الأربعاء، 6 يناير 2010

مش .. لكى يا سيدتى




السلام عليكم ورحمة الله وبركاته



الموضوع ده خاص شوية وموجهة للسادة الرجال ..... وهى علشان أحط إيديهم على بعض الحلول البسيطة جدااااااا إللى ممكن تساعد وتخفف من حالة الست النفسية إللى بتتأزم بعد الجواز والخلفة ... وممكن الحاجات البسيطة دى تساعد فى تأخير أو منع وصول الست لمصيرها المحتوم والمتوقع بعد الجواز والخلفة بحوالى 20 سنه 

زى بالظبط كدة لما بنشوف أى مسلسل أو فيلم يكون فيه حمدى غيث أو عبد الله محمود أو نوال أبو الفتوح

من المعروف جداااااااا إن حمدى غيث هيتعمى فى نص المسلسل ... وإن عبد الله محمود هيموت فى نص أو آخر المسلسل ... وإن نوال أبو الفتوح أكيد هتتشل فى آخر حلقة من المسلسل

بالظبط كدة الستات بعد 20 سنة جواز بيبقوا عبارة عن نسخ متطابقة تمشى على الأرض نفس المصير المحتوم من جميع الإتجاهات


هقول الأول الأعراض إللى تساعد أى زوج إنه يعرف إن مراته بدأت ضغوط الحياة تستولى عليها وتسيب آثار وبصمات فيها ومن هنا تكمن الخطورة إذا إستمر الوضع على كدة

من أهم الأعراض دى

1... إنك تنده عليها وهى فى المطبخ ومترودش من أول مرة زى زمان ..... فى الحالة دى بتكون الست يا إما سرحانة وتايهة ومش سامعة فعلا ... يا إما مخنوقة ومتضايقة ومطنشة وبتقول فى سرها ... لمؤخاذة يعنى ... ما يجى هو ولا على رجليه نقش الحنة أنا مش فاضية

فى الحالة دى تواضع وتعالى على نفسك وروحلها إنت .. بس الله يخليك وانت رايح أبقى اتنحنح يمكن تكون سرحانة ولا حاجة وهى مش ناقصة سارعة بلاش الخصلة بتاعتكم دى إننا نلاقيكم فى نص المطبخ فجأة كدة واحنا بيبقى فى إيدينا آلات حادة وممكن نئزيكم أو نئزى نفسنا من الخضة 

                         ***************************

2 ... إنك تبقى قاعد مكانك كدة وتلاحظ إن مراتك واقفة فى وسط أوضة ما وسرحانة ومش بتعمل حاجة .. وفجأة تلاقيها خرجت من الأوضة ودخلت تانى أكتر من مرة وبرده مش بتعمل حاجة .... إهدى ومتخافش مراتك كويسة إن شاء الله ..... كل ما فى الموضوع إنها كانت رايحة تجيب حاجة من الأوضة  وأول ما دخلت الأوضة نسيت هى كانت عايزة إيه ... فهى بتحاول تعيد المشهد من الأول يمكن تفتكر

فى الحالة دى إن مراتك ربنا وفقها وإفتكرت ورجعت تانى للى كانت بتعمله ,, خلاص مش مشكلة دعها تسير دعها تمر .. مفيش مشاكل حصل خير .... إنما لو لاقيتها عمالة تكرر فى المشهد ده أكتر من مرة علشان تفتكر ومفتكرتش حاول كدة بصانعة لطافة إنك تلهيها بأى حاجة علشان متتجننش أو تكسر أى حاجة فى الأوضة .. كله مكتوب عليك فى القايمة

                            ************************ 

3 ... ممكن تبقى قاعد برده مكانك إللى انت كنت قاعد فيه المرة إللى فاتت ... وبعدين تقوم علشان تشرب من التلاجة ... وبعد ما تفتح التلاجة تلاقى .... طقم كوبايات فاضية كدة مغسول وزى الفل ومرصوص فى التلاجة ......... عاااااااااادى جداااااااا كانت بتغسل الكوبايات وهى سرحانة وبدل ما تحطهم فى مكانهم حطيتهم فى التلاجة ...... انت بقى بمنتهى الحنان والزوق خودهم ... أنا عارفة إنهم هيبقوا ساقعين شوية بس مش مشكلة استحمل وحطهم مكانهم ومتعلقش .. بتحصل عادى وبيحصل أكتر من كدة كمان

