كان نفسى أكون كدة ..

 

نفسى لما أشوف سطور وأقراها هى وبس ..مفهمش إللى بين السطور لأنه أحيانا بيتعب .. وبالذات لما بتكون السطور بتقول كلام تانى غير إللى بينها 

  لما أى إنسان يقول كلام يضايقنى أو يجرحنى ويدعى إنه مكنش يقصد .. نفسى مفهمش إنه كان يقصد كل كلمة بيقولها 

 نفسى مكونتش أعرف عدوى من حبيبى .. علشان متعبش أوى لما أبقى متأكدة إن ده عدوى وبيمثل عليا دور حبيبى

نفسى لما أتكلم مع أى إنسان .. وأقول أى كلمة .. ويدعى إن كلامى ضايقه .. مفهمش إنه متأكد إنى مقصدش .. بس هو إللى عايز يمسك عليا غلطة لمجرد إن ده بيسعده

 نفسى لما أكون تعبانة وحزينة ومهمومة .. أبكى وأحزن وأصرخ قدام الناس كلها .. ومجيش على نفسى وأضحك علشان مزعلش الناس إللى بيحبونى

نفسى لما حد يضايقنى بجد ويظلمنى ويجرحنى .. آخد منه موقف شديد أو أبعد عنه وأطرده من حياتى .. من غير ما أحاول أخترعله  عذر واتنين وتلاتة وأديله أكتر من فرصة

 نفسى لما أفضل أدى كتير وكتير لأى إنسان أقف عند حد معين .. ولو مفيش مقابل يبقى خلاص لحد كدة وكفاية

نفسى لما أكون محتاجة شئ أو نفسى أحقق شئ لنفسى .. أعمله حتى لو مش هيفيد غيرى أنا .. ومتخلاش عنه وأتهم نفسى بالأنانية 

نفسى لما احب محبش أوى .. علشان متعبش واتألم لما ملاقيش مقابل الحب ده 

 نفسى موزنش كل شى حواليا بميزان حق ..  وبمثالية زايدة  ..  وأخاف أظلم ناس أسهل حاجة عندهم إنهم يظلمونى

نفسى لما أسمع هموم غيرى .. متأثرش أوى وأفضل أحط نفسى مكانهم .. وأنا عندى إللى مكفينى ومحدش بيسمعنى .. وإللى بيسمعنى .. بيسمع بس و مبيحسش بيا

أنا أسفة 

كان نفسى أقولكم كلام يضحككم زى كل مرة .. بس تعبت من كتر ما بضحك وأضحك الناس وأنا جوايا مش بيضحك

نفسى ربنا يعفوا عنى ويرحمنى ويغفرلى ويهدينى

اللهم عافنا وأعفوا عنا يارب وأغفر لنا كل ذنوبنا ما ظهر منها وما بطن

ذكريات مطبخ سنة اولى جواز

السلام عليكم ورحمة الله وبركاته

البوست إللى فات كلمتكم عن ذكرياتى فى مطبخ ماما .. وأد إيه انا كنت طباخة فظيعة .. وأد إيه انا كنت حد ملوش سبت فى الطبيخ ..

(أخدتوا بالكوا من حد دى .. أصل نفسى اقولها من زمان )

نكمل بقى بحق وحقيقى .. 

المهم يا سادة يا كرام .. قبل ما اتجوز بحوالى 3 - 4 شهور ..

ماما قالتلى حجتك بطلت ولازم تتعلمى بقى .. 

وفعلا إتعلمت المبادئ بتاعت الطبخ كلها .. الأساسيات يعنى وجربتها كلها بنفسى

بس إكتفيت إنى أكتب  باقى الوصفات زى البشميلات والمحاشى وبعض الحلويات فى أجندة علشان مكنش فيه وقت

وقعدت مع ماما قبل الجواز بحوالى أسبوع كدة واقفة وراها فى المطبخ وماسكة الأجندة والقلم وأسألها عن الحاجات إللى مجربتهاش بنفسى

زى أعمل المحشى إزاى ..

وهى تقولى كذا وكذا وكذا وتقشرى توم علشان التقلية ..

أقولها كام تومة يعنى

تقولى 3 أربعة كدة حسب حجمهم .. 

اقولها لأ كام بالضبط وحجمهم اد إيه .. 

متبوظليش الطبيخ بتاعى ( آل هى إللى هتبوظهولى )

إللى إكتشفته بقى بعد الجواز .. إن الفكرة مش فى التعليم بس ..

إنما التعليم ده لازم يكون معاه الخبرة والممارسة

هتقولولى ليييييييه .. 

أقولكم

علشان أولا :اللياقة البدنية

هتقولولى يعنى إيه

أقولكم

يعنى لما أبقى قاعدة فى بيت أبوية مأنتخة ومبلطجة وأخرى أقوم أعمل شاى بالعافية ويوم اما آجى على نفسى أوى أحضر العشا مع ماما

يبقى بالشكل ده لما اتجوز وأصحى أحضر فطار وبعد الفطار أبدأ أحضر فى الغدا وبعدين يبقى مستنينى تحضير عشا بالليل وخصوصا لما تتجوزى واحد زى جوزى عايز يكون قدامه أطباق كتير على أد ما تقدرى .. وبيحب التزويئ والإختراعات الجديدة فى كل حاجة وبيمل من تكرار الأصناف ( يا عينى عليا )

هتلاقى نفسك هنجتى فى نص اليوم ومش قادرة تخدى نفسك ورجلك بتنأح عليكى وتعبانة وعايزة تنامى بعد كل وجبة 

وخايفة اليوم يعدى علشان هتكررى كل ده تانى يوم .. 

وجوزك هيحس إن عندك 60 سنة 

مش فى ربيع عمرك لأ دا هيلاقيه خريف وبيمطر كمان

وخصوصا فى الأيام إللى بيطلعلك فيها أعمال مصاحبة زى التنضيف والغسيل وغيره

أنا عن نفسى كنت أروح أزور ماما وبابا يقولولى مالك يابنتى تعبانة كدة ليه ووشك مخطوف ..

