كتابى "إحشى يا شهرزاد" أول يوم العيد .. باركولى بقا :)

كتاب ساخر " حكايات من وحى الواقع " 

أول يوم العيد بالمكتبات إن شاء الله 

سور النيش العظيم - الحلقة الأولى

‫#‏سور_النيش_العظيم‬
‫#‏الحلقة_الأولى‬

نصايح طنط "مش دافعة حاجة من جيبها " لكل عروسه بتجهز بيتها

-اهم حاجة فى جهاز العروسة هو النيش 

-من غير النيش الحب بينكم مش هيعيش
- وعلى راى المثل عروسة من غير نيش زى الفيلم من غير أفيش
-النيش هو وجهتك وعزوتك و متحف شقتك
- عض عيشى ولا تعض نيشى

= يعنى أجيب ايه أطنط ؟!!

- بصى يا حبيبتشى اولا لازم تخلى خطشيبك يكبر فى النيش كدة ميستخسرش يعنى تجيبى سفرة شرحة وبرحة والنيش بتاعها يجى كدة 4 اوض وصالة قصدى يكون واسع ومبحبح انتى مش اقل من بنت خالتشك ولا بنت عمة ابن مرات خالك ابدااا

= طب انصحينى أطنط أعمل ايه علشان مبقاش أقل منهم ؟!

- انا هروح معاكى وهشتريلك كل الحاجات اللى تشرفك قدام أهل عريسك
على راى المثل اللى ميشرفهاش نيشها قدام حماتها جاتها ستين خيبة على خيبتها
قوومى معايا يالا بسرعة

= هوا أطنط

"محلات الحاج درويش لمستلزمات البيت والنيش"

- مساء الخير يا حاج درويش انا جيالك النهاردة ومعايا العروسة العسل دى عوزاك تطلعلنا كل الحاجات الحلوة اللى عندك عاوزين نجهزلها نيش الكل يحكى ويتحاكى بيه دى زى بنتشى , انا اللى مربياها

= من عونيا يا مودام أحلى نيش لأحلى عروسه بإذن المولى ، بس لامؤخذا الدفع هيكون كاش ولا بالتقسيط علشان الأسعار بتختلف

- تقسيط ايه يا حج درويش احنا وش ذلك ، كاش ياخويا كاش

= على بركة الله يلا بينا نبدأ من قسم الكاسات والكوبايات قبل ما نروح على قسم الصوانى اللى هنطلع منه على قسم اطقم الصينى والأكروبال والبيركس واطقم الجاتوه والشاى والقهوة وبعده بدون مقاطعة على قسم المعالق والسكاكين وبعده قسم اطقم الشوربة والمقبلات واطقم السمك ومنه على قسم أطقم الخشاف والمهلبية والأيس كريم ولو فى العمر بقية هنطلع الدور التانى على قسم المفارش والانتكيات لزوم الديكور والكهربا

- كهربة ايه يا حاج انتو هتكهربونا ؟!

= لا يا مودام دا بردو من لوازم الديكور لو عاوزة النيش ينور من جوا وبتختارى كمان الألوانات يعنى اصفر احمر اخضر برتقانى انتو وذوقكم يعنى

- ننوره يا خويا منوروش ليه احنا اقل من اللى بينورو النيش بتاعهم اهو يبقا شكله حلو لما يجى رمضان ولا العيد يعمل بهجة كدة فى المكان ولو عندك حاجة بتعمل مزيكا هات

= طيب متفكين يلا بينا على بركة الله سيرى يا مودام

" بعد 6 ساعات "

= انا تعبت اوى أ طنط هو فاضل ايه لسه ؟

- وانا كمان رجلى اتكسرت مش قادرة , الحاجات كلها احلى من بعضها معقول كل ده ومشتريناش غير 4 اطقم كاسات و 3 اطقم صوانى بس

= اومال هنخلص باقى النيش امتى أطنط ؟

- هنخرج كل يوم يا بنتى نشترى اللى ناقص وعلى رأى المثل يا عروسة كملى النيش ومتيأسيش

= لا أطنط انا هستحمل متخافيش كله الا النيش

" بعد شهر "

