ليه ?!!

 

 

 

ليه اللى مش متجوز بيحسد المتجوز على إنه عنده شريك حياة , والمتجوزين عايشين كأنهم مش متجوزين وكل واحد فيهم عايش فى عالم لوحده .

ليه إللى معندهومش اولاد حياتهم كلها واقفة عند الأمنية دى , وإللى عندهم أولاد مش فاضيين يقعدوا معاهم أو يستمتعوا بوجودهم والدنيا لهياهم .

ليه فى ناس عندها كلام كتير أوى عايزة تقوله للى بتحبه بس مش لاقياه قدامها ,, وإللى جمبه دايما الإنسان إللى بيحبه مكسل يقوله كلمة حلوة .

ليه إللى فقد إنسان عزيز عليه نفسه يوم واحد يرجع علشان يبوس إيده وراسه , وناس تانية حواليها أعز الناس ومش مقدرين قيمتهم .

ليه فى ناس الوقت عندها ملوش قيمة ومش لاقيين حاجة يعملوها ,, وناس تانية نفسها تستلف وقت علشان يكفى اللى نفسها تعمله .

ليه فى ناس فلوسها تعباها والجنيه ملهوش قيمة عندها وممكن ترميه وتدوس عليه ,, وناس تانية الجنيه ده ممكن يحللها مشكلة كبيرة فى حياتها ومش لاقينه .

ليه فى ناس بتموت كل يوم من الوجع والمرض وبتقول الحمد لله ومش بتشتكى لحد , وناس تانية الصداع عندها هو أكبر مشكلة فى حياتها ومش بيبطلوا شكوى كأنهم فى أعظم إبتلاء .

ليه الطفل إللى معندوش لعب بيلعب بأى حاجة حتى لو شوية تراب وزلط وبيكون سعيد , والطفل إللى عنده لعب كتير زهقان و مش لاقى حاجة يعملها وحزين .

ليه إللى ربنا مأنعمش عليه بنعمة البصر نفسه يشوف لو ساعة واحدة علشان يقرأ جزئين قرآن ,, وفى ناس بتشوف  كويس ومبتحاولش حتى تمسح التراب إللى على المصحف من كتر ركنته .

ليه المريض إللى مش قادر يقف ويصلى ويسجد نفسه ربنا يرجعله صحته علشان يسجد لله , وناس فى كامل صحتها مش عارفة مواعيد الصلاة إمتى .

ليه إللى بيموت نفسه يرجع ولو دقيقة يعمل فيها عمل خير , وإللى عايشيين وعندهم الفرصة لسه تايهين وغافليين ومش مقدرين النعم إللى هما فيها .

 

أنا بخير ..

أنا التى حفرت قلب وسهم على جذوع الشجر
وخشيت الرمال فقصورها يخربها المطر
وبنيت قصرى على ضفاف النهر
فالنهر هادئ لا يعلو كالبحر

ورسمت بعينى إبتسامة على وجه القمر
وحملت حلمى بقلبى بعيدا عن الخطر
بعيدا عن غدر البحر وسقوط المطر

ولكنى نسيت أن أحميه من ذنوب البشر
فهى تمحو ما حفر على أقوى الشجر
وتعكر ألف بحر وألف نهر

ومات الحلم وبيدى وضعته فى القبر
ومازالوا يسألوننى ومازلت أجيب .. أنا بخير

أنا فاهمة كل حاجة .. بس عايزة أفهم كمان شوية !!!!

دلوقتى لما يبقى فى ناس محترمين ... أخلاقهم عالية ... شايفين شغلهم تمام ... ملف حياتهم وشغلهم مفيهوش نقطة سودة ... ومش بشهادتهم هما , لأ بشهادة الجميع  ..........

( إنتوا معايا .. واخدين بالكو ) شايفين عينى الشمال بتبربش لواحدها خلو بالكو دا مرض معدى  (أصلى واخدة الموضوع على أعصابى شوية )

أبطل رغى وأرجع للموضوع

يقووووووم الناس دول ياخدو قرار إنهم يربوا دقنهم ... ليييييييييييييييييه ...

مش شغلنا هما حريين ...



يربوها إقتداء بالرسول .. ولا علشان بيوفروا فلوس الحلاق .. ولا علشان يضفروها .. هما حريين ... المهم إن قرارهم ده مش هيضر حد ولا حتى هيضرهم شخصيا ولا هيضر شغلهم

 ( واخدين بالكم )  عينى اليمين بدأت هى كمان تبربش , قولتلكم المرض معدى  .. نكمل


تقووووووووووووم تيجى ناس تانية .. توقفهم عن العمل ...

ليييييييييييييييييييه ..

إحلقوا دقنكم الأول وبعدين تعالوا إشتغلوا ...

ليييييييييييييه ..


