الجمعة، 25 ديسمبر 2009

أهلا بيا فى عالم المدونات ( إشمعنى انا )

 أولا..  بسم الله الرحمن الرحيم 

ثانيا .. هبدأ بتفسير بسيط أكيد هتحتاجو تعرفوه 

يوميات فرن بالكهربا .. أكيد اسم غريب محتاج لتفسير .. أنا كتبت الإسم ده مش لأن فرنى هو أكتر شئ بشوفه فى اليوم كله بس .. ومش لأنه أكتر شئ بعرف أتحكم فيه وأظبته على مزاجى بس .. ومش لأنه الشئ الوحيد إللى بيعملى إللى انا عايزاه وبطريقتى بس .. كمان لأنى بحس إنى بينى وبينه شبه كبير وهو إنه أحيانا بيكون من جوه على حرارة 250 وفى حاجات بتغلى وممكن تنفجر كمان ..وفى نفس الوقت بيكون محافظ على شكله من بره الهادى البارد الشيك ومحدش بيحس بيه إلا إذا شخص حاول يقرب منه جدااا .. والشخص ده طبعا بيكون أنا .. (أنا وأنا) ..

ثالثا .. بصراحة مش عارفة الواحد بيبقى محرج فى الأول شويا وخصوصا إنه بيكلم نفسه وياعالم هيكلم نفسه لحد إمتى 

بس ممكن نبدأ بالكلام عن  المدونات ... بصراحة انا مكونتش أسمع عنها لحد ما سمعت عن غادة عبد العال وشوفتها فى العاشرة مساء (عقبالنا يارب) أنا واخواتى وحبايبى .... وكمان كان معاها بنتين تانين علشان منضيعش حق حد ... 

بس بصراحة إللى إتشهرت فيهم  والحكاية مشيت معاها هى غادة عبد العال بصراحة تستاهل كل خير أسلوبها فظيع وعندها معانى بين السطور أفظع ... وحاليا بقت بتكتب فى جريدة الشروق حتة واحدة  عقبالى يارب وانتوا كمان (أنا مش بحسدها ولا حاجة) مع إنه كان حلم من أحلامى إنى أشتغل صحافية ... حتى إنى كنت فى الثانوية علمى وإللى يسألنى ناوية تدخلى كلية إيه أقولهم طب (زى أخويا الكبير وقدوتى ) وإللى يسألنى ناوية تشتغلى إيه لما تكبرى أقولهم صحافية (كان عقلى كبير جدا ومرتبة أمورى وعارفة أهدافى كويس

هتقولولى إزاى هقولكم معرفش ... وعلشان ترتيبى وتنظيمى لأولوياتى كان كويس الحمد لله ربنا وفقنى ودخلت كلية تانية خالص (طبعا ده إللى بيحصل مع كل الناس) بس كانت من كليات القمة ومستقبلها رائع وبعد ما تخرجت من الكلية الفظيعة دى ولأنى عارفة هدفى كويس الحمد لله إتجوزت وقعدت فى البيت وحاليا بشتغل مديرة منزل ( بلاش خدامة ) ودادة  ومن غير مرتب كمان بس بمزاجى وهى دى بقت أولوياتى إللى خلاص مبقاش منها مفر 

ولو حد دلوقتى جانى وجابلى وظيفة صحافية على طبق من فضة ... هقوله قلبك أبيض يا خوية هو انا لاقية وقت أكتب فيه مسج على الموبايل حتى  علشان أكتب وأبتكر مقالات  أنا زمان كنت فاضية للأشعار والمقالات إللى محدش كان بيقراها ومش عارفة مكانهم فين دلوقتى 

أنا كل كتاباتى اليومين دول مقتصرة على رسائل قصيرة مكتوبة بخط عفش (لأنى نسيت القلم بيتمسك إزاى ) بالزقها على الثلاجة ... أقول لجوزى فيها على الطلبات الناقصة أو أكتبله رسالة تحذيرية من إنه يفكر أو يحاول يصحينى من النوم قبل ما أصحى لوحدى لأنى نايمة الساعة 7 الصبح بسبب بوبه (بنتى

