من موضوعك
شغلته الاساسيه هي لالاسف معرفه السيدات المتزوجه
بتبعات العلاقه
ومن كتر ما نصحته ومن كتر حواورته
سالته ليه الست بتخون حد زي الناس دي اللي اكلمتي عنهم

منصب اجتماعي ووضع مالي ووووووووووو

اكتشفت ان تسعين في الميه

بتبقي عدم اهتمام الزوج بزوجته وعدم اعطائها حقوقا المعنويه وليست الجسديه
اقولك ايه والله ربنا يسترها علينا من الفتن ما ظهر منها وما بطن

sony2000 يقول...

بجد موضوع حلو
وقعدت افكر
لقيت ان احسن رد هو ان كل واحد بيشوف عيوب غيره وموش بيبص لنفسه
مع ان كلنا مليانين وياريت تقدر نغير
علي الاقل علشان البيت واللي فيه بدال مايتهد دا لو مفيش فرصه للاستمرار
ربنا يهدي الجميع:)

هيثــم رمضـــان يقول...

إزيك يا أم بوبه وإزي بوبه والله موضوعاتك القيمة دي وحشانا قوي وخصوصاً مقدماتك ههههههه بس إنتي المره دي دخلتي في الموضوع علي طول وبصراحه قولتي كل حاجه والخلاصه هي "الوسطيه" زي ما وضحتي , وصدقيني لو الراجل بيحب مراته بجد بيحبها في كل أوقاتها ومش بيشوف حد غيرها ولا 100 سكرتيرة وبرضه الست كده لو بتحبه بجد وما كانتش متجوزاه علشان مال أو سلطان مش هتشوف حد غيره ولا حتي رشدي أباظة ولما الحالات اللي إنتي قولتي عليها بتحصل بتحصل لسببين :
الأول: وجود خلل أسري ناتج عن عدم وجود حب مصحوب بتقصير من أحد الطرفين لأن ممكن مايكونش فيه حب في الأول ولكن كل طرف بيعمل ما في وسعه لأرضاء الأخر وده بيعمل حالة حب قوية جداً يعني لو فيه حب مش هيبقي فيه تقصير ولو ما فيش تقصير هيتولد حب قوي بينهم.
التاني: النظرة السطحية لمجمل الأمور يعني لو الراجل فكر شوية في الحاجات اللي إنتي قولتي عليها في السكرتيرة هيدرك إنها مواصفات غير مستمرة بالطبع وبتتغير بتغير العلاقة بينهم من سكرتيرة إلي زوجه.

المهم إنتي كلامك سليم ميه في المية

تحياتي

أم .. بوبه يقول...

هى وظروفها

أنا متطرقتش لفكرة الإختلاط مع إنى ضدها جداا .. ومتاكدة إن الصالح للطرفيين هو تقنين الإختلاط فى حيز الضرورة .. وإن الرجوع للدين وتنفيذ تعاليمه هو باب النجاة من كوارث كتير جدااا موجودة دلوقتى ... ولسه فى ناس بتآوح وبتطالب بالإختلاط أكتر وكأن الحل هو إننا نزود منه

لو أى زوج او زوجة إتقوا ربنا فى بيتهم اولا ومع الطرف الآخر سواء زوج او زوجة .. هيكون سهل عليهم اوى إنهم يتقوا ربنا براالبيت


نوعية الزوجات إللى بتقول عليها دى .. مع إنه أكيد ظلم عليها إهمال زوجها ليها وتجاهله ... بس ده مش مبرر إطلاقا .. لأى خيانة او تصرف غلط .. زى بالظبط الفقير إللى بيسرق .. أو إللى إتحرم من الخلفة فيسرق عيل صغير ..مش مبرر إن اى إنسان يتحرم من شئ يحاول ياخده بطريقة غلط .. إحنا فى الأخر بتحكمنا ضوابط شرعية ودين .. ومستنيانا أخرة وحساب .. ومهما حصلنا دى كلها إختبارات وإبتلاءات وإمتحان من ربنا لينا .. سواء إللى مش قادر يتجوز او متجوز ومش سعيد أو متجوز وسعيد ومبيخلفش .. إلخ

