الثلاثاء، 6 أبريل 2010

التوحد مجرد مرض



السلام عليكم ورحمة الله وبركاته 


 أنا بكتبلكم النهاردة .. علشان أحكيلكم حكاية وأطلب منكم طلب

 الحكاية أولا

 زوجى زى مانتوا عارفين دكتور اطفال ... جه فى يوم من الأيام راجع من الشغل ومعاه كتاب ... بس كان مترجم بالعربى ..

مش كالعادة يعنى كله إنجليزى 

 وسابه على ترابيزة السفرة كالعادة بردوا .. فأنا لفت نظرى إن الكتاب عليه صورة طفل .. وكمان بالعربى .. وانا بحب أقرأ أى شئ عن الأطفال 

 بس كانت الصورة غريبة شوية .. طفل قاعد بعيد عن اصحابه .. وحيد ... وعنوان الكتاب ... التوحد 

 طبعا سألت زوجى وقالى .. شوية معلومات بسيطة وسريعة عن التوحد ومن أهمها .. سبب تسميته التوحد

 غالبا الطفل ده بيحب يقعد لوحده وينعزل عن الناس .. 
 وممكن كمان يحب ياكل نوع واحد من الأكل .. ويلبس لون واحد من اللبس .. 
ويلعب لعبة واحدة بيفضلها عن كل الألعاب .. إلخ إلخ إلخ

 بجد حسيت إنها حاجة ولا الأحلام .. ولا عالم الخيال العلمى 

 طيب وإيه سبب المرض ده ؟!!..

 الله أعلم .. لسه محدش توصل لأسباب معينة ومحددة .. 
يمكن كل حالة لها سبب مختلف عن التانى 

 طيب إيه علاجه ؟!!..

 برده الله أعلم .. مفيش حاجة مثبته علميا لحد دلوقتى .. وكل طفل ممكن يكون له طريقة علاج مختلفة عن التانى

 بس كمان زوجى قالى .. إن الأطفال دول غالبا بيكونوا أذكية جداااااا .. لدرجة إنهم ممكن يوصلوا للعبقرية 

 وقالى كمان .. إن بيتهوفن , وبيل جيتس , أينشتاين .و تمبل جرانديد  كل دول كان عندهم توحد وهما صغيرين 


 ومن اليوم ده شغلنى أوى موضوع التوحد ده .. ولو أى شئ صادفنى عنه لازم أقراه .. حتى إنى حبيتهم جدااااااا والله وبدون مبالغة وتعاطفت معاهم 

 لحد ما فى يوم .. كنت بعمل سيرش على النت عن مواضيع متعلقة بتعليم الأطفال الصغار الكلام لأن بوبة إتأخرت شوية فى الكلام 

 فخدنى السيرش على موقع منتديات .. من ضمنهم منتدى التوحد 

 بصراحة انا كنت متخيلة إن عددهم قليل ... إتفاجئت بعالم تانى 

 شوفتوا كدة العوالم المتوازية ... أهو النت ده بحس إنه كده .. مجموعة من العوالم المتوازية ... كل واحد فى عالم تانى ومش شايف غيره 

 شوفت نوع تانى من الأمهات عمرى ما شوفته ولا سمعت عنه ممكن تطلقوا عليهم أمهات محاربات .. دا أقل شئ ممكن يتقال عنهم .. 

ونوع تانى من الأطفال
متتخيلوش محتاج مجهود أد إيه الطفل ده علشان يقدر يبص للإنسان إللى قدامه فى عينه أو ينده على أمه ويقولها يا ماما ... أقل شئ ممكن يعمله أى طفل ...

 ومن يومها وأنا زائرة مستديمة للمنتدى ده .... وإللى شايفاه فيه إنه عبارة عن قصص بطولات متكررة 

 بتبدأ بموضوع الصدمة الأولى لكل أب أو أم ... وبعد كدة يتعافى من الصدمة ويقف جمبه كل أب وأم فى المنتدى ويدوله من وقتهم ومعلوماتهم 
ويقولوله يعمل إيه لإبنه او بنته وهما محتاجين إيه ........

