يوميات فرن بالكهربا

الأربعاء، 15 يوليو 2015

كتابى "إحشى يا شهرزاد" أول يوم العيد .. باركولى بقا :)

كتاب ساخر " حكايات من وحى الواقع "

أول يوم العيد بالمكتبات إن شاء الله

الاثنين، 15 يونيو 2015

سور النيش العظيم - الحلقة الأولى

‫#‏سور_النيش_العظيم‬
‫#‏الحلقة_الأولى‬

نصايح طنط "مش دافعة حاجة من جيبها " لكل عروسه بتجهز بيتها

-اهم حاجة فى جهاز العروسة هو النيش

-من غير النيش الحب بينكم مش هيعيش
- وعلى راى المثل عروسة من غير نيش زى الفيلم من غير أفيش
-النيش هو وجهتك وعزوتك و متحف شقتك
- عض عيشى ولا تعض نيشى

= يعنى أجيب ايه أطنط ؟!!

- بصى يا حبيبتشى اولا لازم تخلى خطشيبك يكبر فى النيش كدة ميستخسرش يعنى تجيبى سفرة شرحة وبرحة والنيش بتاعها يجى كدة 4 اوض وصالة قصدى يكون واسع ومبحبح انتى مش اقل من بنت خالتشك ولا بنت عمة ابن مرات خالك ابدااا

= طب انصحينى أطنط أعمل ايه علشان مبقاش أقل منهم ؟!

- انا هروح معاكى وهشتريلك كل الحاجات اللى تشرفك قدام أهل عريسك
على راى المثل اللى ميشرفهاش نيشها قدام حماتها جاتها ستين خيبة على خيبتها
قوومى معايا يالا بسرعة

= هوا أطنط

"محلات الحاج درويش لمستلزمات البيت والنيش"

- مساء الخير يا حاج درويش انا جيالك النهاردة ومعايا العروسة العسل دى عوزاك تطلعلنا كل الحاجات الحلوة اللى عندك عاوزين نجهزلها نيش الكل يحكى ويتحاكى بيه دى زى بنتشى , انا اللى مربياها

= من عونيا يا مودام أحلى نيش لأحلى عروسه بإذن المولى ، بس لامؤخذا الدفع هيكون كاش ولا بالتقسيط علشان الأسعار بتختلف

- تقسيط ايه يا حج درويش احنا وش ذلك ، كاش ياخويا كاش

= على بركة الله يلا بينا نبدأ من قسم الكاسات والكوبايات قبل ما نروح على قسم الصوانى اللى هنطلع منه على قسم اطقم الصينى والأكروبال والبيركس واطقم الجاتوه والشاى والقهوة وبعده بدون مقاطعة على قسم المعالق والسكاكين وبعده قسم اطقم الشوربة والمقبلات واطقم السمك ومنه على قسم أطقم الخشاف والمهلبية والأيس كريم ولو فى العمر بقية هنطلع الدور التانى على قسم المفارش والانتكيات لزوم الديكور والكهربا

- كهربة ايه يا حاج انتو هتكهربونا ؟!

= لا يا مودام دا بردو من لوازم الديكور لو عاوزة النيش ينور من جوا وبتختارى كمان الألوانات يعنى اصفر احمر اخضر برتقانى انتو وذوقكم يعنى

- ننوره يا خويا منوروش ليه احنا اقل من اللى بينورو النيش بتاعهم اهو يبقا شكله حلو لما يجى رمضان ولا العيد يعمل بهجة كدة فى المكان ولو عندك حاجة بتعمل مزيكا هات

= طيب متفكين يلا بينا على بركة الله سيرى يا مودام

" بعد 6 ساعات "

= انا تعبت اوى أ طنط هو فاضل ايه لسه ؟

- وانا كمان رجلى اتكسرت مش قادرة , الحاجات كلها احلى من بعضها معقول كل ده ومشتريناش غير 4 اطقم كاسات و 3 اطقم صوانى بس

= اومال هنخلص باقى النيش امتى أطنط ؟

- هنخرج كل يوم يا بنتى نشترى اللى ناقص وعلى رأى المثل يا عروسة كملى النيش ومتيأسيش

= لا أطنط انا هستحمل متخافيش كله الا النيش

" بعد شهر "

- مبروك يا حبيبة قلبى الف الف مبروك النهاردة عيد

= الله يبارك فيكى أطنط انا مش مصدقة نفسى أخيرا خلصنا كل حاجات النيش

- ايوة يا حبيبتى واهم حاجة انك اشتريتى من اغلى حاجة , حاجات تشرف بصحيح هو صحيح أبوكى من صدمته فى الفلوس اللى دفعها محجوز فى المستشفى وأمك فقدت النطق بس فداكى عقبال ما خطيبك يشترى النيش بقا ونفرح بيكى بجد

= أنا مش مصدقة إمتى اليوم اللى هتجوز فيه ويبقا عندى نيش زى كل البنات أطنط

- قريب يا حبيبتى قريب بس قولى لخطشيبك بقا يشد حيله ويشترى باقى العفش وينجز

= بكرا ان شاء الله هنروح نتفرج على الشقة ونلف على محلات العفش ولو لاقينا حاجات عجبانا هنشتريها علطول

" تانى يوم "

= ادخلى برجلك اليمين يا حبيبتى , أدخلى برجليك الشمال يا حماتى , ادخلى برجليكى الإتنين أطنط , إيه رأيك يا حبيبتى فى عش الزوجية السعيد

- ايه ده هى دى الشقة !!