أقولهم أصلى النهاردة عملت فطار وغدا ....... عشينا بقى يا ماما عاااااااا

كانت امى تفرح فيا بس بابا كان يقعد يأنبنى ويقولى فطار وغدا أومال بعد العشا بتكونى عاملة إزاى

ويدور الدفة على ماما كالعادة ويقول ما امك دى إللى خيبتك جمبها وهى إللى دلعتك

وتبدأ المناقشة المعتادة .. وأنا اروح أترمى على أى سرير فى البيت

طبعا موضوع اللياقة البدنية ده بيكون مؤقت وبعد كدة الحاجات دى مش بيتعملها حساب وبتبقى سهلة جداا وممكن الواحدة تعمل 4 او 5 شغلانات فى وقت واحد وبعد ما تخلص تكون لسه فريش ومفيش مانع تخرج تتمشى هى وجوزها كمان 

.. وكمان بعد ما بتخلف بتقدر تعمل 70 شغلانة فى وقت واحد

ثانيا بقى : الخبرة والنفس بتاع الطبيخ

عايزة ممارسة بصراحة

هفهمكم من خلال موقفين حصلولى

أولا .. الرز المعمر

أكيد كتير منكم عارفينه

فى اول شهر جواز حبيت اعمل لجوزى مفاجأة وأعمله رز معمر لأنه بيحبه

ومش أى حد يطبخه دا لازم تكون طباخة مية مية ... حبيت طبعا اسبتله إنى طباخة بريمو .. ما أنا معايا كل الوصفات فى كتاب نظيرة .. قصدى اجندة ماما 

المهم عملت كل حاجة مكتوبة بالحرف الواحد ومن المعروف إن الرز المعمر بيتعمل بلبن ( طبعا حطيت اللبن مش نشا مش للدرجادى ) وحطيته فى الفرن ومستنية بقى وبعد شوية ببص ... لاقيته عامل زى ما يكون رز بالجبنة .. اللبن مكلكع كدة والرز فى جمب واللبن فى جمب ومش شبه الرز المعمر خالص إللى ماما بتعمله

قررت أرميه فى الزبالة بقى وأعمل رز عادى وخلاص بما إن جوزى ما يعرفش

بس إللى حصل فى اللحظة دى لاقيت باب الشقة بيتفتح وجوزى جه .. والصينية سخنة ومش عارفة أفضى الرز منها وأرميه قبل ما جوزى يشوف الفضيحة

فذكائى بقى وسرعة البديهة بتاعتى خلتنى أرمى الصينية كلها فى الزبالة وقفلت عليها بسرعة 

ودخل جوزى طبعا على المطبخ على طول وسألنى السؤال المعتاد الأكل خلص

قولتله كل حاجة خلصت بس لسة شوية على الرز ههههههههههههه (دى أنا)

إللى إتضحلى بعد كدة إن اللبن كان رايب .. وكان المفروض أختبر اللبن الأول بإنى اغلى شوية كدة على جمب علشان أتاكد إنه كويس 

(هو ده الدرس المستفاد من أول رز معمر عملته فى حياتى )

ندخل على الحمام المحشى بالرز لأننا مش بنحب الفريك

لاقيت فى الفريزر بتاعى حمام قولت ليه لأ .. يعنى إللى بيطبخ حمام احسن منى

وروحت على التيليفون ( التيليفون الأول وبعدين المطبخ ) 

أسأل ماما لأنه مكنش فى كتاب نظيرة

ماما قالتلى كل الوصفة ومن ضمنها إنى بعد ما احشى الحمام أقفله بالإبرة والخيط كويس علشان الحشوة متقعش منه وهو بينطبخ

إلتزمت بالتعليمات وبعد ما حضرت كل حاجة .. مسكت الخيط والإبرة وقفلت الحمام كله ولا أجدعها خياطة لدرجة إن مفيش رزاية واحدة حتى وقعت منه وهو بيتسلق

( لأ طباخة طباخة يعنى )

وخلص الحمام وكله ماشى تمام وإتحمر وبقى شكله تحفه .. وقعدت أصور فيه بالموبايل وكنت ناقص أنزله على النت

وجه جوزى وتفاجئ وإنبهر ..  ثم .. إستغرب وقلق

(ده تطور طبيعى وإحساس طبيعى بيبقى عند الأزواج الجداد )

وطبعا كنت محضرة المقص مع الأكل علشان نفتتح الحمام لأنه متقفل جامد .. وطبعا كالعادة بدأ الأول بتفريغ الحشوة من الحمام فى الطبق (ترك ترك ترك ترك ترك) ده صوت الرز وهو بينزل على الطبق

مستواش ههههههههههههه ( دى انا )..

الناس بتقول فى الطبخات البايظة أصلى زودت الملح شوية او قللت الماية شوية ...

وأنا قولت

أصلى خيطه جامد شوية ههههههههه .. 


لدرجة إن الماية موصلتش للرز ومستواش 
(ودا الدرس إللى إستفدته من أول حمام محشى عملته فى حياتى )

باقى المقالب إللى شوفتها وجربتها وجوزى كان صابر عليا فيها كتير عايزين مدونة لوحديهم بس بصراحة كان جوزى راجل مثالى وبيصبر وبيحتسب

بس أكيد فهمتونى أنا أقصد اقول إيه من الموقفين دول

لأن إتضحلى بعد ما إتعلمت الطبيخ كويس ومارسته كتير إنه ممكن يكون زى الموهبة والإحتراف كمان ..