 ويبدأوا مشوار العلاج والتدريب والصبر والأمل .......... والمشوار ده بيتخلله ... أحيانا إنتصارات .. أو إنتكاسات أو مفاجآت .. ودموع وأفراح ومباركات 

 بس أكتر حاجة إتعلمتها فعلا من العالم ده ... إن الصبر ملوش غير مقابل واحد وهو الفرج ......... وإن مع العسر يسر

 والحمد لله نهاية المشوار بإذن الله وحده وبفضله بتكون الشفاء 


انا تقريبا دلوقتى أعرف معلومات عن التوحد وطرق علاجه وتدريباته أكتر من زوجى ...لدرجة إنى حابة المجال ده جداا ونفسى أدرس فيه واشتغل فيه

بس أكتر مشكلة بيعانوا منها الناس دول فى بداية المشوار ... هى الناس 

 ونظرة الناس 

 وكلامهم إللى مبخلصش

 ونظرتهم للطفل ده على إنه معاق ومفيش منه فايدة 

ومش الناس بس ده ساعت المدرسين بتوعهم إللى فى المراكز الخاصة بيتعاملوا معاهم على الأساس ده وبيعملوا إحباط للأمهات بكلامهم
مع إن برا غير كدة خاااااالص .. علشان كدة حالات الشفاء عندهم بتزيد بفضل الله

 وبالطريقة دى أحيانا بدل ما يساعدوا الأم إنها تخرج إبنها من دايرة التوحد .... لأ دول بيخلوها تهرب معاه فيها وتبعد عن الناس 

 مع إن من أهم وسائل علاج الطفل ده إنه يختلط بالناس

هما محتاجين بجد إن كل إللى حواليهم يتغيروا ويثقوا فى أبناءهم وقدراتهم ويساعدوهم ويساندوهم ويقفوا جمبهم ... 

محدش بعيد عن المرض ولا عامله محضر بعدم التعرض له 

 دى مقادير ربنا مقدرها على عباده ... لحكمه هو واحده يعلمها ... وكان ممكن إحنا نكون فى مكان غيرنا .. محدش أحسن من حد 

 يبقى نحمد الله على أى شئ مهما كان ... ونطلب من ربنا إنه يحسن خاتمتنا ولا يجعل مصيبتنا فى دينا .. هو ده أهم شئ


 أنا كتبت الكلام الكتير ده .. علشان اقولكم إن مجموعة من المنتدى ده عملوا جروب على الفيس بوك علشان يحاولوا يغيروا فكرة الناس عن التوحد .. وعن اطفالهم .. لأنهم نفسهم يطلعوا أولادهم للنور من غير ما حد يحرجهم أو ينظرلهم نظرة تضايقهم أو يقولهم شئ يجرحهم حتى لو بجهل منه أو من غير  قصد

الجروب ده إسمه 

 التوحد مجرد مرض .. Autism just disease

http://www.facebook.com/group.php?gid=104827802886886&ref=mf

ياريت تساندوهم ولو حتى بالإنضمام 




15 التعليقات:

صيدلانيه طالعه نازله يقول...

اولا صباح الخير
انا كنت قريت ان الاطفال المعرضين ليه اللى هما من عمر سنتين
و كنت مرعوبه اما خلفت انى اصادف الموضوع ده مع ولادى
بس الحمد لله
ربنا يشفى الاطفال كلها و كل حد مريض

غير معرف يقول...

السلام عليكِ
هذه تدوينة قيمة جداً .. بالطبع توغلت في الموضوع بعض الشيء بحكم الدراسة وسأحاول العودة من جديدة لمزيدٍ من النقاش اليوم أو غداً

بنـوتــــة يقول...

الأطفال دول فعلاً بيحتاجو صبر طويل و رعاية من الأهل
ربنا يحفظ الجميع و يشفيهم
أنا بحكم تخصصي درست عنهم شوية
و أهم حاجة إنهم يبقوا تحت الملاحظة و يحسوا بجد بحب اللي أدامهم
و دي أصلاً صعبة لإن الطفل ده يكاد يكون غير كدرك لوجود الآخر أو مش مرحب بيه
بس في النهاية بيبقوا أطفال سكررر زي باقي فتافيت السكر اللي في كل مكان
و هو مجال جميل لو هتدرسيه فعلاً
ربنا يوفقك للخير
^ـ^

بعبعه يقول...

بجد موضوعك جميل
وفعلا احنا عندنا مشكليه مجتمعيه فى تقبل الاخرين

واساتذه فى الياس واحباط الامال

ومره قريت ان المرض ده ممكن يكون له اسباب عضويه

بس عموما هو مرض صعب اوي ربنا يشفيهم يارب

موضوع جميل

صباح الخير يقول...