طولت عليكم صح ... طبعا السؤال دلوقتى أنا جايبة وقت منين أكتب فيه الكلام ده ؟!! هقولكم ... أنا نايمت بوبا وضحيت بساعة غالية عليه من ساعات نومى القليلة علشان  صاحبتى حبيبتى أقنعتنى إنى لازم أمسح دموع البصل من عنيا و أنشف إيدى من غسيل الأطباق ,وألم الكوافيل والبناطيل وأرمى سبت الغسيل وأفتح فرن الكهربا وأخرج منه وأفضفض عن نفسى شوية وكمان علشان أفيد الناس من خبرتى فى الحياة (خبرتى المتواضعة ) وأنا سمعت كلام صاحبتى العزيزة عليا جدااا وعلى فكرة إنتوا كمان تعرفوها ده على اساس إنكم دخلتوا وقريتوا الكلام ده (كفاية بقى أكلم فى نفسى اكتر من كدة ) إن شاء الله الحلقة الجاية هتعرفوا صاحبتى وتعرفونى أكتر

31 التعليقات:

الشعب لابد له من حكومه تشكمه يقول...

يااااجاااااااااااااامد يانوءاااا...
انا صاحبتها انا صاحبتها,,ارجوووووووووووكى بلاش فضايح,,لو هتتكلمى عنى راعى بريستيجى برضه بلاش تبعتريه ادام اصدقائى المدونين..

مستنيه بوستاتك على احر من الجمر عارفه دمااااااااااااااااااااااغك,,فظييييييييييعه

هناء محمود يقول...

شيما حبيبتى ميرسى كتير على الكومبوليمو الرقيق ده (لغات بقى) متخافيش يا شوشو مش هقول كل إللى أعرفه عنك إحنا أصحاب برده وعشرة عمر ووكلين مع بعض عيش وبيض وملح من بتاع المدينة.. بس ده مش هيمنع إنى غصب عنى هتلاقى اسمك كتير بيتقال بس هحاول أسيطر على إللى هقوله .. مانتى جايبة سيرتنا كلنا واحنا كنا نايمين على ودانا .. نورتينى يا شوشو فى اول تعليق

غير معرف يقول...

السلام عليكم

أتمنى لك التوفيق
بالمناسبة لفت نظري أنك من كفر الشيخ فقُلت مبدهاش ندخل نسلم على أهلنا في بلدنا

وأتمنى أن يديم الله عليكالدفء الأسري الذي تعيشه مع زوجك وبنتك إن شاء الله

هناء محمود يقول...

آمين يارب وجزاك الله كل خير

Lady E يقول...

اهلا بيكي يا ام بوبة وبلاش امبوبة دلوقتي :)

اسلوبك في الكتابة جميل جدا بجد

مبروك المدونة الجميلة

هناء محمود يقول...

شكرا كتير يا ليدى بجد مبسوطة لمرورك .. ومتخافيش الأمبوبة حاليا بعيدة عن أى مصدر للإشتعال .. والله يبارك فيكى

!! a7mad sala7 !! يقول...

مبروك البلوج

وويلكم فى عالم التدوين
ويلكم بالانجليزي مش ويلكم بالعربي
مش هتشوفى الويل دلوقتى .. لسه شوية :D

يا رب عامل التدوين يعجبك
وانا واثق انى هستفيد منك كتير

تحياتى :)

قلم رصاص يقول...

السلام عليكم

الف مبروك على المدونة ..وان شاء الله تكون عتبه وشها حلو عليكي

دمتي في حفظ الله

عاشقه وغلبانه يقول...

حمد لله علي سلامه الوصول يا اوختي
هو انتوا لسه ماوصلكوش الغاز الطبيعي ولا ايه؟؟
عموما ياامبوبه ياختي انتي منورانا ومشرفانا ومفرحانا
ياهلا والله
وانا من موقعي هذا
وفي حالتي النفساويه الزفت هذه
بقولك اسعدنا وجودك

غير معرف يقول...

مادام صاحبة شيما القمر
اكيد حتكونى عسل وقمر زيها
باذن الله تكون المدونة فرصة
لان تلتقطى انفاسك وتخرجى عن
الروتين المنزلى اليومى
فى انتظار كتاباتك خاصة وان اسلوبك جميل
ربنا يحفظ لك بنتك

Unknown يقول...

طبعاً بهنيكي لخطوتك الحلوة
واكيد حترتاحي بالتدوين وحتلاقي اصدقاء زي العسل
بتمنالك التوفيق يااااارب
وحياة تدوينية زوجية سعيدة :)

--
طبعاً بهادي المناسبة وبما انه شيما مقفلة التعليقات بمدونتها
وبما انك صاحبيتها فانا حاخد راحتي هون شوية :)
طبعاً بشكر شيما على ترحيبها فيا , انا كتير سعيد بالاتصال بيهم اثناء لقاء المدونين بالمنصورة
بالفعل كنت اتمنى اكون موجود بيناتهم , ولكن لأسف حصارنا وظلم الاحتلال كان دائماً هو العقبة بيننا ..
ولكن فعلاً شعرت بالسعادة حينما تحدثت معهم
تمنياتي لكم جميعاً بالتوفيق

Tamer Moghazy يقول...