                           *************************

4 ... هتلاحظ إن شراباتك بدأت تختفى واحد ورا التانى أو بيختفى من كل شراب فردة واحدة ... لا تأنبها ولا تسألها لأنها مش هتعرف مكانهم فين لو عملت إيه ... الحل إنك تاخد بعضك وتروح على دولاب إبنك الصغنون الجميل هتلاقيهم مترصصين بتطبيقتهم زى ما هما .. أو يا إما تغسل شرباتك بنفسك وتعينهم إنت دى الطريقة الأضمن

                                 ***********************

5... لو حصل وسألتها النهاردة إيه فى الشهر أو أى يوم من أيام الأسبوع عمرها ما هترود عليك بسرعة لأنها فعلا مش عارفة علشان مش فارقة معاها ويمكن لو فكرت شوية كمان برده مش هتعرف .. الحل بقى إنك تجيب نتيجة كبيرة وتعلقها فى المطبخ إللى هو مكانها الدائم وتقطعها انت بنفسك كل يوم لأنها مش هتقطعها هى .. وأبقى سيب الورق القديم مترميهوش لأنه بينفع فى توليع فرن الغاز  ولك جزيل الشكر .. أوكى

                          ************************

6 ... من أهم وأخطر العلامات ......... إنك تلاحظ تضخم فى حجم قطع الخضار إللى فى السلطة عن الحجم إللى كانت بتقطعه زمان .. ده معناه إنها بدأت تمل وتتخنئ وبدأ ده يأثر على طريقتها فى أداء عملها المنزلى وبدأت تكروت وفى الحالة دى هتكون محتاجة ريفرش

فى الحالة دى إنت تعمل إيه ... أولا هتاكل السلطة طبعا ( لازم تاكلها ) ثانيا بعد ما تاكلها إسألها .. إنتى كويسة ؟ هتقولك الحمد لله 
يعنى مش ناقصك حاجة عايزانى أجيبهالك أو نفسك فيها ؟ يا إما ما هتصدق إنك سألتها وهتقولك لستة طلبات هى محتاجاها ولازم تجيبها طبعا .... يا إما هتقولك لأ الحمد لله مش ناقصنى حاجة

فى الحالة دى تقولها مش عايزة تخرجى فى أى مكان تغيرى جو ؟ يا إما هتقولك آه وطبعا لازم تخرجها علشان تعمل ريفريش وتستعيد نشاطها تانى

يا إما بقى لو قالتلك لأ مش عايزة أخرج ... يبقى فى الحالة دى اتضح إن مراتك طول عمرها بتعمل السلطة كبيرة وانت إللى مش واخد بالك ولا مركز معايا ودى مشكلة فى حد ذاتها 


كدة البوست ده خلص إنما للموضوع بقية 



ونختم بأغنية     ليا عشم وياك يا جميل     من راديو ستات البيوت 
                             
                                   
ليا عشم وياك يا جميل إن بوحت بالسر تقوله
مكتوب عليا طبيخ وغسيل وحبيبى أكويله هدوووووومه

والبيت مطهأنى .. مبطلش فيه تنضيف
وأنا إيه إللى بينوبنى .. غير هدمتى ورغيف

ليا عشم وياك يا ظريف إن بوحت بالسر تقوله
مكتوب عمرى أقضيه تنضيف وحبيبى .......... كسلان من يووووومه


كانت معكم أم .. بوبة من داخل المنزل

تحدييييييييث بسيط وضرووووووووووورى 
******************************
أنا بعد ما قريت بعض الردود إللى أخدت كلامى ده وفهمته على إنه مبالغ فيه أو فهمته إنه تشويه لست البيت ووصف غير مقبول وغير مشجع على الإقبال على فكرة الجواز للغير متزوجين .. لأنهم شافوا ست البيت بالمنظر ده تبقى شئ مرعب 