وينفع فيه الإبتكار والإختراع كمان وأحيانا التأليف وبتكون الست مستمتعة جدااا وهى بتبتكر وبتجرب

بس ده كله مينفعش يتعمل إلا بعد ممارسة طويلة وخبرة وساعتها بتكون الست واثقة فى نفسها وتقدر تتحكم فى نتيجة أى شئ هى بتعمله حتى لو كان لأول مرة

عايزة أقول حاجة كمان

إنى بجد عملت المدونة دى وبكتب فيها الكلام ده .. 

علشان أولا وأخيرا ..

أوجه نظر الناس سواء بنات او ولاد أو ستات أو رجال لحاجات ممكن يكونوا شايفنها صغيرة بس هى أخطاء بتتكرر كل يوم ومهملة ..

وكل جيل بيسلم للجيل التانى نسخ طبق الأصل من الأولانى .. يعنى نفس الأخطاء دى بتتكرر بنفس الحجج والمبررات ومفيش توجيه كافى فيها .. لأنهم شايفينها صغيرة والكل بيقول بكرة يتعلموا ..

مع إنهم لو إتعلموها النهاردة هتفرق معاهم كتير بكرة وهيكونوا أحسن فى بعد بكرة كمان

كلامى مش بينطبق على الموضوع ده بس ولا كل المواضيع إللى كتبتها عن الحياة الزوجيه إنما كمان كل حاجة تخص حياتنا 

بس أنا آخر تخصص ليا حاليا هو الحياة الزوجية إللى مليش حياة غيرها

فى مقولة سمعتها زمان

إن الغبى ..إللى مش بيستفيد من أخطاؤه

وإن الذكى .. إللى يستفيد من أخطاؤه

وإن الأذكى .. إللى يستفيد من أخطاء الآخرين

لو كنت فى حياتى شايفة نفسى إنى كنت بحاول أكون ذكية .. 

فبتمنى بجد إن كل إللى حواليا يكونوا أذكى ويستفيدوا من أخطائى .. وميمنعش كمان إنى بحاول أكون الأذكى فى حاجات تانية كتير وأستفيد من أخطاء غيرى

والسلام ختام

ذكريات من مطبخ قبل الجواز

السلام عليكم ورحمة الله وبركاته

إيه الأخبار ؟؟!!

 الحمد لله ...

 الحمد لله ... أخبار النكد إيه والكسل وحالات الإحباط  .. مش احسن برده 

 الحمد لله ...

 الحمد لله ... أنا كمان كنت داخلة على حالة الكسل والإحباط  .. بس الحمد لله 

 الحمد لله ... 

 طبعا الحمد لله

حبيت اكلمكم النهاردة عن ذكرياتى فى مطبخ ماما قبل الجواز

 وعايزة بقى بالذات البنوتات الحلوات المقبلات على الجواز يصحصحوا معايا علشان يستفيدوا .

 وطبعا كالعادة الدعوة عاااااااااامة للجميع 

 أنا طبعا هتكلم عن نفسى وتجربتى الخاصة  وممكن ميكونش كتير منكم كان بيستمتع بالمميزات بتاعتى دى

 يعنى أختكم كانت قبل  الجواز .. أستاذة فى الطبيخ .. قمة فى جميع أصناف الحلويات والباشميلات وتخريط الملوخيات إلخ إلخ إلخ

( أول مرة أشوف واحدة بتكدب وبتقول إلخ إلخ )  هو الكدب كمان فيه إلخ 

نقول الحقيقة بقى .... أنا بصراحة مكنليش فى المواضيع دى .. كنت قايمة بالدور التانى فى فيلم المطبخ يعنى تقشير توم .. بطاطس .. سلق بيض .. حرق رز .. حاجات من هذا القبيل ...... مع إنى كنت بكره الدور التانى ده 

 كنت بحس إنى مش سيدة الموقف .. أو بمعنى أصح مش سيدة المطبخ .. وكنت دايما بتخانئ مع سيدة المطبخ إللى هى أمى  

وكان المطبخ بالنسبالنا بيبقى ساحة المعركة ووبتنتهى المعركة بصرخة كبيرة من ماما بتنده لبابا وبتقوله ( طلع البت دى من هنااااااااااا )

بس هى بصراحة إللى كانت تاعبة نفسها معايا  فى حاجات بسيطة  ممكن تتغاضى عنها .. زى

 كانت بتحاول كتير تقنعنى إنى لما أكون واقفة فى المطبخ أكون مشمرة إيديا الإتنين .. وأنا مكونتش بحب أعمل كدة

وغولبت معايا بصراحة فى إنها تحاول تخلينى أستخدم إيدى الإتنين .. يعنى مينفعش أقلب البطاطس فى الزيت بإيد والإيد التانية أحطها فى جيبى كالعادة  .. وأنا كنت بحب دايما احط إيدى فى جيبى وأنا واقفة فى المطبخ ( طول عمرى شيك )

 وكمان كانت دايما تقولى لما يكون فى حاجة سخنه على النار ياريت أستخدم فوط المطبخ فى شيلها من على البوتاجاز وبلاش كمام البيجامات بتاعتى 

أنا عن نفسى كنت بلاقى الطريقة دى عملية أكتر وسريعة مع إنها أحيانا بتسيب أثر فى كمام البيجامة .. وكمان فادتنى كتير لما روحت سكن الطالبات

 أنا كنت دايما أقول لماما مش مهم انا بعمل الحاجة إزاى .. المهم النتيجة 

 بس هى كانت دايما تقولى لأ .. الوقفة فى المطبخ ليها أسلوبها وطريقتها 

 كانت دايما تقولى أنا مش هدفى إنك تساعدينى فى حاجة .. أنتى بتعملى كدة علشان نفسك علشان لما تتجوزى

 أقولها خلاص ياستى ليكى عليا قبل ما أتجوز بشهرين آخد قرص طبيخ مكسف وأبقى طباخة مية مية 

كنت بتضايق أوى لما بلاقى ماما بالليل واحنا كلنا قاعدين سوا .. وهى واقفة فى المطبخ بتعمل حاجات ..وأقعد أقول لنفسى هى بتجيب الشغل ده منين هو شغل المطبخ ده صبح وظهر وبالليل كمان 

وأقول أنا لما هتجوز عمرى ما هعمل كدة .. المطبخ له وقته وبعد كدة خلاص شطبنا .. والواحد يقعد بعد كدة مع عيلته 

 لما ماما كانت تصحى بدرى وإحنا نايمين وألاقيها بتخربط فى المطبخ وأسمع صوت الحنفية شغال  .. 