تعرفي بقى ان صاحبتك شيما بتحبك قووووي...؟
هي اللي عرفتنا عليك..وبعدين ما الحياة الا مطبخ كبير :)
وكل انسان ممكن يكون فرن بيخفي جواه اكتر من اللي ممكن نتوقعه..
ها نستنى تدويناتك وكل سنة وبوبة طيبة بمناسبة السنة الجديدة.

البنفسج الحزين يقول...

اولا اهلا وسهلا بيكي عضوة جديدة في عالم المدونين ...
ثانيا قولي يا أختشي واحكي خلي الرجاله يعرفوا قد ايه الستات بيتعبوا وبيضحوا بأحلامهم وطموحاتهم عشان تكون بيوتهم مستقرة...
تحياتي

يوميات شاب منوفى يقول...

اهلا بيكى فى عالم التدوين واضح ان اسلوبك جميل فى الكتابة منتظرين المزيد وعايزين نعرف شوية من اسرار شيما دى اختى على فكرة

lostlove يقول...

نورتي العالم الجامد ده
الي انا بردو اتحشرت فيه كده زق وجيت علي فجاء
بس انا بقي قريت فرن كهربا فرن كهربا
وجيت
حتي مفيش حتيت كيك
صنيه بسبوسه
كدهو يعني
خلاص انا هعمل واجبلك
تحياتي ليكي ونورتي
واتمني التوفيق

هناء محمود يقول...

لأ لأ لأ أنا كدة إتفاجئت يعنى أنام وأصحى ألاقى المدونة بتاعتى مكسرة الدنيا كدة

(أنا عارفة إنها كوسة ووسايط من شيما صاحبتى ) بس الوسطة حلوة برده بتريح الواحد معدش فاضى ياخد السلم خطوة خطوة .. الأصانسيرات بقت مالية البلد

على العموم انا بشكوركم واحد واحد وواحدة واحدة بجد .. وشكرا على الكلام الجميل ده

وإللى عايز يعرف حاجة عن شيما .. أكيييييييييد هيعرف إن شاء الله ..

وأهم حاجة هتعرفوها دلوقتى إنى انا كمان بحبها أوى هى أختى مش صاحبتى بس ..

ومتخافوش الفرن شغال 24 ساعة وهتدوقوا كل طبخاته وحلوياته إن شاء الله .. وكمان عندى أكلات بايتة بس مش بايظة هدوءكم منها برده شئتم أم أبيتم

والآن عليا الذهاب إلى الروتين المنزلى .. وكمان عندنا حدث حماااااااتى معزومة عندنا النهاردة هى وعائلتها الكريمة هروح بقى لفرنى حبيبى إدعولى

Mano يقول...

يأهلا بيكي
في عالم المدونين
مانتي كنتي مريحة دماغك
استعدي للصداع بقي من هنا وجاي
تحياتي

مواطن شووجااع يقول...

أسلوبكـ في العرض حلو بجد وشيق

ستيتة يقول...

شوفي انا اعرف ام علي
دي حبيبتي
ام هند
دي لغة شوبابي آخر تلات اربع حاجات
لكن ام بوبة دي جديدة فعلا
مرحبا وهلا فيكي اخت ام بوبة
فضفضي براحتك يا اوختشي احنا نتشرف
بس الاهي ما يأخر لك بتاع انابيب تعملي صفحة التعليقات منفصلة
وشيلي البتاع بتاع التحقيق ده بالمرةإلاهي يدخلوا لكم الغاز الطبيعي يا شيخة
تحياتي وخالص امنياتي بالتوفيق

MǿиY El-Shreef يقول...

اووووووووووعى صاحبة شيما جااااات

لولولولولولولولولولىىىىىىىىى

يادي النور يادي النوور

دانا افرشلك البلوجر كله رمل وورد وكل حاجه جميله غير قابله للاشتعال :))

بصي انا عن نفسي هتابعك اكيييييد ان شاء الله

واي حد من طرف شيما يبقى حبيبنا ونحطوه جوا عنينا

منورة كل بلوجر يا ام بوبه

سجود يقول...