ياما فى ستات جميلات محترمات ومهملات اقصى إهمال من ازواجهم .. كل إللى بيعملوه إنهم يربطوا على قلبهم ويربوا اولادهم ويتجاهلوا الطرف التانى ويقتدوا بالمثل إللى بيقول ضل راجل ولا ضل حيطة ... وده فى حد ذاته اقصى عقاب للزوج وإنتقام ممكن ست تعمله فى زوجها حتى لو مكنش فارق معاه ..... إنما الخيانة فدول نفوسهم ضعيفة وإيمانهم ضعيف وللأسف بيستغلهم الأضعف منهم نفوسا وإيمان

وربنا يستر على ولايانا ويهدى الجميع

أم .. بوبه يقول...

sony 2000
فعلا نقطة مهمة أوى دى

كل واحد شايف عيوب غيره وبس

وتخيل إنه كان يستاهل أحسن من كدة بكتير

مع إن الأحسن من كدة ممكن كان يحسسه بالنقص وإنه ميستهلوش

والكل ماشى فى دايرة مغلقة

لو كل واحد فكر فى واجباته قبل متطلباته الحياة هتكون أجمل بكتير

أم .. بوبه يقول...

هيثم رمضان

جزاك الله كل خير

كلامك صح ومنطقى جدااا

بس إللى إتضحلى اليومين دول إن الأهم من الحب بين الزوجين هو الحفاظ عليه .. لأنه بقى بيبلى زى ما الإيمان بيبلى

وكل واحد بيتعود على مميزات الطرف الأخر .. وحتى كمان فى ناس بقت بتزهد فى إظهار المميزات دى لأنها معدش يهمها رد فعل الطرف الأخر .. دا إذا كان لسه فى ردود افعال موجودة اصلا

الحب بين الزوجين عامل زى الطفل الصغير .. لازم تشجيعه على كل شئ حلو بيعمله علشان يحافظ عليه ويستمر فيه .. لازم يحس إنه لفت نظرك بالشئ الكويس اكتر من الوحش .. ياإما مش هيعرف بعد كدة الكويس من الوحش ولا إيه هو الفرق بينهم

ربنا يبارك لكل زوجين فى بعض ويجمع بينهما فى خير

Just waiting يقول...

بجد موضوعك جامد واسبابك صح جدا
بس انتي نسيتي حاجه مهمه ما اجتمع رجل وامرآه الا وكان ثالثهما الشيطان
الشيطان صايع كفاية ان الممنوع مرغوب وهو بيخليه كمان حلو في عنينا قوي
تحياتي ليكي

حنين يقول...

ام بوبه
ايوة كده هى دى البوستات الجامده
بس هقولك ايه لا حياه لمن تنادى
ده بالنسبه للرجاله طبعا دايما
مش عاجبهم حاجه وللاسف زى ما قلتى
حالات كثير انفصال بعد زواج سنيييين
حاله يقظه متأخره ربنا يهدينا
ويهديهم
تحياتى وسلامى لبوبه

هيثــم رمضـــان يقول...

أم بوبه ممكن تسمحيلي بتعليق تاني..
كلامك صح بخصوص حالة الحب اللي بتتأثر مع مرور الأيام وأعتقد إن ده بسبب الروتين والرتابه ولازم الزوج والزوجه في الحالة دي يكونوا أذكياء ويحاولوا كسر الروتين في كل شيء حتي في أبسط الأشياء زي أنواع الأكل مكان الأكل الزيارات مكان العفش في البيت تغيير في الشكل في أي حاجه ممكن تكسر الروتين والأهم هو إهتمام كل طرف بالطرف الأخر وإشعاره بطريقة أو بأخري بهذا الأهتمام ولكن دون مبالغه علشان مايبقاش خنقه ..عجبني قوي تشبيهك للحب بالطفل الصغير أنا كمان ديماً بشبه الحب بالشجرة فمهما كان الحب كبير قبل الجواز بيبدأ مع الجواز وكأنه شجرة صغيرة لو راعيناها هتخضر وهيبقي شكلها حلو قوي ولو أهملناها ورقها هيدبل وشكلها هيبقي وحش ومتربه لكنها بتفضل موجوده وجذورها موجوده وممكن ترجع جميله لو أهتمينا بيها هكذا الحب يظل موجود في القلوب ولا يظهر إلا في وقت الشدائد ولكن إذا راعيناه وأهتمينا بيه هيظهر في كل الأوقات وعلشان ده يحصل لازم الاتنين يكونوا مقتنعين إن الحب هو السبيل للعيش في سعاده وليس الماديات وحدها وإن وجد طرف أن الطرف الأخر غير مدرك لهذا فمن واجبه أن يلفت نظره مره وأتنين وتلاته ويفهمه إنه كده بيضيع علي نفسه السعاده إذا ظل يهمل العواطف والحب.