- مبروك يا حبيبة قلبى الف الف مبروك النهاردة عيد

= الله يبارك فيكى أطنط انا مش مصدقة نفسى أخيرا خلصنا كل حاجات النيش

- ايوة يا حبيبتى واهم حاجة انك اشتريتى من اغلى حاجة , حاجات تشرف بصحيح هو صحيح أبوكى من صدمته فى الفلوس اللى دفعها محجوز فى المستشفى وأمك فقدت النطق بس فداكى عقبال ما خطيبك يشترى النيش بقا ونفرح بيكى بجد

= أنا مش مصدقة إمتى اليوم اللى هتجوز فيه ويبقا عندى نيش زى كل البنات أطنط

- قريب يا حبيبتى قريب بس قولى لخطشيبك بقا يشد حيله ويشترى باقى العفش وينجز

= بكرا ان شاء الله هنروح نتفرج على الشقة ونلف على محلات العفش ولو لاقينا حاجات عجبانا هنشتريها علطول

" تانى يوم "

= ادخلى برجلك اليمين يا حبيبتى , أدخلى برجليك الشمال يا حماتى , ادخلى برجليكى الإتنين أطنط , إيه رأيك يا حبيبتى فى عش الزوجية السعيد

- ايه ده هى دى الشقة !!

= اه هى دى مالها ؟

- الصالة صغيرة اوى ويادوب الباقى أوضة نوم وأوضة أطفال وصالون علشان الضيوف أومال هنحط السفرة فين ؟

= ماهى الصالة أهى تقضى قاعدة التيلفزيون وترابيزة سفرة

- ترابيزة سفرة بس !! أومال النيش هيبقا فين كله إلا النيش لا الشقة دى متنفعش شوف واحدة تانية

= نيش ايه وزفت ايه أنا لفيت كعب داير لحد ما لقيت الشقة دى ومش مستعد أضحى بيها علشان خاطر النيش بتاعك ده

- لو سمحت متغلطش فى النيش , إلزم حدودك

= ما هو يا انا يا النيش بقا من الأخر

- انت بتقول ايه ؟ إلحقينى أطنط !!!!!

" إلى اللقاء فى الحلقة القادمة smile emoticon "

‫#‏هناء_محمود‬

وبالمناسبة وحشتونى ووحشتنى المدونة :) 

باركولى :) أول حلقات برنامجى على اليوتيوب

أنا منتقبة من زمان على فكرة من قبل ما أبدأ تدوين بحوالى 4 سنين 

من زمان كنت مستنية حد يطلع ويعبر عن البنت المصرية الحقيقية المنتقبة إللى هى الشريحة الأكبر فى وسط المنتقبات كلهم
إللى عايشة حياتها طبيعى وبتتعلم وبتفرح وبتتفسح وبتحاول تقرب من ربنا , اللى مش شايفة نفسها أحسن من حد وعارفة إن ربنا هو اللى هيحاسب كل الناس وان ربنا هو الأعلم بقلوب عباده

وكمان أبين استيائى من أى حد بيتعمد يشوه صورة البنت المنتقبة ويركز بس على السلبيات وعلى الأمثلة السيئة مع سبق الإصرار والترصد ويتجاهل اى نموذج حلو وميظهروش 

وحاجات كتير نفسى أقولها , فضلت مستنية حد يقول بدالى بس فكرت شوية وقولت ليه ميكونش أنا ,, وبدأت الحمد لله بأول حلقة , ويارب تعجبكم

بس على فكرة البرنامج مش دينى هو برنامج إجتماعى وأكيد ان شاء الله هتكلم فى حاجات تانية كتير غير النقاب والمنتقبات , بس كان  مهم ان أتكلم عن النقاب فى أول حلقة بما انى مقدمة البرنامج بالنقاب و ده ممكن ناس كتير تستغربه , والكلام اللى قولته لما يجى من منتقبة هيكون أفضل بكتير من اى حد تانى ممكن يتهم إنه متعمد يضايق حد 

اضغطوا على الرابط اللى تحت ده و شوفوا أول حلقة #نقاب_استايل وقولولى رأيكم بصراحة :)

برنامج منتقبة دوت كوم حلقة #نقاب_استايل

ساعدوووونى يا مدونييين

 

 

 

ازيكم بجد وحشتونى وانا عارفة انى مقصرة في حق مدونتى حبيبتى ومقصرة في حقكم ومش متابعة بقالى فترة