السلام عليكم
مبرووووك علي المدونه ونورتي عالم التدوين كله
وربنا يوفقك يارب
ويباركلك في بنتك
وتعيشي حياه سعيده انتي وهي وزوجك ان شاء الله

Remas يقول...

اهلا بيكى ياقمر

ونورتى التدوين كله

بجد اسلوبك عسول خالص خالص

وواضح جدا انك انتى وشيما اصدقاء فعلا لان لكم نفس الدماغ الحلوة والروح الجميلة

بس فعلا وصفتى حالنا كلنا بعد الجواز

وطموحنا واحلامنا قبل الجواز والاطفال

ربنا يخلى لك بنوتك الحلوة وبيتك وجوزك

وفي انتظار بوستك القادم يا قمر

همس الاحباب يقول...

مبروك المدونة
ونورتى عالم التدوين يا ام بوبة
والواضح ان اسلوبك فى السرد شيق
وربنا يستر علينا من شيما وام بوبة
تحياتى

سارة درويش يقول...

ههههههههههههههههههههههههههههههههههههههههههههههه انتي بجد زي العسل
عاجبني دماغك اوي وفكرتك ف الاسم
وان شاء الله اتابع مدونتك دايماً
وياستي طلعتي ما بتكلميش نفسك ولا حاجة اهو :D

R-H-S يقول...

بوتجاز بالكهربا دا لسه موصلش البلد عندنا
خلاص
مادام البوتاجاز دا بيطلع حاجات جميله كدا نبقي نقعد نسمعله واسلوب جميل والي الامام
يام بوبه

ملحوظه مدارية : ياريت تشيلي ال notification
:D

فراشة يقول...

أهلا بيكي يا ام بوبه واهلا ب بوبه شخصيا وبوسه منى ليها

اسلوبك جميل ماشاء الله ونورتينا هنا ف عالم البلوجر ويارب تتبسطي معانا فيه

وتفيدينا بخبرتك ف كل حاجة .. وتحكي وتتكلمي واحنا نسمعك ومتبقيش فرن كهربا

منورانا ومرحبا بيكي

blue-wave يقول...

اشتقنا اوى نشوف دماغك عامله ايه:))
مستنيننك واهلا بيكى وسطنا

أحمد عاطف يقول...

بسم الله الرحمن الرحيم

اول مرة الاقي واحده ست فاهمه معنى الفرن

واد ايه الفرن دا يشبه البشر

كل اللي كنت باشوفهم بيتكلموا عن الفرن بيتكلموا عنه على انه هم وغم وخدمة لراجل مابيحسش وعيال يقصروا العمر

اهلا بيكي في عالم التدوين

واسلوبك بسم الله ما شاء الله مش محتاج اي كلام

كلهم مدحوا بما فيه الكفاية

واحيانا مدحي بيكون سمج بس اكيد انتي عارفه مقدار نفسك

ربنا يزيدك

Cute Kitty **sookra يقول...

شيما طبعا عملت الواجب
وعرفتنا على مدونتك
وجينا لقينا اسلوب جميل وحلو
وانا شخصيا اتبسطت جدا لما عرفت انك من كفر الشيخ
كدا بقى ممكن نعمل حزب وتجمع عندنا احنا كمان ولاايه
كل سنه وانتى وبوبه طيبين
ويارب نقرالك بوستات مولعه بنار الفرن بتاعك

dr.abdallah يقول...

السلام عليكم

على فكرة كلامك حلو جدااااااااااااااا

و اسلوبك اكثر من رائع و ده مش مجاملة

بجد انتى فعلا تستاهلى اكتر من كدة و الف مبروك من قلبى على المدونة اللى ان شاء الله هاتكون قريب جداااااااااا
احسن مدونة فى مصر

بس بالله عليكى بلاش شغل كتير على الفرن لسببين

اولا فاتورة الكهربا اكيد هاتكون نااااااااار

ثانيا انا لسه بدفع اقساط الفرن

هههههههههههههه

بنـوتــــة يقول...

برغم إن ده أول بوست
لكن حبيت أقولك فيه
بما انه باب المدونة
^ـ^
بجد بجد
المدونة تحفة و رائعة جداً
جميلة جدا جدا جدا
و أسلوب أحلى
ربنا يخليلك بوبة يا رب و يحفظهالك و يباركلك فيها

و الحمد لله
ايدي مش مبلولة
و مش ماسكة كبريت
و مش راجل عشان أطبق الشرط التالت - خصوصاً إني مبدخنش
D:
^ـ^