 أهو كده .. (أحتمال تكون دقنهم دى هتشوكهم )

الناس بقى اللى ربوا دقنهم الموقوفين دول .. بيطالبوا بحقهم إنهم يرجعوا شغلهم ... والكل مطنش وعاملين نايمين والمنبه لسه مضربش

وأسمع ناس بتقول ... طب كانت دقنكم دى فين من زمان ولا الإيمان منزلش عليهم إلا لما الإخوان مسكوا الحكم ؟

هو فى حاجة فضلت على حالها بعد الثورة .. ما حاجات كتير اتغيرت .. وحاجات كتير مكنش حد عارف يعملها قبل الثورة وعرف يعملها دلوقتى ... إشمعنى دول إللى حكايتهم بقى فيها إن

واحدة قيلالى النهاردة شغلهم أهم حرام عليهم  .............. طيب هو مين اللى وقفهم عن العمل .. الناس عايزة تشتغل ..


إللى أنا فاهماه إنها العقدة القديمة مازالت بشنيطة عند بعض الأفراد اللى نشأت وترعرعت على إيد النظام القديم  وللأسف مازال ليها كلمة وسلطة فى وقتنا ده

عقدة الدين ... إعمل أى حاجة .. أى حاجة ..  بس متقولش أصل دينى إللى بيقولى كدة ... يا نهار اسود انت متدين

ربى دقنك آه بس متقولش إقتداء بالرسول لأ كدة غلط  وكدة الشغل هيتعطل والسياحة هتنضرب والشواطئ هتتقفل وعلاقتنا بالدول التانية هتبوظ وهنروح فى ستين داهية ...

ممكن تربيها إقتداء بسمير الإسكندرانى ماشى نعديها دى .. كدة ميت فل وعشرة انت كدة ماشى صح

تقصر بنطلونك إقتداء بالرسول .. إوعى .. كدة هتتحط فى اللستة السودة ... ممكن تقصره إقتداء ببرمودة تامر حسنى ماشى إحنا معاك وكلنا بنحبك ومتخافش من أى حاجة

... حتى لو كانوا بيفكروا إن الدقن دى بتعكس منهج  وسلوك فى دماغ الشخص إللى مربيها هما مش راضيين عنه ومش حبينه ... طيب هو لما يحلقها ويرجع شغله .. إنتوا كدة  مسحتوا منهجه ولا حلقتوله دقنه وخلاص 

دا لو عندهم شوية ذكاء يسيبوهم براحتهم مرابيين دقنهم .. أهم يبقوا متعلمين ومعروفيين ويتحطوا تحت المراقبة علشان إللى يغلط بجد يتعاقب ..  ولا هى إيه النظرية بالظبط


كنت زمان بسمع الناس إللى عندها شوية حكمة بتقول .. لما تشوف حد ظاهر عليه المعصية متحكمش عليه إنه مش كويس .. ربنا هو الأعلم بالنوايا والقلوب

الغريب إننا دلوقتى بنتمنى العكس ... لما  تشوف حد ظاهر عليه الطاعة سواء راجل مربى دقنه ولا واحدة محجبة ولا منتقبة .. متقولش أكيد أخلاقه زى الزفت .. حتى لو كنت شوفت أمثلة سيئة مرت عليك فى حياتك .. مش حجة مقنعة .. بردو مش من حقك تعمم ..

إللى نفسى حد يفهمهولى أكتر ... الدقن دى هتعوق العمل إزاى بالظبط ؟ واللى بيحصل ده إيه ؟ ليه نفس الناس إللى بتطالب بحرية الإبداع .. فى حاجات زى الزفت تغضب ربنا ومفيهاش أى إبداع زى ما بيقولو ... بيجوا على الشئ إللى يرضى ربنا وبيقيدوا حريته ..

مش خلاص بقى ولا إيه ؟؟ دماعنا هينضف من البلاوى اللى معششة فيه دى ولا لسة شوية .. ولا لسه كتير ؟؟

ليه قنوات وبرامج متكلفة تقعد تعيد وتزيد فى تفاهات ...

النهاردة ماسكين موضوع جلابية المحافظ وعاملين عليها أفلام ؟؟ والراجل برر موقفه وابنه ماشى يحكى لكل الناس حكاية صلاة الفجر والجلابية

المشكلة كانت فى الجلابية ولا فى صلاة الفجر ولا فى إيه بالظبط .. إذا كان دخل المستشفى علشان يطمن على أحوالهم لأن واحد طلب منه كدة ... يعنى كان يقوله استنى لما أروح ألبس البدلة أصلى كفاءتى فى الشغل بتعلى لما بلبس البدلة

والراجل أكيد مكنش متخيل إن الهوليلة دى كلها هتحصل علشان الجلابية  ...عايزين نشتغل بقى ومفيش حاجة تعطلنا لا جلابية ولا شبشب ولا قبقاب .. إللى يقدر يعمل حاجة يعملها بأى شكل وفى أى وقت

خلونا نطلع بقى من عنق الزجاجة وندخل فى الشاليموه  

إحنا مش كنا بنقول نفسنا إللى يمسكوا بلدنا يبقوا  مننا وعايشين عيشتنا وحاسين بينا ويمشوا فى وسطنا  ... طب ليه منحسبهاش كدة وخصوصا إنها أول مرة لما تبقى تتكرر كتير نبقى بقى نلت ونعجن لحد ما نوصل للسر الخطير إللى ورا لبس الجلابية

هواحنا عايزين ايه  ؟ إنتوا عايزين حاجة ؟ أنا مش عايزة حاجة ؟ إلى عايز حاجة يقول ؟

إنتوا عنيكم كويسة ولا إتعديتوا .. أنا لما فضفضت عنيا إرتاحت شوية من البربشة الحمد لله :D بس إحوليت للأسف

 

ليا طلب .. المرة دى من الشعب المصرى مش من الحكومة

السلام عليكم ورحمة الله وبركاته

تحية كبيرة لشعب مصر وخصوصا شباب مصر  إللى رفع راسه ورفع راسنا كلنا ..