انا حابة اقول أولا إن كل الكلام إللى قولته فوق ده حقيقى وبيحصل فعلا  وكل المواقف دى حصلتلى شخصيا وما زالت بتحصل معايا بس مش معنى ده إنها بتحصل كل يوم وإنى عايشة فى عالم آخر وزوجى حاسس باكتئاب .. لأ دى بتحصل فى بعض الأوقات إللى بكون فعلا مضغوطة فيها بسبب شغل البيت أو أى ظروف طارئة أو النوم غير المنتظم .. وممكن تحصل للراجل نفسه لو تعرض لنفس الظروف
 وكمان لما بتحصل مش بيكون شئ محزن ولا مؤسف لأ بالعكس دى أغلب المواقف دى لما بتحصل بيكون رد فعل الزوجين عليها هو الضحك والبهجة ويمكن كمان بيروحوا يحكوها لغيرهم علشان يضحكوهم معاهم  


ثانيا مش محتاجة أقول إن فى بعض المبالغة فى كلامى وده على سبيل الهزار (المفروض الكل يكون فاهم ده لواحده سواء رجالة أو ستات ) يعنى مش كل واحد بيهزر محتاج يقول بعد ما بيخلص كلام انا كنت بهزر

ثالثا حتى لو فى ستات شايفين إن الكلام ده مش منطبق عليهم وإنهم مرتاحين ومش مشغولين ومش مضغوطين وحاسين إنى عاملة فيلم هندى وببالغ ... فده مش معناه إن حالهم زى باقى حال غيرهم .. لأنه بيختلف من بيت للتانى حسب طبيعة الزوج وتعاونه مع الست حتى لو كان تعاون معنوى وكمان حسب طبيعة الطفل نفسه لأنها بتختلف من طفل للتانى فعلا , يعنى فى اطفال هاديين وتربيتهم سهلة وفى طفل بعشرة لواحده وعدد الأطفال كمان أكيد بيفرق .. وحسب حاجات كتير مفيش وقت لطرحها .. أنا بتكلم كلام عام  

مش عايزة حد ياخد الكلام ده على أعصابه ويفهمنى غلط ويتهيأله إنى بعقد الأمور لأن ده مش هدفى خاااااااااالص ولا هى دى الحقيقة إللى انا عايزة اوصلهالكم


39 التعليقات:

P A S H A يقول...

استني كده لما أقيس الأول البوست ده كام متر ههههه أحسن يطلع مسافات طويلة زي البوست أياه وأنا عندي شغل الصبح .

عموماً أنا حبيت أعلق مسبقاً .. عشان ممكن تلاقيني زوغت ههههههههه

تحفة .. هايل .. تسلم إيدك .. رائع .. مذهل .. هاقراه وأجيلك .

:)

سلام كبييييييييييييير لبوبا

P A S H A يقول...

هههههههههه
لا والله في اللذيذ المرة دي .. تسلم غيدك حقيقي .. ويا سبحان الله الاغنية دي تحديداً كنت باهديها لفاتيما النهارده في تعليق عندها !! ... توارد أغاني !!

بالنسبة لمعلومة السلطة دي جامدة بس أنا هاكل من سكات ومش هاسأل نياهاهاها .. وبعدين غسيل الشرابات ده أحد الأسباب اللي مخلياني عاوز أتجوز .. تقوليلي أغسل شرابات ؟؟ لا يمكن أبداً .. وبالنسبة لحالة الزهايمر دي عااااااادي جداً .. ده كده نبقى احنا الاتنين ميت فل وتمنتاشر .. أهم حاجة بس إنها تبقى عارفاني وحافظة رقم الشقة والدور
هههههههههه

سلام

الشعب لابد له من حكومه تشكمه يقول...

استنى بس الاول وتاتا تاتا:

اولا:
( نئزيكم أو نئزى نفسنا من الخضة)
على العلام واللى بيتعلموه كان اسمه ايه دكتور عبد المعطى هروح اقوله يعلقك على باب الجامعه:))
اسمها نئزيكم..ههههههههههه.نأذى يا اوختى انتى ثقافتك اسبانى انا عارفه بس عيب برضه:)


ثانيا:
نوءا انا عندى الاعراض دى من دلوقتى ومن زمااااااااااااان:))
فاكره القلم بتاعى لما كنت بقعد ازهقكو فين القلم وفى الاخير كنا بنلاقيه فيييييييييين؟فاكره:)
دا غير ان عمو قالى عاوز اشرب روحت جبت الميه ووقفت ادام ماما وقولها امسكى:((

تفتكرى ايه دنا كده ضعت خااالص..