كنت بتضايق لأن كان نومى خفيف جدااا .. وكان نفسى تبطل العادة دى وتصحى متأخر شوية .. حتى فى الأجازة بما إنها كانت بتشتغل .. إيه المشكلة يعنى 

 وكمان كنت بتضايق لما كانت تدخل الأوضة عليا وأنا نايمة علشان ترتب فيها حاجة .. وتقعد تخربط فى الأوضة 

 وأقولها طيب ما تستنى يا ماما لما أصحى ..

تقولى يعنى أستنى للظهر .. ليه هو أنا مش ورايا غير اوضتك

 أقولها طيب انا لما هصحى هرتبها 

 تقولى .. مش هتعملى حاجة .. أعملها انا أضمن  

 (كانت بتثق فيا ثقة عمياء)

 كان ناقص تطبق البطانية وانا فيها علشان تبقى خلصت ترتيب البيت 

 وكانت دايما تقولى إنى أنا المفروض أصحى بدرى 

( طبعا ده كان بيكون فى الأجازات )

 بس بقى انا كان عندى وجهة نظر ومقتنعة بيها  فى الموضوع ده

بما إنى طول السنة فى دراسة زى أخويا الولد بالظبط ..

مينفعش لما آخد اللأجازة أقضيها فى المطبخ وهو يبقى سهران براحته ومزاجه حلو .. وانا إللى أدخل أنام بدرى و أصحى بدرى علشان عندى شغل بيت الصبح ... أومال هرتاح إمتى بقى 

 والله لو مش عاجبهم الحال ده .. كان عملوا معانا زى زماااااان ...

لما كانت البنت مش بتتعلم وحتى بنات الذوات كانوا بيجيبولهم فى البيت مدرسين يعلموهم القراية والكتابة .. ومدرسة البيانو ومدرسة الفرنساوى وخلاص .... 

وبيتعلموا التريكو والكروشيه والأشغال اليدوية ........ والله كانوا زى الفل وقاعدين فى البيت مترستأين .. ولا مواصلات ولا سكن طالبات ولا بهدلة وفى اللآخر كانوا بيتعلموا أحسن مننا

 مأنا فضلت أربع سنين رايحة جاية بلاد تشيلنى وبلاد تحطنى علشان أتعلم إسبانى وفى الآخر قعدت فى البيت ومش فاكرة منه حاجة غير hasta la vista  يعنى إلى اللقاء

 وياما انا وشيما صاحبتى 

دعينا على هدى شعراوى وقاسم أمين 

وإحنا صاحيين الصبح بدرى ورايحين الكلية ومتعكننين

وبنقول منهم لله مكونا فى بيتنا مرتاحين 

 ووقتها مكوناش عارفين لا إحنا  ستات بيوت شاطرين 

ولا عارفين نبقى زى الولاد 

طول السنة فى دراسة وفى الأجازات مرتاحين ومبسوطين ...

بقى عندنا بدل الشغلانة الواحدة شغلانتين 

ولا إحنا فى دى عدلين ولا فى دى فالحين 

 الحكاية قلبت معايا شعر ههههههههههه .. مكنش مقصود والله بس طلع معايا كدة 

 البوست الجاى إن شاء الله هقولكم .. إيه إللى إكتشفته فى مطبخ سنة أولى جواز .. غير عندى وجهات نظر كتييييييير

نشرة الأخبار الرياضية ... الكورة مع أم .. بوبة

 نشرة الأخبار الرياضية ..... تقدمها لكم  :  أم .. بوبة

 مساء الأنوار

الخبر الأول .. بعنوان

  كابتن شوبير وحبوب الصراصير

 قام حارس المرمى بنادى الأهلى سابقا, ومقدم البرامج الرياضية  الشهيييير وعضو البرلمان الكبييير حاليا  كابتن أحمد شوبيييير ,

يوم فوز المنتخب المصرى بكأس الأمم الافريقية , بغلطة عمره , وهو عندما أخذته الفرحة ومكنتش هترجعه تانى , عند مكالمته الهاتفية بالسيد جمال مبارك فى أنجولا وتهنئته بفوز المنتخب المصرى قائلا :
(مبروووك يا جيمى)

   

    
ويا داهية دوجى على دماغ الكابتن شوبير  

والله أعلم أين قضى الكابتن شوبير ليلته هذه إللى مكنش هيطلعلها شمس .. هناك مصادر تقول يا إما قضاها على البلاط فى أحد الغرف المظلمة بدليل ظهوره فى اليوم التالى فى برنامجه الشهير وهو يبدو عليه أعراض البرد وقلة النوم .... أو يا إما قضاها فى بيته يتلقى مكالمات هاتفية من أصدقاءه واحباءه يقولون له (إيه إللى إنت هببته ده يا كابتن إنت كنت مبلبع حاجة )  .. يا إما قضاها فى منزله وعلى سريره ولكنه بيتقلب شمال ويمين وبيفرك ومش عارف ينام لأنه كل ما ينام يحلم بالسيد جمال مبارك وهو رئيس للجمهورية على إعتبار ما يمكن أن يكون .. ومعلقه من رجليه وبيقوله (بقى أنا جيمى يا شوشو طب  خد ............) يقوم يصحى مفزوع .. أو يا إما مخرجش أصلا من الأستوديو لحد اليوم التالى منتظر أن يصلح غلطته .