إحساسى اليومين دول ميتوصفش بصراحة .. ساعات بيمر عليا لحظات بحس إنى بحلم .. سواء من الحاجات الحلوة إللى شيفاها فى مصر وشعب مصر .. أو سواء من الكوارث إللى بسمعها عن مال البلد المنهوب والفساد إللى كان فى البلد ..

فى الحالتين بحس إن مذهولة .. يعنى الحالة العامة ليا اليومين دول هى الذهووول من كل حاجة .. وكل ما أنام وأصحى أفضل لحظة كدة مش عارفة أنا فين وفى سنة كام وفجأة أفتكر كل إللى حصل وأنزهل

ما علينا 

عندى طلب .. بيلح عليا كتير اليومين دول ممكن يكون سابق لأوانه أو ممكن تكونوا مش محتاجين أطلبه منكم لأنكم خلاص بدأتوا عهد جديد فى كل حاجة .. 

بس بردوا الكلمتين واقفين فى ظورى ومش هعرف أنام إلا لما أكتبهم علشان أرتاح 

ياريت بعد ما كل حاجة حلوة ظهرت فينا .. والجواهر إللى جوا الشعب المصرى ظهرت وزغللت عيون العالم كلها .. والكل ناوى على الإستمرار فى كل حاجة جميلة ونافعة تقدمنا متأخرناش ...... لازم ولابد مع الحاجات دى .. إعادة ترتيب الأولويات والإهتمامات .. 

من الآخر الكورة .... الكورة ....... إللى كانت سارقة كل حياة معظم الشعب المصرى مش عايزة أقول كله قبل يوم 25 يناير .. البير إللى كانوا مغرقين فيه الشعب المصرى وبيعملوا كل إللى فى وسعهم علشان ميطلعوش منه أبدا .. 

القنوات الرياضية إللى مكنتش بتتقفل فى كل بيت .. الأصوات إللى مكوناش بنسمع غيرها .. شوبير ومدحت شلبى وغيره وغيييييييييييره .. 

كل يوم بيطلع واحد جديد وبرنامج جديد وقناة جديدة ... الأخبار إللى مكوناش عايزين نسمع غيرها .. التعصب ما بين الأهلاوى والزملكاوى والإسمعلاوى إللى كان عامى عيون الشعب المصرى ... عن إن الكورة دى شئ أتفه بكتير إن يوقف أهل شعب واحد قدام بعض ... 

أسعار اللعيبة إللى عمالة تزيد وتتزايد بسبب الإهتمام الغريب بيهم إللى مكنش من حقهم أبدا 

الكورة أخدت من الشعب المصرى رقات ورقات .. سواء ده كان شئ مدبر أو غير مدبر .. الشعب المصرى كان واقع فى الفخ ومستغرق ومستمتع ... ومش عايز يطلع منه ..  ومش عايزة أقولكم إن شعب تونس برده كان بيمر بنفس الحلة بينام وبيصحى علشان الكورة الفخ ده كان منصوب لكتير مش المصريين بس

بس الحمد لله الشعب فاق وإتحرك أخيرا والإهتمامات إتبدلت وبقالنا أهداف أسمى والشعب بقى حاجة واحدة بعد ما كان كل واحد مصنف نفسه حسب النادى بتاعه .. فى الوقت إللى كانوا بينادوا إننا منصنفش نفسنا تبع الدين .. كانوا مستمتعين وهما شايفين الزملكاوى واقف قصاد الأهلاوى والإسمعلاوى بيكره الأهلاوى .. 

ولما كانت مصر بتقوم ومبتقعدش علشان  ماتش .. مكنش فى أى شكاوى من الوضع ده كان على قلبهم زى العسل .. إنما أى مظاهرة دلوقتى بتهدد إستقرار وأمن الوطن .. مع إنى شايفة وجه الشبه كبير دلوقتى مابين إحتفالات الجمهور الكروى وإحتفالات الشعب المصرى ..

كلها هتافات وأعلام وزحمة .. بس إحتفالات الكورة كانت على قلبهم زى العسل سيبوا الشعب يفرح وأهو ملهى ربنا يلهيه كمان وكمان 

وللأسف مش محتاجين أحكيلكم عن موقف اللعيبة المصريين المحترمين إللى كانوا المفروض يفضلوا مصلحة مصر عن مصالحهم الشخصية ..