= اه هى دى مالها ؟

- الصالة صغيرة اوى ويادوب الباقى أوضة نوم وأوضة أطفال وصالون علشان الضيوف أومال هنحط السفرة فين ؟

= ماهى الصالة أهى تقضى قاعدة التيلفزيون وترابيزة سفرة

- ترابيزة سفرة بس !! أومال النيش هيبقا فين كله إلا النيش لا الشقة دى متنفعش شوف واحدة تانية

= نيش ايه وزفت ايه أنا لفيت كعب داير لحد ما لقيت الشقة دى ومش مستعد أضحى بيها علشان خاطر النيش بتاعك ده

- لو سمحت متغلطش فى النيش , إلزم حدودك

= ما هو يا انا يا النيش بقا من الأخر

- انت بتقول ايه ؟ إلحقينى أطنط !!!!!

" إلى اللقاء فى الحلقة القادمة smile emoticon "

‫#‏هناء_محمود‬

وبالمناسبة وحشتونى ووحشتنى المدونة :)

الخميس، 15 مايو 2014

باركولى :) أول حلقات برنامجى على اليوتيوب

أنا منتقبة من زمان على فكرة من قبل ما أبدأ تدوين بحوالى 4 سنين

من زمان كنت مستنية حد يطلع ويعبر عن البنت المصرية الحقيقية المنتقبة إللى هى الشريحة الأكبر فى وسط المنتقبات كلهم
إللى عايشة حياتها طبيعى وبتتعلم وبتفرح وبتتفسح وبتحاول تقرب من ربنا , اللى مش شايفة نفسها أحسن من حد وعارفة إن ربنا هو اللى هيحاسب كل الناس وان ربنا هو الأعلم بقلوب عباده

وكمان أبين استيائى من أى حد بيتعمد يشوه صورة البنت المنتقبة ويركز بس على السلبيات وعلى الأمثلة السيئة مع سبق الإصرار والترصد ويتجاهل اى نموذج حلو وميظهروش

وحاجات كتير نفسى أقولها , فضلت مستنية حد يقول بدالى بس فكرت شوية وقولت ليه ميكونش أنا ,, وبدأت الحمد لله بأول حلقة , ويارب تعجبكم

بس على فكرة البرنامج مش دينى هو برنامج إجتماعى وأكيد ان شاء الله هتكلم فى حاجات تانية كتير غير النقاب والمنتقبات , بس كان مهم ان أتكلم عن النقاب فى أول حلقة بما انى مقدمة البرنامج بالنقاب و ده ممكن ناس كتير تستغربه , والكلام اللى قولته لما يجى من منتقبة هيكون أفضل بكتير من اى حد تانى ممكن يتهم إنه متعمد يضايق حد

اضغطوا على الرابط اللى تحت ده و شوفوا أول حلقة #نقاب_استايل وقولولى رأيكم بصراحة :)

برنامج منتقبة دوت كوم حلقة #نقاب_استايل

الاثنين، 16 ديسمبر 2013

ساعدوووونى يا مدونييين

ازيكم بجد وحشتونى وانا عارفة انى مقصرة في حق مدونتى حبيبتى ومقصرة في حقكم ومش متابعة بقالى فترة

بس مشغولة في صفحة انا أدمن فيها اسمها يوميات زوجة مفروسة الصفحة ناجحة اوى ما شاء الله ومشهورة ومؤسسين الصفحة ظهروا في برامج تيليفزيونية كتير

وكلهم بجد موهوبين وعندهم افكار حلوة ورسالة مهمة بيقدموها بطريقة لذيذة وخفيفة

احنا بنفكر نعمل كتاب ساخر نوضح فيه أفكارنا أكتر وبشكل أوضح

بس كنت عاوزة حد يساعدنى وينصحنى ايه الخطوات اللى المفروض نبدأ فيها بالترتيب و ازاى الفكرة دى تتنفذ بنجاح ان شاء الله

بليييز اللى عنده اى معلومة ميبخلش عليا أختكم ام بوبة بردو عشرة قديمة :)

الاثنين، 1 يوليو 2013

عمرى ما هندم يا مبارك

لو حتى الشعب إتدبس
فى رئيس مطلعش كويس
عمرى ما هندم يا مبارك
وهقولك آسفة يا ريس
ما أنا سامعة الناس بتقول
كان راجل عرض وطول
أول ما يقول يا مواطن
الشعب يخاف علطول

كنا فى أمان نايمين
فى الشارع مش خايفين
ولا آى أزمة فى حياتنا
زى النور والبنزين

قالوا إتبطرنا عليه
كان ذنب الراجل إيه
دا العيشة كانت حلوة
إرجع يا سعة البيه

لو كنتوا نسيتوا الذل
وهوان الناس والكل
وبلد عاشت غرقانة
وفلول نامت عالفل

وفقير من فقره مل
من حوجة إيده إنذل
ودعا على نفسه بموته
يمكن بالموت تنحل

ولا اشتاقتو لشوبير
وكلام فى الكورة كتير
وأهلى يفوز بالدورى
وزمالك محتاج تغيير

و بلد تتباع بالمتر
وناس مش لاقية الستر
أنسوا يا أشباه مبارك
خلاص نزلنا التتر

ولو تانى الشعب إتدبس
فى رئيس مطلعش كويس
عمرى ما هندم يا مبارك
وهقولك آسفة يا ريس