فقام الكابتن شوبير فى اليوم التالى بمحاولة تصليح ما قد طينه فى الأمس , وهو عندما ظهر فى برنامجه وكأنه لم ينم ولم يزق طعم الراحة ولا الزاد حتى هذا الحين .. قائلا:

( خلاص إمبارح كنا فرحانين والفرحة مأثرة علينا وكنا بنقول للسيد جمال يا جمال والسيد علاء يا علاء بدون ألقاب من فرحتنا .. بس خلاص النهاردة بقى نرجع الألقاب ونقول السيد جمال والسيد علاء وإلخ إلخ إلخ ) وكل شوية يعيد ويزيد فى الكلام ده  .. وكان يتلفت يمينا ويسارا وكأنه خايف من تكرار شئ ما حدث من قبل .. الله أعلم ما هو

 الخبر الثانى  .. بعنوان

  كل الأحبة إتنين إتنين وانت يا حضرى فريقك فين

تساؤلات تدور حول مصير حارس مرمى المنتخب المصرى عصام الحضرى  بعد ما حقق كل هذه البطولات الرياضية وسجل اسمه فى تاريخ رياضة كرة القدم بحروف من ذهب  .. لأنه بعد ما مخه وعقله الكبير هيأله إنه لما يترك النادى الأهلى ويلتحق بمركز شباب سيون الرياضى هتفرج وهتبقى ميت فل وعشرة 

.. وإن هو ده الصح والكلام إللى ميزعلش حد ومكنش شايف سبب مقنع لزعل الناس وموقف النادى الأهلى منه 

... ولكن بعد ما ظهرت له الحقيقة وطلعله مخ فى يوم ما 

وعرف إنه عك عكاية جامدة ومش عارف يعمل إيه

وبقى بيشيل التراب ويحطه على نفوخه ويلطم على وجهه .. ويحب على إيد السيد حسن حمدى رئيس النادى الأهلى .. والسيد حسن حمدى يقوله روح مطرح ما جيت ملكش عيش عندنا كل لقمتك فى حته تانية ....

والكابتن عصام مش بيبطل تلميح فى كل وسائل الإعلام  بإنه زعلان وندمان ونفسه يرجع النادى الأهلى , والنادى الأهلى مصدر الطارشة كعادته لمن يسول لهم انفسهم التجرؤ عليه وعدم الإلتزام بقوانينه ( الكبير كبير يا جدعان )  

فلا يزال الأمر بين مؤيد ومعارض و الكل منتظر ومهتم ويتساءل هل سيسامحه النادى الأهلى بعد فوز المنتخب المصرى بكأس الأمم الإفريقيه ويرجعه وعفا الله عما سلف  .. ولا برده هيفضل مصدرله الطارشة إقتداءا بالمثل الذى يقول
( مطرح ما تكاكى بيضى )

 الخبر الثالث والأخير .. بعنوان

   زيدان يقبل يد  آبـــا  الحاج  السيد محمد حسنى مبارك

 قام لاعب الكرة محمد زيدان , إللى محتار دايما فى شعره ومش عارف يعمل فيه إيه ولا إيه وكل يوم بقصة شكل ومعتبر شعره كراسة الرسم بتاعته , 

ومحتار أيضا فى مقاس حذائه الذى غالبا ما بيكون ضيق عليه , لذلك بيضطر آسفا لخلعه أثناء اللعب والجرى حافيا علشان يهوى رجليه شوية , 

بعد عودته من أنجولا مع المنتخب المصرى ومقابلة الرئيس محمد حسنى مبارك وإلتقاط بعض  الصور التذكارية معه وأثناء مصافحة الكابتن محمد زيدان للريس قام بتقبيل يده وكان ناقص يحب على راسه .. ولقد فسر الجمهور المصرى هذا الفعل تفسير واحد فقط ملوش تانى وهو إن الكابتن محمد زيدان أخذته حرارة المشاعر واعتبر وقتها السيد الرئيس زى أبوه الحج زيدان بالظبط

انتهت النشرة الرياضية ... طاب مساءكم ... وإلى اللقاء

بس ما تمشوش قبل ما تحلوا أسئلة المسابقة الرياضية ...........
                                                                                                             

  

                             

أسئلة المسابقة الرياضية

   السؤال الأول 

  # لما الكابتن شوبير قال للسيد جمال مبارك يا جيمى  ...

  1- كان ناسى نفسه   

  2 - كان مبلبع حاجة  

  3 - كانت الفرحة مش سيعاه

.........................................................................................

  السؤال الثانى

  # لمشجعين النادى الأهلى .. ماذا تحب ان تقول للكابتن عصام الحضرى ؟

  1- إرجع يا حضرى 

  2-  إهرب تانى يا حضرى   

  3- نصيبك كدة وأرقص فى أى نادى يا حضرى

..........................................................................................

  السؤال الثالث

  # ماهو توقعك لتسريحة محمد زيدان القادمة ؟

1- هيحلق زلبطة  

 2- هيزرعها نجيله   

       

 3 - هيرسم خريطة مصر

 .................................................................................

  ترسل الإجابات على صفحة تعليقات يوميات  فرن بالكهربا 

   وسيحصل الفائز إن شاااااااااء الله على صينية كوسة بالبشاميل

إزاى تخلى زوجتك تحبك

السلام عليكم ورحمة الله وبركاته

انا بقى هتكلم دلوقتى عن شوية حاجات بسسسسسيطة جدااااااا ( أكيد من وجهة نظرى الشخصية ) لو عملها الزوج بتفرق كتير أوى مع الزوجة فى وسط الضغوطات النفسية والبدنية إللى بتكون فيها الستات بعد الجواز والخلفة والعيال

كلامى كله فى الحاجات البسيطة إللى ممكن تفرق معايا أو مع غيرى أو متفرقش مع حد غيرى ... بإستثناء إللى بيفرق مع الكل وهو .. (الخيانة , الكذب , الإساءة فى المعاملة , البخل , الكراهية إلخ إلخ الحاجات إللى ميختلفش عليها إتنين )  مش موضوعى

طبعا انا مش بنفى إن الزوج مش بيكون مضغوط فى شغله وتحمله المسئولية ..  .. هو كمان بيكون مضغوط وتعبان ومرهق ..