بعد السلام عليكم

بوست جميل بجد .. واحساس جميل أن نشعر بالاخرين من خلال معرفتنا بهم وبمشاكلهم

أسأل الله العظيم رب العرش العظيم أن يشفى كل مريض

تحياتى
فى انتظار تشريفك لى بالزيارة

قلم رصاص يقول...

انا شايف ان التوحد دا مش مرض بالمعنى
المنطقي وانما هو مجرد عرض لمرض بمعنى انه لم يرق بعد لمرتبة المرض

وانما هذا لايعني انه غير موجود وبه اطفال تعاني منه ويعاني معهم اهاليهم

انا سعيد اوي لما قولتي ان زوجك قالك ان معظم الاطفال دي بيكونوا عباقره او عندهم تميز في حاجة معينه .. سبحان الله فرحت جدا من باب ان دا تعويض ربنا ليهم

لأضعف الايمان انضممت للجروب ع الفيس بوك
وجزاكم الله خيرا ام بوبه على البوست

في امان الله

سارة درويش يقول...

موضوعك قيم بجد وعجبني جداً

المفروض الناس قبل ما تتكلم عن أي حد تتخيل موقفها لو كان ابنها عنده توحد

مش بس التوحد ، امراض كتير بيكون نظرة وكلام الناس متعبة اكتر من المرض نفسه :(

شكراً ليكي على الموضوع

حنين يقول...

ازيك يا ام بوبه
منوره المدونه بكلامك الجميل
ربنا يجزيكى خير
وربنا يشفى كل مريض
تحياتى

غير معرف يقول...

السلام عليكِ
على فكرة أنا مش ناسي استفسارك بخصوص دورات معهد الخدمة وغداً سأحضر لكِ الرد بإذن الله

غير معرف يقول...

هى شيما حذفت مدونتها ليه؟

حصان المرجيحة يقول...

والله ربنا يعافينا
بس عندي سؤال هو المرض ده لما هو من زمان اوي كده
ليه ماسمعناش عنه غير دلوقتي

مش عارف
الحمد لله الذي عافانا مما ابتلي به كثير من غيرنا

هيثــم رمضـــان يقول...

الحمد لله الذي عفانا, أنا أول مره أسمع عن المرض ده فعلاً حاجة صعبه جداً علي الطفل وأهله ربنا يقويهم ويجزيكي خير .

تحياتي

غير معرف يقول...

السلام عليكم

لفتني موضوعك جدا
انا سمعت عن مرض التوحد من يمكن 3 سنين
و بدك الصراحة هو برضو مسؤلية كبيرة جدا على اي ام او اب ومحتاج شجاعة كبيييرة و صبر ما اله حدود ..
انا لسا ربنا مرزقنيش اطفال .. لكن في كل صلاة بأدعي ربنا يرزقني اطفال سليمين بعقولهم واجسامهم وان الله يعافينا مما ابتلا به الكثيرين ..
عشان يمكن مكونش قد مسؤلية .. او يمكن ميكونش تحملي كفاية .. و اطفالي اخر اشي ممكن اقبل اني اقصر فيه :)

ربنا يخليلك ابنك وشكرا ع البوست الروعة :)

ام مجد ومريم

التميز المثالي للخدمات المنزلية يقول...


شركة تاج للتنظيف بالدمام 0551844053

شركة رش مبيدات بالدمام

شركة مكافحة حشرات بالدمام

شركة تنظيف شقق بالدمام

شركة تنظيف فلل بالدمام

شركة رش مبيدات بالخبر

شركة مكافحة حشرات بالخبر

شركة تنظيف منازل بالخبر

شركة تسليك مجارى بالدمام

شركة تنظيف بالدمام

شركة تنظيف سجاد بالدمام

شركة مكافحة حشرات بالاحساء

شركة مكافحة النمل الابيض بالاحساء

شركة مكافحة حشرات بالجبيل

شركة مكافحة النمل الابيض بالجبيل

شركة تنظيف منازل بالجبيل

شركة مكافحة النمل الابيض بالدمام



شركة تنظيف ومكافحة الحشرات يقول...

شركة تسليك مجارى بالقطيف
شركة كشف تسربات المياه بالقطيف
شركة تنظيف خزانات بالقطيف
شركة مكافحة النمل الابيض بالقطيف
شركة مكافحة حشرات بالقطيف
شركة تنظيف موكيت ومجالس بالقطيف