 

بس مشغولة في صفحة انا أدمن فيها اسمها يوميات زوجة مفروسة الصفحة ناجحة اوى ما شاء الله ومشهورة ومؤسسين الصفحة ظهروا في برامج تيليفزيونية كتير

 

وكلهم بجد موهوبين وعندهم افكار حلوة ورسالة مهمة بيقدموها بطريقة لذيذة وخفيفة

 

احنا بنفكر نعمل كتاب ساخر نوضح فيه أفكارنا أكتر وبشكل أوضح

 

بس كنت عاوزة حد يساعدنى وينصحنى ايه الخطوات اللى المفروض نبدأ فيها بالترتيب و ازاى الفكرة دى تتنفذ بنجاح ان شاء الله

 

بليييز اللى عنده اى معلومة ميبخلش عليا أختكم ام بوبة بردو عشرة قديمة :)

عمرى ما هندم يا مبارك

لو حتى الشعب إتدبس
فى رئيس مطلعش كويس
عمرى ما هندم يا مبارك
وهقولك آسفة يا ريس
ما أنا سامعة الناس بتقول
كان راجل عرض وطول 
أول ما يقول يا مواطن
الشعب يخاف علطول

كنا فى أمان نايمين
فى الشارع مش خايفين
ولا آى أزمة فى حياتنا
زى النور والبنزين

قالوا إتبطرنا عليه
كان ذنب الراجل إيه
دا العيشة كانت حلوة
إرجع يا سعة البيه

لو كنتوا نسيتوا الذل
وهوان الناس والكل
وبلد عاشت غرقانة
وفلول نامت عالفل

وفقير من فقره مل
من حوجة إيده إنذل
ودعا على نفسه بموته
يمكن بالموت تنحل

ولا اشتاقتو لشوبير
وكلام فى الكورة كتير
وأهلى يفوز بالدورى
وزمالك محتاج تغيير

و بلد تتباع بالمتر
وناس مش لاقية الستر
أنسوا يا أشباه مبارك
خلاص نزلنا التتر

ولو تانى الشعب إتدبس
فى رئيس مطلعش كويس
عمرى ما هندم يا مبارك
وهقولك آسفة يا ريس 

يالى رايح عالميدان

يالى رايح عالميدان

سلملى على سلمية

إحرق مقرات الإخوان

بس بسلامة نية

خلى صوتك يبان

 لو حتى على جثة مية

 مالدم رخص بقالو زمان 

ومحدش شاف حرية 

والأخ على أخوه هان 

علشان عدالة اجتماعية

معاك فى إللى جى و اللى كان

بس مش بالطريقة ديه

ثور واغضب بجنان 

بس متهدش دنيا

 لا تهين ولا تتهان

 ولا تجرح ناس تانية

 ولا ترفع على كتفك جبان

 كان يوم مع ناس خاينة

 لو ترجع يا مصرى إنسان

 تبقى أيامك يا مصر جاية 

يووه النور قطع !!

وإنت فى بلدك متقولش يووه النور قطع

دا الضلمة جنة فى وسط أهلك يا جدع

إسأل غريب عايش بعيد وداء الوجع

دا الغربة زى التلاجة لما بابها بيتفتح

تنورلك ..

بس من برد هواها قلبك يتلسع 

دا إحساسى الحقيقى بجد .. أوعى تقول يووه النور قطع .. بس مفيش مانع تقول منك لله يا مرسى :)

ليلة زفاف قيس وليلى (2)

خلص اليوم الأول لليلى فى الكلية وكل إللى طلعت بيه ورقة فيها جدول المحاضرات , وجرح فى رجليها بسبب الجزمة الجديدة ( أول لبسة بقى ) ورقم تيليفون قيس المتسجل على تيليفونها بالإضافة إلى شعور غريب مربك مكنتش فهماه , كل إللى كانت فهماه إنها نفسها تغمض وتفتح تلاقى تانى يوم جه بسرعة علشان تروح الكليه تانى .