بس فى البوستين إللى فاتوا أنا كنت حابة أبين للى مش عارف إن ست البيت مش مجرد واحدة قاعدة  فى البيت وفاضية ومش حاملة هم حاجة .. لأ دى بتشتغل كتير وشغل مهم جداااا لا يقل أهمية عن قيمة شغل الرجل ولو توقفت عن شغلها ده فى أى وقت الدنيا بتبوظ خالص وحتى معندهاش أجازات  ( علشان نبقى فرغنا من النقطة دى قبل ما نتكلم )

ثانيا

ليس كل ما يكتب في مدونتي إسقاط على حياتي الشخصية

الإنسان مش مجرد حياة بيعيشها
لكن حياة بيشوفها وبيسمعها وبيتأثر بيها

على فكرة انا إستلفت الكلمتين دول من عند الدكتورة ستيتة حسب الله الحمش

نبدأ بسم الله .....

كلامى موجه طبعا  للرجال المتزوجين ..... والدعوة عامة طبعا للباقى 

1 .. صلوا على النبى  (عليه الصلاة والسلام )

2 .. من الحاجات إللى بتضايق الستات .. إن لما جوزها يرجع من الشغل ويلاقى الأكل متأخر يتنرفز ويقولها ( أومال بتعملى إيه من الصبح ) .. وبيبقى مستنى رد مقنع والمشكلة إن الست بتبقى مش عارفة ترد تقول إيه لأنها بتكون عملت حاجات كتييييييير كلها صغيرة وتعتبر هايفة بس مهمة وبتاخد وقت وخصوصا لما بيكون فيه أطفال وكل إللى تعرفه إنها من أول ما صحيت من النوم وهى بتشتغل ومقعدتش فالكلمة دى بجد بتأثر فى نفسيتها جداااا

الحل .. وخصوصا لو كانت الحكاية دى نادرا لما بتحصل هو إنك تاكل أى حاجة تيك أوى من التلاجة وترحمها شوية من نرفزتك علشان تنجز وتكمل الأكل لأن مناقشتك معاها هتأخر إللى إنت عاوزه ومش هتجيب أى نتيجة غير إنها هتحس إنها مهانة وخصوصا لما تكون مش مقصرة بجد

3 .. ياريت لما ترجع من بره وتلاقى البيت منظم ومرتب وتحس إنه باين عليه إنها لسة مخلصة شغل وتنضيف فيه ... بلاش الخصلة بتاعت بعض الرجالة إللى عينيهم بتقع على الحاجة الغلط وبسرعة يقولها مرتبتيش ليه كذا أو نسيتى تنضفى كذا .. وكأنه داخل مسابقة دور على الجزء إللى مش نضيف ....... البديل بقى الله يهديك أولا إنك تتغاضى عن ملاحظاتك الدقيقة فى الحاجات إللى نسيت تعملها  وتأجلها لوقت تانى يكون مناسب وتقولها لها بشكل لطيف ....

وثانيا إنك تحسسها إنك لاحظت إن البيت جميل ومنظم وحاسس بالمجهود إللى هى عملته وياسلام لو قولتلها أنا مش عارف من غيرك كنا هنعمل إيه (ولك الأجر والثواب عند الله)

4 .. ياريت لو كنت من النوع إللى ماما كانت مدلعاك جدااا واخواتك البنات شايلينك من على الأرض شيل .. واتعودت إنك متعملش حاجة بنفسك .. فى الحالة دى مش هنطلب منك كتير .. بس هو ياريت بعد ما تشرب شاى أو أى مشروب فى كوباية ومراتك فى المطبخ ياريت قبل ما تطلع من المطبخ ومجرد ما تيجى تقعد وترتاح متقولهاش خودى بقى الكوباية دى .. مش هيحصل حاجة لما توديها بنفسك المطبخ مع إبتسامة رقيقة.......

وكمان ياريت وانت راجع من الشغل تعلق هدومك على الشماعة وتحطها فى الدولاب ومترميهاش على السرير مش هيحصل حاجة خالص لما تعلقها إنت وتوفر عليها الدقيقتين دول تستفيد بيهم فى أى حاجة تانية وفى نفس الوقت هيبان إنك منظم ... 

5 .. بالنسبة بقى للرجالة إللى عدوا المرحلة إللى فاتت دى .. مش هيجرى حاجة لو إتعلموا يعملوا المشروبات لنفسهم وخصوصا فى الأوقات إللى بتكون فيها الست مشغولة .. وكمان سلق البيض وقليه وبعض مبادئ الطهى (علشان فى حالة الظروف القسوى وتعب الزوجة أو ولادتها )

يعنى حتى علشان لو كانت نايمة تعبانة أو مرهقة ميروحش يصحيها ويقولها انا عايز أفطر ( بجد لما بيعمل الزوج حركة زى دى زوجته بتحس إنها فى نظره خدامة وخصوصا لما بيكون مجرد فطار أو كوباية شاى وهى بتكون تعبانة أو عيانة ) إنما لما بيحصل العكس بجد بيزيد فى نظرها وبتحبه أكتر وبتقدره وممكن تقوم تساعده كمان وهى فرحانة  

6 .. إبعد عن إدمان الماتشات وبرامج التحليل الرياضية وياريت يكون لها وقت محدد مش كل وقت وكل يوم أولادك وزوجتك أولى بالوقت ده كله

7 .. وانت راجع من شغلك ياريت قبل ما تروح بسرعة لمراتك التانية .. سلم الأول على مراتك الأولانية وغير هدومك وأقعد مع أولادك وإتغدى وبعدين يا سيدى أبقى روح شوية عند مراتك التانية  .... طبعا هتقولوا مين مراته التانية هقولكم الكمبيوتر ... ياريت متنسوش نفسكم أوى وانتوا قاعدين عليه بالساعات   .. وحجتكم إن الست مشغولة .. 