بس للأسف كانوا مستخبيين وكل همهم إن ربنا يزيح الغمة دى على خير علشان الدورى يكمل وكمان النوادى ترجع تكسب تانى والقنوات الرياضية ترجع أهم القنوات تانى زى ما كانت .. وكانت الدنيا فى وادى وهما فى وادى تانى 

أنا مش بطلب إننا نمحى الكورة من حياتنا .. أكيد الحياة هترجع زى الأول بعد فترة .. وهيبقلنا هوايات وتسليات غير الفرجة على القنوات الإخبارية 

بس ياريييييييييييييت مترجعش زى الأول ولا حتى نص ولا ربع الأول .. عايزين ندى لكل زى حق حقه .. عايزين كل واحد يعرف قيمته وحدوده مع الشعب المصرى .. معدناش عايزين ندى شئ أكبر من حقه وحجمه أرجوكم .. نفسى زى ما بدأنا كلنا عهد جديد ..

عايزة عهد الكورة فى كورة ده يولى هو كمان  وكفاية الوقت إللى ضيعناه والأخطاء إللى إرتكبناها مع بعض بسبب الكورة

دى مجرد كورة وبس 

دخلت الشبكة أو مدخلتش شئ ميستهلش يهز مشاعرنا وقلوبنا ويعلى أصواتنا ويظهر شراينا ويحمر وشوشنا ويخلينا نرفع إيدينا فى وش بعض أو حتى نرفع أصواتنا على بعض ويضيع ساعات وأيام مننا علشان نشوف لاقطة متستهلش 20 ولا 50 مرة ونسمع لمليون تحليل  ونسأل ونهتم ونتابع لأ لأ لأ وألف لأ للمهذلة دى 

دى مجرد كورة .. مجرد كورة مش أكتر من كدة

الله يسامحه .. إللى طلعك أول طالعة

لو كل واحد شارك فى حرب أكتوبر بقى من حقه يبقى رئيس مصر لمدة 30 سنة ويفسد ويبيع ويشترى فيها براحته ..

ومينفعش حد ينطق ولا يتكلم لأنه رمز من رموز حرب أكتوبر .. يبقى مصر كدة هتضيع للأبد ...

مكنتش طلعة جوية دى هيزلنا بيها كدة .. يعنى هو كان طالع لوحده وبقيت الجيش كان نايم

وقالوله روح حررنا يا حسنى ولما ترجع أبقى صحينا 

لا إله إلا الله .. الله يسامحه إللى خلاك تطلع الطلعة دى يا أخى

دا ممكن يجيلنا بعد كدة واحد يقولنا أنا فرقعت بومبة فى حرب أكتوبر وعايز أبقى رئيس مصر .. أنا رمز 

اللهم ارفع مقتك وغضبك عنا يارب

لأ معقول فى حد كدة فى الدنيا

مش قادرة أقول غير ربنا يصبركم يالى فى ميدان التحرير

ويصبرنا

أنا مشوفتش كدة أبدا  .. دا فاق كل التوقعات 

دا شئ أغرب من الخيال 

عفوك وسترك ورضاك يارب

غصب عنى بقالى فى السياسة

عمرى ما كان لى فى السياسة

ولا الثورة ولا الحماسة

حتى البطالة كانت على مزاجى

طلعت لذيذة مش بطالة

أهلى بقى يجهزونى .. يجوزونى 

ولو مش معاهم يخللونى

مهو غصب عنى .. زيى زى غيرى

قاعدة مليش شغلانة

إتخرجت و إتعلمت التناحة

آكل وأشرب وأتأمر ببجاحة

 

بحلم وبس بصراحة..

بحلم بعريس وبيت وعيشة مرتاحة

الدهب رخص ولا غلى 

مش شغلى بأمانة

الخشب نزل ولا طلع

أنا عايزة سفرة ونوم وصالون وأنترية

مينقصوش خرزانة

والعريس .. مهندس أو دكتور

لو حتى محدش لاقى رجالة

يإما بكرمتى خلينى قاعدة

عند أهلى واكلة شاربة

لا أعرف السكر بكام ولا البيض ولا حتى البامية

وأهلى الأبطال جهزونى !!