نتكلم جد شويه باه والله انتى بتقولى كلام زى الفل لو حد بس يفهم الكلام ده..
ياااااااااااه الحياه هتباى وردى وردى على راى صفاء ابو السعود...

تسلمى يانوءا وبوسيلى القرده اللى جمبك واللى اكيد لسه صاحيه مفييييييش فايده.

Unknown يقول...
أزال أحد مشرفي المدونة هذا التعليق.
R-H-S يقول...

مصححتيش الفكره بتاعه البوست اللي فات بل انتي زودتي ان الست مش هتركز في حياتها مع انك قاعد علي الكمبيوتر وسايبه الطبيخ ومش مركزه مع جوزها ومش ومش ومش بدوده

انا تخيلت صوره لواحده متجوزه من وصفك مطقتش شكلها

تحياتي

بسمه عبدالباسط يقول...

هههههههههههههههههههههههه

تصدقى أنا زى شيما عندى نفس الأعراض اللى قالتها تفتكرى ده يبقى إيه

هههههههههههههههههه

بوست راااااائع ودمه خفيف كعادتك
بس تفتكرى الكلام ده هيأثر فيهم

:))))))))))

هيثــم رمضـــان يقول...

حاسس إن البوست في حاجه ناقصه علشان مافيش مقدمة كبييييييرة زي ما عودتينا وشكراً علي النصايح الغالية دي تصدقي في ناس كتير حذرتني من موضوع الشرابات ده بس الحمد لله لحد دلوقت ما فيش حوادث فقد شرابات إلا في مرات قليلة جداً هي بصراحة ماشاء الله منظمة.

تحياتي

simply me يقول...

جميل جميل
ياريت ياخدوا بالهم بقى
بس الحكايه دى هتاخد وقت شويه

ستيتة يقول...

السستم عندك واقع ومحتاجة ابلود يا ستي
ها تقلبي علينا الرجالة وباين ها ارش ع الفرن الكهربا ميه :)
تطبيق الشربات وعملها كور متجانسة مهمة الرجالة يا ماما
المكوة برضه مهمة راجل
شرا الطلبات
خروج الزبالة اخر اليوم
مذاكرة العيال .. ماشي ماشي ها امشيها مهمة مشتركة علشان انا متساهلةالنهاردة ولسه قابضة :)
طبخة كل حين ومين
يناولك الغسيل ساعة النشر كل كام مرة برضه من قبيل انكم بتدردشوا وانت نازلة تملي القلل وتنشري الغسيل
كده يعني
وكل اللي انت فاهمه بقى يا وديع :)

لكن اللي انتي بتقوليه ده مش ستات بيوت
دي جوانتانموا يا اوختشي
متوتوروناش بقى

هناء محمود يقول...

pasha

شيما

أهلين بيكم

إللى عندك ده يا شوشو عادى فى الرجلة إللى قبل الجواز كلنا مرينا بيه .. ويمكن إللى زيك وزيى كدة هما إللى بيجيلهم توهان أكتر بعد الجواز

وفاكرة حكايه القلم ههههههههه

هناء محمود يقول...
أزال المؤلف هذا التعليق.
أميرة الأحلام يقول...

جميل اوى موضوعك وواقعى جدا
ده الي بيحصل اليومين دول
والاحلى بقى الاغنيه الي في الاخر
هههههههههه
ربنا يسعدك يارب ويملا ايامك فرح وسعاده

هناء محمود يقول...

عاوز أصحى

أنا قولت فى الول إن دى أعراض الضغط النفسى عند الستات مقولتش دول الستات الحلوين المبسوطين .. وإن شاء الله المرة الجاية هكمل دا إن كان فيه مرة جاية

ثانيا أنا كنت قاعدة بكتب البوست و مش بطبخ ولا بعمل شغل البيت لأن الساعة كانت 3 بالليل وبنتى سهرانة ومش راضية تنام ومفيش أسهل من ان الواحد يقضى الوقت ده فى أى شئ يعمله وهو قاعد مكانه .. إنما المشكلة فى الصبح لما تصحى بدرى وانت منكتش كويس أتمنى إنى أكون شرحتلك كويس

هناء محمود يقول...