وربنا يوفق كل أزواج وزوجات المسلمين

تحياتي

حصان المرجيحة يقول...

فينك من زمان
حمدالله علي السلامة
و فعلا من اهم مشاكلنا اننا بنهتم بالمظهر و بنتغر بيه
و انا في واحد قربيي كده
ماتجوزش لغاية دلوقتي لانه عايز واحد (تنور في الظلمة)
علي حد تعبيره
بس ده مش معناه اني اتجوز قردة
هههههههههه
برضو الواحد صابر كتييييير
حمدالله علي السلامة

أم .. بوبه يقول...

just waiting

فعلا الشيطان له دور كبير .. بس إحنا غالبا إللى بنسمحله يقوم بدوره على أكمل وجهه
لأنه أضعف من إنه يسيطر على الأمور سيطرة كاملة .. أحيانا شيطانا بيكون جوانا وإحنا إللى بنوسوسله

أم .. بوبه يقول...

حنين

وحشتينى والله .. فعلا حالة يقظة متأخرة .. بس فى الحالات دى مهما الوقت إتأخر بيبقى القرار ده صحى فى جميع الحالات ( وجهة نظرى )

أم .. بوبه يقول...

هيثم رمضان


تشبيه الشجرة أفضل بكتير من الطفل .. علشان زى ما قولت مهما دبلت جذورها قوية .. بس محتاجة إللى يعتنى بيها

إضافة متميزة كالعادة

أم .. بوبه يقول...

حصان المرجيحة

أكيد الجمال شئ مفضل ومش عيب إن الإنسان يدور على زوجة جميلة .. بس مينفعش يكون كل هدفه جميلة بس ومش مهم أى حاجة تانية

ولا إيه ؟

انت تسال والكمبيوتر يجيب يقول...

سعدنا بالمرور فى هذه المدونه المتميزهباسلوبها الرشيق العميق رغم بساطتهونهنا صاحبتها بها وبشهر رمضان ونوجه لها هذه الدعوهعلى امل ان تتواصل معنا بفكرهاوآرائهافى برنامجنا الأذاعى عند عودته بعد رمضان
نحن اول برنامج أذاعى عن النت والمدونات ويذاع يوميا عدا الجمعه التاسعه وعشر دقائق صباحا على موجات الأذاعه الرئيسيه لمصر
نحن نطرح موضوعات الحلقات قبل اذاعتها فى مدونتنا لبعلق عليها اصحاب المدونات او غيرهم من الزائرين
ونذيع هذه الموضوعات مع التعليقات ومقتطفات من مدونات اصحابها اذا رغبوا
وبذلك نجمع لأول مره بين الأعلام التقليدى والنت
مدونتنا
http://netonradio.blogspot.com

شركة تنظيف بالدمام شركة تاج يقول...


شركة تاج للتنظيف بالدمام 0551844053

شركة رش مبيدات بالدمام

شركة مكافحة حشرات بالدمام

شركة تنظيف شقق بالدمام

شركة تنظيف فلل بالدمام

شركة رش مبيدات بالخبر

شركة مكافحة حشرات بالخبر

شركة تنظيف منازل بالخبر

شركة تسليك مجارى بالدمام

شركة تنظيف بالدمام

شركة تنظيف سجاد بالدمام

شركة مكافحة حشرات بالاحساء

شركة مكافحة النمل الابيض بالاحساء

شركة مكافحة حشرات بالجبيل

شركة مكافحة النمل الابيض بالجبيل

شركة تنظيف منازل بالجبيل

شركة مكافحة النمل الابيض بالدمام