بصراحة بهرونى وفاجؤنى

أصلهم لامؤخذة كانوا مدرسين

ولا عمرهم سافروا بره ولا كانوا وارثين

والخارج كان أد إللى داخل مرتين

أى نعم .. كانوا مكتئبين

وبيحمدوا ربنا إن عندهم بلوة واحدة مش بلوتين

بس وأنا مالى .. جابو إزاى ومنين ؟

المهم جبت كل الأجهزة

وبقيت عروسة متجهزة

والنيش إتملى على آخره كاسات وفناجين

وإتجوزت واحد من الدكاترة المحترمين

وخلفت بنوتة شبه بووو.. فى فيلم شركة المرعبين

الحمد لله كده فل وتمام

حققتلى ياربى كل الأحلام 

بس إيه إيه إيه ؟

بتقولوا السكر بكام ؟ 

والدقيق والبيض كمان

معقول الكلام ده من زمان

يا عينى يا بابا.. يا حبيبتى يا ماما

كل ده و مجالكومش لسه جنان

دا الدنيا والعة نار

والمرتبات تجيب لأصحابها إنهيار

ولا دكتور ولا مدرس ولا مهندس

قادر على سعر الخضار

معلش غصب عنى عقلى طار

شلت الهم وندمت على إللى كان وإللى صار

وإتفقنا نشوفلنا أى عقد 

ونروح على أقرب مطار

ونهرب على أى بلد

فيها المرتبات على أد الأسعار

فيها مدارس بتعلم أجيال

ومستشفيات بتعالج الكل 

مش بس إللى معاه المال

بلد بتحترم الصغار قبل الكبار

وعلى قد تعبنا نلاقى ونعلى 

 مش مهما نتعب فى إنحدار

ولا نستنى شوية يمكن تفرج 

وينفك عن بلدنا الحصار

بإختصاااااااااار

غصب عنى بقالى فى السياسة 

وبتكلم زى أهل الثورة والحماسة

وفهمت معنى الفساد 

إللى دوقنا فى بلدنا طعم التعاسة

وشحتنا فلوسنا بكل خباثة وخساسة

وخلى عمرنا كله بطالة بعد أيام و سنين دراسة

وضيع حلم أهلنا فينا

بعد ما ضاع عمرهم حسابات بالقلم والكراسة

خلاص .. حلمى دلوقتى إتغير

نفسى بنتى تشوف أيام أفضل

على قد ماتتعب تلاقى 

وعلى قد ماتاخد تعلى و تكبر

لا تفكر تسافر .. ولا تهرب

وفى وسط أهلها تكبر ولأحلامها توصل

وعشان ده يحصل

لازم شعب مصر فيها يفضل

وكل ظالم وفاسد فى بلدى يرحل 

 

رسالة للسيد ( رمز ) جمهورية مصر العربية

يا سيادة الرئيس

عارف وأنا صغيرة كنت معرفش إنك رئيس الجمهورية .. تخيل كنت فاكراك جمهورية مصر العربية .. وأحيانا كنت بختلف مع إخواتى ياترى إنت جمهورية مصر العربية ولا مجلس الشعب .. لما كبرت شوية شوية فهمت .. 

بس الفكرة القديمة فضلت مسيطرة على إحساسى وإللى كان بيهيألى إنك مصر ومصر هى إنت .. دا حتى النسر إللى فى وسط علم مصر كنت بحس إنه فيه شبه منك .. كنت بشوف فيك ألوان علم مصر ...

فعلا مش عارفة اليوم إللى هشوف فيه رئيس غيرك  .. أو هسمع إسم تانى للرئيس مفهوش كلمة مبارك هيكون إحساسى إيه .. ودانى إتعودت على نبرة صوتك وانت بتقول أخوانى المواطنون ..

إتولدت وانت رئيس جمهورية مصر العربية بقى عندى 28 سنة وانت مازلت رئيس جمهورية مصر العربية .. أنا وغيرى كتير من جيلى محتاجين دكتور أمراض نفسية يهيأنا لعدم وجودك كرئيس جمهورية سواء النهاردة أو بكرة

منكرش إنك كنت ومازلت رمز .. بس للأسف رمز وبس

 زى ما كبرت وانت رمز مصر بالنسبالى .. زى ما إتعودت على إن مفيش شخص فى بلدى واخد حقه .. وكمان إتعودت إنى أسمع المصريين بيشتموا مصر معترضين على حال مصر عايزين يطفشوا من مصر وأنا أحيانا كنت بنضم ليهم وبوافقهم ..

لأنى شايفة زيهم إن مفيش لا دكتور ولا مدرس ولا فلاح ولا عامل ولا موظف ولا ست بيت ولا حتى طفل واخد حقه فى مصر

من الآخر مفيش حاجة حالها عدل فى مصر علشان كدة الناس كرهت العيشة مش عايزة أقولك إنهم كرهوا مصر نفسها

بس إللى إتضحلى بجد الأسبوع إللى فات إن مش أنا لوحدى إللى كنت بالنسباله رمز مصر لأ دا كل شعب مصر .. علشان كدة كان بيتهيألهم إنهم بيكرهوا مصر .. دا لأنك كنت ومازلت مصر بالنسبالهم .. الحكاية بقت عقدة كبيرة ونفسنا نتخلص منها

لأول مرة هقولها لنفسى وليك .. إنت مش مصر .. إحنا كلنا بنحب مصر وبنموت فى تراب مصر ...ولما كان حد فينا بيقول إنه بيكره مصر وحال مصر مكنش يقصد غيرك وغير أفعالك

إنت كمان محتاج تعرف إنك مش مصر وعمرك ما هتكون مصر ومصر مش ملكك ولا عمرها ما هتكون ملك حد

يا سيادة الرئيس

صدقنى هتقدر تعيش من غير ما تكون رئيس جمهورية مصر العربية .. زى ما إحنا هنقدر ونتعود إن شاء الله

بجد التغيير معدش كفاية .. كان ممكن يكون كفاية بس دا من أسبوع فات على الأقل

إنت إتعاملت مع جيل جديد جدااااااا عليك حاولوا يتعاملوا معاك بتحضر ومش كأنهم فى عام 2003 لأ دا 2030 وانت للأسف عاملتهم كأنك فى سنة 1884 .. الفجوة وسعت أوى يا سيادة الريس بجد وظهر الفرق مابين الماضى إللى انت منه ولسه عايش فيه والحاضر إللى إحنا كلنا منه وعايزين نعيشه صح ...