وغمضت ليلى وفتحت فعلا وجه اليوم الجديد , وعلى الكلية جرى , وعلى غير المعهود فى الحياة إننا مش بسهولة نلاقى إللى بندور عليه فى الوقت إللى بنحتاجه فيه , تقابل ليلى قيس بمجرد دخولها من باب الكليه ( يا محاسن الصدف ) 

قيس : ليلى .. إزيك ؟
ليلى : الحمد لله كويسه .
قيس : ها يومك كان عامل إيه إمبارح ؟
ليلى : تمام , كله كويس 
قيس : على فين دلوقتى ؟
ليلى : أول محاضرة بقى .
قيس : شكلك متحمسة أوى .. بس يارب تفضلى كدة علطول . 
ليلى : ( ضحكة خجولة ) على حسب بقى 
قيس : مش محتاجة أى حاجة ؟
ليلى : لا ميرسى

متستغربوش إن ليلى بتقول ميرسى , أصل ليلى تركيبة غريبة , هى أى نعم إتربت فى مدينة صغيرة أشبه بالريف , وطول عمرها مخرجتش براها , بس ليلى كانت محظوظة كانت من عيلة راقية وزى ما بيقولوا كدة بالمعنى الصحيح للكلمة وليس بالمعنى الساخر كانت عيلة محافظة, محرموهاش من حاجة بس حرموا عليها حاجات كتير , حاجات ممكن تلوث أى فطرة نقية , علشان كدة ليلى جمعت بين رقى المدن و نقاء الريف , جمعت ما بين رجاحة العقل و طيابة القلب ,  كانت هى التوليفة الصعبة النادرة إللى عمر قيس ما تخيل إنها موجودة وعايشة وبتتنفس فى الوجود إللى هو فيه .

خرجت ليلى من محاضرتها الأولى بتدور على قيس كل إللى هى حاساها إنه ممكن يجرالها حاجة لو مشفتوش تانى النهاردة , ولتانى مرة ليلى تلاقى قيس بسهولة , وده مش سحر ولا شعوذة ولا حاجة , دا لأن قيس كان مهتم وهو كمان بيحاول يلاقيها و إللى بيحركه هو إحساسه إنه عاوز يعرفها أكتر .

وطول ما ليلى بتدور على قيس وطول ما قيس مهتم وعايز يعرف ليلى أكتر , يبقى هيقدروا يلاقوا بعض فى أى مكان وفى أى وقت ,  وأى كلام هيتقال حتى ولو كلمة صباح الخير مش هتمشى فى مسارها الطبيعى , دى هتاخد مسارات تانية خالص وهتوصل لأبعد مدى , وهتبدأ فترة ما قبل الإعتراف بالحب , إللى لكل نظرة وكلمة فيها إحساس غير عادى , إللى لما بيغيب فيها حد عن التانى الزمن بيقف  واللسان بيتجمد , لأنه مش عارف يقوله نفسى أشوفك , الفترة إللى محدش فيها خلاص ضمن التانى وإتأكد من حبه وقلبه إرتاح , الفترة إللى فيها لسه القلوب بتتحرك والعنين مبترمش و الكلام له معنى , الفترة إللى بتنتهى بكلمة "بحبك"

القصة لسه مخلصتش .. 


آسفة على التأخير .. سامحونى ظروف منعتنى من الكتابة الفترة إللى فاتت  :)

ليلة زفاف قيس وليلى ( 1 )

قيس إبن العاصمة كان وسيم أنيق مميز فى وسط أصحابه فى الجامعة مش لأنه فى آخر سنة وكل سنة بيجيب إمتياز وبس لأ لأنه رئيس إتحاد الطلبة كمان و أحسن واحد ممكن يلقى الشعر إللى هو بيألفه بنفسه فى حفلات الجامعة , ومواهبه  كتير متعدوش .

والغريب إن قيس لحد دلوقتى ملقاش فتاة أحلامه إللى بيدور عليها طول التلات سنين إللى فاتوا فى الجامعة ... لحد ما شاف ليلى بنت الريف الجميلة الرقيقة البريئة , إللى كانت ماشية تايهه مش عارفة تلاقى جدول المحاضرات فين وسايبة بلدها ورايحة العاصمة شايلة فى إيديها كتبها و أوراقها وأحلامها وأغانيها وأفلامها ومسلسلاتها الرومانسية إللى كانت ساكنة عقلها وقلبها ومستنية بطل مسلسل حياتها إللى هتقوم قدامه بدور البطولة , لحد ما سمعت صوت قيس إبن العاصمة وهو بيقولها : إنتى محتاجة حاجة .