بسمة .. نورتينى يا جميلة أنا كمان كنت كدة زيكم قبل الجواز عادى شغالين برده
ويبدو إن الكلام مأثر فى البعض بشكل مش متوقع يعنى مأثر فيهم بمزاجهم

هيثم رمضان

فعلا البوست ناقص المقدمة لأنه هو أصلا مقدمة البوست الجاى إن شاء الله

بس محبتش أطول زى المرة إللى فاتت وربنا يباركلك فى زوجتك وأولادك

هناء محمود يقول...

بندقة

الله يخليكى إنتى إللى جميلة .. بس أنا شاكة زيك كدة إنهم ممكن ميخدوش بالهم برده ومش هتفرق

هناء محمود يقول...

إزيك يا دكتور ستيتة .. أنا فهمت خلاص .. إنت شكلك من الستات إللى جوازهم مدلعينهم يا جميييييييييل ربنا يباركلك يا ستى مش بنقررررر

بس عايزاكى تعرفى أصلا إن جوزى مش بشوفه تقريبا فى اليوم أكتر من 4 أو 5 ساعات بالكتيييير ومتقسمين كمان على مدار اليوم وبيقضيهم مابين النوم والأكل والكمبيوتر وباقى اليوم يا إما فى العيادة أو المستشفى علشان كدة كل حاجة على دماغى لوحدى وغير كدة طلباته كتييييييير ومبيحبش حتى يدخل كوباية الشاى المطبخ بعد ما يشربها .... فهمتى بقى إيه إللى موقع السيستم بتاعى

همسات ساكنه يقول...

التوهان دايما بيجي نتيجة ظروف وضغوط نفسيه الواحد بيمر بيها
او ممكن من كتر المشغوليات فمفيش تركيز بقى
حفتكر ايه ولا ايه
بس فعلا لما يكون عندنا توهان واحنا لسه بالسن ده امال بعدين حيحصل ايه :(

هناء محمود يقول...

أميرة الأحلام

همسات ساكنة

نورتونى وربنا يكملكم بعقلكم .. ومع إننا إللى بنتوه وتعبانين وعارفين إن الكلام ده واقعى وإن كان فى بعض المبالغات للهزار فقط ومش محتاجة أشرح النقطة دى لأن المفروض الكل يكون فاهمها
إلا إننا واخدين الموضوع ببساطة وبضحك زى ما بيحصل فى البيت مع أزواجنا لما بيضحكوا علينا

OlivE يقول...

هههههههههههههههههههههه

لاالبوست دا جامد اوى

عندك حق والله كل دا بيحصل بس مش بيقدروا على فكره :(

عايزاها زى ما هى من يوم الجواز متتغيرش ال يعنى متجوز عروسه بمزنبلك يملاها تعمل كل اللى عايزه وهكذا

ربنا يكون فى عونا

انا مضربه اصلا عن الجواز
بلا جواز ولا بتاع يا شيخه محلاها عيشه بيت ابويا

سلامى

R-H-S يقول...

وصلت الرساله

خواطر شابة يقول...

"أنا أسفة إنى عملتلك إكتئاب ... ولو عايزانى أبطل أكتب خالص أنا مستعدة"
" وإن شاء الله المرة الجاية هكمل دا إن كان فيه مرة جاية"
ليه يا بنتي كل ده انت مقتنعة برأيك وعبرت عنه يبقى خليك على رأيك ودافعي على وجهة نظرك مش اول ماالناس تختلف معاكي تحسي انك غلط وتتراجعي
الاختلاف في الاراء وارد لاننا مختلفون في العقليات وفي الطبائع وفي طريقة العيش ولكن مع ذلك كل واحد حر في التعبير عن رأيه
قبلاتي لبوبة يا ام بوبة

هناء محمود يقول...

olive
نورتينى يا جميل وحلوة أوى حكاية عروسة بزمبلك دى هههههههه



خواطر شابة

عندك مليون حق فى الكلام إللى انتى بتقوليه ودى وجهة نظرى الشخصية كمان

بس المشكلة فى طريقة تعبير إللى قدامك عن رأيه
المشكلة مش فى الرأى نفسه حتى لو بيخالف رأيك اكيد مبنى عن وجهة نظر تحترم

إنما لما تلاقى طريقة طرح وجهة النظر دى فيها شئ من العصبية والإنتقاد والسخرية كمان .. أكيد هيكون رد فعلك مختلف

خواطر شابة يقول...