ممكن نسامحك على ظلم على فساد على أى حاجة بس أكتر حاجة بجد بتوجع قلبى منك هى الإستهانة بعقولنا ... متتخيلش شئ مقزز جداااا .. إللى بيحصل دلوقتى على القنوات الحكومية بناء عن أوامرك .. أنا مش بتنرفز لما بشوف الجزيرة ولا أى قناة فضائية غيرها أد ما بتستفزنى القنوات إللى بتدعى إنها مصرية وبتهدى من الوضع بكلامها وإدعاءتها وتجاهلها السخييييييييييييييف جدااااااااا

معذرة يا سيادة الريس لو زى ما بدأتوا تدعو إن  أمريكا هى إللى دربت متظاهرين 25 يناير دول على الأسلوب المتحضر فى طلب حقوقهم المشروعة ودربتهم على الشجاعة والإصرار لتحقيق حلمهم .. فتحياتى لأمريكا وإحترامى ليهم وشكرا جزيلا ....

وأسفة جدااا لكل العالم إللى شايف مصر دلوقتى بمظهر غير متحضر بسبب البلطجية والشرطة والأمن إللى إنت دربتهم على الوقوف قدام الحق بكل عنف وظلم وعشوائية وتطرف

وصلت شعب مصر بإنه يبقى جريح وبينزف وخايف يدخل عربية إسعاف بلده يمكن تطلع فخ إنت محضره ليهم

عمر ما الماية إللى بتدفعها فى وجوه المتظاهرين المسالمين ما هتبرد نار الناس إللى ماتوا بسببك .. وطول مانت متجاهل الأمر وكأنه لم يكن النار بتزيد ومحدش هيقدر يطفيها

صدقنى الموضوع بقى شخصى جدااا وبقى أكبر مما كان عليه فى البداية بسبب أفعالك إنت

مع كل إحترامى وتقديرى لأى شئ عملته أو معملتوش لمصر بقولك ياريت تمشى النهاردة قبل بكرة معدش وجودك هو إللى هينقذ مصر .. رحيلك هو الإنقاذ الحقيقى .. 

حتى لو مازال فى ناس بيدعوا إنهم شايفينك رمز وأب .. فمش كفاية تكون مجرد رمز .. ولو كنت أب فعلا كان حقنا عليك إننا نشوف منك إللى يساعدنا على برك .. مش إللى يخلينا نتبرى منك

طلب أخير من مواطنة وزوجة وأم مصرية إتولدت فى عهدك ومازلت تعيش فيه .. حتى بنتها إتولدت بردوا فى عهدك .و فى إنتظار طفل تانى خلال شهور بإذن الله ...

ياريت ومن فضلك وبصوت واطى وبدون إهانة وبكل إحترام ومن غير همجية ولا أسلحة بيضاء ولا جمال ولا خيول ولا تدريب من أمريكا ولا إيران 

مش عايزة أبنى يتولد فى عهدك ولو حتى ليوم واحد ........ من فضلك

ومش عايزة الرد يكون قنابل مسيلة للدموع مش محتجاها .. دموعنا سالت بما فيه الكفاية وقلوبنا نزفت بما فيه الكفاية

عايزة أقولك .. .. ممكن أتنازل عن التشكيل الوزارى الجديد .. وعن وجود نائب ليك وعن إعادة إنتخابات مجلس الشعب .. وعن تعديل الدستور

بس طلب رحيلك وإسقاط سلطتك بقى مستحيل التنازل عنه لأن دا بقى الحل الوحيد لإنقاذ مصر .. 

حتى لو ظالم تانى غيرك هو إللى حكم مصر .. إحنا خلاص إتعودنا على الظلم  

بس منك إنت ..كدة كفاية

حصريا ..... فى رمضان

السلام عليكم ورحمة الله وبركاته

قبل كل رمضان كالعادة .. والناس مضغوطة ومطلوب منها طلبات أد كدة وخصوصا رمضان إللى بعده المدارس 

( وإللى أكيد بعده العيد بردو) 

نلاقى جميع القنوات بتعلن عن المسلسلات الحصرية  إللى مفيش زيها أبدا ..

وإعلانات عن برامج المقالب .. والحوارات المحرجة والصريحة ..

والممثلات إللى مش لابسين هدوم فى المسلسلات ..

والممثل إللى بيتسرع فى برنامج معمول فيه مقلب ..

والممثلة إللى بتعيط من سؤال محرج فى برنامج ما

( ياعينى بيتبهدلوا فى رمضان بجد )

دى إستامبا كلنا متعودين عليها فى كل رمضان .. والغريب إن بعد كل الإعلانات دى بيبدأ رمضان وإحنا مش عارفين على أى قناة هنلاقى المسلسل أو البرنامج ده لأن كل القنوات كانت بتعلن فى نفس الوقت ..