إلتفتت ليلى ببرائتها المعهودة ورفعت حواجبها بإستغراب وإرتباك وقالتله : أأأأأأأنا بدور على الجدول .

قيس : إنتى أكيد فى سنة أولة .

ليلى : أيوه .

قيس : طيب تعالى معايا .

ليلى وقفت مكانها ومتحركتش مع إن قيس مشى وسبقها وهى عمالة تفكر هو ينفع كدة أمشى مع ولد عادى طب الناس تقول عليا إيه وبتبص حواليها لقت الناس كلها إتنين إتنين ومحدش واخد باله من حد .

فى اللحظة دى قيس أخد باله إن ليلى واقفة مكانها متحركتش وعمالة تبص حواليها فرجعلها تانى وقالها : مش هتيجى أوريكى الجدول فين .

ليلى : حاضر جاية أهو .

وهما ماشيين ورايحين للجدول سألها قيس : إنتى إسمك إيه ؟

ليلى : ( بعد تردد وتفكير لثوانى ) إسمى ليلى .

قيس : أنا قيس رئيس إتحاد الطلبة .

ليلى حست إن الدنيا لفت بيها ومش عارفة هو السبب إن إسمه قيس ولا إنه رئيس إتحاد الطلبة , الإتنين كانوا أقوى من بعض عليها ( الله يخرب بيت المسلسلات العربى ).

ليلى : طططططبببببب هو انننت فى سنة كام .

قيس : أنا فى آخر سنة ولو محتاجة أى خدمة أو مساعدة متتردديش وأطلبيها منى .. إدينى رقم موبايلك علشان أبقى أطمن عليكى .

ليلى : رقم موبايلى أأأصصصل .....

فى اللحظة دى أخد قيس من إيديها تيليفونها وكتبلها رقمه .

وقالها : لو إحتاجتى أى حاجة أطلبينى إنتى فى أى وقت ووقفها قدام جدولها ورجعلها تليفونها وسابها ومشى , وهى عمالة تبص بصة فى الجدول وتبص بصة عليه وتبص بصة فى موبايلها  .

وقيس ماشى وحاسس إنه بدأ يلاقى إللى بيدور عليه وناوى يتابع أخبرها ويعرف عنها كل حاجة , لأن من الواضح إنها ليلى مختلفة عن كل الليالى إللى شافها قيس قبل كدة .....  

القصة لسة مخلصتش ..............

أرجوك .. إرمينى

ويظل الصراع مستمر بين الزوج وزوجته علشان تقنعه إنه ياخد في إيده كيس الزبالة وهو نازل.

ويظل الرجل يفكر ويفكر ويإما ياخد القرار الصعب وينزله يإما يتحجج بإنه هينزل تانى في نفس اليوم وهيبقى ياخده المرة الجاية

وتظل المرأة مفروسة وبتعضعض في ضوافرها وبتحاول تفهم طب إيه الفرق ما بين النزلة الأولى والتانية ,غيرإن كيس الزبالة ريحته هتطلع عليها هى والعيال وهتتخنئ

ويعود الرجل من مشواره الأولانى ويكسل يروح مشواره التانى ويقولها بكرة بقى ,, تقوم الست المفروسة ضربة إسدال الصلاة على السريع ولما إكياسها وزبالتها  هى وعيالها على أساس إنه ملوش حاجة في الزبالة دى , ومتجهه إلى  باب الشقة علشان تنزل هى اكياس الزبالة

أحيانا بتتحرك النخوة في قلب الرجل ويقولها إستنى وياخد هو الأكياس ويرميها , وأحيانا أخرى بيتحرك بردوا ويقولها إستنى أما أفتحلك الباب علشان إنتى شايلة الأكياس .