مادام فى اولاد يبقى تقعدوا معاهم وتهتموا بيهم جوا البيت زى الست بالظبط مينفعش تكون بالنسبالهم مجرد مصرف فلوس وبس علشان هى برده مينفعش تكون بالنسبالهم مجرد طباخة ودادة متنساش إنك مسئول عن تربية الأولاد زيها بالظبط ويمكن أكتر و أكيد إهتمامك بالولاد جوا البيت بيخفف عنها كتير وبيسعدها

هقول كفاية كدة .. وفى الآخر دى مجرد حاجات بسيطة كلها كلام أو أفعال سهلة وبسيطة مش بتنتقص من رجولة الزوج بالعكس دى بتزودها وبتفرق مع الست كتير .. أكيد مفيش راجل واحد فيه كل الحاجات دى ... بس بصراحة لو فيه واحد مش بيغلط كل الغلطات دى انا بحييه وبقوله ربنا يكرمك ويبعد عنك إنت وزوجتك الحسد

وربنا يهدى الجميع وجزاكم الله كل خير 


والسلام عليكم ورحمة الله وبركاته

مش .. لكى يا سيدتى

السلام عليكم ورحمة الله وبركاته

الموضوع ده خاص شوية وموجهة للسادة الرجال ..... وهى علشان أحط إيديهم على بعض الحلول البسيطة جدااااااا إللى ممكن تساعد وتخفف من حالة الست النفسية إللى بتتأزم بعد الجواز والخلفة ... وممكن الحاجات البسيطة دى تساعد فى تأخير أو منع وصول الست لمصيرها المحتوم والمتوقع بعد الجواز والخلفة بحوالى 20 سنه 

زى بالظبط كدة لما بنشوف أى مسلسل أو فيلم يكون فيه حمدى غيث أو عبد الله محمود أو نوال أبو الفتوح

من المعروف جداااااااا إن حمدى غيث هيتعمى فى نص المسلسل ... وإن عبد الله محمود هيموت فى نص أو آخر المسلسل ... وإن نوال أبو الفتوح أكيد هتتشل فى آخر حلقة من المسلسل

بالظبط كدة الستات بعد 20 سنة جواز بيبقوا عبارة عن نسخ متطابقة تمشى على الأرض نفس المصير المحتوم من جميع الإتجاهات

هقول الأول الأعراض إللى تساعد أى زوج إنه يعرف إن مراته بدأت ضغوط الحياة تستولى عليها وتسيب آثار وبصمات فيها ومن هنا تكمن الخطورة إذا إستمر الوضع على كدة

من أهم الأعراض دى

1... إنك تنده عليها وهى فى المطبخ ومترودش من أول مرة زى زمان ..... فى الحالة دى بتكون الست يا إما سرحانة وتايهة ومش سامعة فعلا ... يا إما مخنوقة ومتضايقة ومطنشة وبتقول فى سرها ... لمؤخاذة يعنى ... ما يجى هو ولا على رجليه نقش الحنة أنا مش فاضية

فى الحالة دى تواضع وتعالى على نفسك وروحلها إنت .. بس الله يخليك وانت رايح أبقى اتنحنح يمكن تكون سرحانة ولا حاجة وهى مش ناقصة سارعة بلاش الخصلة بتاعتكم دى إننا نلاقيكم فى نص المطبخ فجأة كدة واحنا بيبقى فى إيدينا آلات حادة وممكن نئزيكم أو نئزى نفسنا من الخضة 

                         ***************************

2 ... إنك تبقى قاعد مكانك كدة وتلاحظ إن مراتك واقفة فى وسط أوضة ما وسرحانة ومش بتعمل حاجة .. وفجأة تلاقيها خرجت من الأوضة ودخلت تانى أكتر من مرة وبرده مش بتعمل حاجة .... إهدى ومتخافش مراتك كويسة إن شاء الله ..... كل ما فى الموضوع إنها كانت رايحة تجيب حاجة من الأوضة  وأول ما دخلت الأوضة نسيت هى كانت عايزة إيه ... فهى بتحاول تعيد المشهد من الأول يمكن تفتكر

فى الحالة دى إن مراتك ربنا وفقها وإفتكرت ورجعت تانى للى كانت بتعمله ,, خلاص مش مشكلة دعها تسير دعها تمر .. مفيش مشاكل حصل خير .... إنما لو لاقيتها عمالة تكرر فى المشهد ده أكتر من مرة علشان تفتكر ومفتكرتش حاول كدة بصانعة لطافة إنك تلهيها بأى حاجة علشان متتجننش أو تكسر أى حاجة فى الأوضة .. كله مكتوب عليك فى القايمة

                            ************************ 

3 ... ممكن تبقى قاعد برده مكانك إللى انت كنت قاعد فيه المرة إللى فاتت ... وبعدين تقوم علشان تشرب من التلاجة ... وبعد ما تفتح التلاجة تلاقى .... طقم كوبايات فاضية كدة مغسول وزى الفل ومرصوص فى التلاجة ......... عاااااااااادى جداااااااا كانت بتغسل الكوبايات وهى سرحانة وبدل ما تحطهم فى مكانهم حطيتهم فى التلاجة ...... انت بقى بمنتهى الحنان والزوق خودهم ... أنا عارفة إنهم هيبقوا ساقعين شوية بس مش مشكلة استحمل وحطهم مكانهم ومتعلقش .. بتحصل عادى وبيحصل أكتر من كدة كمان