ايا كان تعبير اللي قدامي حتى لو كان كما قلت انت طريقة طرح وجهة النظر دى فيها شئ من العصبية والإنتقاد والسخرية كمان فطريقته بتعبر عنه مش عني فأناأخذ من كلامه المفيد والباقي لايهمني ولا يؤثر فيا
على فكرة انا اتكلم في العموم لاأقصد اي احد من المعلقين عندك احترامي للجميع
كوني قوية عزيزتي مادمت اخترت ان تكتبي عن وجهة نظر قابلة للاختلاف فاقبلي الامر بصدر رحب ودون حساسية

Engineer A يقول...

ههههههه


بوست عسل ودمه خفيف :)

تقبلي مروري الأول في مدونتك

تحياتي

هناء محمود يقول...

خواطر شابة

شكرا بجد على النصيحة المقبولة جدااااااا
واعتبريه درس اتعلمته وإن شاء الله مش هنساه أبدا .. وانتى فعلا عندك حق .. وطول ما فيه ناس زيك كدة يبقى الواحد مطمن إنه لما هيغلط أو ينسى هيلاقى إللى يفكره وينصحه


engeenera
نورتينى يا جميييييييل ومبسوطة كتير بمرورك

صاحب رأى يقول...

عجبتنى جدا النصايح دى
واوعدك هعمل بيها ان شاء الله لما ربنا يكرمنى واقدر ارتبط ببنت الحلال
بس ياريت بردو هى تخلى بالها لو جوزها عمل حاجات مشابهه
وبردو ياريت هى تحاول تساعد جوزها انه يقولها كلمة كويسه ويعاملها كويسه بلاش البوووووز والنبى :)

وربنا يستر

احساس طفلة محبة للرومانسية بس واقعية يقول...
أزال المؤلف هذا التعليق.
احساس طفلة محبة للرومانسية بس واقعية يقول...

البوست رهيب بجد
وكمان قاريت البوست اللى قبل اللى فات
كلامك يموت من الضحك واكيد فى بعض من الحقيقة بتمس اللى هيقراء وفى اختلافات لازم نكون فاهمينها حسب ظروف كل شريكين واطفالهم يعنى افرضى مثلا واحدة معندهاش ابنها الصغنون هتحط الشربات فين ؟
نعمل لعبة اسمها ابحث عن الشرابات
واكسب 3 شرابات مغسولين هدية :)

حقيقة اكيد الست بتختلف بعد الجواز
ومش اول سنة زى خامس سنة زى عاشر سنة بس لازم بعض الريفريش زى ما قلتى فى النص لان ضغوط الحياة كتير وزى ما هى على الرجل زى ما هى على الست ولازم يكونوا عون لبعض عشان الحياة تمشى

دمتى بكل خير
تقبلى مرورى

اقصوصه يقول...

loooooooool

والله تدويننه فنتك

يا ليت الاولاد يستفيدون منها

استمتعت جدا بالقراءه

اسلوبك فكاهي وجميل

وفعلا كلامك واقعي :)

هناء محمود يقول...

صاحب رأى .. يارب النصايح تفيدك وربنا يرزقك ببنت الحلال وإن شاء الله متكونش من النوع المبوز على طول مع إنه غالبا البوز ده بيكونله أسبابه

هناء محمود يقول...

احساس طفلة .. بجد حسستينى إن مش بادن فى ملطة زى ما بيقولوا .. أهو ده الكلام يا جميل فهمك للموضوعين حاسيت بيهم من الكلمتين إللى قولتيهم .. بجد فهمتيم صح
وحلوة لعبة الشربات دى .. مع إنها مش هتجيب معايا نتيجة أنا مش بعرف شربات جوزى بتختفى فين مع إنى كمان عندى منشر داخلى يعنى مهما راحت أكيد مش برا البيت

وبالنسبة للريفريش ده متتخيليش مهم أد إيه بجد لينا وللزوج كمان بس بجد شئ مهمل لأبقصى درجة والزوجين بيظلموا نفسهم بالحكاية دى والذات إللى حالهم زيى وزى جوزى كدة إللى هتكلم عنه بعدين إن شاء الله

نورتينى يا جميل

هناء محمود يقول...