ولحد 10 رمضان كدة بنبدأ نستقر ونتعرف على معاد برنامج أو مسلسل أو إتنين بعد ما بتكون بطارية الريموت فضيت من كتر التقليب بين القنوات ....

مشكلتى أنا بقى إن دايما بقلب والفواصل الإعلانية شغالة وفى الآخر مش بوصل لأى نتيجة

أنا بقى الحمد لله ربنا تاب عليا من المسلسلات الهابطة وغير الهابطة .. بس منكرش إن فى برامج كتير تافهة مازالت بتشدنى أتفرج عليها ...

رمضان السنة دى بقى لاحظت ظاهرة غريبة ..

أثناء بحثى عن البرامج التافهة أثناء الفواصل الإعلانية ...

ألاقى نفسى متكعبلة فى واحدة منتقبة ماشية أو قاعدة أو واقفة المهم المنظر ده بيشدنى أعرف إيه إللى هتعمله أو إيه المناسبة يعنى  ..

إحنا إتعودنا إن الممثلات بتقلع فى رمضان .. معقول إتنقبوا السنة دى ....

وأفضل متابعة إيه إللى هيحصل وأحيانا لمدة حلقتين والنتيجة النهائية 

إنى بيتحرق دمى

( ليه بيتحرق دمى ؟ )

هتعرفوا بعدين

مرة ألاقى واحدة لابسة النقاب علشان هربانة من البوليس

ومرة غصب عنها ومجبرة على كدة

ومرة واحدة لسانها طويل ووبتدعى الإلتزام

وإللى ينقط أكتر إنى ألاقى واحدة لابسة شورت بتفتى وتقول إن النقاب مش من الدين ... طيب خلينا نقول أوكى ..

السؤال هنا بقى 

( إيه وضع الشورت فى الدين عادة ولا عبادة ؟ ) 

ياريت يوضحولنا فى المسلسل الحصرى إللى جاى أنا فى إنتظاره

إللى عايز يعرف أنا ليه محروق دمى وليه منقوطة وإن مكونتش كتبت الكلمتين دول كان ممكن يجرالى حاجة ؟

هو إنى وليا الفخر والعزة من المنتقبات دول والحمد لله .

والأغرب من كدة وإللى مش ممكن حد يصدقوا

إنى لما لبست النقاب لبسته من نفسى مش بأمر من أمير الجماعة ولا حاجة

حتى إنى لحد دلوقتى محدش بعتلى رشاش هدية مكافئة على نقابى

ولا لاقيتهم جايبنلى واحد معرفوش وقالولى ( يا أختنا غدا سيتم زفافك على الأخ عبد القادر )

وإنى بتكلم عادى بالعامية زى باقى البشر كدة وأحيانا بقول كلام إنجليزى كمان

وحتى عندى  كمان الإختراع إللى إسمه موبايل وبغيرله الكفر كل فترة ...

لا وإيه عندى مينى لاب توب وجوزى إللى جايبهولى كمان

 عندى شبشب للحمام بلاستيك .. مش بدخل الحمام بالقبقاب ولا حاجة

ومقطعتش صلتى بأى صاحبة ليا  مش منتقبة وقولت عليها عدوة الله والدين

إيه تانى

أه لما بجوع باكل 

وبطبخ مكرونة بالباشميل وفراخ بانية وبفتيك وبيتزا.. ونفسى أعرف طريقة  البيكاتة بالشامبليوو ..  وكل أكل الفرنجة بنعمله وبناكله 

(سامحنى يارب )

الغريب جداا بقى .. إن لما حد بيقول نكتة قدامى .. تخيلوا بضحك عليها وممكن أقولها لغيرى وأضحكه  ( شئ لا يصدقه عقل )

وساعات لما ببقى قاعدة وقت كبير كدة فى البيت بتضايق وببقى عايزة أخرج وأتفسح زى البنات إللى مش منتقبات بالظبط 

سبحان الله ( شئ مدهش)

 

الأغرب من كدة ومش ممكن حد يصدقوا .. إنى مش بس منتقبة 

لأ دا جوزى كمان ( مش منتقب طبعا ) لأ ملتحى ( يعنى مربى دقنه بالعربى ) بس مش هو الأخ عبد القادر دا الدكتور عبد الله

مفيش مجال بقى أحكيلكم عن جوزى لأنكم مش هتصدقوا

هديكم نبذة بسيطة جوزى عنده أكاونت على الفيس بوك (و ساعات بيلعب نييييييد فور سبييييييييد ) واااااااااااااااااااو

محصلش مرة إن حد كسر علينا باب الشقة وأخدوه فى نص الليل ومنعرفلوش طريق جرة 

الحمد لله لحد النهاردة ملوش ملف فى أمن الدولة يا عالم بكرة إيه إللى هيحصل

جمدوا أعصابكم بقى لأن أخوية الكبير دكتور هانى  ملتحى (أى مربى دقنة ومراته منتقبة زيى بالظبط )