                           *************************

4 ... هتلاحظ إن شراباتك بدأت تختفى واحد ورا التانى أو بيختفى من كل شراب فردة واحدة ... لا تأنبها ولا تسألها لأنها مش هتعرف مكانهم فين لو عملت إيه ... الحل إنك تاخد بعضك وتروح على دولاب إبنك الصغنون الجميل هتلاقيهم مترصصين بتطبيقتهم زى ما هما .. أو يا إما تغسل شرباتك بنفسك وتعينهم إنت دى الطريقة الأضمن

                                 ***********************

5... لو حصل وسألتها النهاردة إيه فى الشهر أو أى يوم من أيام الأسبوع عمرها ما هترود عليك بسرعة لأنها فعلا مش عارفة علشان مش فارقة معاها ويمكن لو فكرت شوية كمان برده مش هتعرف .. الحل بقى إنك تجيب نتيجة كبيرة وتعلقها فى المطبخ إللى هو مكانها الدائم وتقطعها انت بنفسك كل يوم لأنها مش هتقطعها هى .. وأبقى سيب الورق القديم مترميهوش لأنه بينفع فى توليع فرن الغاز  ولك جزيل الشكر .. أوكى

                          ************************

6 ... من أهم وأخطر العلامات ......... إنك تلاحظ تضخم فى حجم قطع الخضار إللى فى السلطة عن الحجم إللى كانت بتقطعه زمان .. ده معناه إنها بدأت تمل وتتخنئ وبدأ ده يأثر على طريقتها فى أداء عملها المنزلى وبدأت تكروت وفى الحالة دى هتكون محتاجة ريفرش

فى الحالة دى إنت تعمل إيه ... أولا هتاكل السلطة طبعا ( لازم تاكلها ) ثانيا بعد ما تاكلها إسألها .. إنتى كويسة ؟ هتقولك الحمد لله 

يعنى مش ناقصك حاجة عايزانى أجيبهالك أو نفسك فيها ؟ يا إما ما هتصدق إنك سألتها وهتقولك لستة طلبات هى محتاجاها ولازم تجيبها طبعا .... يا إما هتقولك لأ الحمد لله مش ناقصنى حاجة

فى الحالة دى تقولها مش عايزة تخرجى فى أى مكان تغيرى جو ؟ يا إما هتقولك آه وطبعا لازم تخرجها علشان تعمل ريفريش وتستعيد نشاطها تانى

يا إما بقى لو قالتلك لأ مش عايزة أخرج ... يبقى فى الحالة دى اتضح إن مراتك طول عمرها بتعمل السلطة كبيرة وانت إللى مش واخد بالك ولا مركز معايا ودى مشكلة فى حد ذاتها 

كدة البوست ده خلص إنما للموضوع بقية 

ونختم بأغنية     ليا عشم وياك يا جميل     من راديو ستات البيوت 
                             

                                   

ليا عشم وياك يا جميل إن بوحت بالسر تقوله

مكتوب عليا طبيخ وغسيل وحبيبى أكويله هدوووووومه

والبيت مطهأنى .. مبطلش فيه تنضيف

وأنا إيه إللى بينوبنى .. غير هدمتى ورغيف

ليا عشم وياك يا ظريف إن بوحت بالسر تقوله

مكتوب عمرى أقضيه تنضيف وحبيبى .......... كسلان من يووووومه

كانت معكم أم .. بوبة من داخل المنزل

تحدييييييييث بسيط وضرووووووووووورى 

******************************

أنا بعد ما قريت بعض الردود إللى أخدت كلامى ده وفهمته على إنه مبالغ فيه أو فهمته إنه تشويه لست البيت ووصف غير مقبول وغير مشجع على الإقبال على فكرة الجواز للغير متزوجين .. لأنهم شافوا ست البيت بالمنظر ده تبقى شئ مرعب 

انا حابة اقول أولا إن كل الكلام إللى قولته فوق ده حقيقى وبيحصل فعلا  وكل المواقف دى حصلتلى شخصيا وما زالت بتحصل معايا بس مش معنى ده إنها بتحصل كل يوم وإنى عايشة فى عالم آخر وزوجى حاسس باكتئاب .. لأ دى بتحصل فى بعض الأوقات إللى بكون فعلا مضغوطة فيها بسبب شغل البيت أو أى ظروف طارئة أو النوم غير المنتظم .. وممكن تحصل للراجل نفسه لو تعرض لنفس الظروف

 وكمان لما بتحصل مش بيكون شئ محزن ولا مؤسف لأ بالعكس دى أغلب المواقف دى لما بتحصل بيكون رد فعل الزوجين عليها هو الضحك والبهجة ويمكن كمان بيروحوا يحكوها لغيرهم علشان يضحكوهم معاهم  

ثانيا مش محتاجة أقول إن فى بعض المبالغة فى كلامى وده على سبيل الهزار (المفروض الكل يكون فاهم ده لواحده سواء رجالة أو ستات ) يعنى مش كل واحد بيهزر محتاج يقول بعد ما بيخلص كلام انا كنت بهزر

ثالثا حتى لو فى ستات شايفين إن الكلام ده مش منطبق عليهم وإنهم مرتاحين ومش مشغولين ومش مضغوطين وحاسين إنى عاملة فيلم هندى وببالغ ... فده مش معناه إن حالهم زى باقى حال غيرهم .. لأنه بيختلف من بيت للتانى حسب طبيعة الزوج وتعاونه مع الست حتى لو كان تعاون معنوى وكمان حسب طبيعة الطفل نفسه لأنها بتختلف من طفل للتانى فعلا , يعنى فى اطفال هاديين وتربيتهم سهلة وفى طفل بعشرة لواحده وعدد الأطفال كمان أكيد بيفرق .. وحسب حاجات كتير مفيش وقت لطرحها .. أنا بتكلم كلام عام  

مش عايزة حد ياخد الكلام ده على أعصابه ويفهمنى غلط ويتهيأله إنى بعقد الأمور لأن ده مش هدفى خاااااااااالص ولا هى دى الحقيقة إللى انا عايزة اوصلهالكم