في الحالتين دمها بيكون إتحرق ,, علشان كدة أنا من موقعى هذا أناشد كل أم إنها تدرب إبنها وهو لسه في بيتها إنه ياخد الزبالة في إيده وهو نازل كل يوم علشان يتعود على كدة وميطلعش عين الغلبانة إللى هتتجوزه , زى مأنا عينى طالعة كدة

 وبناشد كل المصانع إللى بتصنع أكياس الزبالة إنها تهتم شوية بشكل الكيس ومش هيخسروا حاجة لو رسموا على الكيس من برا وش بيعيط و كتبوا جملة  "أرجوك .. إرمينى" , ومفيش مانع من التنويع في الجمل , يعنى مرة " أرجوك إرمينى " ومرة " أبوس إيدك إرمينى " أو " إرمينى .. شكرا " أو " بلييز ..خرجنى برا " أو " شمنى كدة .. وانت وضميرك "

وكل واحدة تختار الجملة إللى هتناسب جوزها وتحرك مشاعره ناحية الكيس لما يعدى عليه الصبح وهو رايح الشغل ويلاقيه جمب الباب بيعيط وبيقوله : "أرجوك .. إرمينى"

فين هى مصر ... + تحديث

 

 

 

لما أهل الدين يتقال عليهم دجالين

 

والمسلمين يتقال عليهم نصابين

 

والمسموعين يتقال عليهم كدابين

وواحد تبقى تهمتوا علامة صلاة على الجبين

أو مربى لحيته زى سيد المرسلين

وناس متفرقين على الشمال وعلى اليمين

وناس بتقتل بعضها وناس واقفين متفرجين

وناس بتدعى على إخواتها وأهلها وبتقول آمين

 

وناس في الوسط تايهين ومش فاهمين

 

بلدهم جاية منين أو رايحة فين

 

وأيام عمالة تعدى بتجر السنين

 

والحق ضايع مش عارف صاحبه مين

 

يبقى فين هى مصر ..

 

ومين إللى كانوا إسمهم مصريين

 

 

مصرية حزينة أوى على بلدها

 

 

ملحوظة مهمة : أنا وجهة نظرى الشخصية إن الدعاة كلهم مش كدابين , ولا كل المسلمين نصابين , ولا كل الإعلاميين كدابين , كل دول فيهم الشر والخير , بس أنا بنقل الكلام إللى بنسمعه كتير الأيام دى إللى بقى التعميم فيه هو الأساس والمصداقين كتير , ومعدش حد عارف يفرق أو بمعنى أصح عايز يفرق بين الحلو والوحش , زى ما يكون معدش عندهم وقت يفكروا شوية , علشان كدة بسأل لما كل الناس إللى في بلدنا زى ما بيتقال عليهم دجالين ونصابين وكدابين طيب المصريين فين

ليه ?!!

 

 

 

ليه اللى مش متجوز بيحسد المتجوز على إنه عنده شريك حياة , والمتجوزين عايشين كأنهم مش متجوزين وكل واحد فيهم عايش فى عالم لوحده .

ليه إللى معندهومش اولاد حياتهم كلها واقفة عند الأمنية دى , وإللى عندهم أولاد مش فاضيين يقعدوا معاهم أو يستمتعوا بوجودهم والدنيا لهياهم .

ليه فى ناس عندها كلام كتير أوى عايزة تقوله للى بتحبه بس مش لاقياه قدامها ,, وإللى جمبه دايما الإنسان إللى بيحبه مكسل يقوله كلمة حلوة .

ليه إللى فقد إنسان عزيز عليه نفسه يوم واحد يرجع علشان يبوس إيده وراسه , وناس تانية حواليها أعز الناس ومش مقدرين قيمتهم .

ليه فى ناس الوقت عندها ملوش قيمة ومش لاقيين حاجة يعملوها ,, وناس تانية نفسها تستلف وقت علشان يكفى اللى نفسها تعمله .

ليه فى ناس فلوسها تعباها والجنيه ملهوش قيمة عندها وممكن ترميه وتدوس عليه ,, وناس تانية الجنيه ده ممكن يحللها مشكلة كبيرة فى حياتها ومش لاقينه .

ليه فى ناس بتموت كل يوم من الوجع والمرض وبتقول الحمد لله ومش بتشتكى لحد , وناس تانية الصداع عندها هو أكبر مشكلة فى حياتها ومش بيبطلوا شكوى كأنهم فى أعظم إبتلاء .

ليه الطفل إللى معندوش لعب بيلعب بأى حاجة حتى لو شوية تراب وزلط وبيكون سعيد , والطفل إللى عنده لعب كتير زهقان و مش لاقى حاجة يعملها وحزين .