أقصوصة .. شرفتينى ونورتينى يا جميل وكويس إنها عجبتك ويارب دايما تقرى كل تدويناتى وتنورينى على طول

MǿиY El-Shreef يقول...

هههههههه

والله يا بنتي عندك حق ف حوارات النسوان والنسيان دي

بس مش كلهم كده ماتظلميش الكل :)

بوست دمه زي العسل ع فكره

morgana يقول...

لا موضوع النسيان والتوهان ده من غير جواز ولا حاجه

يانهاري امال هيجرالي ايه بعد كده:))

ظل السماء يقول...

السلام عليكم..
والله كلامك حلو و زي العسل :)
هلأ انا متجوزه من سنتيين و عندي ولد زي القمر يعني :) و بتصير معي الأعراض دي أحيااااناً أحياناً و الله بس:)
يعني زي ما قولتي بالضبط ده بسبب الضغط و الهم اللي بيكوون فوق دماغنا
بس أهو
لسه عايشيين زي الناس و يمكن أحسن كمااان و بنضحك و بنهزر و بنقرأ و بنتثققققف و بنقعد عالكمبيوتر آآآآآآآآآآخر روقان :)
و أنا عن نفسي هلأ عم بحكي و الجو هدوووء يا سلام و ابني باسم الله ما شاء الله نااااايم:) و قاعده بلففف على المدونااات كُلها :)))

آه صحيييييييح
أنا مُمكن أسألك سؤال?
مُمكن?
طيب خلاص هاسأللللل:)
هوَ انتي ليه بتحزفي أغلب التعليقات الغير مُعرررررف? مش يمكن في ناس مُعجبين بكلامك و بيحطو رأيُهم بكل إحترام بس ما عندهمش أكاونتتتتتت????

على فكره بقى يا أم بووووبه
أنا في تاني بوست ليكي كُنت من الناااااس دوووول و علللقت والله و كنت بجد حابه كلامك بس إتحزففففف سوم هااااو :))))
و والله والله ما كانت إيدي مبلووله و لا حاجه
أصل هنا في أمريكا شغل البيت أحلى اشي في الدنيا
كُلللله الماشيييين بتعملو:)))))
بس ها? تقدري تجاوبيييني?

هناء محمود يقول...

مونى

إنتى إللى عسل يا جميل

ومالهم الستات كدة زى الفل بردوا دا كدة بيبقى دمهم أخف


مورجانة

انا كنت زيك كدة برده فى بعض الأوقات بس شغالة بردو بعد الجواز متخافيش

هناء محمود يقول...

ظل السماء نورتينى يا جميل

عندك حق إحنا فعلا عايشين كويس الحمد لله وبنعرف نتصرف برده ونرفه عن نفسنا

بالنسبة بقى للموضوع إللى بتقولى عليه ده بتاع الغير معرف

فأنا عمرى ما لغيت أى تعليق من غير معرف

أنا فى أول ما عملت المدونة كنت عاملاها للمدونين بس وللى عندهم حساب جوجل وبعد كدة صلحتها وعملتها لأى شخص

وعلى فكرة كل التعليقات إللى أنا لغيتها دى كانت ليا أنا و لغيتها لأسباب معينة

وبجد أنا محزفتش أى تعليق فى تانى بوست ليا خالص بجد .. يمكن هو موصلش أصلا ..

إنتى ظلمانى فى الحكاية دى .. وياستى مستنية تعليقاتك على كل البوستات الجاية إن شاء الله وإن مشوفتكيش بقى أنا إللى هزعل منك

وأهلا وسهلا بأى شخص غير معرف

هناء محمود يقول...

ظل السماء

وكمان نسيت أقولك إنى لازم أشوفك فى مدونتى التانية كمان

http://awraktanbod.blogspot.com/

ظل السماء يقول...

اووووووووه خلاص حقك عليااا
أكيييد ما وصلش التعليق و أكيد أنا معرفتش كيف والله

ان شاء الله أنا متربعه في عرش مُدونتك :))))
و على فكره أنا رُحت هناااك أكتر من مره و عجبني الكلام كتيييير بس ما كُنت بعللق عشان خُفت يتحزففف زي ما كُنت فاكره...
و آآآآآآآسفه عشان ظلمتك يا عسسسسسل
إن بعد الظن إثم D:
سلام ...