والغريب إن إبنهم إسمه عمرو وبيدلعوه بيقولوله يا عمورة

كفاية هزار بقى علشان متتخنؤش منى

بجد بجد الحقيقة غير إللى وسائل الإعلام بتحاول توصلها للناس

وأنا متأكدة إن فى منكم كتير يعرف كدة وفاهمنى أنا أقصد إيه

ليه لبست النقاب ؟

موضوع أكيد يطول شرحه

النقاب فرض أو فضل ؟

مش تخصصى علشان أفتى فيه .. بس أكيييييييييد أكيييييييييد مش عادة جاهلية زى ما بيقولوا

فى ناس بتستخبى ورا النقاب وتعمل حاجات تخالف الضمير ؟

أكيييييد طبعا .. زى الدكتور إللى بيستخبى ورا البلطو بتاعه .. والظابط إللى بيستغل بدلته وزى الست الشيك جداا الستايل إللى راكبة عربية آخر موديل وبتخدع الناس بمظهرها لأغراض أخرى

مشكلة إن النقاب بيخفى الشخصية إللى لابساه ؟

نظارة شمس كبيرة وإيشارب يقدروا يخفوا أى شخصية .. عملية تجميل تقدر تغير ملامح أى إنسان .. صابغة شعر وقصة جديدة وعدسات يغيروا شكل أى بنى آدم

.. ده ميمنعش إن يكون فى إجرآت مناسبة بدون إهانة أى إنسان للتحقق من شخصيته فى كل مكان

النقاب بقى موضة ؟

فعلا كتير بيلبسه لمجرد التقليد أو واحدة جوزها حمش وطلب منها تنتقب .. أنا عن نفسى منعت ناس كتير إنهم يلبسوا النقاب لأنهم هيسيئوا له ومش مستعدين أبدا لتحمل مسئوليته أو حتى ربعها  والحكاية مش ناقصة

بس السؤال إللى محيرنى .. لو النقاب عامل مشكلة دلوقتى وبيحاربوا فيه لأنه بيخفى الشخصية إللى لابساه وبيساعد على حدوث جرمتين تلاتة كل يوم

طيب ليه بيحاربوا الملتحيين مع إن اللحية محدش قال إنها عادة ولا بتخفى شخصية إللى مربيها ولا كل ملتحى ماشى فى الشارع مخبى رشاش فى جيبه ولا بيخبوا سماعات الموبايلات فى لحيتهم وهما بيمتحنوا 

ليه إللى بيلتحى إقتداء بالرسول بيتحارب مع إن فى ناس كتير مربية دقنها موضة وبتقلد ناس ممكن يكونوا مش مسلمين وبيتقال عليهم روشيين .. ليه لما راجل بيقصر بنطلونه إقتداء بالرسول بيبصوله بصة تانية غير أى ولد ماشى فى الشارع لابس بنطلون برمودة تحت الركبة لمجرد إنها موضة 

فين المشكلة بالظبط ؟

مستنية الإجابة من أى شخص ممكن يفهمنى إللى أنا عاملة مش فاهماه

المنتقبات والملتحيين بشر عاديين جداااااا بتغلط وبتستغفر وبتبعد وبتقرب وبتحاول توصل ومنتظرين النتيجة مع الكل ..

وأى حد ممكن يكون أحسن منهم وممكن يكونوا أحسن من ناس كتير

الله أعلم هو الحكم العدل .. الحكم لله وحده

خلينا نقول إن لبس النقاب أو تربية اللحية حاجة من ضمن مليون حاجة فى الدين ..بترفع الواحد درجة أو إتنين الله أعلم .. 

بس مش من حق أى حد إنه يقرر إنها لازم تكون آخر حاجة فى المليون حاجة دول ..

إللى يقدر على حاجة يعملها ميستناش يعمل غيرها الأول لأنه ممكن ميقدرش على غيرها ويبقى خسر الإتنين .. 

إللى هينتظر إنه يكمل الجوهر قبل المظهر سواء كان حجاب عادى أو نقاب أو تربية لحية يبقى هينتظر كتير وممكن ينتظر للأبد لأن الكمال لله وحده جل جلاله 

أكيد للنقاب إحترامه وللحية ولازم إللى يقدم عليهم يكون قدهم ...

بس من الواقعى إنه مش هيوصل لدرجة الملايكة .. ومحدش ينتظر منه كدة .. لأنه بشر زى باقى البشر 

مع كل إللى بيحصل اليومين دول والهجوم العنيف على النقاب .. 

ليه ألف عذر إللى ممكن يتأثر .. وإللى بيتلخبط .. وإللى مش فاهم حاجة .. وإللى تخاف تلبس النقاب ..وإللى مش عارف شرعيته إيه 

مع كل الهجوم والمشاكل إللى حصلتلى وقت ما لبست النقاب من ست سنين إلا إن الوضع كان أهدى بكتير من دلوقتى ..

وبعد الست سنين دول وكل إللى بيحصل ده .. إكتشفت إن النقاب كان ........

أحسن وأجمل قرار أخدته فى حياتى وبسأل الله إنه يثبتنى عليه إلى يوم الدين