ليه إللى ربنا مأنعمش عليه بنعمة البصر نفسه يشوف لو ساعة واحدة علشان يقرأ جزئين قرآن ,, وفى ناس بتشوف  كويس ومبتحاولش حتى تمسح التراب إللى على المصحف من كتر ركنته .

ليه المريض إللى مش قادر يقف ويصلى ويسجد نفسه ربنا يرجعله صحته علشان يسجد لله , وناس فى كامل صحتها مش عارفة مواعيد الصلاة إمتى .

ليه إللى بيموت نفسه يرجع ولو دقيقة يعمل فيها عمل خير , وإللى عايشيين وعندهم الفرصة لسه تايهين وغافليين ومش مقدرين النعم إللى هما فيها .

 

كلام إتنين متجوزين

هى  : شوفت الولاد عملوا إيه في الحضانة النهاردة

هو : إيه ؟

هى : أقول

هو : أيوة يا ستى ما تقولى

هى : طيب أتكلم  إزاى وإنت أصلا حاطط وشك في الموبايل ومش بتبوصلى

هو : الراجل يا بنتى بيقدر يسمع كويس وهو مركز في حاجة تانية عادى

هى : طيب والراجل بردو بيعرف يشوف كويس وهو مركز في حاجة تانية ؟!

هو : أكيد لأ , ليه السؤال ده ؟

هى : علشان لو كلفت نفسك وبصتلى وأنا بكلمك كنت شوفت الفستان الجديد إللى أنا لبساه

هو : ألف مبروك جميل أوى

هى : بجد , طب إيه اكتر حاجة عجبتك فيه

هو : كله عجبنى , الراجل مبيعرفش يدقق في تفاصيل صغيرة كدة زى الستات هو بيشوف الحاجة على بعضها , زى ما تقولى كدة حتة واحدة

هى : تعرف حصلى موقف عجيب وانا بشترى الفستان ده

هو : آيفون 5 ولا جلاكسى نوت 2

هى : نعم

هو : بجد محتار مش عارف أشترى أى جهاز فيهم الإتنين حلوين

هى : إنت مش ملاحظ إنى كنت بتكلم معاك في موضوع تانى خالص , طب قولى كدة كنت بقول إيه

هو : أنصحك نصيحة الرغى بتاع الحريم ده  والحكايات والتفاصيل الصغيرة إللى بيحبوا يحكوها الرجالة مش بتركز فيها أصلا ولا عندها دماغ للكلام ده , ولو ركزت شوية بتنساها بسرعة

هى : يعنى الراجل بيعرف يسمع الست كويس وهو مش بيبصلها , و الراجل مش بيدقق في التفاصيل الصغيرة , والراجل مش بيحب يسمع الحكايات والرغى بتاع الست  


هو : شاطرة ونبيهة طول عمرك

هى : أفهم من كدة  بقى إنك مكونتش راجل أيام خطوبتنا !!!!!

هو ( ساب الموبايل ورفع حواجبه وبصلها بتركيز مع شوية إندهاش وسكت شوية وقالها  وهو عامل نفسه مهتم ) : الولاد عملوا إيه النهاردة في الحضانة ؟
 
هى ( رفعت حاجب واحد و إبتسمت إبتسامة ماكرة , وفى عنيها لمعة الإنتصار وقالت بهدوء ): معملوش حاجة جديدة , أنا بس كنت بحاول ألفت نظرك علشان تبوصلى وتشوف فستانى الجديد .



( يعنى لو كان بص من الأول كان رحم نفسه من وجع الدماغ ده , ولو كان  إختصر الكلام الكتير إللى إتكلمه عن صفات الراجل المغوار وقالها كلمتين حلوين عن الفستان كان زمانها طارت من الفرحة وقامت وحلت عن دماغه  , بس هما إللى جايبين لنفسهم وجع القلب  وبيقولوا علينا إحنا إللى مخنا فاضى وهما فيهم إللى مكفيهم )


دا الحوار نفسه بس بالفصحى إحتراما لإختلاف اللهجات :)
http://nebeauty.com/14868/

والنسخة التركى هنزلها قريب إن شاء الله
أنا إللى هترجمها , مش تركيا بتتكلم سورى بردو !!!